Friday, May 31, 2013

မတကသကပ်တဲကြီး။ ရေးသူ - ဖိုးသံ လူထု






ကျွန်တော်မမေ့နိုင်သောအဆောက်အဦများ
မတကသကပ်တဲကြီး

            တချိန်က  မန္တလေးတက္ကသိုလ်မှာ ရွှေပြည်အေး၊ အောင်မင်္ဂလာနဲ့ ရတနာပုံဆိုတဲ့ အမျိုးသားကျောင်းဆောင်များ တည်ရှိတဲ့ လမ်းတိုအတိုင်း အရှေ့ဘက်ကနေ လျှောက်လာရင် အနောက်ဖက်ဖျားကို ရောက်တော့ သွပ်မိုး ကပ်တဲကြီးတွေကို တွေ့ရပါတယ်။ အဲဒါတွေဟာ အခု ၀န်ထမ်းနေအိမ်ဆိုလား ဖြစ်နေပြီး အရင် ကျွန်တော်တို့ ခေတ်ကတော့ အဆောင်ကျောင်းသားတွေအတွက် ထမင်းစားဆောင်နဲ့ မီးဖိုတွေ ဖြစ်ပါတယ်။ ဒါပေမဲ့ အဲဒီတဲတွေရဲ့ အနောက်ဖက်ဆုံးမှာ တခြားတဲကြီးတွေနဲ့ ဆက်မနေတဲ့ တဲကြီးတလုံးရှိပါတယ်။ အဲဒါကတော့ မန္တလေးတက္ကသိုလ် ကျောင်းသားများသမဂ္ဂ အဆောက်အဦပဲ  ဖြစ်ပါတယ်။

            ဒီ အဆောက်အဦရဲ့ ရှေ့မှာ မန္တလေးတက္ကသိုလ်အတွင်း အနှံ့စီးဆင်းနေတဲ့ ရေဆိုးမြောင်းလည်းမဟုတ်၊ ရေကြည် မြောင်းလည်းမဟုတ်တဲ့ မြောင်းလေးတခု ရှိပါတယ်။ အမျိုးသားကျောင်းသားဆိုရင် လွှားကျော်သွားလို့ရတဲ့ ဒီမြောင်းပေါ် မှာ ပျဉ်သုံးချပ်လောက်ကို တံတားအဖြစ် ခနော်ခနဲ့ ခင်းထားပါတယ်။ နောက်ပြီး တမာပင်ထင်ပါရဲ့ သစ်ပင်တပင်။ အဆောက်အဦဟာ အုတ်ခုံခင်းထားတာ မှန်ပေမဲ့ သူ့ ပတ်ပတ်လည်မှာတော့ မြက်တွေ၊ ခြုံတွေ ချည့်ပါပဲ။ မြွေ၊ ကင်းတွေ မကြာခဏ တွေ့ရတတ်ပါတယ်။

            ကပ်တဲကြီးရဲ့ အ၀င်တံခါးအပေါ်မှာတော့  ”မန္တလေးတက္ကသိုလ်ကျောင်းသားများသမဂ္ဂ” ဆိုတဲ့ အနီရောင် ဆိုင်းဘုတ် ရှိပါတယ်။ ဆေးတွေက ကွာသလောက် ကွာနေပါပြီ။

            ပေငါးဆယ်လောက် ရှည်ပြီး အရှေ့အနောက်တန်းနေတဲ့ ဒီတဲကြီးရဲ့ အရှေ့ထိပ်မှာ လူဆယ်ယောက်ကျော်လောက် အစည်းအဝေး ထိုင်နိုင်တဲ့ စာပွဲကြီးတလုံးနဲ့ ကုလားထိုင်တွေ ရှိပါတယ်။ ဒါပေမဲ့  အားလုံးက  ဟောင်းဟောင်း နွမ်းနွမ်းပါ။ စာပွဲကြီးရဲ့ နောက်ကျောက ထရံမှာတော့ ခွပ်ဒေါင်းအလံကို ကန့်လန့်ဖြတ် ချိတ်ထားပါတယ်။ အခန်းထောင့် တနေရာမှာ ခြောက်ပေ အမြင့်လောက်ရှိမယ့် ကျောင်းသားအာဇာနည် ဗိုလ်အောင်ကျော်ရဲ့ ပန်းချီပုံကြီးတခုကို ထောင်ထားပြီး ထရံ တနေရာမှာ ဆရာကြီးသခင်ကိုယ်တော်မှိုင်းပုံ ချိတ်ထားပါတယ်။ နောက်ပြီး နိုင်ငံတကာ ကျောင်းသားလှုပ်ရှားမှုက ပိုစတာ အနည်းးအပါး ကပ်ထားတယ်လို့ မှတ်မိနေပါတယ်။ အခန်းထဲမှာ စာအုပ်ဘီဒို (သူများလှူထားတာတွေ) လေးခု လောက်ပေမဲ့ စာအုပ်များများစားစား မရှိပဲ သတင်းစာဟောင်းတွေပဲ ရှိပါတယ်။

            အဲဒီတုန်းက ကျောင်းသားသမဂ္ဂတွေဟာ ငွေကြေးအရ ချို့တဲ့ပါတယ်။ ဒါကြောင့် အခမ်းအနားတခု လုပ်တယ်ဆိုရင် အနီးအနားက ဆရာတွေရဲ့ အိမ်တွေကို သွားပြီး စာပွဲခင်းကအစ ရက်ကော်ဒါ အသံသွင်းစက်အဆုံး ငှားရမ်းကြရပါတယ်။ ကျွန်တော်ပါဝင် ငှားဖူးတဲ့ ဆရာဦးခင်မောင်တင့်(တက္ကသိုလ်ဘုန်းနိုင်)၊ ဆရာဟာဂျီ(အင်္ဂလိပ်စာကထိက)တို့ အိမ်တွေဆိုရင် အင်မတန် လိုလိုလားလားနဲ့ ထက်သန်ရက်ရောစွာ ထုတ်ကြတာကို ကောင်းကောင်းမှတ်မိနေပါတယ်။

            ကျွန်တော် တက္ကသိုလ်ကျောင်းကို ရောက်တဲ့နှစ်ဟာ နောက်ဆုံး(အခုအထိ) တက္ကသိုလ်ကျောင်းသားများသမဂ္ဂ ရွေး ကောက်ပွဲ လုပ်တဲ့နှစ် ဖြစ်ပါတယ်။ ကျောင်းဖွင့်ပြီး နှစ်လလောက် အနေမှာပဲ ထင်ပါရဲ့၊ မန္တလေးတက္ကသိုလ်ကျောင်းသား ညီညွတ်ရေးတပ်ဦး ညီလာခံ ကျင်းပါတယ်။ သမဂ္ဂအဆောက်ဦထဲမှာ လုပ်တာဖြစ်ပြီး စိတ်ဝင်စားသူ ဘယ်သူမဆို တက်လို့ရ ပါတယ်။ ကျွန်တော်က နောင်တော့်နောင်တော်ကြီးများနဲ့အတူ သွားတက်တော့ တက္ကသိုလ်ကျောင်းသား မဟုတ်တော့တဲ့ တပ်ဦးကောင်စီဝင် (အဖွဲ့ဝင်ကို ကောင်စီဝင်လို့ခေါ်ပါတယ်)တွေ လာတက်တာလည်း တွေ့ရပါတယ်။ အစည်းအဝေးမစခင် ကျနော့် ဘေးပတ်လည်က နောင်တော်ကြီးများက ကျွန်တော့်ကို တပ်ဦးကောင်စီဝင်မလား မေးကြပါတယ်။ ကျွန်တော်ကလည်း ဒီလို အပြောကို စောင့်နေသလိုမို့ ချက်ခြင်းပဲ ခေါင်းငြိတ်လိုက်တော့ သူတို့ချင်း လက်တွေ့လုပ်ဆောင်စရာတွေ ညှိနှိုင်းတာတွေ့ရပါတယ်။ သူတို့အထဲက တယောက်က သဘာပတိစာပွဲပေါ်မှာရှိတဲ့ ကောင်စီဝင်လျှောက်လွှာကို သွားတောင်းယူခဲ့ပါတယ်။ အဲဒီ လျှောက်လွှာကို ကျွန်တော်က ဖြည့်ပြီးတော့ ကျောင်းသားညီညွတ်ရေးတပ်ဦး ဖွဲ့စည်းပုံဥပဒေအတိုင်း ထောက်ခံမယ့်လူနှစ်ယောက် ရှာရပါတယ်။ ကျွန်တော့်ကို ၀င်ဖို့စ တိုက်တွန်းတဲ့ ကိုသောင်းရွှေ (ပေါင်းလောင်းဒေသဖက်မှာ ကျဆုံးသွားသူ) က ထောက်ခံသူတယောက်လုပ်ပြီး နောက်တယောက် ဘယ်သူလုပ်မလဲလို့မေးတော့ အတူထိုင်နေတဲ့ စာရေးဆရာမောင်မိုးသူ (သူက အဲဒီအချိန်မှာ တက္ကသိုလ်ကျောင်းသား မဟုတ်တော့ပါဘူး) က “ဒီကောင် ဆိုရင်တော့ ငါထောက်ခံမယ်ကွာ” (ဒါသူ့ စကားအတိုင်းပါပဲ၊ ကျွန်တော်အတိအကျ မှတ်မိနေပါတယ်) ဆိုပြီး လျှောက်လွှာ ပုံစံမှာ လက်မှတ်ထိုးပေးပါတယ်။

            ရန်ကုန်တက္ကသိုလ်မှာ ကျောင်းသားသမဂ္ဂအဆောက်အဦကြီးကို ဒိုင်းနမိုက်နဲ့ ခွဲလိုက်ပြီဆိုတော့ တပြည်လုံးက တက္ကသိုလ်နဲ့ကောလိပ် အားလုံးကိုလည်း ပိတ်လိုက်တာမို့ နောက်တနေ့မှာ ကျွန်တော်တို့ ကျောင်းသွားမတက်ကြပါဘူး။ ဒါကြောင့် မန္တလေးတက္ကသိုလ် သမဂ္ဂအဆောက်အဦကိုတော့ ဘယ်လို သဘောထားတယ်ဆိုတာကို သိချင်နေကြပါတယ်။ ဒါပေမဲ့ မကြာပါဘူး။ သတင်းစာတိုက်မှာနေသူဆိုတော့ အဲဒီမနက် (ဇူလိုင်လဂရက်)မှာပဲ သတင်းကို ကြားရပါတယ်။ မန္တလေးတက္ကသိုလ် ကျောင်းသားများ သမဂ္ဂအဆောက်အဦကိုလည်း နန်းတွင်းက လာဖျက်ပြီး ကားနဲ့ တိုက်ယူသွားကြသတဲ့။ ကျွန်တော်မှတ်တာ မမှားဘူးဆိုရင် အဲဒီတုန်းက ဗမာပြည်မှာ ကျောင်းသားများ သမဂ္ဂအဆောက်အဦဆိုလို့ ဒီနှစ်ခုပဲ ရှိတာပါ။ ဒီတော့ ကျောင်းသားသမဂ္ဂနဲ့ ပတ်သက်တာ မှန်သမျှ ကျူငုတ်တောင် မကျန်အောင်လုပ်လိုက်တဲ့ သဘောပါပဲ။ အုတ်ခုံကလေးသာ ကျန်ပါတယ်။

            ဒါပေမဲ့ ကျောင်းသားတွေကိုတော့ ကျူငုတ်ပါ မကျန်အောင် သူတို့မလုပ်နိုင်ခဲ့တာမို့ မကြာခင်မှာပဲ လှုပ်ရှားမှုတွေ ပြန် ပေါ်ပါတယ်။ ၁၉၆၃ခုနှစ်မှာ တော်လှန်ရေးကောင်စီ စစ်အစိုးရက တပြည်လုံး ငြိမ်းချမ်းရေးခေါ်ဆိုတဲ့ အခါမှာ ကျောင်းသား လှုပ်ရှားမှုတွေ ပြန်ပေါ်လာပါတယ်။ ကျွန်တော်တို့တတွေ မြို့နယ်ဗကသ၊ ခရိုင်ဗကသတွေ ပြန်ထောင်ကြပါတယ်။ ကျွန်တော်လည်း ခရိုင်ဗကသ အမှုဆောင် (အတွင်းရေးမှူး) ဖြစ်လာပါတယ်။ ဒါပေမဲ့ တကသ ကတော့ ရွေးကောက်ပွဲနဲ့မှ ဖွဲ့စည်းနိုင်တာမို့ ကျွန်တော်တို့ တက္ကသိုလ်နယ်မြေအတွင်းမှာ ပြန်စုစည်းဖို့ လိုနေပါတယ်။

ဒီလိုနဲ့ ၁၉၆၃ခုနှစ် ၇ရက် ဇူလိုင်အခမ်းအနား (ထင်ပါတယ်) ကို အဲဒီ မတကသ အဆောက်အဦ ကွက်လပ်လေးပေါ်မှာ ကျင်းပခဲ့ကြပါတယ်။ စာပွဲလေးတလုံးချ၊ သဘာပတိနဲ့ အခမ်းအနားမှူးအတွက် ကုလားထိုင်လေး ၂လုံးခင်းပြီး ပရိဿတ်က အုတ်ခုံပေါ်မှာ ထိုင်ကြပါတယ်။ ဖျာကြမ်း ခင်းပေးနိုင်၊ မပေးနိုင် မမှတ်မိတော့ပါဘူး။ ကျွန်တော့်ကိုလည်း စင်တင်တဲ့အနေနဲ့ နောင်တော်ကြီးများက  ”ဒီမိုကရေစီရေး” အဆိုတင်သွင်းဖို့ တာဝန်ပေးပါတယ်။ ”ဘာတွေပြောကွာ” လို့ ဘယ်သူကမှ မပြောခဲ့ပါဘူး။ ဒါကြောင့် ကျွန်တော့် အလှည့်ရောက်လို့ ခုနက ပြောတဲ့ စာပွဲလေး အနားရပ်လိုက်တော့ တုန်လိုက်တဲ့ ဒူးတွေ၊ ထိန်းမနိုင်သိမ်းမရ ပါပဲ။ ထိန်းလို့ရလိုရငြား စားပွဲကို လက်ထောက်လိုက်တော့လည်း မထူးပါဘူး။ ပရိဿတ်ထဲမှာ ရှေ့ဆုံးကထိုင်တဲ့ အမျိုးသမီးကျောင်းသူတွေကတော့ ကျွန်တော့်အဖြစ်ကို သိလို့၊ အားနာလို့လား မသိပါဘူး အားလုံး ခေါင်းငုံ့နေကြပါတယ်။ ကျွန်တော်လည်း စဉ်းစားထားတာရဲ့ တ၀က်လောက်ကိုပဲ ပြောပြီး မိန့်ခွန်းကို သိမ်းလိုက်ပါတယ်။ အခမ်းအနားပြီး သွားလို့ ပစ္စည်းတွေ သိမ်းကြတော့ အဲဒီနှစ်မှာ ကျောင်းသားညီညွတ်ရေးတပ်ဦး ဥက္ကဋ္ဌ ဖြစ်လာတဲ့ ကိုကျော်ခင်က တဟဲဟဲ ရီရင်း ”ကောင်လေး ဘာတွေပြောလဲမသိဘူး” လို့ပြောပါတယ်။ ဒီအခါမှာ ကျန်တဲ့ ရဲဘော်များကလည်း ရီကြပါတယ်။ ဒါပေမဲ့ အားလုံးက ကျွန်တော့်ကို ချစ်ကြနားလည်ကြတော့ ဘယ်သူကမှ အပြစ်တင်တာ၊ လှောင်ပြောင်တာ မလုပ်ပါဘူး။ ဒါဟာ ကျွန်တော့်ဘ၀မှာ ပထမဆုံးအကြိမ် မိန့်ခွန်းပြောတာ မဟုတ်လား။ ၁၈နှစ်သား အရွယ်လေ။

ဒီအကြောင်းတွေကြောင့်  ဒီအဆောက်အဦကို ကျွန်တော့်ဘ၀မှာ မမေ့နိုင်တဲ့ အဆောက်အဦတခုလို့ မှတ်တမ်းထိုး မိတာပါ။ တနေ့ကတော့ အာအက်ဖ်အေ အသံလွှင့်အစီအစဉ်က ဆောင်းပါးတခုမှာ ဒီကွက်လပ် နေရာဟာ ခြုံနွယ်ပိတ် ပေါင်းတွေနဲ့  ဖြစ်နေပြီလို့ ကြားလိုက်ရပါတယ်။ ၀မ်းနည်းစရာ စိတ်မကောင်းစရာပါ။

တနေ့မှာ ဒီခြုံနွယ်ပိတ်ပေါင်းတွေကို ရှင်းနိုင်ရင် ရိုးသားစွာ ကျောင်းသားအရေးအတွက် စွန့်လွှတ်လုပ်ကိုင်ခဲ့ကြတဲ့ ကျောင်းသားတွေရဲ့ ဇာတ်လမ်းတွေ ပေါ်လာမလား မသိပါဘူး။ ကျွန်တော့် အသိထဲမှာတော့ ဒီ ခပ်ကုပ်ကုပ် ကပ်တဲကြီးထဲက ထွန်းပြောင်တဲ့ စကားတွေနဲ့ လုပ်ရပ်တွေပေါ် ထွက်ခဲ့တယ်ဆိုတာ စွဲနေပါတယ်။

ဖိုးသံ(လူထု)

[နေ့သစ် အင်တာနက်မှာ ဖော်ပြပြီးသော စာမူဖြစ်ပါတယ်။ စာရေးသူရဲ့ ခွင်ပြုချက်နဲ့ မာယာမဂ္ဂဇင်းမှာ တင်ပါတယ်။ ]

Thursday, May 30, 2013

အပြာရောင် မီးတောက် ရေးသူ မောင်မှိုင်းလွင် (အင်းဝ)



အပြာရောင်မီးတောက်



(၁)
နွေအပူ ….
မြေအပူ ….
မွန်းတည့်နေပူအောက်မှာ
ဝမ်းဟာနေသူ ၊ ရင်အပူနဲ့ လူတယောက် ။

အို ….
ဟိုနားမှာလည်း တယောက်
ဒီမှာလည်း တယောက် ၊ နှစ်ယောက်
သုံးယောက် ၊ လေးယောက်
…………………… ။

(၂)
အစ
ပြုံးရာကတည်
တည်ရာကမဲ့
မဲ့ရာကငို … ။

သောကမီးကြောင့်
ရှိုက်ကြီးတငင် ၊ ငိုပြီးရင်
ရင်မှာ နာကျည်းတတ်လာမယ် ။

နာကျည်းလွန်းမှ
အစက ရီနေကြမျက်နှာ
တင်းမာခက်ထန်လာကြလိမ့် ။

(၃)
အပူမီးခ
ဒေါသမှိုင်းဝေ မျက်နှာတွေ …. ။

ဒီမျက်နှာတွေများ
ပေါင်းစည်းမိသွားရင်တော့
မီးတောက်ပဲပေါ့

အပူချိန် အမြင့်ဆုံးရောက်
မီးတောက် အပြာရောင် ။
အဲဒီအခါ ….. ။   ။

မောင်မှိုင်းလွင် (အင်းဝ)

(မောင်မြင့်စံ ၊ မောင်မှိုင်းလွင် (အင်းဝ) ၊ ဘုန်းနွယ်လင်း ၊ ပုသိမ်ခင်လေး ၊ မောင်ဆန်းညွန့် ၊ မောင်စိန်ဝင်း (ပုတီးကုန်း)
စက်မှုတက္ကသိုလ်ကလောင်ရှင်များရဲ့ “အပြာရောင်မီးတောက်” (၁၉၇၂ ၊ ဖေဖော်ဝါရီလ) မှ )

Tuesday, May 14, 2013

"၀" လူမျိုးတို့ရဲ့ဒေသ ပန်းဆန်းမြို့မှာ စုံစုံညီညီ ဗမာပြည်ကွန်မြူနစ်ပါတီ ဗဟိုဌာနချုပ် ရုံးစိုက်သည်၊ ရေးသူ နီမော်



          ဗမာပြည် အရှေ့မြောက်ဘက်ယွန်းယွန်း၊ တရုတ်-မြန်မာနယ်စပ် တောင်တန်းကြီးတွေပေါ်မှာ "၀" ပန်း လို့ခေါ်တဲ့ "၀"ပြည်ရဲ့ မြို့တော် ပန်ဆန်းမြို့ ရှိတယ်လေ။ တန်ယန်းမြို့က လာရင် သံလွင်မြစ်ကို ကျော်ဖြတ်ပြီး တာနဲ့ ၀နယ်ထဲ ၀င်ရောက်လာတယ်။  "၀"လူမျိုးတို့ရဲ့  ဒေသဟာ  "၀" မြောက်နဲ့  "၀" တောင်ဆိုပြီး နှစ်ဒေသ ခွဲလျက် တည်ရှိတယ်။ "၀" ဘာသာစကားနဲ့  "၀" လူမျိုးတို့ရဲ့ ဓလေ့ထုံးစံကတော့ နှစ်ဒေသလုံး  အတူတူပါ။  "၀"  မြောက် ခရိုင်ရဲ့ မြို့တော်က မိုင်းမောမြို့ခေါ် ရှင်းတီဖန့် (တရုတ်အမည်) ဖြစ်ကာ ဆောက်ဖားမြို့နယ်က သွားရင် မိုင်းမောမြို့ကို ရောက်ပါတယ်။ ၀မ်လိန်၊ ဆောက်ဖား၊ မိုင်းမော ခရီးစဉ်ပါ။ ၀မ်လိန်မြို့နယ်မှာ ဗမာပြည် ကွန်မြူနစ်ပါတီ အရှေ့မြောက်စစ်ဒေသရဲ့ မွေးမြူရေးခြံကြီး ရှိပြီး ၀မ်လိန် တောင်ကြော၊ တောင်ကြား၊ မြေပြန့်စားကျက်ကောင်းတဲ့ နေရာတွေမှာ သိုး၊ ဆိတ်၊ မြင်း၊ လား၊ နွားတွေကို အုပ်စုလိုက် တွေ့ရတယ်။ မွေးမြူရေးခြံ ကြီးကို ဦးစီးတဲ့ တာဝန်ခံက တရုတ်ပြည် ကွေ့ကျိုးကေဒါ (ခေါ်) ကွေ့ကျိုးမြို့မှာ ဖွင့်တဲ့ မာက်စ်၊ လီနင်၊ မော် အတွေးအခေါ် နိုင်ငံရေးသင်တန်းဆင်း ကေဒါရဲဘော် သန်းမောင်ပါ။ စစ်ဒေသ မွေးမြူရေးခြံကြီးထဲမှာ မြင်းနဲ့ လားကို သားစပ်ထားတဲ့ မြည်းကလေးတွေရှိတယ်။ အရပ်ကလေး ပုပေမယ့် ခြေလက် တောင့်တင်း သန်မာ ကြောင်း၊ မြင်းနဲ့ လားထက် ၀န် ပိုထမ်းနိုင်ကြောင်း၊ တောင်ပေါ်ဒေသမှာ သိပ်အသုံးဝင်ကြောင်း၊ တနေ့ကို ကြက်ဥ၊ ကြံသကာနဲ့ ကောက်ညှင်းကဇော် လေးကြိမ်လေးခါ ကျိုချက်ကျွေးရကြောင်း ပြောတော့လွတ်မြောက် ဒေသ ရောက်လာကတည်းက ပဲပုတ်နဲ့ မုန်ညင်း၊ ပြောင်းထမင်း၊ ကန်းစွန်းဥထမင်း နေ့စဉ် ၀တ္တရားမပျက် ပုံစံ စားနေကြရတဲ့ ကျွန်မတို့ ရဲဘော်အားလုံး  "မြည်းလေးဘ၀  ကောင်းလေစွ၊ကောင်းလေစွ"  လို့  မြည်းကလေး နှာယောင်ကို ပွတ်လို့ မုဒိတာပွားများကာ မြည်းပုလေးကို ပီတိသံပြိုင် ပြောကြားလိုက်ကြတယ်။

ကျွန်တော်တို့  ခြံမှာ ပင်ဒါ ၀က်ဝံ နှစ်ကောင် မွေးထားတယ်ဗျာ၊ အဲ့ဒါ မနှစ်က ရဲဘော်ဦးတင် (ဗိုလ်မှူးချုပ်ဟောင်း ကျော်ဇော)တို့  တပ်ဖွဲ့လာတုန်းက ကျွန်တော် ဂုဏ်ပြုချင်လွန်းလို့ ပင်ဒါတစ်ကောင် သတ်ကျွေးလိုက်တာဗျ။  ၀မ်လိန် မွေးမြူရေး ခြံကြီးအနီးမှာ နတ်ရေကန်လို့ တင်စား ခေါ်ဝေါ်ထားတဲ့ တောင်ပေါ်က ရေကန်ကြီးရှိတယ်။ ရေကန်ကြီးဟာ သန့်ရှင်းလှပြီး ရေ၀င်ပေါက်၊ ရေထွက်ပေါက်မရှိ  ရေအမြဲ ပြည့်နေတယ်။ ရေကန်ကြီးပတ်လည် တောကြီးထဲမှာ တန်ဘိုးကြီးလှတဲ့ တိုင်းရင်းဆေးပင်တွေရှိကြောင်း၊ ရောဂါ တကယ် ပျောက်ကင်းတာကြောင့်  "၀" လူထုတွေ အလွန် တန်ဘိုးထားကြောင်း ရဲဘော်သန်းမောင်က ပြောပြတယ်။

          ၀ မြောက်ခရိုင်၊ ဆောက်ဖားမြို့ကို ရောက်တော့ ရှေးယခင်ကာလက လူလူချင်း ခေါင်းဖြတ်၊ နတ်တင် ယဇ်ပူဇော်တဲ့ စနစ်ဆိုးကြီး ရှိခဲ့တာကြောင့် "၀" လူထုတွေဟာ  ခေါင်းဖြတ်တော့မယ့်  သတင်းကြားရင် တုံးမောင်း ခေါက်ကာ အချက်ပေးကြရတယ်။ ဒီအခါ  အိမ်ရှေ့ကလာရင် အိမ်နောက်ကို၊ အိမ်နောက်ကလာရင် အိမ်ရှေ့ကို ထွက်ပြေးဖို့  တူးမြောင်းကြီးတွေ တူးထားကြရတယ်။  ဒီမြောင်းကြီးတွေထဲကနေ ထွက်ပြေး လွတ်မြောက်ကြ ရတယ်။ လူခေါင်းဖြတ် နတ်တင်ပြီး ယဇ်ပူဇော်တဲ့အခါ ကျွဲခေါင်း၊ နွားခေါင်းတွေကိုလည်း ဖြတ်ကာ ပူဇော်ရ ကြောင်း၊ အရိုးခြောက်နေပြီဖြစ်တဲ့ ကျွဲခေါင်း၊ နွားခေါင်းခွံတွေကို  ပြကြတယ်။  "၀" လူမျိုးတွေဟာ အိမ်ကို ခပ်ကုပ်ကုပ် ဆောက်ကာနေထိုင် ကြတာ။ ခေါင်းဖြတ် နတ်တင်တဲ့ စနစ်ဆိုးကြီးကြောင့်ပါ။  ဒီလိုအဖြစ်ဆိုးကြီးကို မကြုံရဖို့ ပုန်းလျှိုး ကွယ်လျှိုး နေလို ကြတယ်။  ဒါကြောင့် အိမ်ဆောက်ရာမှာ ရှည်လျားတဲ့  ခေါင်တိုင်ကြီးတလုံးကို စိုက်ထူကာ တိုင်ထိပ်ဖျားက မြေကြီးအထိ လူတယောက် ၀င်နိုင်ရုံသာ ထားပြီး သက်ကယ်တွေ အထုံးလိုက် အထုံးလိုက် ချိတ်ဆွဲ ကာရံထား ပုံက တဲပုံသဏ္ဍာန်ဟာ လက်ထိုးကန်တော့ကြီး မှောက်ထားသလိုပါပဲ။ တတဲလုံးမှာ ကဲလားလို ပြူတင်းပေါက် တပေါက် ဖောက်ထားတယ်။ တတဲလုံး မှောင်နေတယ်။  တဲအလယ်မှာ မီးဖိုရှိတယ်။ ဗမာပြည်ကွန်မြူနစ်ပါတီ ရောက်လာမှ  "၀" ဒေသမှာ ခေါင်းဖြတ် နတ်တင်ယဇ်ပူဇော်တဲ့ စနစ်ဆိုးကြီး ပပျောက်သွားကြောင်း သိရသည်။

          "၀" မြောက်မှာလည်း တောင်ယာစပါးစိုက်တာ၊ "ခေါ့" လို့ခေါ်တဲ့ အနှံတစ်မျိုး စိုက်တာတွေ့ရပြီး ရိက္ခာ ဆန်မလောက်ရင်"ခေါ့" ကို ချက်စားကြရတယ်။  "ခေါ့" ကို ချက်စားကြရတယ်။  "ခေါ့" က ညိုညိုနက်နက် နှမ်း သာသာ အလုံး အစေ့လေးတွေပေါ့။  "ခေါ့" ကို တဆေးနဲ့ ရောကာ "၀" ခေါင်ရည် ချိုချိုအေးအေးကို ချက်ကြ ရတယ်။ "၀" ခေါင်ရေဟာ ချိုမြတဲ့အပြင် အာဟာရရှိတာကြောင့် "၀" လူမျိုးတို့ အလွန်နှစ်သက်ကြတယ်။  "၀" ခေါင်ရည်ချိုချို အေးအေးသောက်လိုက်ရင် အမောပြေအားရှိလာမယ့်အကြောင်း သီချင်းစပ်ဆိုကာ ဘူးပလွေမှုတ်ပြီး  "၀" ပျိုဖြူတွေ က ကြတယ်။

"၀" လူမျိုးတွေဟာ အသားညိုညို၊ မျက်လုံးမျက်ဖန် ကောင်းကောင်း၊ မျက်တောင်ကော့ကော့၊ ခန္ဓာကိုယ် တုတ်ခိုင်သန်စွမ်းကာ အလွန်အပင်ပန်းခံနိုင်တဲ့၊ သတ္တိဗျတ္တိကောင်းတဲ့ လူမျိုးစု ဖြစ်ပါတယ်။

          "၀" မြောက်က ခရီးဆက်လိုက်တာ တောင်စဉ်တောင်တန်း အကြီးအငယ်၊ အနိမ့်အမြင့် အသွယ် အတန်းလိုက် ကျော်ဖြတ်ကြရပြီး  "၀" တောင်ခရိုင်ကို ရောက်လာပါတယ်။  မန်မန်းဆိုင်မြို့နယ်၊ ၀င်းကောင်မြို့ နယ်တို့ကို တောင်စဉ် တလျှောက် ကျော်ဖြတ်ပြီးတော့ နမ့်ခါ ချောင်းဘေးက ရှမ်းရွာကြီး နှစ်ရွာဖြစ်တဲ့ ဘန့်ပွဲရွာ၊ နားလော့ရွာတို့က ၀င်လာလိုက်တာနဲ့  ၀တောင်ခရိုင်ရဲ့  မြို့တော်  "၀" ပန်း ခေါ်  ပန်ဆန်းမြို့ကို ရောက်တယ်။ ဗကပတွေဟာ ပန်ဆန်းစစ်ဒေသကြီးကို အရင်ဖွဲ့စည်းတယ်။

ပန်ဆန်း စစ်ဒေသကြီးဟာ မယ်ဇလီပင် အုပ်အုပ်ရှိတဲ့  ရှမ်းလူမျိုးတို့ရဲ့ ကောင်းဟုန်းရွာ၊ ကောင်းမုရွာတို့နဲ့ တဆက်တည်း ရှိတယ်။ တောင်ကြားထဲက မြေပြန့်ကြီး တခုလို့ ပြောလို့ ရတယ်။ လယ်ကွင်းတွေနဲ့ လှေကားထစ် လယ်တွေရှိတယ်။ နမ့်ခါချောင်းရိုးတလျှောက်မှာ လယ်ကွင်း လယ်ကွက်တွေ၊ သဲသောင်ခုံတွေ၊ ထင်းအတွက် စိုက်ပျိုးထားတဲ့ မယ်ဇလီပင် အုပ်အုပ်တွေနဲ့ မျက်စေ့ ပသာဒရှိလှတယ်။ နမ့်ခါချောင်းရိုး တလျှောက်မှာ ကြောင်ဘန်းပင်၊ ခံတက်ပင်၊ မြင်းခွာရွက်ပင်၊ ၀ဥပင်၊ ဒရင်ကောက်ပင်၊ ဖန်းအပင် ခေါ် ဒရင်ကောက်ရိုင်းပင်၊ ကြိတ်မှန်ရွက်ပင်တွေကို တွေ့နိုင်တယ်။ မြန်မာပြည်မမှာ မသိန်းရှင်ဆီပို့ပေးပါ၊ နွေတည၊ မဟူရာမေတ္တာ စတဲ့ လုံးချင်းဝတ္ထုတွေကြောင့် နာမည်ကျော်ကြားခဲ့ရတဲ့ စာရေးဆရာ နိုင်ဝင်းဆွေ (ရဲဘော်ကျော်ဆိုင်) နဲ့ ဇနီး ၀ အမျိုးသမီး မကျုံတို့ နှစ်ဦးဟာ  ခံတက်ချဉ် တည်ရောင်းဖို့၊ ရဲဘော် ရဲဘက်တွေကို ပေးဝေငှဖို့ ခံတက်ပင်တွေရှိရာ နမ့်ခါချောင်းရိုး တလျှောက် မမောနိုင်မပန်းနိုင် ခံတက်ရွက် ရှာပုံတော် ဖွင့်ရတာကလည်း အရှေ့မြောက်စစ်ဒေသ ပန်ဆန်းမြို့ရဲ့ ပစ္စည်းမဲ့ အလှတပါးလို့ ဆိုပါရစေ။  နမ့်ခါ ချောင်းမှာ အ၀တ်လျှော် ရေချိုးဆင်းတဲ့ ရဲဘော်တိုင်းကို  ရဲဘော်ကျော်ဆိုင်က သူ့ရဲ့ သွားအကုန်ပေါ်အောင် ပြုံးရွှင်ရယ်မောတဲ့ မျက်နှာ ပြည့်ပြည့်ညိုညိုကြီးနဲ့  ဖော်ရွေရင်းနှီးစွာ  ခံတက်ချဉ်လာယူဖို့ မှာရ၊ ပြောရတာကလည်း အမောပါ။

          တကယ်တော့ ကျွန်မတို့ ဗမာပြည် ကွန်မြူနစ်ပါတီ၊ ဗဟိုခေါင်းဆောင်တွေဟာ ၁၉၇၇ ခုနှစ်လောက်က  ၀နယ် ပန်ဆန်းမှာ ဗဟိုရုံးချုပ်၊ စစ်ဒေသရုံးချုပ်ဖွင့်ဖို့ စတင် အကောင်အထည် ဖော်ရတာကတော့ ပန်ဆန်းမြို့ ဟာ ဥက္ကဋ္ဌနဲ့ ပေါလစ်ဗျူရို ဗဟိုခေါင်းဆောင်များအတွက် နောက်ကျော အင်မတန်လုံလို့ပါ။  ပန်ဆန်းအ၀င် ရှမ်းရွာကြီး နှစ်ရွာဖြစ်တဲ့ ကောင်းဟုန်းရွာ၊ ကောင်းမုရွာ ကစလို့ မြေပြန့်ကြီးတခု ဖြစ်နေတာရယ်၊ တရုတ်ပြည်နဲ့ ပန်ဆန်းကို ခြားထားတဲ့ နမ့်ခါချောင်းက ရွာနဲ့ လယ်ကွင်းတွေ၊ တပ်တွေ၊ ဌာနတွေကို ရစ်ခွေစီးနေလို့ စိုက်ပျိုးရေးလုပ်ဖို့ အဆင်ပြေနေတာရယ် ပန်ဆန်းမြေပြန့်ကြီးရဲ့ အနားသတ်အဖြစ် တောင်ကုန်းတောင်တန်းတွေ ကာရံ ထားတာရယ်၊ စစ်ရေးနဲ့ လုံခြုံရေးအတွက် ကင်းတပ်တွေ တောင်ကုန်းမြင့်မြင့်တွေမှာ တင်ထားနိုင်တာရယ်ကြောင့် အဖက်ဖက်က အဆင်ပြေနေတယ်။

ယုန်တင်ရွာကအဆင်း ပန်ဆန်းအ၀င်မှာ စစ်ဒေသ လျှပ်စစ်ဓာတ်အားပေးစက်ရုံကို စတင်တွေ့ရတော့တာပါ။ လျှပ်စစ်ရုံတောင်ကုန်းကနေ ပန်ဆန်းတမြို့လုံး လျှပ်စစ်မီး ရစေ တယ်။ လျှပ်စစ်ရုံ တောင်ကုန်းအောက်မှာတော့ ပန်ဆန်းရဲ့ ငါးရက်ဈေးလို့ခေါ်တဲ့ ဒူးလောက်မြင့်တဲ့ တိုင်လေးတိုင် ပေါ်မှာ ပျဉ်ခင်းကာ သက်ကယ်မိုးထားတဲ့ ဈေးဆိုင်တန်းပါ။ ဈေးကြိုနေ့ ဈေးနေ့ကို ငါးရက်တစ်ကြိမ် ကြုံကြရ တာပါ။ ဈေးမှာ တရုတ်ငွေ၊ မြန်မာငွေ၊ ပန်းခိုက်ခေါ် ဒင်္ဂါးနဲ့ ၀ ပိုက်ဆံခေါ် ကြေးနီပြားတွေကို ငွေလဲနှုန်းအလိုက် လဲလှယ်သုံးစွဲကြတယ်။ တန်ယန်းကုန်သည်တွေက ငါးပိငါးခြောက်၊ ကုလားပဲ၊ အ၀တ်အထည်၊ နို့ဆီ၊ ငါးသေတ္တာစတာတွေ သယ်ယူရောင်းချကြသလို ပန်ဆန်းရဲ့ ရှမ်းလူထုနဲ့ ၀ လူထုတွေကတော့ ဒေသထွက် ကြံသကာ၊ ပဲပုတ်စေ့၊ ဘိန်းစေ့၊ ပြောင်းစေ့၊ဘိန်းဆီ၊ ကြံသကာ၊ ဟင်းသီးဟင်းရွက်မျိုးစုံ ရောင်းချကြတယ်။ တချို့လည်း တရုတ်ပြည် မုံအာရွာအထိ ခေါက်ဆွဲခြောက်၊ ဆား၊ ရေနံ၊ သကြားစတဲ့ လူသုံးကုန် အမျိုးမျိုးကို သွားရောက် ၀ယ်ယူကြတယ်။

တကယ်တော့ ကျွန်မတို့  ပြည်သူ့တပ်မတော်သားများအားလုံးဟာ တရုတ်ပြည် ကြီး နောက်ကျောမှာ ရှိနေလို့သာ နေထိုင် စားသောက်ရေး၊ လုံခြုံရေး၊ စစ်ရေး အစစအရာရာ အဆင်ပြေ ချောမွေ့နေတာပါ။  အပြန်အလှန်အားဖြင့် တရုတ်နယ်စပ်အတွက်လည်း လုံခြုံမှုရနေတာပါ။ ပန်ဆန်းဈေးကြီး ကနေ လမ်းမကြီးအတိုင်း ဆက်လျှောက်လာခဲ့ရင် နားလော့ရွာခေါ် ရှမ်းရွာ အသွားလမ်းမှာ စစ်ဒေသဆေးရုံကို တွေ့ရတယ်။ စစ်ဒေသ အမြာက်တပ်၊ စစ်ဒေသ ကင်းတပ်၊ စစ်ဦးစီးဌာန စစ်ဒေသကင်းတပ်၊  စစ်ဒေသ မူလတန်းကျောင်း၊ ဘောလုံးကွင်း၊ စစ်ဒေသ စည်းရုံးရေးဌာန၊ စစ်ဒေသဌာနချုပ်၊ စစ်ဒေသ ဆက်သွယ် ရေးဌာန၊ စစ်ဒေသ အမျိုးသမီးတပ်ကျောင်း၊ မြင်းတပ်၊ လားတပ်နဲ့ ဆေးတပ်ဖွဲ့တို့ပြီးရင် ဗဟိုယူနစ်ဖြစ်တဲ့ စပယ်တောစခန်း၊ ဗဟိုဝါဒဖြန့်ချိရေး၊ ဗဟိုပြည်သူ့အသံလွှင့်ဌာန၊ ဗဟိုကင်းတပ်၊ ဗဟို ဘဏ္ဍာရေးနဲ့ ထောက်ပံ့ ရေးဌာန၊ ဗဟိုစီးပွားရေးဌာနတို့ကို နမ့်ခါချောင်းရိုး တလျှောက် နမ့်ခါချောင်းနဲ့ လယ်ကွင်းတွေခြားပြီး တည်ရှိ ပါတယ်။

ဗဟိုထောက်ပံ့ရေး စီးပွားရေးဌာန၊ ဗဟိုကင်းတပ်တို့ကနေ တဖြည်းဖြည်း တောင်ကုန်းအတိုင်း နိမ့်ရာမှ မြင့်ရာသို့ တက်လာတဲ့အခါ ပန်ဆန်းမြို့ရဲ့အတွင်းပိုင်းအကျဆုံး၊ တရုတ်ပြည် မုံအာရွာနဲ့ အနီးဆုံး၊ ပန်ဆန်းမှာ အမြင့်ဆုံး ဂငယ်ပုံတောင်စွယ်လေးကတော့ ဗမာပြည် ကွန်မြူနစ်ပါတီဗဟိုဌာနချုပ်ရုံးပါ။ ဗဟိုဌာနချုပ် တောင်စွယ်လေးပေါ်ရှိ မြေပြန့်ကလေး အ၀င်မှာ ဗဟိုကင်းတပ်ရှိတယ်။ တောင်ယာစိုက်ပျိုးခင်းတွေ၊ မယ်ဇလီ ပင်တွေနဲ့ စိမ်းစိမ်းစိုစို အုပ်အုပ်ဆိုင်းဆိုင်း တောင်စွယ်လေးပေါ်မှာ ဥက္ကဋ္ဌ သခင်ဗဟိန်းတင်ရဲ့ နေအိမ်၊ ဒု-ဥက္ကဋ္ဌ သခင်ဖေတင့်နဲ့ ဒု-ဥက္ကဋ္ဌ ရဲဘော်ခင်မောင်ကြီးတို့နှစ်ဦးရဲ့ အိမ်၊ ပေါလစ်ဗျူရို ရခိုင်ဦးကျော်မြနဲ့ ပေါလစ်ဗျူရို ရဲဘော်ထွန်း ခေါ် ဗိုလ်ကြင်မောင်တို့ နှစ်ဦးရဲ့အိမ်၊ ဗိုလ်မှူးချုပ်ဟောင်းကျော်ဇောခေါ် ရဲဘော်ဦးတင် ဇနီးမောင်နှံနဲ့ ဗဟိုစစ် အကြံပေး ရဲဘော်ဟိုကောင်း ခေါ် ရဲဘော်သန်းရွှေတို့နှစ်ဦးရဲ့အိမ်၊ ဗဟိုခေါင်းဆောင်များ ရဲ့ အိမ်တွေဟာ သရက်ပင်၊ ငှက်ပျောပင်၊ ပုဏ္ဏားရိပ်ပင်၊ စကားဝါပင်၊ ခရေပင်တွေနဲ့ စိမ်းစိုအုံ့ဆိုင်းကာ နေချင် စဖွယ်ကောင်းတဲ့ ရွှံ့၊ အုတ်ကာ သက်ကယ်မိုး နှစ်ခန်းတွဲအိမ်တွေ ဖြစ်ပါတယ်။ အစီအရီ ဆောက်လုပ်ထားတဲ့ နေအိမ်တန်းတွေရဲ့ အတွင်းဘက်မှာ ဘော်လီဘောကွင်း၊ ရိက္ခာရုံ၊ စာကြည့်တိုက်၊ အစည်းအဝေးခန်းမကြီးတို့ ရှိကြတယ်။  ရဲဘော်တွေ ညနေတိုင်းကစားကြတဲ့ ဘော်လီဘောပွဲ၊ ကြက်တောင်ပွဲတွေကို ဥက္ကဋ္ဌ သခင်ဗဟိန်းတင်နဲ့ ဗဟိုခေါင်းဆောင်များဟာ ကြည့်ရှုအားပေးလေ့ရှိပါတယ်။
ဆက်လက်ဖော်ပြပါမည်.....

နီမော်