(၁)
နွေအပူ ….
မြေအပူ ….
မွန်းတည့်နေပူအောက်မှာ
ဝမ်းဟာနေသူ ၊ ရင်အပူနဲ့ လူတယောက် ။
အို ….
ဟိုနားမှာလည်း တယောက်
ဒီမှာလည်း တယောက် ၊ နှစ်ယောက်
သုံးယောက် ၊ လေးယောက်
…………………… ။
(၂)
အစ
ပြုံးရာကတည်
တည်ရာကမဲ့
မဲ့ရာကငို … ။
သောကမီးကြောင့်
ရှိုက်ကြီးတငင် ၊ ငိုပြီးရင်
ရင်မှာ နာကျည်းတတ်လာမယ် ။
နာကျည်းလွန်းမှ
အစက ရီနေကြမျက်နှာ
တင်းမာခက်ထန်လာကြလိမ့် ။
(၃)
အပူမီးခ
ဒေါသမှိုင်းဝေ မျက်နှာတွေ …. ။
ဒီမျက်နှာတွေများ
ပေါင်းစည်းမိသွားရင်တော့
မီးတောက်ပဲပေါ့
အပူချိန် အမြင့်ဆုံးရောက်
မီးတောက် အပြာရောင် ။
အဲဒီအခါ ….. ။ ။
မောင်မှိုင်းလွင် (အင်းဝ)
(မောင်မြင့်စံ ၊ မောင်မှိုင်းလွင်
(အင်းဝ) ၊ ဘုန်းနွယ်လင်း ၊ ပုသိမ်ခင်လေး ၊ မောင်ဆန်းညွန့် ၊ မောင်စိန်ဝင်း
(ပုတီးကုန်း)
စက်မှုတက္ကသိုလ်ကလောင်ရှင်များရဲ့
“အပြာရောင်မီးတောက်” (၁၉၇၂ ၊ ဖေဖော်ဝါရီလ) မှ )
No comments:
Post a Comment