Tuesday, November 4, 2008

ကျွန်မနဲ့..ဖုန်းဖြေစက်
ရေးသူ- နုနုရည် (အင်းဝ)


ကျွန်မညီမလေး 'သီ' နဲ့ ကိုရဲလင်း (Alfred)တို့ ဇနီးမောင်နှံ ဒီတခေါက် အမေရိကားက အပြန်မှာ ကျွန်မတို့အိမ်အတွက် ဖုန်းဖြေစက် (Answering Machine) လေးဝယ်လာတယ်။ မြန်မာစကားကို မွှတ်နေတဲ့ ကိုရဲလင်းက 'ဒါ ဆရာမတို့အတွက် အလိုအပ်ဆုံး ဖြစ်မယ်။ နောက်ဆိုရင် ကျွန်တော်တို့ မောနေအောင် လိုက်မရှာရတော့ဘူးပေါ့နော်' တဲ့။ သူပြောတာ တကယ်ကို မှန်ပါတယ်။ နှစ်ယောက်တည်းရှိတဲ့ ကျွန်မတို့အိမ်မှာ နှစ်ယောက်လုံးထွက်သွားရင် လူကိုယ်တိုင်ပဲ လာလာ၊ ဖုန်းပဲဆက်ဆက်၊ လက်ခံပြီး ဖြေမယ့်သူရယ်လို့ ဘယ်သူမှ မရှိတော့ဘူးလေ။
တခါတလေကျ ဖုန်းဆက်ပြီးလာမယ့် သူတွေကလည်း ဖုန်းမြည်ပြီး ကိုင်မယ့်သူမရှိ တာကိုပဲ ပျက်နေတယ်ထင်ပါရဲ့ ဆိုပြီးလာ၊ ဒီရောက်တော့ မတွေ့၊ မေးရမယ့်သူကလည်း မရှိနဲ့ အင်မတန် အားနာစရာကောင်းတာ။ ကျွန်မမိတ်ဆွေကြီး ရွှေပုပ္ပါးဆို အကြိမ်ကြိမ် အခါခါ ခံရလွန်းလို့ 'မဖြစ်တော့ဘူးဆရာမ၊ ဘောလ်ပင်နဲ့ စာအုပ်ကလေးတအုပ် ဆရာမတို့ တံခါးဝမှာ ချိတ်မှ ဖြစ်တော့မယ်' လို့ အကြံပေးဖူးတယ်။ ဒါပေမယ့် အဲဒီနည်းလမ်းကလည်း သိပ်အဆင် ပြေမယ် မထင်လို့ အဲဒီအကြံ အထမမြောက်ခဲ့ဘူး။



နောက်တော့ ကျွန်တော်တို့ နှစ်ယောက်က စိတ်ကူးပေါက်တဲ့အချိန် ထွက်ချင်ရာ ထွက်သွား၊ မိတ်ဆွေသူငယ်ချင်းတွေက ဖုန်းဆက် မတွေ့၊ သွားတတ်တဲ့နေရာတွေ လိုက်ရှာကြ မတွေ့၊ စိတ်ညစ်ကြ၊ စိတ်တိုကြ၊ မေတ္တာပို့ကြနဲ့ပဲ.... ဒီလိုနဲ့ပဲပေါ့။
ကျွန်မ ဝေးရပ်မြေခြားမှာတုန်းက ဖုန်းဖြေစက်လေးတွေ ရုံးတိုင်းစေ့၊ အိမ်တိုင်းစေ့ တပ်ထားတာတွေ့တော့ အိမ်ဖို့ စိတ်ကူးမိသေးတယ်။ ဒါပေမယ့် ကျွန်မတို့ဆီမှာ ဘယ်အိမ်မှာ၊ ဘယ်ရုံးမှာမှ သိပ်တပ်လေ့မရှိဘူးဆိုတာ သွားသတိရတယ်။ တယ်လီဖုံးဆိုတာလည်း အိမ်ပေါက်စေ့မရှိ။ ရှိတဲ့အိမ်တွေမှာလည်း တယ်လီဖုံးကိုင်ဖို့ လူအားတယောက်က အမြဲရှိနေတတ်တာလေ။ ကိုယ်တယောက်တည်း ကြောင်တောင်တောင်နဲ့ ဖြစ်နေဦးမယ်။ တော်ပါပြီလေဆိုပြီး မ၀ယ်ခဲ့တာ။ တကယ်တမ်းကျ (စီးပွါးရေး၊ ကြီးပွါးရေးကိစ္စ ဟုတ်လည်း မဟုတ်၊ ရှုပ်လည်း မရှုပ်ပေမယ့်) အပေါင်းအသင်းများစွာနဲ့ ကိစ္စများမြောင်လှတဲ့၊ အိမ်မှာလဲ ဘယ်တော့မှ ကပ်လေ့မရှိတဲ့ ကျွန်မတို့အိမ်မှာကမှ အဲဒီစက်ဟာ တကယ်လိုအပ်တာ။ ခုတော့ ဟန်ကျသွားပြီ။ 'သီ' တို့ ဇနီးမောင်နှံက သူတို့လက်ဆောင်ကလေးကို အိမ်တိုင်ရာရောက် လာရောက်တပ်ဆင်ပေးပြီး သုံးစွဲပုံ နည်းနာနိသျှတွေကို သင်ကြားပေးသွားပြီး နောက်တနေ့မှာ ပဲ ကျွန်မတို့ စတင်အသုံးပြုပါတော့တယ်။
နောက်တနေ့ အပြင်ထွက်ခါနီးမှာ စက်ကလေးကို ပလပ်ထိုး၊ အသံသွင်းခလုတ်ဖွင့်ပြီး၊ စက်ကို နည်းနည်းပါးပါး မြင်ဖူး၊ တွေ့ဖူးထားတဲ့ ကျွန်မက ဆရာကြီးလုပ်ပြီး 'ဟဲလို၊ ခြောက်၊ ခြောက်၊ ခွန်၊ သုံး၊ လေး၊ သုံး' လို့ ပြောထည့်လိုက်တယ်။ ပြီးတော့ အသံ ပြန်နားထောင်ပြီး မီးနီလေး ငြိမ်သွားပြီ ဆိုတော့မှ 'ရပြီ၊ သွားစို့' ဆိုတော့ ကျွန်မခင်ပွန်းက 'ဟာ.. ဒီလောက်နဲ့ ရပါ့မလား' တဲ့။ 'ရတာပေါ့၊ ဒီလိုပဲ သွင်းရတာ၊ ဟိုမှာ ဒီလိုပဲ ဖုန်းနံပါတ်ပဲ ပြောထားတာပဲ' ဆိုပြီး 'ဟိုမှာ' နဲ့ ကျွန်မကိုင်ပေါက်လိုက်တော့ ကျွန်မခင်ပွန်းခမျာလည်း 'ဟုတ်လား၊ ဒါဖြင့်လည်း ပြီးတာပဲ' ဆိုပြီးငြိမ်သွားရှာတာပေါ့။
အဲဒီနေ့ တနေ့လုံး စက်အားကိုးနဲ့ သွားချင်ရာတွေ သွားပြီး အိမ်ပြန်လာတော့ မီးနီလေးကိုလည်း ကြည့်လိုက်ရော မီးနီကလေးက နဂိုအနေအထားအတိုင်း ရဲရဲလေးပဲ ငြိမ်လို့။ တယောက်ယောက်က စက်ထဲစကားပြောထည့်ထားရင် မီးနီလေးက မှိတ်တုတ်မှိတ်တုတ်နဲ့ အချက်ပြမှာလေ၊ ခုတော့ ငြိမ်လို့။ ဘယ်လိုသဘောလဲ။ ကျွန်မတို့ သွားနေတုန်း တစုံတယောက်သောသူမှ မဆက်ဘူးဆိုတာကတော့ မဟုတ်နိုင်။ ဘယ်လိုမှ မဟုတ်နိုင်။ ဒါဆိုရင် ဘာကြောင့်လဲ။ ဘာကြောင့်လဲဆိုတဲ့ အဖြေကို ကျွန်မ စဉ်းစားနေတုန်းမှာပဲ ဖုန်းသံ မြည်လာပါတယ်။ ကျွန်မကောက်ကိုင်ပြီး 'ဟဲလို' လုပ်လိုက်တော့ ကျွန်မသူငယ်ချင်း ကျောင်းအုပ်ဆရာမ အပျိုကြီးရဲ့ အသံ။
'ငါပါဟဲ့.....မယ်နုရဲ့'
'အေးပါ၊ ဘာလဲ ပြောလေ'
'နေစမ်းပါဦး၊ နေ့လည်တုန်းက နင်ဘယ်လို ဖြစ်တာလဲ။ ဘာဖြစ်လို့ ဖုန်းနံပါတ်ပြောပြီး ဖုန်းကို ချပစ်ရတာလဲ'
'ဟောတော့'
'ဘာဟောတော့လဲ။ အရေးကြီးတာ ပြောမလို့ပါဆိုမှ နောက်စရာ မဟုတ်ဘူးဟဲ့။ ငါလေ တကယ်စိတ်တိုတယ်။ သုံးခါတောင်လုပ်တယ်၊ နင်.... ဟင်း...'
'အမယ်လေး... သေတော့မှာပဲ၊ အဲဒါလူမဟုတ်ဘူးဟဲ့။ စက်၊ စက်။ Answering machine ဟဲ့။ နင်ပြောချင်တာတွေ အဲဒီထဲ ပြောထားခဲ့လို့ ရတယ်လေ။ ဒါလေးတောင်မှ နင်မသိဘူးလား။ ငါတနေကုန် အပြင်သွားနေတာ'
'ဟင်.. ဟုတ်လား၊ ငါဘယ်လိုလုပ် သိမလဲဟဲ့။ နင်ပဲ မှတ်တာပေါ့။ စက်ဆိုလည်း စက်မှန်းသိအောင် ပြည့်ပြည့်စုံစုံပြောဟေ့၊ တို့က တောသူတွေ'
ဟုတ်လိုက်လေ၊ ဒီတခါတော့ အပျိုကြီး မှန်သွားပြန်ပါပြီ။ စက်အတွေ့အကြုံ လုံးဝမရှိတဲ့ သူတယောက်ဟာ ဒီလိုဖြစ်နိုင်တယ် ဆိုတာကို ကျွန်မဘာဖြစ်လို့ ဘ၀ မေ့ရတာလဲ။ ဝေးမြေ ရပ်ခြားမှာ အဆောင်ကနေ သူငယ်ချင်းဆီ ဖုန်းဆက်တော့ ဖုန်းသံသုံးချက် မြည်အပြီးမှာ 'ဟဲလို သစ်စ်အစ်စ် ကြည်ကြည်' အစချီပြီး စက်သံပေါ်လာတာကို မသိဘဲ ၀မ်းသာအားရနဲ့ 'ဟေ့... မကြည်၊ မနုလေ၊ မနု' နဲ့ လုပ်နေတာ၊ ဟိုဘက်က မရပ်ဘဲ ဆက်ပြောနေတော့မှ နည်းနည်း ရိပ်မိသွားပြီး ငြိမ်နားထောင်ကြည့်ရတာ၊ အဲဒါကျမှ 'သြော်... စက်ဆိုတာ ဒါကိုး' ဆိုပြီး ဥာဏ်အလင်းပွင့်သွားတာ။ နောင် စက်များစွာနဲ့ တွေ့ထိဆက်ဆံပြီးတော့မှ စက်နဲ့လူကို ချက်ချင်း ကွဲနိုင်သွားတာလေ။ ဒီတော့ ကျွန်မ၏ များစွာသော ချစ်မိတ်ဆွေ၊ ချစ်သူငယ်ချင်းများ လည်း ကျွန်မကဲ့သို့ ဥာဏ်အလင်းပွင့်စေရန် စက်ဖြစ်ကြောင်း ထည့်သွင်းပြောကြားမှ ဖြစ်တော့မယ်လို့ ဆုံးဖြတ်ချက်ကို ခင်ပွန်းသည်အား တင်ပြလိုက်ခါ ရှိသေး။ တခါတည်း အောင်နိုင်သူတို့ မျက်နှာနဲ့ 'ကျုပ် မပြောဘူးလား၊ ဒါ 'ဟို' မဟုတ်ဘူး။ 'ဒီ.. ဒီ' မြန်မာပြည်... နော် ဖုန်းနံပါတ်လေး ပြောရုံပဲ မရဘူးဗျ' နဲ့ လိုအပ်သည်များကို လမ်းညွှန်မိန့်ကြားတော့တာပဲ။
အံမယ်၊ နောက်နေ့ကျတော့ 'ကိုယ်အသံသွင်းမယ်' ဆိုပြီး၊ ဘယ်လိုပြောထည့်လိုက် သလဲ သိလား။ 'ဟဲလို.. ခြောက်၊ ခြောက်၊ ခွန်၊ သုံး၊ လေး၊ သုံး၊ ဦးအောင်ကျော်တိုးနဲ့ ဒေါ်နုနုရည်အင်းဝ အိမ်ကပါချင်ဗျာ။ ကျွန်တော်တို့ နှစ်ယောက်လုံး အပြင်သွားပါတယ်။ ဒါစက်ပါခင်ဗျာ၊ မှာစရာရှိရင် စက်ထဲမှာ..'
အဲဒီနေရာလည်းရောက်ရော ကျွန်မက မအောင့်နိုင်ဘဲ ရယ်ချလိုက်ရော။
'ဟောဗျာ.... ဒီမှာ အသံသွင်းနေတယ် ဘာဖြစ်တာလဲ'
'ဘာမှ မဖြစ်ဘူး၊ 'ဒါစက်ပါခင်ဗျာ' ဆိုတာကြီးကို ရယ်ချင်လို့၊ မှာစရာရှိရင် စက်ထဲမှာ မှာခဲ့ပါ ဆိုရင် သိပါပြီ။ ကျုပ်တို့လူတွေ ဒီလောက် မတုံးပါဘူး'
အဲဒါကျမှ 'အေး.....အေး' ဆိုပြီး နောက်ဆုံး အချောသပ် ဘယ်လိုသွင်းလိုက်လဲ ဆိုတော့ 'ဟဲလို... ခြောက်၊ ခြောက်၊ ခွန်၊ သုံး၊ လေး၊ သုံး၊ ဦးအောင်ကျော်တိုးနဲ့ ဒေါ်နုနုရည်အင်းဝ အိမ်ကပါခင်ဗျာ၊ ကျွန်တော်တို့ နှစ်ယောက်လုံး အပြင်သွားပါတယ်။ မှာစရာရှိရင် စက်ထဲမှာ မှာထားခဲ့လို့ရပါတယ်။ ကျေးဇူးတင်ပါတယ်ခင်ဗျာ' တဲ့။ မဆိုးပါဘူး၊ အိုကေဆိုပြီး အဲဒီနေ့က ကျွန်မတို့ အပြင်ထွက်ပြီး၊ ပြန်လာတော့ ကျွန်မရဲ့ စက်ကလေးမှာ မီးနီကလေးက မှိတ်တုတ်မှိတ်တုတ်နဲ့ အချက်တွေပြလို့။ ကြည့်စမ်း... ကျွန်မသူငယ်ချင်း၊ မိတ်ဆွေတွေ စက်မှန်းသိသွားပြီ။ မှိတ်တုတ်မှိတ်တုတ် မီးနီကလေးဟာ စက်ထဲမှာ မှာထားတာတွေရှိကြောင်း အသိပေးနေတာလေ။ ဘယ်သူတွေ ဘာတွေ မှာထားပါလိမ့်။ ကဲ.. လာခဲ့စမ်းဆိုပြီး နားထောင်တဲ့ခလုပ်ကို ကျွန်မ ဖွင့်ချလိုက်တယ်။
ပထမဆုံး ပေါ်လာတဲ့ အသံက ကျွန်မနဲ့ စိမ်းတဲ့ အမျိုးသမီးတယောက်ရဲ့ မ၀ံ့မရဲ အသံလေး။ '....မှာ.....ကျင်းပပါမယ်ဆရာ၊ အဲဒါ ဆရာ တက်ဖြစ်အောင်တက်ပါတဲ့။ ဒါပါပဲ' တဲ့။ ကျွန်မတို့ နှစ်ယောက် တယောက်မျက်နှာ တယောက် ကြည့်လိုက်ကြတယ်။
'အသံက ပြတ်နေတယ်။ အဲဒါ ဘယ်သူလဲ'
'ကိုယ့်ဌာနက တယောက်ယောက် ဖြစ်မယ်၊ ကောင်းရော။ ဘယ်နှစ်နာရီ၊ ဘယ်မှာဆိုတာ အကုန်ပြတ်နေတယ်။ အေး... ကိုယ်သိပြီ။ စက်ထဲက တီ..တီ..တီ.. ဆိုတဲ့ အချက်ပေးသံ အဆုံးကို မစောင့်ဘူး၊ ပြောချလိုက်တာ'
'ဟုတ်တာပေါ့ ပြသနာပဲ'
စက်ထဲမှာ 'မှာစရာရှိရင်မှာပါ၊ ကျေးဇူးတင်ပါတယ်' ဆိုပြီး စကားဆုံးရင် တီ..တီ..တီ ဆိုတဲ့ အချက်ပေးသံလေး ပေါ်လာလေ့ရှိတယ်။ နောက်ဆုံး 'တီ' ဆိုတဲ့ အသံရှည်လေးဟာ စပြီးအသံသွင်းဖို့ စပြီးစကားပြောဖို့ အချက်ပေးတဲ့ အသံပဲ။ အဲဒီ အချက်ပေးသံ အဆုံးကို မစောင့်ပဲ သွင်းလိုက်ရင် ရှေ့က အသံတွေ အကုန်ပြတ်ကုန်တာပေါ့။ နောက်ထပ်သွင်းထားတဲ့ (Message) သုံးခုကို ကျွန်မနားထောင်ရတော့လည်း ထိုနည်းလည်းကောင်းပဲ။ ရှေ့က အသံတွေ အကုန်ပြတ်ပြီး တယောက်ကကျ 'ဒါပဲနော်' တဲ့။ နောက်တယောက်ကျ 'ဖုန်းပြန်ဆက်ပါ' တဲ့။ နောက်တယောက်ကျ 'လာခဲ့ပါနော်.. ဒါပဲ' တဲ့။ ဘယ်သူ့အသံလဲ ဆိုတာ ဖမ်းလို့မရဘူး။ ပြသနာပဲ။
'ကဲ... ဘယ့်နှယ်လုပ်မလဲ'
'အင်း..နေဦး'
နောက်တနေ့ အပြင်ထွက်မယ်လုပ်တော့ ကျွန်မတို့ ဘယ်လိုလုပ်လိုက်သလဲဆိုတော့ 'စက်ထဲမှာ မှာစရာရှိတာ မှာထားခဲ့လို့ရပါတယ်' ဆိုတဲ့ စကားနောက်မှာ 'မှာမယ်ဆိုရင် အချက်ပေးသံလေး နားထောင်ပြီး အချက်ပေးသံလေးဆုံးတော့မှ မှာပါနော်' ဆိုတဲ့ ၀ါကျရှည်တကြောင်းကို ထပ်မံဖြည့်စွက်ပစ်လိုက်တယ်။ ပြီးတော့မှ ကျေးဇူးတင်ပါတယ်ပေါ့။ အိုကေ... ဒါဆိုရင်တော့ တော်တော်လေး ဟုတ်သွားပြီ။ စက်ဖြစ်ကြောင်းလည်း ဖွင့်ဆိုရှင်းပြပြီး ပြီ။ စက်ကို ဘယ်လို အသုံးပြုပါ ဆိုတာကိုလည်း မေတ္တာရပ်ခံပြီးပြီ။ ဘာများအဆင်မပြေစရာ ရှိသေးလို့လဲ။ အဆင်ကို ပြေရမယ်ဆိုပြီး ကျွန်မတို့နှစ်ယောက် အပြင်လောကကို တခေါက် ထပ်မံထွက်ခဲ့ကြပြန်တယ်။

xxxx xxxx xxxx xxxx

ဒီတခါမှာတော့ ကျွန်မတွေးထင်ထားတဲ့အတိုင်းပါဘဲ။ မီးနီကလေး မှိတ်တုတ်နဲ့ စက်ကလေးထဲက ချစ်မိတ်ဆွေတို့ရဲ့ အသံတွေဟာ အပြတ်အတောက်မရှိ အဆင်တော့ ပြေပါရဲ့။ ကဲ.... ကျွန်မ စက်ကလေး တနေ့တာ ဖမ်းယူရရှိထားတဲ့ အသံတွေကို နားဆင်ကြည့်စမ်းပါဦး။

xxxx xxxx xxxx xxxx

'အဲ.. ဟဲဟဲ...ဟဲဟဲ (အကြောင်းမဲ့ ရှက်စနိုး ရယ်မောလိုက်သောအသံ) အဲ.. ခင်မောင်မြင့် ဆက်တယ်၊ ခင်မောင်မြင့်... ဟိုဟာလေ စာတမ်းဖတ်ပွဲကိစ္စပြောမလို့။ ပြည့်ပြည့်စုံစုံ ပြောချင်တာ။ အဲ.. ဘယ်လိုပြောရမလဲ မသိဘူး။ ဟဲ...ဟဲ.. ကိုတိုးနဲ့ မနု အခုဆက်တာ ခင်မောင်မြင့်၊ ဒါပဲနော် ကျေးဇူးပဲ'
(သူကတော့ ကျွန်မတိုရဲ့ ရင်းနှီးတဲ့မိတ်ဆွေ လက်ထောက်ညွှန်မှူးအဆင့်ရှိတဲ့ ဦးခင်မောင်မြင့် ဆိုသူ ဖြစ်ပါတယ်)
'ဟဲလို... အဲ..ဟဲလို...အဟင်း (လည်ချောင်းရှင်း၍အားယူသံ) ကိုအောင်ကျော်စိုးရှင်၊ ရှင့်ကို ကျွန်မ မသိပါဘူး၊ ကျွန်မကိုလည်း သိမှာ မဟုတ်ပါဘူး။ ဟို... ကျွန်မ ဖုံးမှားဆက်မိတာပါ။ ဒါပေမယ့်.... ဒီလို အသံမျိုး တခါမှ မကြားဖူးလို့ အသံသွင်းကြည့်တာပါ။ နောက်လည်း ဆက်ပါဦးမယ်ရှင်'
(နာမည်ကိုပါ မှားခေါ်သွားတဲ့ အမည်မသိ၊ လူချင်းလည်းမသိ၊ ထူးဆန်းသော မိန်းမတယောက်)

xxxx xxxx xxxx xxxx

'ခစ်ခစ်.....ခစ်ခစ်...' (ကလေးရယ်သံများ)
'ပြောလေ' (ကြီးကောင်ဝင်စ ချာတိတ်အသံ)
'အို.... ပြောချင်ပါဘူး' (စွာတာတာချာတိတ်မအသံ)
'ဒီမှာ... ဒီမှာ၊ ခင်ဗျားကိုယ်ခင်ဗျား ဘီအီးဒီအောင်သိုက်များ မှတ်နေလား၊ အသံကိုက 'ပဲ' ချည့်ဘဲ' (ဒီအသံပိုင်ရှင်များကတော့ ကျွန်မတို့ သူငယ်ချင်း လေယဉ်မှူးကြီးရဲ့ အနာဂါတ် မျိုးဆက်သစ် ရင်နှစ်သည်းချာလေးများနဲ့ သူကလေးတို့ရဲ့ မိခင်ငယ်လေး ဖြစ်ပါတယ်)

xxxx xxxx xxxx xxxx

'ဟဲလို.... အမယ်လေး.. စက်ကြီးက ချေလိုက်တာ အစ်မရယ်၊ တော်ပြီ၊ မပြောတော့ဘူး.. ဘိုင်' (ဒါက ကျွန်မရဲ့ 'ဂေးလ်' သမီးတွေထဲက နှုတ်ခမ်းတလန်ပန်းတလန် လုပ်တတ်တဲ့ သမီးတယောက် ဖြစ်လိမ့်မယ်)

xxxx xxxx xxxx xxxx

'ဟဲလို...ဆရာ၊ အဲ.. သမီးတို့ပါ၊ ဟို သမီးတို့ အောင်စာရင်းတွေ ဘယ်တော့လောက် ထွက်မှာလဲဆိုတာ သိချင်လို့ပါ။ ဟေ့.. ဒါ ငါ စက်နဲ့စကားပြောနေတာ သိလား။ စက်နဲ့။ (အနားရှိ သူငယ်ချင်းများ လှည့်ပြောသံ) မယုံရင်နေ၊ တကယ်ကို စက်၊ လာနားထောင်ကြည့်'
'ဟဲလို.. ဟဲလို၊ ဟင် စက်ကလည်း ဘာမှ ပြန်မပြောဘူး'
'ခုနကပြောတယ်၊ ငါကြားပါတယ်ဆိုနေမှ၊ ပေး...ပေး..၊ တော်ပြီ၊ ဟဲလို ဒါပါပဲဆရာ၊ သမီးတို့ ဖုန်းပြန်ဆက်ပါမယ်' (သူကလေးတွေကတော့ ကျွန်မခင်ပွန်းရဲ့ တပည့်လေးတွေ 'ဘွဲ့လွန်တက္ကသိုလ်ကျောင်းသူ' များဖြစ်ပါတယ်)

xxxx xxxx xxxx xxxx

'အေး... စက်၊ စက်ဟုတ်လား၊ အဲဒီစက်ကြီးပျက်၊ အေးရော' (ဒီအသံပိုင်ရှင်ကို ရင်းနှီးပုံရပေမယ့် ဒီနေ့ထိ ကျွန်မတို့ ဖော်လို့ မရသေးပါဘူး)
'ဟဲလို... အဲ... နက်ဖြန်မနက် ကိုးနာရီကနေ ဆယ့်တနာရီ (Top Star) ကို၊ ကိုသက်နွယ်ဖိတ်တာ လာခဲ့ဖို့ မှာခဲ့တယ်လို့ သေချာလေး၊ ပြောပေးပါဗျာ နော်၊ အရေးကြီးလို့ပါ၊ ကျေးဇူးတင်ပါတယ်ဗျာ' ('ဟောတော့' ဆိုပြီး ကျွန်မ သဘောကျစွာရယ်မိသူကကတော့ ကျွန်မတို့ အစ်ကိုကြီး နာမည်ကျော် ကဗျာဆရာ ဖြစ်ပါတယ်)

xxxx xxxx xxxx xxxx

'ဟဲလို.... အဲ.... တိုးလေး၊ ငါပါကွာ၊ မင်းသူငယ်ချင်းလေ၊ သိတယ်မဟုတ်လား၊ ဟင်... ဘာမှလဲ ပြန်မပြောဘူး၊ အင်း စက်တပ်တာ ကောင်းပါတယ်၊ ဒါပေမယ့် စကားပြောရတာ အရသာ မရှိဘူးကွနော်၊ အဲ... သူငယ်ချင်းရေ..၊ ပြောရဦးမယ်၊ ဖြစ်ကြောင်းရယ် ကုန်စင်ဆို သလိုပေါ့ကွာ။ ဟိုနေ့က အင်း... မှတ်မှတ်ရရ လွတ်လပ်ရေးနေ့၊ ဇန်န၀ါရီလ လေးရက်နေ့မှာဟေ့ ဖြစ်တာ။ တကယ်တော့ ငါမမှားဘူး သူငယ်ချင်း။ အဲဒီနေ့မနက်က ထင်တော့ထင်သား၊ မျက်ခုံးကလည်း လှုပ်တုတ်တုတ်ကွ။ ငါပြောတယ် မိန်းမကို၊ မိန်းမရေ ငါ ဒီနေ့...'
(မှာကြားရန် Message တခုကို စက္ကန့် ၃၀ အချိန်ကိုက်ထားတဲ့အတွက် စက်က ဖြတ်တောက်လိုက်တဲ့အတွက် ကျွန်မခင်ပွန်း ငယ်သူငယ်ချင်းရဲ့ ဖွဲ့နွဲ့မှုဟာ တ၀က်တပြက်နဲ့ (သူဘာဖြစ်တယ်ဆိုတာ မသိလိုက်ရဘဲ) ပြတ်တောက်သွားတော့တယ်။ သူကတော့ သူ့ထုံးစံအတိုင်း ဖြစ်ကြောင်းရယ်ကုန်စင်ကို ဘယ်အချိန်ထိ ဆက်ပြီး ဖွဲ့နွဲ့လေတယ်မသိ။)

xxxx xxxx xxxx xxxx

အသံတွေ အားလုံးကို နားထောင်ပြီးတဲ့ အချိန်မှာတော့ ကျွန်မတို့ နှစ်ယောက် မျက်နှာငယ်ကလေးတွေနဲ့ တယောက်မျက်နှာ တယောက် ကြည့်လိုက်မိကြတယ်။ သက်ပြင်းတချက်ကိုလည်း ကျွန်မ ရှိုက်လိုက်မိတဲ့ခဏမှာဘဲ ဖုန်းသံက မြည်လာပြန်တယ်။
'ဟဲလို.....'
'ဟဲ့... စက်လား၊ လူလား...'
ဟိုက်....၊ ကျွန်မရဲ့ အချစ်ဆုံး ငယ်သူငယ်ချင်း၊ အရာရှိကြီးကတော်ရဲ့ အသံ၊ စက်လား.. လူလားတဲ့။
'လူပါဟယ်၊ လူပါ၊ စက်မဟုတ်ပါဘူး'
ကျွန်မဖြေသံကို ကိုယ့်ဘာသာကိုယ်တောင် ကျွန်မ သနားနေမိတယ်။
'မသိဘူးဟေ့၊ မေးရသေးတာ၊ ငါ့အကြောင်းညည်းသိသားပဲ၊ စက်နဲ့ ပြောဖို့ မဆိုထားနဲ့ တယ်လီဖုန်းခွက်ကြီး နားနားကပ်ပြီးပြောရတဲ့ အလုပ်ကို ငါအင်မတန် စိတ်ပျက်တာ၊ ဟဲ့..... နေဦး ငါပြောဦးမယ်'
'အေး...အေး.. ပြော....'
ခါတိုင်း ကျွန်မတို့ သူငယ်ချင်းနှစ်ယောက်တွေ့ရင် ဘယ်သူမှ ၀င်လို့မရအောင် စကား ပြောတတ်ကြပေမယ့် ဒီတခါမှာတော့ ကျွန်မတယောက် ဟီးဟီး ဟားဟား လည်းမလုပ်နိုင်၊ သူပြောတာတွေကိုပဲ အင်း လိုက်ရင်းနဲ့ ဖုန်းဖြေစက်ကလေးကိုပဲ မမှိတ်မသုန်ကြည့်လို့။ သင်းကလေးကို ဆက်ထားသင့် မထားသင့် ကျွန်မတွေးနေမိပါပြီ။

xxxx xxxx xxxx xxxx

'ဟဲလို'
'....'
'ဟဲလို'
'ဟဲလို.... အဲ... ဆရာမလား၊ လူကိုယ်တိုင်ပဲလား၊ ကျွန်တော်ပါ၊ မိုးထိုက်ပါ'
'အေး... ကိုမိုးထိုက်ပြော၊ လူကိုယ်တိုင်ပါပဲ မောင်ရာ...ပြောပါ'
'ဟာ... ဆရာမနှယ်၊ ဟိုနေ့က ကျွန်တော်ဆက်တယ်၊ စက်မှန်းသိပါဘူးဆိုဗျာ၊ ဆရာမ အသံကလည်းတိုးတိုး၊ မြန်လည်း မြန်နေတယ်ဗျာ။ သိုင်းကယူလို့လည်း ကြားလိုက်တော့ ကျွန်တော့်ကို ဘိုလိုပြောနေတယ်ထင်လို့.. ဟဲလို.. အိုင်အမ် မိုးထိုက်၊ အိုင်ဝမ့်တူ စပိခ် ၀သ်စ်ယူနဲ့ လုပ်နေတာဗျို့။ နောက်... ဆရာမအသံက ငြိမ်သွားပြီး တီတီ ဆိုတာတွေ ပေါ်လာတော့မှ ဟိုက်... စက်ဆိုတာ ဒါနဲ့ တူရဲ့ပေါ့။ ကိုယ်လည်း တခါမှ သုံးဖူးသုံးစ မရှိတော့ အဲဒီဟာထဲလဲ ဘယ်နှယ့်ဟာ၊ ဘာညာရယ်လို့ ထည့်ခဲ့တော့ပါဘူးဗျာ'
'သြော်...အေး၊ အဲဒီနေ့က လှည်းတန်းဘက် ခဏလေးထွက်သွားတာကွ၊ သွားခါနီး ငါ ကဗျာကယာ သွင်းသွားလို့နဲ့ တူတယ်'
'မသိဘူးလေဗျာ၊ အဲဒါ နေဦးဗျ၊ ညဘက်ကျတော့ ကျွန်တော် တခါ ထပ်ဆက်ပြန်ရော။ အောင်မယ် အဲဒီအခါကျတော့လည်း ခင်ဗျားယောက်ျား အသံကြီးနဲ့ လုပ်ပြန်ရောဗျို့'
အညာသား၊ နာမည်ကျော် ဓာတုဗေဒ ကျူရှင်ဆရာနဲ့ စကားပြောပြီးတဲ့ အချိန်မှာတော့ ကျွန်မခမျာ ရယ်ရတော့မလို၊ ငိုရတော့မလို။
ဘယ်လိုလဲ စက်ကလေးရေ၊ သနားစရာ စက်ကလေးကို ကျွန်မ အသာတို့ထိလိုက် တုန်းမှာဘဲ ဖုန်းသံက မြည်လာပြန်ပါပြီ။
'ဟဲလို'
'ဟဲလို... နုနုလား၊ ရွှေအေးပါ'
'ဟယ်...ရွှေအေး..သူငယ်ချင်း၊ ငါသတိရနေတာ ဘယ်လိုလဲ....'
(ရုတ်တရက် ရွှေအေးရှိုက်သံကို ကျွန်မ ကြားလိုက်ရပါတယ်)
'ဟဲ့... ရွှေအေး၊ ဘာဖြစ်ပြန်ပလဲ ငါ့ကို ပြောစမ်း'
ဝမ်းနည်းဓါတ်ခံ အလွန်ရှိတဲ့ မရွှေအေးက ဆက်ပဲရှိုက်နေတယ်။ ပြဿနာပဲ။ ကျွန်မ ဒီသူငယ်ချင်းက ငယ်ငယ်ကတည်းက ဆင်းရဲရှာပြီး၊ ရိုးရိုးအအ၊ အရာရာမှာ အားငယ်ကြောက် တတ်၊ ပြဿနာမှန်ကို မျက်ရည်နဲ့ဘဲ အလျှော့ပေး ဖြေရှင်းတတ်တဲ့သူ။ သူအားအကိုးဆုံးက ကျွန်မ။ ခုလည်း ဘာဖြစ်ပြန်ပြီလဲ မသိပါဘူး။
'ရွှေအေး၊ နင့်ကိုငါပြောထားတယ် မဟုတ်လား၊ မျက်ရည်နောက်မှကျ၊ ပြဿနာကို အရင်ပြောရမယ်လို့လေ'
'ငါ...ငါ... ၀မ်းနည်းလို့ပါ'
'အေး.. ဘာဖြစ်လို့ ၀မ်းနည်းတာလဲလို့'
'ငါ... ဟိုတနေ့က နင်တို့အိမ်ကို ဖုန်းဆက်တာ၊ နင့်ယောက်ျားက ငါ့ကို အဖက်လုပ် စကားမပြောဘူး သိလား'
'ဘာရယ်....'
'ငါက ဒီဘက်ကနေ ပြောနေပါတယ်။ ဆရာ၊ ကျွန်မ နုနုသူငယ်ချင်း ရွှေအေးပါလို့၊ သူက ဖုန်းနံပါတ်တွေ၊ နင်တို့ နှစ်ယောက်နာမည်တွေပြောတယ်။ အသံကလည်း တမျိုးကြီး၊ ငါ့ကို အရင်က ပြောတဲ့ အသံမျိုး မဟုတ်ဘူး။ ငါဘယ်လိုပြောပြော သူပြောချင်တာတွေ ပြောပြီး ဖုန်းချပစ်လိုက်တယ်။ ငါ ၀မ်းနည်းလိုက်တာ... ငါ...'
'နေဦး.... ရွှေအေး ငါပြောမယ်'
'(ရှိုက်လျက်) ငါက နင့်ကို ခဏခဏ အကူအညီတောင်းရတာ ခဏခဏ ဒုက္ခပေးရတော့ သူက ငါ့ကို....၊ ငါနောက်... နင့်ကို ဒုက္ခမပေးတော့ပါဘူး။ ဘယ်တော့မှလည်း ဖုန်းမဆက်တော့ပါဘူး'
'ရွှေအေး....၊ ရွှေအေး'
ကျွန်မ ဘယ်လိုပဲ ခေါ်ပေမယ့် ကျွန်မသူငယ်ချင်းဟာ 'ဂွပ်' ခနဲမြည်တဲ့ဖုန်းချသံနဲ့ နောက်ဆုံးနှုတ်ဆက်ခဲ့သွားပါပြီ။ သက်ပြင်းတချက်ကို ချလိုက်ရုံကလွဲလို့ ကျွန်မ ဘာများ တတ်နိုင်ဦးမှာလဲ။ စက်ကလေးရေ၊ မင်းကိုငါ ဖြုတ်ပစ်တာပဲ ကောင်းမယ်ထင်ပါရဲ့။ ဖုန်းဖြေစက်ကလေး ဘေးနာမှာ ထောင်ထားတဲ့ ၂၀၀၁ ခုနှစ် ပြက္ခဒိန်လေးထဲက လှည်းယဉ်ကလေးနဲ့ မြန်မာသမီးပျိုလေးက ပြုံးပြုံးလေးကျွန်မကို ကြည့်နေတယ်။ အလို... ကျွန်မ စက်ကလေးကို ဖြုတ်ဖို့ စိတ်ကူးတဲ့နေ့ဟာ ဇန်န၀ါရီ (၁)ရက်၊ နှစ်ဆယ့်တစ်ရာစုထဲကို ချင်းနင်း ၀င်ရောက်တဲ့ နေ့ပါလား....။ ။

နုနုရည် (အင်းဝ)
ကလျာမဂ္ဂဇင်း၊ အမှတ် ၁၉၄။

1 comment:

ကြာပီ said...

နုနုရည်(အင်းဝ) စာတွေအတွက် ကျေးဇူးပါ မာယာ။ နုနုရည်(အင်းဝ)ကို ၀တ္ထုရှည်(လုံးချင်း)တွေ ရေးပါအုန်းလို့ တိုက်တွန်းပေးပါနော်။