Monday, March 22, 2010

မုံရွာဘက်သို့ခရီးထွက်စဉ်က...
ရေးသူ-ရွှေဥဒေါင်း


[၁၃၆၂ ခု၊ တပေါင်းလကွယ်နေ့၊ ၂၀၀၁ မတ်လ ၂၃ မာယာ မဂ္ဂဇင်း]


"လိုက်ခဲ့ဦးလေကွာ မောင်ဖေသိန်း" ဟု ဆရာကြီး သခင်ကိုယ်တော်မှိုင်းက နောက်ဆုံးအကြိမ် ခေါ်ငင်ရာတွင်၊ မလိုက်တော့ပါဟု ဆုံးဖြတ်ချက် ချထားခဲ့သော ကျွန်ပ်မှာ (၂၀-၃-၅၆) နေ့က ဆရာကြီးတို့နှင့်အတူ မုံရွာနယ်ဘက်သို့ လိုက်ပါသွားခဲ့ရတော့သည်။ ငယ်တပည့်ဖြစ်သည့်အတွက် "မင်းနဲ့ခရီးသွားရတာ ပျော်သကွာ" ဟု ဆရာကြီးပြောစကားသည် ကျွန်ပ် အဖို့အရာ၌ အမိန့်ပေးခြင်း တမျှ လေးစားမိသည် ဖြစ်၍ ၎င်းနေ့ နံနက်စောစောတွင် မေမန်းဘတ်စ်ကားတစီးဖြင့် မန္တလေးမှ ရွာထောင်သို့ ထွက်လာခဲ့ကြသည်။


ကျွန်ပ် အဖွဲ့တွင် ဆရာကြီးနှင့် ကျွန်ပ်အပြင် ကိုဘငြိမ်း၊ ဦးရွှေဖြူ၊ ကိုဘ၀င်းနှင့် ကျောင်းသား ခေါင်းဆောင်တဦးဖြစ်သူ မောင်လှမြင့်တို့ ပါဝင်ကြသည်။ ထိုရက်တွင် အမရပူရနှင့် ရွှေကြက်ယက် အကြားရှိ မီးရထားတံတားမှာ မပြင်ရသေးသည့်အတွက် ရွာထောင်ဘူတာတွင် မီးရထားစီးကြရမည် ဖြစ်သည်။ ရွာထောင်ဘူတာတွင် မူလက ခန့်မှန်းသည်ထက် အချိန်ကြာမြင့်စွာ စောင့်ဆိုင်းရသော်လည်း ဆရာကြီးကိုမြင်လျင် မကြည်ညိုသူ မရှိသည့်အလျောက် မီးရထားရုံပိုင်၏ ဂရုတစိုက် စောင့်ရှောက် မှုကြောင့် ကျွန်ပ်တို့လူစုမှာ နေရာထိုင်ခင်းနှင့်တကွ ချမ်းသာစွာ စောင့်နေနိုင်ကြပေသည်။

စားချင်စဖွယ်ထမင်းဆိုင်များ

(၉)နာရီခွဲ အချိန်တွင် ရွာထောင်မှ မီးရထား ထွက်လာသောအခါ မီးရထား အလုပ်သမားများ သည် ဆရာကြီးအပေါ်တွင် စေတနာထားသည့်အလျောက် နောက်ဆုံးပိတ် ဂါတ်တွဲ၌ နေရာထိုင်ခင်း ပြင်ဆင်ပေးကြပါသည်။ ညောင်ပင်ဝန်းဘာတာတွင် မီးရထား အလုပ်သမားများက ကျွန်ပ်တို့ လူစုအတွက် နံနက်စာကို ထမင်းဆိုင်၌ တည်ခင်းကျွေးမွေးကြသည်။ ထမင်းဆိုင် အခင်းအကျင်းနှင့် ဟင်းလျာများ ချက်ပြုတ်ပုံမှာ အထက်အောက် မြန်မာပြည် မီးရထားလမ်း တလျောက်လုံးတွင် ထိပ်တန်းကျသော ဘူတာများအနက် တခုအပါအ၀င် ဖြစ်သည်ဟု ဆိုထိုက်ပေသည်။ ထူးခြားသော အခြင်းအရာတခုမှာ နွားနို့စစ်စစ် ရနိုင်သောဘူတာဆို၍ ထမင်းစားပြီးသူတိုင်း နွားနို့တခွက်စီ သောက်ကြသည်ကို တွေ့ခဲ့ရသည်။
မြန်မာလူမျိုးသည် အိန္ဒိယတိုင်းသားနှင့် အနောက်တိုင်းသားများကဲ့သို့ နွားနို့ကြိုက်တတ်သူများ မဟုတ် ဆိုသော်လည်း ကောင်းကောင်း စစ်စစ်ရနိုင်လျင် သောက်ချင် ရှာကြပေတကားဟု စဉ်းစား မိသည်။ အချိန်ကလည်း (၁၁)နာရီခွဲ ပြီး၍ ဆာချိန်ဖြစ်ပြန်၊ ဟင်းလျာများကလည်း စုံလင်ပြန်၊ ကက္ကိုပင် ရိပ်ကြီးကလည်း အေးချမ်းသာယာပြန်ပေရာ ခရီးသည်တိုင်းကိုပင် မြန်ယှက်စွာ စားသောက်ကြသည်ကို မြင်ခဲ့ရသည်။

နားမလည်သူများ၏ပုတ်ခတ်ခြင်း

မွန်းလွဲ၍ မီးရထား ထွက်လာသောအခါ ဆရာကြီးမှာ ထမင်းဆိပ်တက်သည် ဟု ဆိုကြသည့်အတိုင်း ငိုက်မျဉ်းရှာသည်နှင့် ချောင်ကလေးတွင် ကွေးလျက် မှိန်းရှာတော့သည်။ (မန္တလေး-မုံရွာ မီးရထားမှာ အထက်တန်းတွဲ မပါသောကြောင့် ဆရာကြီးအတွက်နေရာကို ဖြစ်တတ်သလို စီမံပေးကြရသည်) နေရာကလည်း ပူပြန်၊ နောက်ဆုံးတွဲ ဖြစ်သောကြောင့် မီးရထားလည်း အပြင်းအထန် ယိမ်းထိုး လှုပ်ခါပြန်၊ နေရာကလည်း ကျဉ်းကျုတ်ပြန်လေရကား ချောင်ထဲ၌ ကွေးလျက် အိပ်ရရှာသော ဆရာကြီးသခင်ကိုယ်တော်မှိုင်းကို မြင်ရသည်တွင် ရင်ထုမနာ ဖြစ်မိခြင်းနှင့်အတူ ဆရာကြီး၏ ငြိမ်းချမ်းရေးဆန္ဒ ပြင်းပြမှုကိုလည်း စိတ်ထဲက ချီးကျူးမိပါသေးသည်။
ကျွန်ပ်မှာ အသက် ၇၀ နီးရုံမျှရှိသေး၍ ဒုက္ခရောက်လှသည်ဟု အောက်မေ့မိသည့် အခါတိုင်း အသက် ၈၀ ကျော်ပြီဖြစ်သော ဆရာကြီး၏ ငြိမ်းချမ်းရေးဇွဲကို မြင်ရ၍ ကိုယ့်ကိုယ်ကို အားပေးရပါ တော့သည်။
သို့နှင့်ပင် တခါတရံတွင် ကမ္ဘာ့ငြိမ်းချမ်းရေး၊ ပြည်တွင်းငြိမ်းချမ်းရေးအတွက် ဒုက္ခခံလျက် ဆောင်ရွက်ကြရာ၍ မသိနားမလည်သူများက တောင်ပြောမြောက်ပြောနှင့် စွတ်စွဲ ပုတ်ခတ်ကြ သည်တွင် အောက်ပါ ဥပမာအတိုင်း စဉ်းစားမိ၍ စိတ်ချဉ်ပေါက်သလို ဖြစ်မိပါသေးသည်။

ဗလမကောင်းပဲလျက်လှော်ခတ်ရခြင်း

ကမ္ဘာသူကမ္ဘာသားသည် လည်းကောင်း၊ မြန်မာပြည်သူ ပြည်သားများသည် လည်းကောင်း၊ တစင်းထဲသော လှေပေါ်တွင် အတူစီးလျက် ခရီးသွားကြစဉ် လှေကြီးသည် ရေကြောင်းလွဲ၍ ကျောက်ဆောင်နှင့် တိုက်အံ့ဆဲဆဲ ဖြစ်သည်ဆိုအံ့။ ထိုအခြင်းအရာကို သိမြင်သူများက ကျောက်ဆောင် ကြီးနှင့် လွဲကင်းရှောင်တိမ်း နိုင်စေရန် အပြင်းအထန် လှော်ခတ်ကြသည် ဆိုအံ့။ လှေပေါ်တွင် ကာယဗလကောင်းသူများ ပါရှိသော်လည်း ကူညီလှော်ခတ်ခြင်း မပြုရုံမက ကြိုးပမ်းလှော် ခတ်သူများ ကိုပင် ပြက်ရယ်လှောင်ပြောင်ခြင်း၊ အနှောက်အယှက်ပေးခြင်း ပြုလုပ်ကြသည်ဆိုအံ့။ လှော်ခတ် ရသူများသည် မည်ကဲ့သို့ ရှိချေမည်နည်း။
ကျွန်ပ်သည် ချောင်ကလေးထဲ၌ ချွေးတလုံးလုံးနှင့် အိပ်ပျော်နေရှာသော ဆရာကြီး သခင် ကိုယ်တော်မှိုင်းကို လှမ်းကြည့်ရင်း အများနှင့်အတူ ဘေးအန္တရာယ်မှ လွတ်မြောက်ရန်မှတပါး မည်သည့် ကိုယ်ကျိုးမျှမပါပဲ လှော်ခတ်နေကြသော ကျွန်ပ်တို့၏ ဖြစ်ထွေကို အထက်ပါ ဥပမာအတိုင်း စဉ်းစားမိသည်နှင့် ၀မ်းနည်းချင်သယောင် ဖြစ်မိပါသေးသည်။
သို့သော် ဤစိတ်ကူးကား ခွန်အားနည်း၍ ညံ့ဖျင်းသော စိတ်ကူးအနေဖြင့် ဦးခေါင်းထဲမှ ဖယ်ထုတ်ပစ်လိုက်ပါသည်။ သို့နှင့်ပင် ပြည်တွင်းငြိမ်းချမ်းရေး မရသဖြင့် တပြည်ထောင်လုံး စီးပွါးပျက်သည့် ကပ်ကြီးဆိုက်၍ လုယက်တိုက်ခိုက်ကုန်ကြလျင် အင်ပို့လိုင်စင်သမားနှင့် 'ပြည်တော် သာ' သမားများလည်း ကျွန်ပ်ရေးဖူးသည့် 'ဓါးကုန်သည် ဖိုးသန့်' ကဲ့သို့ ပါးရိုက်ခံရခြင်းသာ အဖတ်တင် မည့်အရေးကို တွေးရင်း အိပ်ပျော်သွားပါတော့သည်။

မုံရွာသို့ရောက်ခဲ့ပြီ

(၂)နာရီခွဲ အချိန်တွင် မုံရွာဘူတာသို့ ၀င်လာ၍ မျှော်ကြည့်လိုက်ရာတွင် နေပူကြဲကြဲ၌ စောင့်ကြိုလျက်ရှိသော ပရိသတ်ထုကြီးကို မြင်လိုက်ရခြင်းဖြင့် အားရမိသည်။ စီစဉ်သူများမှာ ဆရာကြီး လိုက်ပါလာလိမ့်မည်ဟု အသေအချာမသိရပဲ စမ်းသပ်မှန်းဆ၍ ကြိုဆိုရခြင်း ဖြစ်သည်ဆိုပါလျက်၊ ထိုမျှလောက် စည်ကားအောင် စုရုံးနိုင်ကြသည့်အတွက် ချီးကျူးထိုက်ပါပေသည်။
တပြိုင်နက် အ၀တ်ဖြူ ယူနီဖောင်းနှင့် လည်ပင်းတွင် အနီရောင် တဘက် စည်းပတ်ထားသည့် တရုတ်ကျောင်းသူ ကျောင်းသားများကို မြင်လိုက်သည့်အခါ တရုတ်ပြည်ကြီးသို့ လှည့်လည်စဉ်က အခြင်းအရာတခုကို ပြေး၍ သတိရမိသည်။ ဆရာကြီးနှင့် အတူလိုက်ပါစဉ် အခြားသောမြို့များ၌ ဤအချင်းအရာမျိုး မတွေ့ရခဲ့ဘူးပဲ မုံရွာတွင်မှ မြင်တွေ့ရသဖြင့် တရုတ်မြန်မာ ချစ်ကြည်ရေးလမ်းစဉ် အောင်မြင်ခြင်း ပေတကားဟု စဉ်းစားမိသည်။

စိတ်ဝင်စားလျက်ကြည့်နေကြသည်

မိန်းမပျိုလေးများ ပေးဆက်သည့် ပန်းစည်းများကို လက်ခံပြီးနောက် ဆရာကြီးအား မိန်းမပျို လေးများ ခြံရံကာ ကားပေါ်တွင် တင်လျက် ကမ္ဘာ့ခြမ်းချမ်းရေး အဖွဲ့အစည်းတည်ရာဌာနသို့ ပို့ဆောင် ရာတွင် ပရိသတ်မှာ နေပူကျဲကျဲတွင် ဆရာကြီး၏ ကားနောက်မှာ ခြေလျင်လိုက်ပါရှာကြသည်။
'ဆရာကြီးသခင်ကိုယ်တော်မှိုင်း ဆိုက်ရောက်လာကြောင်း' ရှေ့ဆုံးမှ အသံချဲ့စက်ဖြင့် ကြွေးကြော်သွားသဖြင့် အိမ်ပေါက်စေ့ ထွက်၍ ကြည့်ကြသော မြို့သူမြို့သားများ၏ မျက်နှာကို အကဲခတ်ရာတွင် ဤအသက် ဤအရွယ်၌ ဒုက္ခခံပြီး နယ်လှည့် ဟောပြောရှာသော ပုဂ္ဂိုလ်ကြီး ပေတကားဟု အံ့သြကြီးစွာနှင့် မျှော်ကြည့်ကြသည့် လက္ခဏာအသွင်အပြင်များကို မြင်ခဲ့ရပေသည်။
ကျွန်ပ်အဖို့မူ လွန်ခဲ့သည့် နှစ်ပေါင်း (၄၀)ခန့်က မင်းကြီး၏ တောလိုက်စာရေးနှင့် မုံရွာသို့ သုံးလေးခေါက် ရောက်ဖူးစဉ်က ခြေရာလက်ရာ အမှတ်အသားများ လုံးဝမတွေ့ရတော့ပဲ အသစ် စက်စက် မြို့တမြို့ ဖြစ်နေပါတော့သည်။
သို့သော် ယခင်ကအတိုင်း တည်ရှိနေသေးသည့် အမှတ်အသားတခုကား ချင်းတွင်းမြစ်ပင် ဖြစ်ပေရာ အသစ်မွေးသူ မွေးဖွား၍ အဟောင်းများ သေလွန် ကွယ်ပျောက်ကြသည့် အထဲတွင် ကျန်ရှိနေသည့် ဤမြစ်ကို မြင်ရခြင်းအားဖြင့် လူသတ္တ၀ါတို့၏ သင်္ခါရသဘောတရားအကြောင်းကို စဉ်းစားမိပါသေးသည်။

အထင်ကြီးသောလူတစုပေတကား

ကမ္ဘာ့ငြိမ်းချမ်းရေးအသင်း ဥက္ကဌ ဦးဖေညိုတိုက်သို့ ဆိုက်ရောက်ကြ၍ ဆရာကြီးက ကျောင်းသား လူငယ်များအား သြ၀ါဒမိန့်ခွန်း အနည်းငယ် ပြောကြားပြီးနောက် လူစုခွဲလိုက်ကြသည်။
ဤတွင် ရှေးယခင်က ကျွန်ပ်တို့ သိကျွမ်းခဲ့ဖူးသည့် ပွဲစား ကုန်သည်စသော ပုဂ္ဂိုလ်များ အကြောင်းကို မေးမြန်းစုံစမ်းကြည့်ရာ ဒုတိယ ကမ္ဘာစစ်ဒဏ်ကြောင့် တောင်ရောက်မြောက်ရောက် ကြက်ပျောက်ငှက်ပျောက် ပျောက်ကုန်ကြသည်ဖြစ်၍ ၎င်းတို့၏ အနွယ်အဆက် တယောက်တလေ မျှပင် ခြေရာကောက်ရ မရနိုင်ပဲ ရှိပါတော့သည်။
စိတ်ကူးတခု ဖြစ်ပေါ်လာသေးသည်မှာ မုံရွာသို့ နောက်ဆုံးပိတ် ကျွန်ပ်ရောက်ဖူးသည့် အချိန်မှာ နှစ်ပေါင်း ၄၀ ခန့် ရှိ၍ ဖဆပလ အစိုးရကလည်း နှစ်ပေါင်းလေးဆယ် တည်မြဲအံ့ဟု ဗျာဒိတ်ပေးထား သည်။ ဗျာဒိတ်ပေးသူများသည် ထိုအချိန်တိုင်အောင် မိမိတို့ပင် ၀ိညာဉ်ကင်းလျင်း တည်ရှိကြဦးမည်ဟု ယုံကြည်ကြဟန် တူပေရာ (မိမိတို့ကိုယ်တိုင် မပါရပဲ ဖဆပလတည်မြဲရေး သက်သက်ကို လိုလားသူဟူ၍ ၎င်းင်းတို့အနက်တွင် တဦးတယောက်မျှ ရှိလိမ့်မည် မထင်) မိမိတို့ ကိုယ်ကို ကျောက်တိုင်ကျောက်ခဲပမာ တည်မြဲနေရလိမ့်မည်ဟု ထင်ပုံရကြသည့်အတွက် တရားသဘာဝနှင့် အတော်ဝေးသေးသော လူတစု ဟူ၍ စဉ်းစားမိပါသည်။

အနားမပေးဘဲစီစဉ်ခြင်း

ကမ္ဘာ့ငြိမ်းချမ်းရေးအဖွဲ့ဝင်များသာ ကျန်ရှိရာတွင် နက်ဖြန်အတွက် အစီအစဉ်များ ပြုလုပ်ကြ သည်။ ကျွန်ပ်အဖို့ ဆိုပါမူ ဆရာကြီးက "ဒီလောက်လှုပ်တဲ့ မီးရထားမျိုး ငါတခါမျ မစီးရဖူးပေါင်ကွာ" ဟုပြော၍ ဆရာကြီး ပင်ပမ်းနွမ်းနယ်ခြင်းကိုလဲ ကိုယ်တိုင်မြင်ခဲ့ရသောကြောင့် အနည်းဆုံး တရက် တလေမျှ ဖြစ်စေ အနားယူဖို့ စီစဉ်ကြလိမ့်မည်ဟု မျှော်လင့်မိသည်။
သို့သော် ကိုသိန်းဖေမြင့်က နက်ဖြန်တွင် မောင်းထောင်ရွာသို့ မော်တော်ကားဖြင့် သွားရန်စီစဉ် ထားပါသည်ဟု ပြောခြင်းကို ဆရာကြီးက မငြင်းဘဲ လက်ခံလိုက်သဖြင့် ဆိတ်ဆိတ်နေလိုက်ပါ တော့သည်။
သို့သော် ဆရာကြီး၏ အပင်ပန်းခံနိုင်သော ဇွဲသတ္တိကို စိတ်ထဲက ချီးမွမ်းရင်း နက်ဖြန်ဆက်၍ ပင်ပန်းရချေသေးရဲ့ဟု အောက်မေ့မိပါတော့သည်။

ရွှေဥဒေါင်း
လူထုသတင်းစာ၊ အမှတ်(ဃ)၁၆၅၂။ ၂-၈-၆၄။

နဲတကာထော်၏ လေးဆစ်ငိုပုံ
ရေးသူ- သခင်ကိုယ်တော်မှိုင်း



{ဤကဗျာကို မောင်တင်ရွှေ စုဆောင်းတင်ပြတဲ့ "သခင်ကိုယ်တော်မှိုင်း လက်ရွေးစင် လေးချိုးတရာ" ပထမနှိပ်ခြင်း၊ ၁၉၇၃ မှ ကူးယူဖော်ပြပါတယ်။

"ဤကဗျာမှာ ဓမ္မစေတီဝတ္ထုမှ ကောက်နှုတ်ချက် ဖြစ်သည်။ ဘုရင်မ ရှင်စောပုက သမီးတော်ကြီး နဲတကာထော်အား ဘုန်းကြီးလူထွက် ဓမ္မဓရနှင့် လက်ထပ်ရန် နားချသောအခါ နဲတကာထော်က ခါးခါးသီးသီးညင်းပြီး ဟစ်ငိုပုံဖြစ်သည်" လို့ မောင်တင်ရွှေက သူ့စာအုပ်မှာ မှတ်ချက်ပေးထားပါတယ်။}



ရွယ်တညီ ဘယ်ဆီမှ မရရင်ဖြင့်၊
နွယ်မဒီ ခြယ်စီသပြီဘု၊
(အမယ်မင်း) မယ်သီလလုပ်ပါ့မယ်။

(သြော်) ပျော်လို့ဘဲ ပျက်ကရော့သလ၊
တော်မို့ မရှက်လေခြင်း၊
သူမက်အောင် တရီရီနှင့် ပြုံးရမတဲ့တော်၊
လူထွက်ကောင် သည်ကတုံးကိုလ၊
တကယ်သာ ဘယ်မှာသုံးမယ်တုံး၊
(အမယ်မင်း) နှလုံးမှာပြို့ပြို့ပြီး အလုံးကြီးတောင် ဆို့ဆို့လာပေါ့ (ကျမ) မုန်းလို့ရွံတယ်။

ပေါင်းစီးလို့ ဆက်ကြရင်ဖြင့်လေ၊
သောင်းထီးကနက်မှာ ဘုရင်တကာ အပြေပြေမှာ ညှိုးစေဘို့၊
ကျောင်းကြီးဖျက်မ တွင်ကာ အသရေ မတိုးတဲ့ပြင်၊
ရွှေပကိုးဆီက နန်းညွန့်နွယ်၊
(အို) မှန်းဝံ့ သရမ်းဝံ့တယ်လို့ နောင်ဥဒါန်း။

ပြောကြလိမ့်မယ်၊
လောကမှာ အသွယ်သွယ်ပ၊
ကျောကစိမ့်ဘွယ် တမင်ကြံရက်ပေ့၊
တပင်စံ လင်ကံ မရှုံးပါရစေနဲ့၊
မကြည်ဖြူ သည်လူဖြင့် မုန်းပါရဲ့၊
အမေ့ဟာ အမေ့ဖါသာဘဲ သုံးလေတော့၊
ပလူးပလဲနဲ့ မြှူကာမူကာတော် ထူးထူးကဲကဲ လူတကာထုံးလိုပ၊
လုံးလုံးစီးစီး တူတူစက်ကြတော့လဲ၊
ပြုံးပြုံးကြီး (ကျမ) မူမူယူယူနဲ့ဖြင့် မဆက်နိုင်ဘူး၊
(အို မယ်တော်ဘုရာ့) ကတုံးကြီးဘယ်သူမက်နိုင်ပ၊
တသက်တဘ၀ (ကျမ) အသေသာ မုန်းလိုက်ပါတော့၊
(အမယ်မင်း) ဘုန်းကြီးလူထွက် ပေါ့ပျက်ပျက်ကမှ သမက်အမေဖမ်း။ ။

[ဓမ္မစေတီဝတ္ထု စာမျာက်နှာ ၈၈]
{မောင်တင်ရွှေ စုဆောင်းတင်ပြတဲ့ "သခင်ကိုယ်တော်မှိုင်း လက်ရွေးစင်လေးချိုးတရာ" ပထမနှိပ်ခြင်း၊ ၁၉၇၃ မှ ကူးယူဖော်ပြပါတယ်။}

Sunday, March 21, 2010

မမေ့နိုင်တဲ့ ဆရာကြီးသခင်ကိုယ်တော်မှိုင်း
ရေးသူ-တင်သိန်းမောင်


ဒီဇိုင်းကိုမျိုး


မြန်မာပြည်သူတွေက အရေးကြီးလို့ သွေးစည်းကြရမယ့် အချိန်မျိုး ကြုံရတဲ့ အခါမှာဖြစ်ဖြစ်၊ အားတက်စရာတွေ၊ အားတင်းကြရမယ့် အချိန်မျိုးမှာ ဖြစ်ဖြစ်၊ ဆရာကြီးသခင်ကိုယ်တော်မှိုင်းကို လွမ်းတသသနဲ့ သတိတရ တမ်းတလေ့ ရှိကြတယ်။
ဘာဖြစ်လို့ ဒီလို အချိန်အခါမျိုးတွေမှာ ကျွန်တော်တို့ မြန်မာပြည်သူတွေဟာ ဆရာကြီး သခင် ကိုယ်တော်မှိုင်းကို လွမ်းတသသ တမ်းတခဲ့ကြ ရတာလဲ။ သတိတရ ရှိကြရတာလဲ။ အကြောင်းကတော့ ဆရာကြီးသခင်ကိုယ်တော်မှိုင်းဟာ မြန်မာပြည်သူတွေ မေ့မရနိုင်တဲ့၊ မြန်မာပြည်သူတွေရဲ့ အသည်း နှလုံးထဲမှာ အမြဲရှိနေတဲ့၊ မျိုးချစ်ပုဂ္ဂိုလ်ကြီး ဖြစ်လို့၊ မျိုးချစ်စာဆိုကြီး (တနည်း အမျိုးသားစာပေ၊ ယဉ်ကျေးမှု တော်လှန်ရေး ခေါင်းဆောင်ကြီး) ဖြစ်လို့၊ ပြည်တွင်းငြိမ်းချမ်းရေးဖခင်ကြီး ဖြစ်လို့ပါပဲ။


'သာသနာ မြေပလ္လင်၊ အသရေလှပေတဲ့
ရွှေမြတောင် သာတဲ့ တိုက်ဆီက
နေလ နှစ်ဆောင် ပါတော်မူတဲ့ အခိုက်ကို ဖြင့်
ကတိုက်ကရိုက် အမြန်မြင်လိုက်တော့
မခံချင် မာန်ဝင့်တဲ့ အစွမ်းရယ်နှင့်'

ဒီလို အရှင်နှစ်ပါး ပါတော်မူသွားပြီး မြန်မာတွေ သူ့ကျွန်ဘ၀ ကျရောက်သွားရတဲ့ အချိန်က စပြီးလို့ ဆရာကြီးဟာ တိုင်းပြည်နဲ့ လူမျိုးလွတ်လပ်ရေးအတွက် တစိုက်မတ်မတ် ဆောင်ရွက်ခဲ့တဲ့ ပုဂ္ဂိုလ်ကြီး ဖြစ်ပါတယ်။
ပထမဆုံး ဆရာကြီး ဆောင်ရွက်ခဲ့တဲ့ အလုပ်ကတော့ ထက်မြက်တဲ့ သူ့ရဲ့ကလောင်ကို မြန်မာ့လွတ်လပ်ရေး ကြိုးပမ်းမှုအတွက် အသုံးချခြင်းပဲ ဖြစ်ပါတယ်။ ဒီကလောင်နဲ့ ဆရာကြီးက မြန်မာတွေကို သူ့ကျွန်ဘ၀ရောက်ပေမယ့် ကျွန်စိတ်မမွေးဖို့၊ သခင်စိတ်မွေးဖို့ လှုံ့ဆော်ပေးခဲ့ပါတယ်။

'တရား မဆိတ် မညံ၊ ဓမ္မက္ခန် အလင်းတွေနဲ့
ငါးကိုယ် ငါးတန် ပုဂံ သနင်းရယ်လို့
ကြငှန်းန၀င်း သာခိုက်တွင်မှ အထိုက်အလျောက်
မြန်မြေ ကမ္ဘာမှာနော်ကွယ်
နန်းခင်းရာရိုက် စိုက်ဆောက်စံနေရာလေ့။
သရုပ်လှစ်ရမှာဖြင့်၊ သမုဒ္ဒရာဇ်ပါတဲ့
အုတ်ရှစ်ကို တူနဲ့ ထုသလိုပေါ့
ဇမ္ဗူ့ ခေတ္တရာ ရွှေပြည်ပျက်စဉ်က
အထက် အညာဆန်လို့မို့
ရတနာ ပုဂံ ဂုဏ်တမွတ်ကယ်နှင့်
ယုန်လွှတ်ခေါ် သာတဲ့ကျွန်းတွင်မှ
ကွန်းထောက် ဗိုလ်ဝင်ခံလို့မို့
ဗဟိုပလ္လင်ပျံမှာ ကနက်ကဒဏ်ထီးတွေနဲ့
တောင်ပြည်မှာ အောင်စည်တီးရန်ဘို့'

ဆိုပြီး ကိုယ့်ထီးကိုယ့်နန်း နေရတဲ့ခေတ်ကို အမွှန်းတင်ပေးခဲ့တယ်။ အမျိုးသားရေး သွေးထိုး စိတ်ဓါတ်ကို လှုံ့ဆော်ပေးခဲ့တယ်။ မြန်မာတို့ရဲ့ ဇာတိသွေး၊ ဇာတိမာန်ကို ထုတ်ဖော်ပေးခဲ့တယ်။ တိုင်းပြည်နဲ့ လူမျိုး သူတပါး လူမျိုးခြားအောက် ကျရောက်နေတဲ့ အချိန်မျိုးမှာ ဒီလို ဇာတိသွေး၊ ဇာတိမာန်ကို ဖော်ထုတ်တာ၊ မျိုးချစ်စိတ်၊ အမျိုးသားရေး စိတ်ကို ဖော်ထုတ်တာဟာ လွတ်လပ်ရေး တိုက်ပွဲရဲ့ အခြေခံ လုပ်ငန်းဖြစ်တယ်။ ဒါကို ဆရာကြီးက စံနမူနာပြခဲ့တယ်။
မြန်မာတွေ အမျိုးသားရေး နိုးကြားလာပြီး ဗြိတိသျှကိုလိုနီအစိုးရနဲ့ အုပ်ချုပ်ရေး တိုးပေးဖို့ အရေးဆိုကြတဲ့အခါ ဆရာကြီးက ထက်ထက်သန်သန် ထောက်ခံ အားပေးခဲ့တယ်။ အင်္ဂလန်သွား အရေးဆိုကြတဲ့ ဦးဘဖေ၊ ဦးပုနဲ့ ဦးထွန်းရှိန်တို့ကို ဒီလို ကောင်းချီးတွေ ပေးခဲ့တယ်။

'သြော် ပြေအမှုပေမို့၊ ငွေခရုငယ်နှင့် ဇေယတုပါကွဲ့
သပြေနုချိန် တင်ရန် ပန်းတွေကလည်း
များလိုက်ပါ ဘိသနဲ့
ဖေ-ပု-ရှိန် အင်္ဂလန် နန်းမြေသွားတို့မှာဖြင့်
အားမြှောက်ဖွယ် ကြံလွယ် ဖန်လွယ်နှင့်
အန္တရာယ် ရန်စွယ်မောင်းပါလို့
မြန်နယ်ကို ပြန်လွယ်ကြောင်းတွေနှင့်
ဆုတောင်းခါ ပတ္တနာ ဆင်တဲ့ပြင်
ဆရာအရှင် မင်းတို့ ကိုယ်ရင်မှိုင်းမှာဖြင့်'
ဆိုပြီး သမိုင်းမှတ်တမ်းထိုးခဲ့တယ်။

၁၉၂၀ ပြည့်နှစ်မှာ ပထမ ကျောင်းသားသပိတ်ကြီး ပေါ်ခဲ့တယ်။ ဒီ ကျောင်းသားသပိတ်ကို ဂျီစီဘီအေ အဖွဲ့ချုပ်ကြီးနဲ့ ပြည်သူတရပ်လုံးက ထောက်ခံအားပေးကြတယ်။ ဒီသပိတ်ဟာ ကိုလိုနီပညာရေး စနစ်ကို ပထဆုံးဆန့်ကျင်တိုက်ခိုက်တဲ့ သပိတ်တိုက်ပွဲ ဖြစ်တယ်။ ဒီလို ကျောင်းသားထုရဲ့ တိုက်ပွဲခေါ်သံကို ဆရာကြီးက

'သြော်.. ဝေးခရီးပေမယ့် အရေးကြီးလျှင်ဖြင့်
သွေးနီးရာပါစမြဲမို့
ဆရာလည်းကွာ ပထမ အရင် ကနဦးဆီက
မြန်မာ့တခွင်မှာ သမတရှင်ဘုရင် မလူးခင်ပ
ထဆင်ဒူးကို တမြည်မြည် သင်ခဲ့သမို့
ထီမထင် ကျောင်းတော်သားတွေရဲ့
အမည်အစဉ် ခေါင်းအပေါ် ဖျားမှာလ
မင်းတို့ ဆရာကို
စာရင်းတို့ကာ ထားလိုက်ပေတော့'
လို့ တုံ့ပြန်ခဲ့တယ်။

ဒီလိုတုံ့ပြန်ပြီး သူရိယတိုက်အယ်ဒီတာ အလုပ်ကထွက်ကာ အမျိုးသား ကောလိပ်မှာ ဆရာသွားလုပ်ခဲ့တယ်။ အရေးကြီးရင် သွေးစည်းခဲ့တဲ့ ဆရာကြီး ဖြစ်တယ်။ မိမိအရေး အမျိုးသားအရေး ယှဉ်လာရင် မိမိအရေးကို စွန့်ပြီး အမျိုးသားအရေးကို အလေးပေး လုပ်ခဲ့တယ်။ အမျိုးသားအရေးကို အမြဲ ဦးထိပ်ထားခဲ့တယ်။ ဒါဟာ ဆရာကြီးရဲ့ လုပ်ဟန်ဖြစ်တယ်။
ဒီနောက်ပိုင်း စံဖဲအရေး၊ ဆရာစံ တောင်သူလယ်သမားအရေးတွေမှာလဲ ဆရာကြီးဟာ စံဖဲ အသက်ကယ်ဆယ်ရေး၊ ဆရာစံလယ်သမား အရေးတော်ပုံကြီး ထောက်ခံရေးတွေကို ရဲရဲရင့်ရင့် ဆောင်ရွက်ခဲ့တယ်။
၁၉၂၉-၃၀ ခုနှစ် ကမ္ဘာ့စီးပွါးရေးပျက်ကပ်ကြောင့် မြန်မာ့ဆန်ရေစပါးဈေးတွေ ကျွမ်းစိုက်ကျပြီး ကိုလိုနီစီးပွါးရေးဘ၀ရဲ့ အောက်ဆုံးအလွှာက မြန်မာ့လယ်သမားတွေ အကြီးအကျယ် ဒုက္ခရောက်ခဲ့ကြ ရတယ်။ လယ်လုပ်ပြီး ထမင်းငတ်ခဲ့ကြရတယ်။ ဆရာစံခေါင်းဆောင်တဲ့ သာယာဝတီ လယ်သမား အရေးတော်ပုံကြီး ပေါ်ခဲ့တယ်။ ဒီ လယ်သမားအရေးတော်ပုံကြီးကို ဆရာကြီးက သူ့ကလောင်နဲ့ ဂုဏ်ပြုခဲ့တယ်။

'သြော် မြန်မာပြည် တ၀ှမ်းတွင်ဖြင့်
သာယာဝတီစခန်းဆီက အာဇာနည်အစွမ်းတွေ
ဟိုအရင် ယမန်က
ဗဟိုပလင်ပျံမှာ သမတ မတိမ်းအောင်လို့တဲ့
ဗိုလ်ဝင်ခံကာ မြန်မာ့ကိန်းတွေနှင့်
မြစိမ်းတောင်ညိုညိုက
ချောင်ခိုကာ အောင်ဗဟိုရ် ရွမ်းလိမ့်မတဲ့
ထွန်းလှဲ့ ခေါင်ပရမေ ပေနော်ကွယ်
အစွန်းမနွဲ့၊ အညွှန်းတဲ့နေကြ
သြ လွမ်းဘွဲ့အောင်မြေ
-------------
ရဂုံစံ ချစ်စရာတပည့်တို့မှာဖြင့်
ဥုံ အရဟံ သစ္စာ ဂတိတွေနဲ့
ဂဠုန် သရဏံ ဂစ္ဆာမိကြပေတော့......'

ဒီလို လယ်သမားအရေးတော်ပုံကြီးကို ဆရာကြီးက မော်ကွန်းထိုးခဲ့တယ်။
အဲဒီခေတ် အဲဒီအခါကဆိုရင် အင်္ဂလိပ် ကိုလိုနီအစိုးရရဲ့ မြို့အုပ် မြို့ပိုင်လောက်ကိုတောင် သခင်ခေါ် လက်အုပ်ချီပြီး ဘုရားထူးရတဲ့ ခေတ်ပါ။ အဲဒီလို ခေတ်မျိုးမှာ ဆရာကြီးက ဒီလိုစာတွေ ရေးခဲ့တာ ဖြစ်ပါတယ်။ အင်္ဂလိပ်ဘုရင်ခံ အင်္ဂလန်ကို ခွင့်ပြန်တုန်းက ဆာဂျေအေမောင်ကြီး ခေတ္တဘုရင်ခံဖြစ်တော့ ဆရာကြီး သခင်ကိုယ်တော်မှိုင်းက လေးချိုးကြီးတပုဒ်ရေးပြီး ဘုရင်ခံကို မောင်းထုတ်ခဲ့ဖူးတယ်။

'ဌာနအင်္ဂလန် ပြန်ရှာမဲ့ ခရီးဆီက
သဒ္ဓါစရ ဘုရင်ခံ ဒကာကြီးကိုဖြင့်
တခါတည်းသာပ အပြီးထာဝရ မြန်းကြွပြန်စေချင်
ချမ်းချမ်းမြမြ မနေလျှင်ဖြင့်
အခွင့်မတော်လျှင်ဖျား
သြော် နန်းမြန်မာ့ရွှေပလင်နှင့်
မသင့်မလျော် တကား'

ဝံသာနုခေတ်အပြီး တို့ဗမာအစည်းအရုံးခေတ်၊ သခင်ခေတ် ရောက်တဲ့အခါ လွတ်လပ်ရေး အတွက် တကယ်စွန့်စွန့်စားစား လုပ်ကြမယ့် ပညာတတ်လူငယ်တွေပဲရယ်လို့ ယုံကြည်ပြီး သခင်အသင်းကို ဆရာကြီး ၀င်ခဲ့တယ်။ သခင်လူငယ်တွေဟာ အတွေးရဲတယ်။ အလုပ်ရဲတယ်။ ဒါကြောင့် လွတ်လပ်ရေး အောင်ပွဲကို သူတို့ ယူပြမှာပဲလို့ ဆရာကြီး ယုံခဲ့တယ်။

'တို့ဗမာတခွင် သခင် ထိုအကျော်အမော် ဂိုဏ်းတွင်ဖြင့်
မျှို့ရတနာသဘင်
အကြင် ဗြဟ္မစိုရ် ဇော်ကသိုဏ်းတွေနှင့်
ပလင်ဗဟို တနှိုင်းပေပ၊
ဇမ္ဗူသမိုင်း ပျော်စရာ့အချေ
အိုကွယ် သခင်ကိုယ်တော်မှိုင်းရယ်လို့
လူတိုင်းခေါ်ကြစေ'

ဒီလို ဆရာကြီး သခင်ဘွဲ့ခံပြီး သခင်လူငယ်တွေနဲ့ ကိုလိုနီဆန့်ကျင်ရေး၊ လုံးဝလွတ်လပ်ရေး တိုက်ပွဲကို ကိုယ်တိုင်ကိုယ်ကျ ပါဝင်ဆင်နွှဲခဲ့တယ်။
ဒီလို သခင်အသင်းဝင်ပြီး တက်တက်ကြွကြွ လွတ်လပ်ရေးအတွက် ကြိုးပမ်းခဲ့လို့ အင်္ဂလိပ်အစိုးရက ဆရာကြီး သခင်ကိုယ်တော်မှိုင်းကို သူ့ရဲ့ ရန်သူတော်စာရင်း (Burma List) မှာ ရန်သူတော် နံပါတ် (၁) အဖြစ် သတ်မှတ်ခဲ့တယ်။ (ဒီစာရင်းမှာ သခင်ဗဟိန်းက နံပါတ် (၂)၊ သခင်အောင်ဆန်းက နံပါတ် (၅) ဖြစ်ပါတယ်။)
ပြောရရင်တော့ ဆရာကြီး သခင်ကိုယ်တော်မှိုင်းဟာ ၀ံသာနုအရေးတော်ပုံ၊ တောင်သူလယ် သမား အရေးတော်ပုံ၊ ၁၃၀၀ ပြည့် အရေးတော်ပုံ၊ ဖက်ဆစ်ဆန့်ကျင်ရေးကာလ၊ လွတ်လပ်ရေးကြိုးပမ်း မှု ခရီးတလျှောက်လုံးမှာ ရဲဘော်ရဲဘက်၊ တပည့်တပန်းတွေနဲ့ ရှေ့တန်းက အစွမ်းရှိသမျှ ကြိုးပမ်းဆောင်ရွက်ခဲ့တဲ့ မျိုးချစ်ပုဂ္ဂိုလ်ကြီး ဖြစ်ပါတယ်။
ဒီလို ဆောင်ရွက်ခဲ့တဲ့ သမိုင်းတလျှာက်မှာ ဆရာကြီးဟာ ရာထူးမမက်၊ အာဏာမမက်၊ ငွေမမက်၊ ဘွဲ့ထူး ဂုဏ်ထူးတွေမမက်ဘဲ အမျိုးသားရေး လွတ်လပ်ရေးအတွက် သစ္စာရှိရှိ ဆောင်ရွက်ခဲ့တဲ့ ပုဂ္ဂိုလ်ကြီး ဖြစ်တယ်။ ကိုလိုနီခေတ်ကစပြီး ခေတ်အဆက်ဆက်မှာ ဆရာကြီးဟာ ကပ်ပါးရပ်ပါးစိတ်၊ မင်းကပ်စိုးမြှောင်စိတ် မထားဘဲ၊ ရိုးသားတဲ့ သီလ သမာဓိ သိက္ခာနဲ့ နိုင်ငံရေးကို ဆောင်ရွက်ခဲ့တယ်။

'ဆရာ ကိုယ်တော်မှိုင်းသည် ကသိုဏ်းအတွက် န၀င်းအရ မင်းဘုရာ့အာဏာမြှောင် ပြီး ဘာကောင်မှ မလုပ်ချင်ဘူး'
လို့လဲ ရေးခဲ့တယ်။

ကိုလိုနီခေတ်မှာ အခွန်အတုပ်တွေ ကြီးလွန်းလို့ ပြည်သူတွေ ဒုက္ခရောက်နေတဲ့ခေတ်မှာ လူ့စည်းစိမ်ခံပြီး ရာထူးယူချင်တဲ့စိတ်မရှိကြောင်းကို-

'အခွန်အတုပ်အကြောင်း ကောင်းကောင်းသိလှသော၊
တပည့်မတို့ ကိုးကွယ်ရာ၊ မဟာယောဂီသည်
လေကီအခုအခါ အမှုပါ၍
လူ့ဓမ္မတာ အထူးမှတ်ကြတဲ့
မှူးမတ်တို့ စည်းစိမ်ကို မဆိုထားဘ်ိ၊
တရားနှလုံး စွဲသုံးဆင်ချင်သဖြင့်
ရှင်ဘုရင်တောင် လုပ်ချင်စိတ် မပေါက်ကြောင်း'

ရေးသားခဲ့ဖူးပါတယ်။ ဒါတွေကို ကျွန်တော်တို့ နောင်လာနောက်သားတွေ အတုယူစရာ ဆရာကြီး ထားရစ်ခဲ့တဲ့ အမွေတွေပါ။
မြန်မာစာပေသမိုင်းနဲ့ ပတ်သက်လို့ပဲ ဆရာကြီးရဲ့ အခန်းဟာ အင်မတန် ကြီးမားပါတယ်။ ဆရာကြီး သခင်ကိုယ်တော်မှိုင်းရဲ့စာတွေဟာ အစဉ်အလာ၊ မင်းဘွဲ့စိုးဘွဲ့ စာတွေကနေ လမ်းခွဲထွက်လာပြီး အကြောင်းအရာရော၊ အရေးအသားပါ သစ်လွင်တဲ့ ပြည်သူ့ဘက်တော်သား၊ ပြည်သူ့ကလောင်အဖြစ် ရပ်တည်ခဲ့တယ်။
ကိုလိုနီတခေတ်လုံး အမျိုးသားရေး၊ လွတ်လပ်ရေးအတွက် သူ့ကလောင်ကို သစ္စာရှိရှိ၊ သတ္တိရှိရှိနဲ့ အသုံးချခဲ့တယ်။ အမျိုးသားရေး၊ လွတ်မြောက်ရေး သမိုင်းတာဝန်ကို ထမ်းဆောင်ခဲ့တယ်။ ဒါကြောင့် ဆရာကြီးသခင်ကိုယ်တော်မှိုင်းကို မျိုးချစ်စာဆိုကြီး၊ အမျိုးသားစာပေဖခင်ကြီး၊ စာပေသစ်ဖခင်ကြီးလို့ ချီးကျူးပူဇော်ကြတာ ဖြစ်ပါတယ်။ ဆရာကြီးရဲ့ စာပေတွေကို လေ့လာလေ ဒီအချက်ခိုင်မာကြောင်းကို တွေ့ရလေ ဖြစ်ပါတယ်။ မြန်မာစာပေသမိုင်းမှာ ဆရာကြီးရဲ့ စာပေကျေးဇူး တွေ အများကြီး ရှိတယ်။
ဆရာကြီးရဲ့ ကိုယ်ကျင့်တရားစင်ကြယ်မှု၊ ရိုးသားမှု၊ သစ္စာရှိမှု၊ ကိုယ်ကျိုးစွန့် အနစ်နာခံမှု တွေဟာ သမိုင်းအဆင့်ဆင့်မှာ အစမ်းသပ် အစစ်ဆေးခံပြီး ဖြစ်ပါတယ်။ ဆရာကြီးရဲ့ သီလဂုဏ် သမာဓိဂုဏ်တွေကို ရေးသားလို့ ကုန်နိုင်စရာ မရှိပါဘူး။ ဆရာကြီးရဲ့ အိုကြီးအိုမ ဘ၀နေ၀င်ချိန် မှာတောင် ပြည်တွင်းငြိမ်းချမ်းရေး၊ ကမ္ဘာ့ငြိမ်းချမ်းရေး လုပ်ငန်းတွေ တိုင်းပြည်အနှံ့ ကမ္ဘာအနှံ့ ခရီးဆန့်ပြီး ဆောင်ရွက်ခဲ့တဲ့ ငြိမ်းချမ်းရေးဖခင်ကြီး လဲ ဖြစ်တယ်။
ဆရာကြီးသခင်ကိုယ်တော်မှိုင်းဟာ နိုင်ငံအရေး ပြည်သူ့အရေးတွေကို ဘယ်လောက် သူ့စိတ်နှလုံးသားထဲ သွင်းထားခဲ့သလဲ ဆိုရင် ကွယ်လွန်ခါနီး နောက်ဆုံးအချိန်မှာတောင်

'အင်း ဆရာတော့ မသေခင် ဆရာတို့ တိုင်းပြည်မှာ တကယ့်လွတ်လပ်ရေးနဲ့ ငြိမ်းငြိမ်းချမ်းချမ်း ညီညီညွတ်ညွတ် ဖြစ်တာကိုပဲ မြင်သွားချင်တာပဲ'

လို့ ပြောသွားတယ်။
ဒီလို နိုင်ငံအရေး၊ ပြည်သူ့အရေးတွေကို တသက်တာပတ်လုံး ကိုယ်ကျိုးစွန့် အနစ်နာခံ ဆောင်ရွက်ခဲ့လို့ အဘိုး သခင်ကိုယ်တော်မှိုင်းကို မြန်မာပြည်သူတွေက ချစ်ကြတာ၊ မမေ့နိုင်ကြတာ ဖြစ်တယ်။ အရေးကြီးလို့ သွေးနီးကြရတဲ့ အခါမျိုးမှာ ဖြစ်ဖြစ်၊ အားတင်းစရာနဲ့ ကြုံရတဲ့ အခါမျိုးမှာ ဖြစ်ဖြစ်၊ ဆရာကြီးကို ကျွန်တော်တို့ လွမ်းတသသနဲ့ တမ်းတကြရတာ ဖြစ်ပါတယ်။
ဒီကနေ့ဆိုရင် (၁၉၉၆) ဆရာကြီးကွယ်လွန် အနိစ္စရောက်တာ နှစ်ပေါင်း ၃၂ နှစ် ရှိပါတော့မယ်။ ဆရာကြီးသာ အသက်ထင်ရှား ရှိမယ်ဆိုရင် ဒီနှစ် (၁၉၉၆) ဟာ ဆရာကြီး အသက် ၁၂၀ ပြည့်မယ့် မွေးနေ့ ဖြစ်ပါတယ်။
ဆရာကြီး သခင်ကိုယ်တော်မှိုင်းရဲ့ အသက် ၁၂၀ ပြည့်နှစ် (၁၉၉၆) မွေးနေ့ကို အထိမ်းအမှတ်ပြု သောအားဖြင့် ဆရာကြီး ခင်းခဲ့တဲ့ စာပေလမ်းကြောင်းမှာ လျှောက်လှမ်းကြတဲ့ ကျွန်တော်တို့ဟာ ဆရာကြီးရဲ့ စံနမူနာအတိုင်း ပြည်သူ့ဘက်က ရဲရဲဝံ့ဝံ့ရပ်တည်ပြီး နိုင်ငံနဲ့ ပြည်သူ့အကျိုး သယ်ပိုးကြပါစို့လို့ နှိုးဆော်ချင်ပါတယ်။

တင်သိန်းမောင်
၁၉၉၆ခု၊ စာပေဂျာနယ်၊

[စာအုပ်အဖြစ်ထုတ်ဝေခဲ့သော ၂၀၀၁ မတ်လထုတ် မာယာမဂ္ဂဇင်းမှ ပြန်လည်ကူးယူဖော်ပြခြင်း ဖြစ်ပါတယ်။]

ဆရာကြီးသခင်ကိုယ်တော်မှိုင်း၏စာပေအနုပညာ (၀ါ) မှိုင်းဗေဒ
ရေးသူ- ဒဂုန်တာရာ




ဆရာကြီးသခင်ကိုယ်တော်မှိုင်း၏ စာပေအနုပညာ (၀ါ) မှိုင်းဗေဒကို ဖော်ပြရန်မှာ ကျမ်းကြီးကျမ်းခိုင် တဆူတဖွဲ့ ဖြစ်ရပါလိမ့်မည်။ ဆရာကြီး ရေးခဲ့သမျှသော ကဗျာ၊ စကားပြေများကို ပြည့်စုံ ခိုင်လုံ ကျယ်ပြန့်စွာ ကိုးကားညွှန်ပြရန် လိုပါလိမ့်မည်။ သို့သော် ယခု စာတန်းငယ်တွင် ဆရာကြီး၏ စာပေအနုပညာသဘောကို နိဒါန်းပျိုးရုံလောက်၊ မိတ်ဆက်ပေး ရုံလောက်၊ အဓိပ္ပါယ်ဖွင့်ဆိုရုံမျှလောက်သာလျှင် တတ်နိုင်မည်ဖြစ်၍ ခွင့်လွှတ်ရန် တောင်းပန် လိုပါသည်။


(၁)
ရှေးဦးစွာ 'သခင်ကိုယ်တော်မှိုင်း၏ စာပေအနုပညာ' ဟူသော ဝေါဟာရ၏ အဓိပ္ပါယ်ကို ရှင်းပြရပေမည်။ အနုပညာဆိုသည်မှာ လူ့စိတ်ကူးဖြင့် လူတို့၏ဘ၀ကို ရသပေါ်အောင် ဖွဲ့နွဲ့သော အာရုံခံစားမှု ပုံသဏ္ဍာန် ဖြစ်ပါသည်။ တနည်းပြောရရင် လူတို့၏ဘ၀တွင် ထိတွေ့ခံစားရသော အာရုံခံစားမှု အတွေ့အကြုံ၊ စီးပွါးရေး၊ နိုင်ငံရေး၊ လူမှုရေးဘ၀ အတွေ့အကြုံ တို့ကို ပိရိသတ်အား မိမိကဲ့သို့ ခံစားရလေအောင် ရသအမူအရာဖြင့် လှပစွာ တင်ပြဖော်ကျူးသောအရာသည် အနုပညာဖြစ်သည်ဟု အဆိုရှိပေသည်။
အသံဖြင့် သီဆို တီးမှုတ်ဖော်ပြသည်။ ကိုယ်လက်လှုပ်ရှားမှု ကပြမှုတို့ဖြင့် ဖော်ပြသည်။ အရောင်အဆင်း၊ မျဉ်းကြောင်းတို့ဖြင့် ဆေးရေးဖော်ပြသည်။ အ၀န်း အပြား အလုံး အကြွ တို့ဖြင့် သွန်းထုဖော်ပြသည်။ စကားလုံးတို့ဖြင့် သီကုံးဖော်ပြသည်။ ယင်းသို့သော ဂီတအနုပညာ၊ အကအနုပညာ၊ သဘင်အနုပညာ၊ ပန်းချီပန်းပု အနုပညာ စသဖြင့် အနုပညာများ ရှိသည့်အနက် စာပေအနုပညာသည်လည်း အနုပညာတရပ်အဖြစ် ပါဝင် ပေသည်။
စာပေ၌လည်း စကားပြေ၊ ကဗျာ ဟူသော စာပေပုံသဏ္ဍာန်များ ရှိလေရာ ဆရာကြီး သခင်ကိုယ်တော်မှိုင်းသည် စကားပြေရော ကဗျာပါ စာပေပုံသဏ္ဍာန် နှစ်မျိုးစလုံး အသုံးပြုသူ ဖြစ်ပေသည်။ စကားပြေ၌ ၀တ္ထု၊ ပြဇာတ်နှင့် ဋီကာ၊ ဂဏ္ဍိဟုခေါ်သော ဆောင်းပါးအမျိုးအစား များ ရေး၍ ကဗျာ၌ လေးချိုးကြီးကို အများဆုံး အထူးပြု ရေးခဲ့ပေသည်။
ယင်းသို့ ဆရာကြီးသည် စာပေများကို ရေးသားရာတွင် ဆရာကြီး၏ စာပေ၌ မည်သူ နှင့်မျှ မတူအောင်ထူးခြားဆန်းသစ်သော၊ သမိုင်းခေတ်အဆက်ဆက် ပြည်သူများ နှစ်သက် စွဲလန်းနိုင်သော အာရုံခံစားနိုင်သော ရသပညာ ရှိသည်။ ယင်းသို့ ဆရာကြီးသခင် ကိုယ်တော် မှိုင်းတည်းဟူသော ပုဂ္ဂိုလ်သာလျှင် ဖန်တီးနိုင်စွမ်းရှိသော၊ ထူးခြားခြင်းရှိသော၊ အနုပညာ ၀ိသေသ ဂုဏ်ထူးကို အစွဲပြုလျက် သခင်ကိုယ်တော်မှိုင်း၏စာပေအနုပညာ ဟူသော စာဝေါဟာရသစ်ဖြင့် သုံးနှုန်းလိုက်ရခြင်း ဖြစ်ပေသည်။
ဆရာကြီးသခင်ကိုယ်တော်မှိုင်း၏ စာပေအနုပညာသည် မည်သို့ ထူးခြားလေသလဲ။ အခြားသော စာအနုပညာတို့နှင့် ကွာခြားပါသလား၊ မည်မျှ ထူးကဲပါသလဲ။

(၂)
ဆရာကြီး သခင်ကိုယ်တော်မှိုင်း၏ အနုပညာသည် မည်သည့်ခံစားမှု ဝေဒနာမှ ဆင်းသက်လာပါသလဲ။ ဤအချက်မှာ ထင်လင်းလှပေသည်။
ဆရာကြီး၏ စာပေအနုပညာသည် ဆရာကြီး၏ ဘ၀ခံစားမှု ဝေဒနာမှ ဆင်းသက်လာ ပေသည်။ တနည်းပြောရလျှင် ဆရာကြီး၏ ဘ၀သည် တကိုယ်တော်ဘ၀ မဟုတ်။ အုပ်စိုးသော လူတန်းစားများ နေထိုင်ရာ မှန်စီရွှေချ စံအိမ်တော် မဟုတ်။ အဖိနှိပ်ခံ အအုပ်စိုးခံ ပြည်သူတို့၏ ဘ၀အောက်ခြေ မြေဇာမြက်ပင်များ၏ ဘ၀နှင့် ဆက်စပ်နေသည်။ တနည်းပြောရလျှင် ဆရာကြီး၏ အနုပညာသည် ဆရာကြီး ဖြတ်သန်းကြီးပြင်းလာရသော မျက်မှောက်ခေတ်နှင့် ဆက်စပ်နေသည်။ တနည်းပြောရလျှင် ဆရာကြီး၏ စာပေအနုပညာသည် ယနေ့ မျက်မှောက် ခေတ်၏ အခြင်းအရာတရပ်ဖြစ်သော ပြည်သူတို့၏ အမျိုးသားလွတ်မြောက်ရေး လှုပ်ရှားမှုကြီး မှ ဆင်းသက်လာခြင်း ဖြစ်သည်။
အမျိုးသား လွတ်မြောက်ရေး လှုပ်ရှားမှုမှာ ကျယ်ပြန့်လှပေသည်။ လွတ်လပ်ရေး၊ ဒီမိုကရေစီရေး၊ ညီညွတ်ရေး၊ ငြိမ်းချမ်းရေး၊ ဆိုရှယ်လစ်ရေး ဟူ၍ တိုက်ပွဲ အခန်းခန်း ရှိပေ သည်။ ဆရာကြီးသည် ယင်း လွတ်လပ်ရေးလှုပ်ရှားမှု၊ ဒီမိုကရေစီရေးလှုပ်ရှားမှု၊ ညီညွတ်ရေး လှုပ်ရှားမှု၊ ငြိမ်းချမ်းရေးလှုပ်ရှားမှု၊ ဆိုရှယ်လစ်ရေး ဦးတည်လှုပ်ရှားမှုများတွင် ပါဝင်ဆောင် ရွက်ပြီး၊ ယင်းတိုက်ပွဲ အခန်းခန်းတို့ကို စာပေ၌ထင်ဟပ်သော အနုပညာကား ဆရာကြီး၏ အနုပညာဖြစ်ပေသည်။
ဆရာကြီးသည် မှန်ခန်းဆောင်၌ ငိုက်မှေးရီဝေနေသူ မဟုတ်။ စိန်ပန်းပြာရိပ်အောက်၌ ခိုနားနေသူမဟုတ်၊ အဖိနှိပ်ခံပြည်သူတို့၏ တိုက်ပွဲအဆက်ဆက်၌ အမြဲတမ်းပါဝင်သူ ဖြစ်သည်။ ထို့ကြောင့်ပင်လျှင် ရှေးဝံသာနုခေတ်မှ ယနေ့ ငြိမ်းချမ်းရေးလှုပ်ရှားမှုခေတ်အထိ အရွယ်အားဖြင့် အသက် ၈၀ ကျော်မှ ဆယ်ကျော်သက် လူငယ်များအထိ အကြည်ညိုခံရဆုံး ပြည်သူ့ခေါင်းဆောင် စာပေပညာရှင်ကြီးအဖြစ် ရပ်တည်နေခြင်း ဖြစ်၏။
ဆရာကြီးသည် တိုးတက်သော လူငယ်များနှင့် ခေတ်အဆက်ဆက် လက်တွဲခဲ့သည်။ မနေ့က တိုးတက်သော လူငယ်သည် ယနေ့ဖောက်ပြန်လာလျှင် ယင်းလူငယ်ဟောင်းနှင့် လက်တွဲဖြုတ်ခဲ့ကာ နောက်တခေတ် တိုးတက်သော လူငယ်အသစ်နှင့် လက်တွဲပြန်သည်။ သမိုင်းခေတ် အဆက်ဆက်တွင် အဖိနှိပ်ခံ ပြည်သူဘက်မှ အစဉ်ရပ်တည်ခဲ့သူ ဖြစ်သည်။ ယင်းသို့ တိုးတက်သော၊ တော်လှန်သော၊ အဖိနှိပ်ခံ ပြည်သူတို့ဘက်မှ ရပ်တည်သဖြင့်လည်း ယင်း ဆရာကြီး၏ နိုင်ငံရေးခံစားမှု ဝေဒနာကို ဖွဲ့နွဲ့သော စကားပြေနှင့် ကဗျာများသည် ပြည်သူတို့၏ ခံစားမှုအသံ (၀ါ) ပြည်သူ့အသံ ဖြစ်လာတော့သည်။ ယင်းသည်ကား ဆရာကြီး သခင်ကိုယ်တော်မှိုင်း၏ အနုပညာ ဖြစ်သည်။

(၃)
ဆရာကြီးသခင်ကိုယ်တော်မှိုင်း၏ အနုပညာဝါဒသည်ကား ဘာလဲ။ ဆရာကြီး၏ အနုပညာဝါဒသည်ကား ဘက်လိုက်ရေး (၀ါ) ပြည်သူ့ဘက်လိုက်ရေး ဖြစ်သည်။
အောင်မြန်မာ သတင်းစာ (၁၉၂၉) သို့ပေးသော ဆောင်းပါးအမှာစာ၌ 'အမောင်တပည့်တို့၊ ယခုထုတ်ဝေလတ္တံ့သော အောင်မြန်မာသတင်းစာမှာ (မည်သည့်ဂိုဏ်း ဂဏ ၀ါဒ တို့တွင်မှ ပါဝင်ခြင်းမရှိဘဲ) ဟူသောအချက်ကို စာမျက်နှာ ၂ တွင် တွေ့မြင်ရကြောင်း၊ ၎င်းကဲ့သို့ အချင်းအရာကို ဆရာဖြင့် မနှစ်မျို့နိုင်ပေ။ အကြောင်းကို ဆိုချေလျင် အကြင် လောကီသူ လောကီသားတို့ ကြီးပွါးဘို့၊ လွတ်လပ်ဘို့ စသော ဂီဟိကမ္မလူတို့ ကိစ္စဟူသမျှ တို့မှာ မူလအားဖြင့် အများတည်းဟူသော အသင်းအပင်း ဂိုဏ်ဂဏ တို့နှင့် ၀ိုင်းမှ ရုန်းဆောင်မှ သာလျှင် အောင်မြင် ထမြောက်နိုင်ရာသည်' စသည်ဖြင့် ဖော်ပြပါရှိရာ ဆရာကြီး၏ ဘက်လိုက်ရေးဝါဒမှာ ယနေ့ ကမ္ဘာ့ဆိုရှယ်လစ်နိုင်ငံရေး သဘောတရား သုခမိန်များ၏ ၀ါဒနှင့် တသားတည်း ကိုက်ညီနေသည်ကို တွေ့ရပေသည်။
ဆရာကြီး၏ အခြားအနုပညာဝါဒမှာ ယနေ့ ဝေါဟာရအားဖြင့် ခေါ်ဝေါ်နေကြသော သရုပ်ဖော်စာပေ၀ါဒပင် ဖြစ်သည်ကို ဆရာကြီး၏ ၀တ္ထုနှင့် လေးချိုးကြီးများတွင် ထင်ရှားစွာ တွေ့နိုင်ပေသည်။ တနည်းပြောရလျှင် ဆရာကြီးသည် ဆရာကြီးနှင့် ခေတ်ပြိုင်လှုပ်ရှားမှုကို အမြဲတမ်းဖွဲ့နွဲ့ သရုပ်ဖော်သော သရုပ်ဖော်ဝါဒကို ကိုင်စွဲသူ ဖြစ်ပေသည်။ ခေတ်ပြိုင်လှုပ်ရှားမှု ကား အခြားမဟုတ်၊ အဖိနှိပ်ခံရသူက ဖိနှိပ်သူကို တော်လှန်ခုခံသော လှုပ်ရှားမှု ဖြစ်သည်။ ထိုအခါ၌ ဆရာကြီးသည် အာဏာရသွားသောသူ (၀ါ) ဖိနှိပ်သူကို ကဲ့ရဲ့ရှုတ်ချပြီး အဖိနှိပ်ခံရသူ ၏ တော်လှန်ခုခံရေးကို ချီးမွမ်းဂုဏ်ပြုသည်။ ယင်းသည်ကား ဆရာကြီး၏ သရုပ်ဖော်စာပေ၌ သုံးသော အနုပညာ ၀ါဒတရပ်ပင် ဖြစ်ပေသည်။
ယင်းသဘောကို ဆရာကြီး၏ လေးချိုးကြီးများ၌ အထင်အရှား တွေ့ရပေသည်။ ဆရာကြီး၏ ၀တ္ထုများ၌ လူ့ဘ၀ လူ့သဘာဝအဖွဲ့အနွဲ့တို့ကို တွေ့နိုင်ပေသည်။ ဆရာကြီး၏ ဋီကာ၊ ဂဏ္ဍိ စသော ဆောင်းပါးများတွင် ဆရာကြီးနှင့် ခေတ်ပြိုင် တော်လှန်ရေးလှုပ်ရှားမှုများ၏ မှတ်တမ်းကို ရသဟန်ဖြင့် ဖွဲ့နွဲ့ဖော်ပြထားသည်ကို တွေ့နိုင်ပေသည်။
ဆရာကြီးသည် သူ၏ အနုပညာပေါ်၌ ရိုးသားဖြောင့်မတ်သည်။ လုပ်သလိုပြော၍ ပြောသလို လုပ်သည်။ အကျင့်တခြား အရေးတခြားမဟုတ်။ ထို့ကြောင့်ပင်လျှင် ပြည်သူတို့က သခင်ကိုယ်တော်မှိုင်းတည်းဟူသော အဖိနှိပ်ခံ ပြည်သူ့ဘက်တော်သား လူပုဂ္ဂိုလ်ကို ခင်သဖြင့် သူ၏ တရားကိုလည်း မင်ခြင်း ဖြစ်ပေသည်။ ယင်းဆရာကြီး၏ အနုပညာအပေါ်၊ ခေတ်အဆက်ဆက် ပြည်သူ့အပေါ် ရိုးဖြောင့်သော သဘောထားသည် ဆရာကြီး၏ အနုပညာဟန် ဖြစ်လာသည်။ ဆရာကြီး၏ လေးချိုးကြီးများသည် ရပ်ရွာထဲမှ ပြည်သူတို့၏ အသံ၊ အမျိုးသားဟန်တို့ဖြင့် ထုံမွှမ်းသည်ဖြစ်၍ ဆရာကြီးသခင်ကိုယ်တော်မှိုင်း၏ စာပေအနုပညာဟူ၍ ယနေ့ တော်လှန်သော ပြည်သူ့စာပေသစ်၌ ကဏ္ဍကြီးတရပ်အဖြစ် ထူထောင်ကျော်ကြားရခြင်း ဖြစ်ပေသည်။ ယင်း ဆရာကြီး၏ အနုပညာစာပေအစဉ်အလာ၊ စာပေရေစီးကြောင်းကြီးသည် ယနေ့ခေတ်၌ စွမ်းသန်သော အင်အားအဟုန်ဖြင့် စီးဆင်းလျက် ရှိနေဆဲ ဖြစ်ပေသည်။

(၁၉၇၂ ဆရာကြီး သခင်ကိုယ်တော်မှိုင်းရဲ့ (၉၆) နှစ်မြောက် မွေးနေ့အခမ်းအနားမှာ ဒဂုန်တာရာ ဖတ်ကြားတဲ့ စာတမ်း ဖြစ်ပါတယ်။ ဒဂုန်တာရာ ရဲ့ 'စာလုံး၊ ဆေးစက် စောင်းကြိုး နှင့် ကတ္တီပါကားလိပ်' ၁၉၇၄ ဧပြီလ၊ ပထမအကြိမ်မှ ကူးယူဖော်ပြပါတယ်)

ဘယ်မအေရိုးမှ မကောင်းပါဘူး
ရေးသူ- သခင်ဘမောင်

ဆရာကြီးသခင်ကိုယ်တော်မှိုင်းသည် ၁၂၄၇ ခုနှစ်မတိုင်မီ မြန်မာဘုရင် သီပေါမင်း လက်ထက် ပဒေသရာဇ်ခေတ်မှ ဗြိတိသျှနယ်ချဲ့ ခေတ်၊ ဂျပန်ဖက်ဆစ်ခေတ်၊ အင်္ဂလိပ် လွတ်လပ်ရေး ကျေညာပေးသော ခေတ်ထိ နှစ်ပေါင်းကိုးဆယ်မျှအတွင်း တိုင်းပြည် အုပ်ချုပ်သူ မင်း အစိုးရအမျိုးမျိုးတို့၏ အုပ်ချုပ်စိုးမိုးပုံတို့ကို ဖြတ်သန်းတွေ့သိခဲ့ ရသော ပုဂ္ဂိုလ်ကြီး ဖြစ်သည်။ထို့ကြောင့် ကျွန်တော်တို့သည် ဆရာကြီးသခင်ကိုယ်တော်မှိုင်းနှင့် တွေ့ဆုံကြသည့်အခါ စပ်မိစပ်ရာ နိုင်ငံရေး၊ လူမှုရေး၊ စာပေရေးစသည်များကို ပြောကြရင်း ခေတ်အဆက်ဆက်တွင် ဆရာကြီး ဖြတ်သန်းတွေ့သိခဲ့ရသော မင်း အစိုးရများအနက် ပြည်သူတို့၏ စီးပွါးရေး၊ လူမှုရေး၊ ပညာရေး စသည့်အကျိုးစီးပွါးများနှင့် ပတ်သက်၍ စီမံအုပ်ချုပ်ပုံတို့သည် မည်သည့်အစိုးရ ခေတ်၊ မည်သည့်အစိုးရလက်ထက်တွင် ကောင်းမွန်၍ မည်သည့်အစိုးရခေတ် မည်သည့်အစိုးရ လက်ထက်တွင် ဆိုးဆိုးဝါးဝါး ဖြစ်ပါသလဲဟု မေးမြန်းကြပါသည်။

ဆရာကြီးသခင်ကိုယ်တော်မှိုင်းက အထက်ပါအမေးစကားကို အောက်ပါပုံပမာကလေး ဖြင့် မိန့်ဆို ဖြေကြားပါသည်။
အုပ်ကျစ်ကျော်အေး မန္တလေးတည်ဆိုတော့ အုပ်က ၁၊ ကျစ်က ၂၊ ကျော်က ၂၊ အေးက ၁၊ အစဉ်အလိုက်ချကြည့်ရင် ၁၂၂၁ ဖြစ်တယ်။ အဲဒီ ၁၂၂၁ ခုနှစ်ဟာ ရတနာပုံ မန္တလေးမြို့ကို မင်းတုန်းဘုရင်ကြီး တည်ဆောက်ခဲ့တဲ့ နှစ်ဖြစ်တယ်။ မန္တလေးမြို့ တည်ဆောက်တာနှင့် မန္တလေးနန်းတည်ဆောက်တာ တချိန်တည်း တနှစ်တည်းတော့ မဟုတ်ဘူး။ နန်းတော်ကြီးကို ၁၂၂၉ မှာ တည်ဆောက်ပြီး၊ ကျုံးမြို့ရိုးအစရှိတဲ့ မြို့တော်ကြီးကို ၁၂၂၁ ခုနှစ်မှာ စတင် တည်ဆောက်တယ်။ မြို့ တော်တည်ဆောက်မဲ့နေရာကိုတော့ ၁၂၁၈ ခုနှစ်ကစပြီး၊ တောရှင်း မြေညှိလုပ်ငန်းတွေ လုပ်ကြတာပေါ့။ ဒါပေမယ့် မှတ်သားလို့ လွယ်အောင်ဆိုပြီး ကျုံးမြို့ ရိုး ပနက်ချတည်ဆောက်တဲ့ သက္ကရာဇ် ၁၂၂၁ ခုနှစ်ကို အုပ်ကျစ်ကျော်အေး မန္တလေးတည် လို့ ခေါ်တွင်ခဲ့ကြတယ်။
မင်းတုန်းမင်းသားဟာ ၁၂၁၄ ခုနှစ်မှာ အာဏာရရှိခဲ့တယ်။ အာဏာရရှိတာကို အမှန်တကယ်ပြောရရင် အိမ်ရှေ့မင်းသား ကနောင်မြို့ စားရဲ့ သတ္တိရှိမှုနဲ့ လုပ်ရည်ကြံရည် ပါဝင်ခဲ့တဲ့အတွက်ဆိုရင် မမှားပါဘူး။ အိမ်ရှေ့ မင်းသားဆိုတာက ၁၃၀၀ပြည့် အရေးတော်ပုံခေတ်မှာ တို့ဗမာအစည်းအရုံးဥက္ကဌ တာဝန်ကို ထမ်းဆောင်ခဲ့တဲ့ သခင်ထိပ်တင် ကိုယ်တော်ကြီးရဲ့ အဖိုးဖြစ်တယ်။
စကားစပ်မိလို့ သခင်ထိပ်တင်ကိုယ်တော်ကြီးအကြောင်း နဲနဲပြောရအုံးမယ်။ သူ့ရဲ့ အိမ်ရှင်မဇနီးက တို့သီပေါဘုရင်ရဲ့ တတိယ သမီးတော်ပေါ့။ သီပေါဘုရင်က မင်းတုန်းဘုရင်ရဲ့ သားဖြစ်တော့ တတိယသမီးတော်ဟာ မင်းတုန်းဘုရင်ရဲ့ မြေးပေါ့ကွယ်။ ညီတော်နောင်တော် အရင်းဖြစ်ကြတဲ့ အိမ်ရှေ့မင်းသားရဲ့မြေး သခင်ထိပ်တင်ကိုယ်တော်ကြီးနှင့် မင်းတုန်းဘုရင်ရဲ့ မြေး တတိယသမီးတော်တို့ဟာ တကယ်ဆိုတော့ မောင်နှမ နှစ်ဝမ်းဘဲကွဲကြသေးတာကလား။ သူတို့နှစ်ဦး လက်ထပ်တဲ့ကိစ္စမှာ ဆရာလဲ တော်တော်ကူညီ ဆောင်ရွက်ပေးခဲ့ဘူးပါတယ်။
တို့ဗမာအစည်းအရုံးက ဆရာတို့ပါဝင်ပြီး နာယက တာဝန်ထမ်းဆောင်တဲ့အခါ သူလဲ တော်တော်ကူညီအားပေးဘော် ရလာတယ်။ သူ့အနေနဲ့ အိမ်ရှေ့မင်းရဲ့မြေး၊ သီပေါဘုရင် သမက်ဖြစ်ပေမဲ့ ပဒေသရာဇ်စိတ် မရှိရှာပါဘူး။ ဆင်းရဲသား ပစ္စည်းမဲ့များ အတွင်းမှာပဲ အရောတ၀င် ဆက်ဆံနေထိုင်လိုတဲ့ ဆန္ဒရှိတာကို သိရတယ်။ နေလဲနေတယ်။
တို့ဗမာအစည်းရုံးကြီးရဲ့ စည်းရုံးရေးကိစ္စအတွက် မုံရွာအထက် ကနီကနဲတို့ မင်းကင်းတို့ဆိုတဲ့ မြို့ရွာတွေကို ဆရာတို့ သွားကြတဲ့အခါ ပထမတခေါက်တုန်းကဆိုရင် ဆေးဖော်ကြောဖက် သိပ်မရှိပါဘူး။ သခင်အသင်းဝင်ထားတဲ့ လူလောက်ပဲ သင်္ဘေဆိပ်က ဆီးကြိုကြ၊ ဆရာတို့ဆီ လာမေးကြ မြန်းကြတာဘဲ။ တရားပွဲတို့ ဆွေးနွေးပွဲတို့ ဆိုရင်လဲ ကြက်ပွဲငှက်ပွဲလောက်တောင် မစည်ပါဘူး။
ဆရာတို့လဲ စိတ်မကျေနပ်တာနဲ့ နောက်တခေါက် ထပ်သွားကြပြန်တယ်။ အဲဒီအခါ ထိပ်တင်ကိုယ်တော်ကြီးကို ခေါ်သွားပြီး အိမ်ရှေ့မင်းရဲ့မြေး၊ သီပေါဘုရင်ရဲ့ သမက် မင်းသားထိပ်တင်ကိုယ်တော်ကြီး ပါတယ်လို့ သတင်းလွှင့်လိုက်တယ်။ အဲဒီသတင်းလဲ ကြားရော တောရောမြို့ပါဆိုသလို မင်းသားကို ကြည့်ချင်မြင်ချင်ကြတဲ့အတွက် ဆရာတို့ကို သင်္ဘေဆိပ်က လာကြိုကြတာ ကမ်းညွတ်မတတ်ပါဘဲ။ တရားပွဲတွေလဲ ၀က်ဝက်ကွဲပါဘဲ။ ကျွေးမွေးဧည့်ခံလိုက်ကြတာလဲ မပြောပါနဲ့။ ဗိုက်ခွေးနမ်းမတတ် ဆိုသလိုပါဘဲ။ သူ့အကြောင်း ပြုပြီး တို့ဗမာအစည်းအရုံးရဲ့ စည်းရုံးရေးအားဟာလဲ တော်တော်တက်လာတယ်။ အသင်းဝင်တွေလဲ များလာတယ်။
ထိပ်တင်ကိုယ်တော်ကြီးက ပဒေရာဇ်စိတ်၊ ရှင်ဘုရင်စိတ် မပေါက်ပေမယ့် လူရုပ်လက္ခဏာ ပုံသဏ္ဍာန်ကတော့ ရှေးကလူတွေအမြင်နဲ့ဆိုရင် တကယ်ထီးမူနန်းဟန် ပါတယ်လို့ ဆိုကြတာပေါ့။ အသားအရေလဲကောင်း လူရည်လဲသန့်တယ်။ အလုံးအရပ်ကလဲ လူတန်းစေ့ဖြစ်ပြီး၊ တော်တော်ခန့်ညားချောမောတဲ့ ပုဂ္ဂိုလ်တဦးပါဘဲ။ သူလဲ အဲဒီ ကနီကနဲက အပြန် သိပ်မကြာပါဘူး။ သခင်အသင်းဝင်ဖြစ်ပြီး သူ့အမည်ရှေ့က သခင်ဆိုတာ တိုးလိုက်လို့ သခင်ထိပ်တင်ကိုယ်တော်ကြီးရယ်လို့ ဖြစ်လာတော့တာဘဲ။
အေး..အေး.. ခုတင်က စကားဆက်ရအောင်၊ မင်းတုန်းမင်းသား အာဏာရရှိတယ် ဆိုတာ ညီတော်အိမ်ရှေ့မင်းသားရဲ့ လုပ်ရည် ကြံရည် အများအပြား ပါဝင်ခဲ့ခြင်းကြောင့် ဆိုရင် မမှားပါဘူး။ နောင်တော် ပုဂံမင်းလက်ထက် အမရပူရမြို့မှာ မင်းတုန်းမင်းသားနဲ့ ကနောင်မင်းသားတို့ နေထိုင်ကြတဲ့အခါ ပုဂံမင်းရဲ့ အိမ်တော်ပါများနဲ့ အချို့မှူးမတ်များက မင်းတုန်းမင်းနှင့် ကနောင်မင်းသားတို့ ရှိနေကြရင် သူတို့ သြဇာမကြီးမှာ သူတို့သဘောကျ မလုပ်ကြရမှာ တွေကို စိုးရိမ်ပြီး လုပ်ကြံပစ်ကြဘို့ ကြံစည်ကြတယ်။ အဲဒါကို ညီတော်ကနောင်မင်းသားက ရိပ်မိလေတော့ ၁၂၁၄ ခုနှစ် ပြာသိုလမှာ သားမယား အချွေအရံများပါ အမရပူရက မတ္တရာ၊ အဲဒီကမှ အနောက်ဖက်ကူးပြီး ရွှေဘိုအထိ ထွက်သွားကြတယ်။
ရွှေဘိုရောက်တော့ မင်းတုန်းမင်းသားကို အေးအေးဆေးဆေး နေရစ်စေပြီး ကနောင် မင်းသားက ဗိုလ်ပါရဲမက်များကို ဦးစီးပြီး အမရပူရကို ရက်ပေါင်းလေးဆယ်ကျော် ၀ိုင်းရံလုပ်ကြံတော့မှ ၁၂၁၄ ခုနှစ်တပေါင်းလထဲမှာ အောင်မြင်တယ်။ အောင်မြင်ပြီးတဲ့နောက်မှ ရွှေဘိုက နောင်တော်မင်းတုန်းမင်းသားထံ အကြောင်းကြားတယ်။ အဲဒီအခါ မင်းတုန်းမင်းသားက နောင်တော်ပုဂံမင်းနှင့်မိဖုရားရော အချွေအရံများပါ ရွှေဘိုသို့ ခေါ်လာစေပြီး ဘေးတော် အလောင်းမင်းတရားကြီးရဲ့ ရွာနေဖြစ်တဲ့ ရွှေဘိုမြို့မှာ ထီးနန်းစိုက်ဖို့ ကြံရွယ်တယ်။
ဒါပေမယ့် ဆရာတော်သံဃာတော်များ၊ မူးမတ်ပညာရှိများက အမရပူရမြို့ကို ပြန်လည်ထီးနန်းစိုက်တာက ပိုမိုသင့်မြတ်မည်ဖြစ်ကြောင်း အကြံပေးကြလို့ ရွှေဘိုမြို့ မှာ တနှစ်ကိုးလ ဆိုသလို နေပြီးမှ ၁၂၁၅ ခုနှစ် တန်ဆောင်မုန်းလမှာ အမရပူရမြို့ကိုပြန်ပြီး ထီးနန်းစံတယ်။ ညီတော်ကနောင်မင်းသားကို အိမ်ရှေ့မင်းအဖြစ်ခန့်တယ်။ နောင်တော်ပုဂံမင်း ကိုလဲ နန်းတော်ရဲ့ အရှေ့ မြောက်ဘက်မှာ သီးခြားအိမ်တော်နှင့် အိမ်နိမ့်စံအဖြစ် ချမ်းချမ်းသာသာ ထားတယ်။ တခါ အမရပူရမှာ သုံးနှစ်လောက်နေပြီးမှ အခု မန္တလေးမြို့တော်နေရာမှာ ယာယီစံနန်း ဆောက်လုပ်နေထိုင်ပြီး မန္တလေးနန်းတော်ကြီးနှင့် မြို့တော်ကိုပါ တည်ဆောက်နန်းစိုက်တယ်။
မန္တလေးမြို့နှင့် နန်းတော်ကြီးကို တည်ဆောက်ရာမှာ လိုအပ်တဲ့ ပစ္စည်းပစ္စယတွေဟာ အသစ်စက်စက် သုံးသင့်တာသုံးပီး အမရပူရမြို့ဟောင်းက ပစ္စည်းတွေ သုံးသင့်တာ ထည့်သုံးရသေးတယ်။ အဲဒီလို အသုံးပြုနိုင်ရေးအတွက် ထီးနန်းဆိုင်ရာ အဆောင်အယောင် ပစ္စည်းတွေ၊ လွှတ်တော်ဗြဲတိုက်ကစပီး အုပ်ချုပ်ရေးဘက် စစ်ဘက်ဆိုင်ရာပစ္စည်းတွေ၊ ဘာသာ သာသနာရေးဆိုင်ရာ အဆောင်အယောင်ပစ္စည်းတွေ၊ ဘဏ္ဍာတိုက်နှင့် စားနပ်ရိက္ခာ ကျည်တော်များမှ ပစ္စည်းတွေ၊ မင်းမိဖုရား သားတော်သမီးတော် နန်းတော်သူ နန်းတော်သား များရဲ့ အသုံးအဆောင်ပစ္စည်းတွေ စသဖြင့် ရွှေ့ ဘို့ပြောင်းဘို့ခဲယဉ်းတဲ့ အဆောက်အဦ အရာဝတ္ထုကြီးတွေကလွဲရင် အကုန်လိုလို ပြောင်းရွှေ့ ကြရတယ်။
အဲဒီလို ပြောင်းရရွှေရတဲ့အခါ ဆင်းရဲသား တောင်သူလယ်သမားများက သူတို့လှည်း များနှင့်သူတို့ အမရပူရမြို့ဟောင်းက မန္တလေးမြို့သစ်နေရာအထိ သယ်ယူပို့ဆောင်ပေးရတယ်။ သယ်ယူပို့ဆောင်ခရယ်လို့ နန်းတော်ကြီးက တနေ့တကျပ်ခွဲ သတ်မှတ်ပေးထားသတဲ့။ ဒါပေမဲ့ ခုခေတ်လိုပေါ့။ လှီးကြဖြတ်ကြတော့ ဆင်းရဲသားလှည်းသမားများလဲ တကျပ် ငါးမတ်ဆိုသလို ရကြတယ်။ ဒီအချက်ကို ဆင်းရဲသားလှည်းသမားများက မကျေနပ်ကြဘူး။ ကျယ်ကျယ်လောင် လောင်လဲ မပြောရဲကြတော့ တိုးတိုးတိတ်တိတ်ကြိတ်ပြီး ပြောကြသတဲ့။ မင်းနားတထောင် ဆိုတဲ့အတိုင်း အဲဒီလို တိုးတိုးတိတ်တိတ် ပြောတာကိုပဲ နန်းတော်ကြီးက သိရလို့ အိမ်ရှေ့မင်းသားကိုယ်တိုင် ရုပ်ဖျက်ပြီး ဆင်းရဲသားလှည်းသမားများထံ သွားရောက်စုံစမ်းတယ်။
တနေ့တော့ အိမ်ရှေ့မင်းသားကြီးဟာ နေ့ခင်း ၁၂နာရီ လောက်မှာ ဆင်းရဲသား လှည်းသမားများ သစ်ပင်ရိပ်မှာ ထမင်းစားရင်း အနားယူနေတုန်း ချည်လုံချည်၊ ချည်အင်္ကျီ တဘက် (မျက်နှာသုတ်ပုဝါ) ခေါင်းပေါင်းကြီးနှင့် ဆင်းရဲသားလို ရုပ်ပြောင်းဝင်သွားသတဲ့။ ပီးတော့ လှည်းသမားကြီးများနှင့် ရောက်တတ်ရာရာ စကားများပြောရင်း အမရပူရ မြို့ဟောင်းက မန္တလေးမြို့သစ်ကို ပစ္စည်းတွေ သယ်ယူပို့ဆောင်ရတဲ့အတွက် တနေ့လှည်းခ ဘယ်လောက်ရ သလဲလို့ မေးမြန်းကြည့်သတဲ့။
အသက် ခြောက်ဆယ် ခွန်နှစ်ဆယ်ခန့်ရှိ အဖိုးကြီးတယောက်က နန်းတော်ကြီး ကတော့ တကျပ်ခွဲပေးဘို့ အမိန့်ချထားတယ် ဆိုတာပဲ။ ဒါပေမဲ့ ဘကြီးတို့ ရတော့ တကျပ် အလွန်ဆုံး ငါးမတ်ဆိုသလို ရသကွဲ့လို့ ဖြေကြားသတဲ့။
တခါ အိမ်ရှေ့မင်းသားက အဖိုးကြီးကို "ဘကြီးက အသက်ဘယ်လောက်ရှိပါပြီလဲ" လို့ ထပ်မေးတော့ အဘိုးကြီးက "ဘကြီးအသက်လား ခုနှစ်ဆယ် ဆိုပါတော့ကွယ်" လို့ ပြန်ဖြေ သတဲ့။
အိမ်ရှေ့မင်းသားက ဒီလိုဆို ဘကြီးဟာ မှန်နန်းရှင်တို့ ကုန်းဘောင်ဘုရင်တို့ ပုဂံဘုရင် တို့ကို ကောင်းကောင်းမီတာပေါ့နော်ဟု မေးလိုက်တဲ့အခါ အဖိုးကြီးက မီတာပေါ့မောင်ရဲ့။ မှန်နန်းရှင် ကုန်းဘောင်တို့တွင် ဘယ်ကမလဲ ဘိုးတော်ဘုရင်ကိုတောင် ဘကြီးတို့ ကောင်းကောင်းမီတာပေါ့ဟု ပြန်ပြောသတဲ့။
တဖန် အိမ်ရှေ့မင်းသားကဆက်ပြီး ဒါဖြင့် ဘကြီးရယ် ကျွန်တော်တို့ လူငယ်တွေ ဗဟုသုတအဖြစ် မေးပါရစေ၊ အခုမင်းတုန်း ရှင်ဘုရင်အထိပေါ့ဗျာ၊ အဲဒီ ဘကြီးမီခဲ့ တွေ့ကြုံခဲ့တဲ့ မင်းတွေ မင်းတွေခေတ်မှာ ဘယ်မင်းဘယ်လက်ထက်မှာ ဆင်းရဲသားများ တိုင်းသူပြည်သား များအတွက် ငဲ့ညှာထောက်ထားပြီး စားဝတ်နေရေး မျှတချောင်လည်အောင် ကောင်းကောင်း မွန်မွန် စီမံအုပ်ချုပ်ပါသလဲ။ ဘယ်မင်းလက်ထက်မှာ ဆင်းရဲသားများ တိုင်းသူပြည်သားများ အပေါ် ငဲ့ညှာထောက်ထားခြင်းမရှိဘဲ မကောင်းတဲ့ အပြုအမူတွေနှင့် ဆိုးဆိုးဝါးဝါး အုပ်ချုပ်ပါသလဲဆိုတာ သိပါရစေခင်ဗျာလို့ မေးလိုက်သတဲ့။
အဲဒီအခါကျတော့ အဖိုးကြီးက မျက်နှာကြီး ရှုံ့မဲ့လိုက်ပြီး အင်း မေးမှမေးတတ်ပလေ တူမောင်ရာ၊ သူတို့ ကြားအောင်တော့ မပြောရဲပါဘူး၊ ဘကြီးတွေ့ခဲ့သမျှ သိခဲ့သမျှတော့ မင်းဆိုတဲ့အကောင်တွေဟာ ဘယ်မအေရိုးမှ မကောင်းပါဘူးကွဲ့၊ မယားကြီးမယားငယ် မယားမြှောင် အမျိုးမျိုးယူပြီး သူတို့သားမယား ဆွေမျိုးတစု ကောင်းစားရေး၊ စည်းစိမ်အမျိုးမျိုး ခံနိုင်ရေး၊ သြဇာအာဏာ ကြီးမားရေးအတွက် လုပ်ကြတာပါဘဲ။ တို့ ဆင်းရဲသားတောင်သူ လယ်သမား အလုပ်သမားတွေကတော့ သူတို့ကောင်းစားရေးအတွက် အစတေးခံဘ၀က မတက်ကြရပါဘူးလို့ ပြောလိုက်တဲ့အခါ အိမ်ရှေ့မင်းသားကြီးလဲ နောက်ထပ်ဘာမျှ မမေးရဲတော့ဘဲ အသာထပြန်လာခဲ့ရသတဲ့။
ယခုခေတ်မှာလဲ ဆရာတွေ့ကြုံခဲ့ရသမျှ မင်းအစိုးရဆိုတဲ့ အကောင်တွေဟာ အဲဒီဆင်းရဲသား လှည်းသမားကြီး ပြောသလိုဘဲ။ ပြည်သူလူထု ကောင်းကျိုးကို အဓိကထား လုပ်ကြတာ မတွေ့ရသေးပါဘူး။ တအိမ်ထောင်၊ ကားတစီး တိုက်တလုံး၊ တလ၀င်ငွေ ရှစ်ရာဆိုတာလဲ သူတို့ တစုအတွက်ပါဘဲဟု ပြောဆိုကာ ရယ်မောနေပါတော့သည်။

{သခင်ဘမောင်စုဆောင်းတင်ပြတဲ့-သခင်ကိုယ်တော်မှိုင်း တင်စားပြောသောပုံပြင်များ-စာအုပ်၊ ဒုတိယအကြိမ်၊ ၁၉၇၆ ဖေဖော်ဝါရီ၊ မှ ကူးယူဖော်ပြပါတယ်။}

Tuesday, March 16, 2010

နောင်ရိုးတင်ဝင်း (၂)
ရေးသူ- မောင်အေးဝင်း



သာလယံဇရပ်ဖြစ်လာခြင်း

ကျနော်တို့ ရောက်စမှာ တိုက်တွေ (၄ - ၅ - ၆ တိုက်) ဟာ ခြောက်ခြားစရာကောင်းအောင် ငြိမ်သက် တိတ်ဆိပ် လွန်းတယ်။ တံခါးဖွင့်သံ၊ တံခါးပိတ်သံ၊ သော့သံကလွဲလို့ အထွေအထူး ဘာမှ မကြားရဘူး။ ညဘက်ဆို ၀ါဒါဝင်လာရင် ကိုင်လာတဲ့ သော့သံဟာ ခပ်ဝေးဝေး ကတည်းက ကြားရတယ်။ ကျနော်တို့ ၅ တိုက်နဲ့ မျက်နှာချင်းဆိုင်တိုက်က ၄ တိုက်။
အိပ်ပျော်နေတုန်းလဲ သော့သံလေးချွင်ချွင်ဆို သဲ့သဲ့အသံလဲ လန့်နိုးတာပဲ။ နားစွင့်လိုက်၊ ၆ တိုက်က လား။ ၄ တိုက်ဖက်ကလား၊ ကိုယ့်တိုက်ကလား။ ပိုပြီး ကျယ်လာရင် ကိုယ့်ဘက်ကို လာနေပြီ။ တံခါးသံကြားရင် တခန်းခန်းကို ဖွင့်နေပြီ။ ဟော... ပိတ်သွားပြီ။ သော့သံဝေးသွားပြီ။ ပြန်ထွက်သွားပြီ။ သော့သံဟာ ရင်ကို ခုန်စေတယ်။ ငါ့ကိုများ ခေါ်ထုတ်ဦးမှာလား။ ထုတ်ရိုက်ခံရဦးမှာလား။


မှိုင်းရာပြည့် အရေးအခင်း ကျောင်းသားတွေ သွင်းလာတယ်။ မီးမောင်းစာစောင် ထုတ်ဝေ / ဖြန့်ချိသူ တွေ သွင်းလာတယ်။ စစ်ကြောရေးထုတ်တယ်။ ပြန်သွင်းတယ်။
အသစ်တွေ ထပ်ထပ် တိုးတိုးလာလေ ရှိပြီးသားတွေကို ဟိုက ဒီရွှေ့၊ ဒီက ဟိုရွှေ့နဲ့ အပြောင်းအရွှေ့တွေ များလေပဲ။ လူတွေကို တခန်း တခန်းမှာ လေးယောက်၊ ငါးယောက်ထည့်တာ။ ကိုတင်ဝင်းကိုပဲ တယောက်ထဲ ထားတယ်။
ကိုတင်ဝင်းက (၃) ဆောင် ဧပြီ ရိုက်ပွဲမှာ ၆ တိုက် ရောက်သွားပြီး၊ ၆ တိုက်မှာ ရက်စေ့တော့ ၅ တိုက်ကို ရောက်လာတယ်။ ဇွန်လကုန်လောက်မှာ ၅ တိုက်မှာ လူစုံတက်စုံနဲ့ စည်ကားလာတယ်။
ကျနော်တို့က နံပါတ် ၂၁ အစွန်ဆုံးအခန်း။ ကိုတင်ဝင်းက ၂၀။ အခန်း ၁၉ ကစပြီး ၁၈..၁၇ တွေမှာ၊ မီးမောင်းစာစောင်က လူတွေ၊ တွဲဘက်ထောင် ရိုက်ပွဲကနေ ၆တိုက် ရောက်ပြီး၊ ၆တိုက်က ပြန်ထွက်လာ သူတွေ။
ကျနော်တို့ မှိုင်းရာပြည့်တွေနဲ့ မီးမောင်းတွေက ရောက်ခါစဆိုတော့ ဧည့်သည်တွေလို ဖြစ်ပြီး တိုက်ကို နဲနဲစိမ်းနေတယ်။ ကိုတင်ဝင်းကတော့ ရောက်ကတည်းက လှုပ်လှုပ်ရှားရှားဖြစ်နေတာ၊ တွဲဘက်က လူတွေလဲ ရောက်လာရော ၀က်ဝက်ကွဲပြီး ၅ တိုက်ဟာ သာလယံဇရပ် ဖြစ်တော့တာပဲ။
တခန်းနဲ့တခန်း စကြ ပြောင်ကြ၊ ပြောကြဆိုကြနဲ့။ အထူးသဖြင့်တော့ တွဲဘက်က လာတဲ့ ကျောင်းသား တွေ။ သူတို့က ၁၂ ယောက်၊ ၁၃ ယောက်လောက်ရှိမယ်။ ၂ ခန်းလား၊ ၃ ခန်းလား မပြောတတ်ဘူး။ ဘိုးတော်ခင်ဝင်း၊ ခိုင်အောင်(မြို့ဟောင်း)(စက်မှုတက္ကသိုလ်)၊ မြေ၀ါ(တန့်ဆည်) (စက်မှုတက္ကသိုလ်)၊ ဟန်ရှင်ဝင်း တို့ အုပ်စုတွေ။
သူတို့က ထောင်ဝင်စာလဲ တွေ့နေရတော့ တနင်းဂနွေ ထောင်ဝင်စာ လာတဲ့နေ့ဆို ပိုဆူတယ်။ မနက်ပိုင်း သူတို့ကို ရေချိုးချတယ်။ ရေချိုးရပြီဆိုရင်လည်း ဒင်းတို့က ကြွက်ကြွက်ညံလို့။ ပျော်ကြတာလေ။
ထောင်ဝင်စာထွက်ရင် တခန်းနဲ့ တခန်း နှုတ်ဆက်ကြတယ်။ ယောက်ဖရေသွားပြီ၊ မင်းညီမကို ဘာမှာအုန်းမလဲ... စသဖြင့်ပေါ့လေ။ ပြန်လာရင်လဲ ဘယ်သူ့ညီမက ဘယ်လို၊ အစ်မက ဘယ်လို စသဖြင့် တခန်းနဲ့တခန်း စကြ ပြောင်ကြ၊ ဖောက်သည်ချကြ။ အပြင်သတင်းတွေ ပြန်ပြောကြ။ ကျနော်တို့ကတော့ နားထောင်ပြီး ကိုယ်တိုင်တွေ့ နေရသလိုပဲ ပီတိတွေ ဖြစ်ကြ။ သူတို့ ရလာတဲ့ ထောင်ဝင်စာတွေကို ထောင်ဝင်စာ မတွေ့ရတဲ့ ကျနော်တို့အတွက် ဝေမျှတာ စားကြ သောက်ကြ။

ဂီတဆည်းဆာ

ညနေ ထမင်းစားပြီးလို့ မှောင်စပျိုးချိန်မှာ ကိုတင်ဝင်းက ဦးဆောင်ပြီး ဂီတဆည်းဆာ လုပ်တယ်။ အခန်းတိုင်းက အနည်းဆုံး တယောက်တော့ သီချင်းတပုဒ် ဆိုရတယ်။ ကိုတင်ဝင်းက ဦးဆောင်ပြီး သူ့အခန်းကနေ အစီအစဉ် ကျေညာပေးနေတော့ ၀ါဒါတွေကလည်း မဆူရင် ပြီးတာပဲဆိုပြီး ပြဿနာ မရှာတော့ဘူး။ တခါတလေ အသံကျယ်လာမှ၊ လက်ခုပ်တွေ တီးကြတာဆိုရင်တော့ တိုးတိုးလုပ်ကြဆိုပြီး လာဟန့်တယ်။
နောက်ပိုင်း တွဲဘက်က ပြောင်းလာတဲ့ ကျောင်းသားအုပ်စုထဲက ၁၀တန်း ကျောင်းသားလေး ခင်မောင်လွင်က ဂျိုကာပဲ။ သူလဲ အစီအစဉ် ၀ိုင်းကျေညာပေးတယ်။ သင်္ချာရည်ချွန်ဆုရ ဟန်ရှင်ဝင်းက အူတူတူ။
ဂီတဆည်းဆာရယ်လို့ ဖြစ်မလာခင်ရက်တွေ စောစောပိုင်းက ကျနော်တို့ကို ကိုတင်ဝင်းက သူတို့ ပြည်ချစ်ပါတီ စစ်ချီသီချင်းတို့၊ သူ့ အသည်းစွဲ ဦးအံ့ကြီးရဲ့ 'စစ်ကိုင်းတောင်' တို့၊ ကျနော်တောင်းဆိုတဲ့ ကိုသန်းလှိုင်ရဲ့ 'ဥဿာလှိုင်ထိပ်ထား' သီချင်းတို့ကို ဆို ပြတယ်။ ကျနော်တို့ အခန်းထဲမှာကလဲ လေးယောက်ရှိတဲ့ အနက် သူနဲ့ ကျနော်နဲ့က ပိုပြီး စကားပြောဖြစ်ကြတယ်။ သူ့အကြောင်းတွေကို အများကြီး ပြောပြတယ်။
ဂီတဆည်းဆာမှာ သီချင်းဆိုကြလို့ ကိုတင်ဝင်း အလှည့်ရောက်ရင် သူက ကိုသန်းလှိုင်ရဲ့ 'ဥဿာလှိုင်ထိပ်ထား' သီချင်းပဲ ဆိုတာများတယ်။ အစီအစဉ် ကျေညာရင် သူက ၂၁ က ကျနော့် ညီများနဲ့ 'ဥဿာလှိုင်ထိပ်ထား' သီချင်းကို ဆိုပါမယ်လို့ ကျေညာတာ။ သံပြိုင်အပိုဒ်မှာ ကျနော်တို့က သူနဲ့ အတူ 'လှိုင်ထိပ်ထား.. ထိပ်ထားပျိုစင်...' လိုက်ဆိုပေးရတယ်။
ဂီတဆည်းဆာမှာ အားလုံးက ဗမာသီချင်းတွေပဲ ဆိုတယ်။ ကိုတင်ဝင်းနဲ့ ကပ်လျက်အခန်း၊ မီးမောင်း စာစောင်အမှုက ရေတပ်ထွက် ဇော်ကြီး ခေါ် ဖေသိန်း တယောက်ပဲ ပရက်စလေ ရဲ့ အင်္ဂလိပ်သီချင်းတွေ ဆိုတယ်။ အဲဒီတုန်းက ဘယ်သူက ဘာသီချင်းပဲဆိုဆို ဘယ်သူ့ကို ဘယ်သူမှ ဝေဖန်ပြောဆိုခြင်း မရှိကြဘူး။ တိုက်မှာနေကြ တာ အားလုံး ညီညီညွတ်ညွတ် ချစ်ချစ်ခင်ခင်ပဲ။

ထောင်ဝင်စာပိတ်ထားခံရသူ

ကိုတင်ဝင်းဟာ ၃ ဆောင်က ကျောင်းသားတွေနဲ့ အာဏာပိုင်တွေ ရိုက်ပွဲမှာ တိုက်ပိတ်ခံထားရသူ ဖြစ်တယ်။ အာဏာပိုင်တွေဟာ ၃ ဆောင်ကို မကြာခဏ သွေးတိုးစမ်းတယ်။ အထူးဆောင်၊ အထူးအခွင့်အရေး ဆိုတာကို မပေးချင်ဘူး။ အဲဒီ အားစမ်းပွဲမျိုး ၁၉၇၆ ဧပြီလထဲမှာ တခါဖြစ်တယ်။ ၃ ဆောင်က ကျောင်းသားခန်းလို့ ခေါ်တဲ့ (၇) ခန်းမှာ ကျောင်းသားတွေနဲ့ အာဏာပိုင်တွေ နှစ်ဖက် အသေအကြေ ရရာလက်နက်တွေနဲ့ အပြန်အလှန် ရိုက်ကြတာ။
လူအင်အား၊ လက်နက်အင်အား မမျှတော့ ကျောင်းသားတွေ ရှုံးသွားတယ်။ အခန်းထဲရှိသမျှ ကျောင်းသားအားလုံးကို သွေးသံရဲရဲနဲ့ ခွေးသေကောင် ဒရွတ်ဆွဲသလို ဆွဲသွားတဲ့အချိန်မှာ ကိုတင်ဝင်းက သူ့အခန်းထဲကနေ ရှေ့ကဖြတ်ဆွဲသွားတဲ့ ၀ါဒါကို ငံပြာရည် အပြည့်ရှိနေတဲ့ ပုလင်းနဲ့ ဘာယာတန်းက လက်ထုတ်ပြီး တအားရိုက်ချလိုက်တယ်။ ထိတဲ့ ၀ါဒါလည်း နေရာမှာ ပုံလဲသွားတယ်။ သူ့ကိုလည်း သူ့အခန်းကဆွဲထုတ်၊ ၀ိုင်းရိုက်ပြီး (၆) တိုက်ထဲ ထည့်လိုက်တာ။ ကျနော်တို့ဆီကို သူရောက်လာတာ သူ့ကို (၆) တိုက်က ထုတ်လာတာ။ ဒါကြောင့်လည်း သူ့ကို ခေါ်လာတော့ စောင်အုပ်ပြီး တယောက်ကို လေး ငါးယောက် ၀ိုင်းချုပ်ခေါ်လာတာ ဖြစ်တယ်။
သာမန်အားဖြင့် ကိုတင်ဝင်း ထောင်ဝင်စာဆိုတာ သူ့ရဲ့ ဆွေမျိုးသားချင်းတွေက စစ်ကိုင်းကနေ မလာနိုင်ကြပါဘူး။ ထိုင်းနယ်စပ်တောထဲ၊ ပြည်ချစ်ပါတီမှာ နေတုန်းက သူအိမ်ထောင်ကျခဲ့တဲ့ မမာလာရဲ့ အိမ်က ထောင်ဝင်စာ လာတာပါ။ မမာလာ အစ်မက ရန်ကုန် ဂွတ်တလစ်ဈေးမှာ ငါးရောင်းတယ်။ ထောင်ကျနေတဲ့ ညီမဖြစ်သူကို ချို့ချို့တဲ့တဲ့နဲ့ ထောင်ဝင်စာ တွေ့ရတာ။ ကိုတင်ဝင်းက မိန်းမထောင်ဝင်စာထုတ်က မျှစားရတာ ဖြစ်တယ်။
မမာလာအိမ်က ထောင်ဝင်စာမလာနိုင်ရင်တောင် သူတို့လင်မယား အတွင်းထောင်ဝင်စာ (ထောင်ကျနေ သူ အချင်းချင်း ထောင်ထဲမှာတွေ့ရတာ) တွေ့ရတယ်။ ခုတော့ ၃ ဆောင် ရိုက်ပွဲ ပြဿနာနဲ့ သူ့ခမျာ အတွင်းရော၊ အပြင်ရော ဘာထောင်ဝင်စာ မှ မတွေ့ရဘူး။ အပိတ်ခံထားရတယ်။

ပါဆယ်

တနေ့တော့ ကိုတင်ဝင်းက သူ့အခန်းဘက်ကနေ ကျနော်တို့ အခန်းကို တိုးတိုးတိတ်တိတ် လှမ်းပြီး ဆွေးနွေးတယ်။ ကျနော်တို့က စစ်ကြောရေးပြီးပေမယ့် စီရင်ချက် အချမခံရသေးတော့ အိမ်နဲ့ထောင်ဝင်စာ မတွေ့ရသေးဘူး။ ကိုတင်ဝင်းဆီမှာ သူနဲ့ ရင်းနှီးတဲ့ တခြားတိုက်က စိတ်ချရတဲ့ ၀ါဒါရှိတယ်။ ကျနော်တို့ အိမ်ကို ဆက်သွယ်ပြီး လိုချင်တာမှာ၊ သူ့ ခယ်မအိမ်မမှာသွားပေးပြီး သူ့ ပါဆယ်နဲ့ ထည့်ပေးဖို့။
အဲဒီလို ကိုတင်ဝင်းကောင်းမှုနဲ့ မာလာ့အစ်မကနေ ဆေးလိပ်တွေ စားစရာတွေ ထောင်ဝင်စာ မရခင်မှာ အိမ်ကပို့တာ စားကြရတယ်။ ပါဆယ်ထုပ်လာရင် ကိုတင်ဝင်း အခန်းမှာပဲထားပြီး သူကပဲ အခန်းတွေ အားလုံးကို ခွဲဝေပေးတယ်။

ဘဲဥတလုံးပျောက်မှု

ကျနော့် အိမ်ကို ဘာပစ္စည်းမှာတယ်၊ အရေအတွက် ဘယ်လောက်ဆိုတာ ကိုတင်ဝင်းက သိနေတော့ တနေ့မှာ ပါဆယ်ထုတ်မှာ ဘဲဥဆားနယ် တလုံးလျော့နေတယ်။ ကိုတင်ဝင်းက ထောင်ဝင်စာ မတွေ့ရသူဆိုတော့ လုံချည်ပြာက ထောင်ဝင်စာခန်းကနေ ပါဆယ်ထုတ်ကို သယ်လာပေးရတယ်။ ကိုတင်ဝင်းက ပစ္စည်းကို စစ်ဆေးပြီး၊ လက်မှတ်ထိုးယူ ရတယ်။
ဘဲဥတလုံးလျော့နေတဲ့ကိစ္စ ကိုတင်ဝင်း ပြဿနာ ရှာပါလေရော။ ပါဆယ်ထုတ်ကို လက်မခံဘူး၊ လက်မှတ်မထိုးဘူး လုပ်တယ်။ လုံချည်ပြာက တိုက်ဝါဒါ ဦးသောင်းကို သွားခေါ်လာ တယ်။ ဦးသောင်းက တောင်းပန်ရှာတယ်။ တင်ဝင်းရယ် ပြဿနာမရှာပါနဲ့ပေါ့။ ကိုတင်ဝင်းကတော့ အလျှော့ပေးလိုက်ရင် နောက်လည်း ဒီလိုပဲ ခိုးနေမှာပဲ ဆိုပြီး လက်မှတ်မထိုးဘူး တင်းခံထားတယ်။ နောက်ဆုံး ၀ါဒါတွေ ဈေးကသွားဝယ်ပြီး ဖြည့်ပေးလိုက်ရတယ်။ နောက်တော့ သိရတာ ထောင်ဝင်စာခန်းက ဘဲဥတလုံးကို နှိုက်ယူထားလိုက်တာ။ ၀ါဒါအဘသောင်းက ဗြစ်တောက်ဗြစ်တောက်နဲ့ လာပြောတယ်။ ထောင်ဝင်စာခန်းကကောင်တွေ မီးခဲကိုမှ သွားကိုင်တာ ငါတို့က အချောင် ဒုက္ခရောက်ရတော့မလို့တဲ့။

ငပိကြော်အထုတ်သေးမှု

ကျနော့်အိမ်က ငပိကြော်ကို အမြဲတမ်း အစိတ်သားနှစ်ထုတ် ထည့်ပေးနေကျ။ ဒီတခါကျပြန်တော့ ပါဆယ်ထုတ်မှာ အိမ်ကကြော်သလိုမျိုး ပုစွန်ခြောက်များများ၊ ငရုတ်သီး အရောင်ရဲရဲ၊ ကြက်သွန်ဖြူ ဥတလုံးကြီးကြီးကို အကွင်းလိုက်လှီး ထည့်ထားတာမျိုး မဟုတ်ပဲ၊ အထုတ်က ကလေးလက်သီးဆုပ်လောက် သေးသေး၊ ဆိုင်တွေက ရောင်းတန်း ကြော်ထားတာမျိုး ဖြစ်နေတယ်။
အဘသောင်းတို့ ခေါင်းစားပြန်ရော။ အဘသောင်းကလည်း မမာလာ ထောင်ဝင်စာထုတ်ထဲ မှားပါသွားသလားဆိုပြီး မိန်းမဆောင်ကို သွားပြီး မမာလာ အထုတ်မှာ သွားရှာတယ်။ မာလာကလည်း မှားစရာမရှိဘူး။ သူ့ဆီမှာ ငပိကြော် မပါဘူးတဲ့။ ကိုတင်ဝင်း ယမ်းပုံမီးကျ ဖြစ်ပြန်ရော။ ၀ါဒါတွေ လဲယူထားလိုက်တယ်ပေါ့။ အဘသောင်းကတော့ တင်ဝင်းရာ ငါသေသေချာချာ ယူလာတာပါ။ ဘယ်သူမှ မလဲပါဘူး။ ငါ့ကိုလဲ သနားပါ ဆိုတာနဲ့ ကိုတင်ဝင်း ခေါင်းညိတ်ပြီး လက်ခံ လက်မှတ်ထိုးလိုက်တယ်။
နောက်ပိုင်း အိမ်နဲ့တွေ့ရတော့မှ သိရတာ အဲဒီအခေါက်က ငပိကြော် မကြော်အားလို့ သိမ်ကြီးဈေးက အပြေးအလွှား အထုတ်တထုပ် ၀ယ်ထည့်ပေးလိုက်တာတဲ့။

ထမင်းထဲ သဲထည့်ခြင်း

ကိုတင်ဝင်းဟာ တိုက်စရာရှိရင် ဘယ်တော့မှ နောက်ဆုတ်တဲ့သူ မဟုတ်ဘူး။ ကျောင်းသားတွေဘက်၊ ကျနော်တို့ဘက်က မှား မှား မှန် မှန် ရပ်တည်ခဲ့တယ်။ တနေ့တော့ လုံချည်ပြာ ကျော်အေးက ထမင်းဝေတယ်။ ပြဿနာက ဘိုးတော်ခင်ဝင်းတို့ အခန်းက စတာ။ အဲဒီဘက်ခန်းတွေ ထမင်းဝေပြီး လာတာ နောက်ဆုံးခန်းဖြစ်တဲ့ ကျနော်တို့ အခန်းရှေ့ ရောက်နေပြီ။ လုံချည်ပြာ ထွက်သွားပြီ ထင်ပြီး ဘိုးတော်တို့ အခန်းဘက်ကနေ အခန်းတွေကို လှမ်းမေးတယ်။ ထမင်းက သဲရှပ်နေတယ်။ တခြား အခန်းတွေကော ဘယ်လိုလဲတဲ့။
လုံချည်ပြာ ကျော်အေးက ကျနော်တို့ အခန်းထမင်းဝေနေရင်း ဘိုးတော်တို့ အခန်းဘက်က လှမ်းပြောတာကို ကြားသွားတယ်။ ကျော်အေးထွက်သွားတာကို ကိုတင်ဝင်းက မြင်လိုက်တယ်။ ဒါပေမယ့် တံခါးကွယ်ပြီး အပြင်ကနေ ဘာတွေ ပြောကြလဲ ဆိုတာ ဆက်နားထောင်နေတာ ကိုတင်ဝင်း မသိဘူး။ ကျနော်တို့က သစ်သား တံခါး ပျဉ်ချပ်ကွဲနေတဲ့နေရာက အပြင် အလင်းရောင်နဲ့ လုံချည်ပြာအစကို တွေ့နေရ တယ်။ ဒါပေမယ့် ကိုတင်ဝင်းကို လှမ်းတားဖို့ မမီလိုက်တော့ဘူး။
တကယ်တော့ ဘိုးတော်တို့ အခန်းကပဲ ထမင်း သဲရှပ်နေတာ။ ဒါလဲ ပန်းကန်စင်အောင် မဆေးလို့ ဖြစ်ချင် ဖြစ်မှာ။ တခြားခန်းတွေက ဘာမှ မဖြစ်ဘူး။ ဒါကို ကိုတင်ဝင်းက ဘာပြောလဲဆိုတော့ ဟေ့ကောင်တွေ ကိစ္စမရှိဘူး၊ ငါ့ဆီမှာတော့ သဲမရှပ်ဘူး၊ ဒါပေမယ့် ငါ သံတိုင်ကြားက သဲနည်းနည်း ကြုံးထည့်လိုက်ပြီ။ ပြန်လဲခိုင်းမယ်။ ဘာမှ မပူနဲ့တဲ့။
ကိုတင်ဝင်းက တာဝန်ကျရဲဘော်ဆိုပြီး ၀ါဒါခေါ်တယ်။ သူခေါ်တာဆိုတော့ သူ့အခန်းကို တန်းလာတာ။ ဘာဖြစ်လဲပေါ့။ လုံချည်ပြာကျော်အေး ၀ါဒါနောက်က ကပ်ပါလာတယ်။ ၀ါဒါကို ကျော်အေးက ပြောခဲ့ပြီးပုံရတယ်။
ကိုတင်ဝင်းက ထမင်းမှာ သဲပါတယ်။ ကောင်းတာနဲ့ လဲပေးပါတဲ့။ တခြားအခန်းတွေက ကိုတင်ဝင်းနောက် သံယောင်လိုက်ပြီး ကျီးကန်းတွေလို ၀ိုင်းအာကြတယ်။
ဝါဒါ့ခမျာ အားလုံးက သဲပါတယ် ပြောနေတော့ ရေချိုးခန်းရှေ့ ၁၃ ခန်းကလောက်စပြီး ကျနော်တို့ ၂၁ အထိ ထမင်းတွေကို ပြန်သိမ်းသွားပြီး ပြဿနာရှာမှန်း သိသိကြီးနဲ့ အသစ်ပြန်လဲ ပေးလိုက်ရတယ်။ လုံချည်ပြာတွေကတော့ ဖိုကြီးမှာ ထမင်းသွားပြန်ထမ်းရတော့ မောတာပေါ့။

သရဲတုခြောက်ခြင်း

ပြည်ချစ်ပါတီက ကိုတင်မောင်ဦးကို ကြိုးပေးလိုက်တာ ကြိုးစင်နဲ့ အနီးကပ်ဆုံးအခန်းတွေဖြစ်တဲ့ ကျနော်တို့ အခန်းတွေက ကောင်းကောင်းကြီး ကြားလိုက် သိလိုက်တယ်။ ကိုတင်ဝင်း တော်တော်ကြီးကို စိတ်ထိခိုက်သွားတယ်။ ဥပုသ်တွေ ဘာတွေ စောင့်ပြီး အမျှတွေ ဘာတွေ ဝေလိုက်သေးတယ်။ အာဏာပိုင်တွေဟာ ကြိုးပေးပြီးတော့ ဘယ်လိုဂယက်တွေ ဖြစ်လာမယ်ဆိုတာကို ရက်တော်တော်ကြာ ဂရုစိုက် နားစွင့်တယ်။
ညဘက် ညဘက် တိုက်တွေမှာ ဘာတွေပြောကြလဲ၊ အထူးသဖြင့် ကိုတင်ဝင်းဆီကကော ဘာများကြား ရမလဲဆိုပြီး ချောင်းပြီး နားထောင်တယ်။ ဒင်းတို့ ဥာဏ်မရှိတာက အုတ်တံတိုင်းနားလာရပ်ပြီး ကပ်နားထောင်တာ ဆေးလိပ်က တဖွာဖွာနဲ့။ အပြင်လေက လှောင်နေတဲ့အခန်းတွေထဲကို ဆေးလိပ်နံ့သယ်လာတယ်။ စီးကရက်နံ့ဆိုတော့ ပိုသိသာတယ်။ အပြင်ဘက်နံရံမှာ တယောက်ယောက်တော့ ရှိနေပြီ။
ကိုတင်ဝင်းက အကြံရတယ်။ ဒီကောင်တွေ ညဘက် ဒီနားမလာရဲအောင် သရဲနဲ့ ခြောက်လွှတ်မယ်တဲ့။ ဘာဖြစ်လဲဆိုတော့ ထောင်မှူးထောင်ပိုင်တွေကအစ အကြပ် ၀ါဒါတွေအထိ ကိုးကွယ်မှု အယူသည်းကြတယ်။ ဂိုဏ်းတွေ၊ နတ်တွေ ကိုးကွယ်တယ်။ အများစုက ရွှေရင်ကျော်ဂိုဏ်းတဲ့။ အထူးတိုက်တွေ၊ အထူးဆောင်တွေကို အုပ်ချုပ်တဲ့ ထောက်လှမ်းရေးက ဆာဂျင်လှရွှေ၊ ဆာဂျင်သိန်းမြိုင်ဆိုတာ ရွှေရင်ကျော် ဂိုဏ်းသားတွေ။
ဒီတော့ ကိုတင်ဝင်းနဲ့ သူ့ ဘယ်ဘက်ခန်းက မီးမောင်းတွေနဲ့ ကြံကြတယ်။ အသားဟင်းစားရတဲ့ တနင်းလာနေ့မှာ စီမံကိန်းအကောင်အထည် ဖော်တယ်။ ညဘက် အိပ်ချိန်အော်ပြီး ခဏနေတော့ စမယ် စမယ် တဲ့။ ကျနော်တို့ကိုလဲ ပြောလိုက်သေးတယ်။ မင်းတို့ မျက်နှာတွေက စပ်ဖြဲဖြဲတွေ လုပ်မနေနဲ့တဲ့။ ရီချင်ရင် အတွင်းနံရံဘက်ကို မျက်နှာလှည့်ထားတဲ့။
ကိုတင်ဝင်းက အသံနက်၊ အသံဆိုးကြီးနဲ့ ရင်ခေါင်းထဲကအသံနဲ့ အသကုန် ညှစ်ပြီး "အောင်မယ်လေး" လို့ အော်တာ။ တထောင်လုံး ကြားလောက်တယ်။
ဆာဂျင်သိန်းမြိုင်တို့၊ ထောင်မှူးတို့ ၀ါဒါတွေ အုပ်စုလိုက်ကြီး အပြေးအလွှား ရောက်ချလာတယ်။ ကျနော်တို့ အခန်းရှေ့ အပြင်တံခါးကို ဖွင့်ပြီး ရောက်ချလာတာ။ မိန်းဂျေးက ထောင်မှူးတွေလည်း ပါတယ်။ ကိုတင်ဝင်းဆီ တန်းသွားတာပဲ။ တချို ၀ါဒါတွေက ကျနော်တို့ အခန်းရှေ့မှာ ရပ်နေကြတယ်။
ကိုတင်ဝင်းကို မေးတော့ ကိုတင်ဝင်းက ဟိုဘက်က အော်တာဆိုပြီး တဖက်ခန်းကို ညွှန်တယ်။ တဖက်ခန်း မီးမောင်းကိုကျော်မိုးက ဇာတ်လမ်းခင်းတယ်။ တကယ်တော့ အသံပြဲကြီးနဲ့ အော်တာက ကိုတင်ဝင်း။
မီးမောင်းက ကိုကျော်မိုးဆိုတဲ့ ရဲဘော်က ပြောတယ်။ ညနေက သူရတဲ့ ၀က်သားပုံစံတုံးကို မကိုက်နိုင်လို့ ဟောဒီသံတံခါးပေါ် တင်ထားတာ အိပ်ပျော်ခါနီး မှေးကနဲအဖြစ်မှာ အမွှေးတွေနဲ့ လက်မဲမဲကြီး လာနှိုက်လို့ နိုးသွားတာတဲ့။ ဆာဂျင်သိန်းမြိုင်တို့ တော်တော် ဖြုန်သွားတယ်။ ထောင်းမှူးက ကြောက်ချင်ဟန်ဆောင်နေတဲ့ ကိုကျော်မိုးကို ဖြောင့်ဖျ နှစ်သိမ့်တယ်။ သွေးလေ ခြောက်ချားလို့၊ စိတ်ထင်လို့ ဘာလို့ပေါ့။
ဒီလို အကြောက်တရားနဲ့ ဖြောင့်ဖျသူတွေကို ကိုတင်ဝင်းက ထပ်ချောက်တယ်။ မနက်စောစောတိုင် သူနိုးတဲ့အခါ တခါတလေ ဟောဒီ သွပ်မိုးပေါ်မှာ ကရင်သင်တိုင်းလို အင်္ကျီရှည်ရှည်ကြီးနဲ့ လျှောက်နေတာ။ ကြည့်ရတာ ခေါင်းမပါဘူး။ ခန္ဓာကိုယ်ချည်းပဲလို့ ပြောတယ်။ သူပြောမှ ပိုဆိုးသွားပြီ။ ကိုတင်ဝင်းက ကိုတင်မောင်ဦး လိုလို ဘာလိုလို မသိသလိုလိုနဲ့ ပြောလိုက်တာ။ သင်တိုင်းလိုလို ဘာလိုလို ဆိုတာကလည်း ကြိုးပေးရင်ဝတ်တဲ့ အင်္ကျီမျိုးဖြစ်အောင် ဇာတ်လမ်းဆင်တာ။
ကျနော်တို့ အခန်းရှေ့က ၀ါဒါတယောက်ဆို ပါးစပ်က ပွစိ ပွစိနဲ့ မန်းမှုတ်နေပြီး မြေကြီးကို စစ်ဖနပ်စီး ထားတဲ့ ဖနောက်နဲ့ ပေါက်နေတယ်။ ကျနော်တို့အခန်းက ကျော်ဝင်းကလည်း သူတရားထိုင်နေရင်လည်း မြင်တယ်တဲ့။ အဆင်းမှာ ဘီးဝင်တပ်တယ်။ ကျနော်ကတော့ ရီချင်လွန်းလို့ အသံမထွက်အောင် မျက်နှာကို ခေါင်းအုံးနဲ့ အုပ်ပြီး အတွင်းဆုံးနံရံဘက်ကို လှည့်အိပ်နေရတယ်။
ဘုရားရှိခိုးအိပ်ကြ၊ တရားမှတ်ပြီး အိပ်ကြနဲ့၊ ဆာဂျင်သိန်းမြိုင်က ပြောပြီး အာဏာပိုင်တွေ တပ်ခေါက်သွားတယ်။ အဲဒီညက စပြီး ညဘက်ဆို ဆေးလိပ်နံ့လည်း မရတော့ဘူး။ အပြင်က လာချောင်းနား မထောင်ကြတော့ဘူး။ လွတ်မြောက်တဲ့ နယ်မြေဖြစ်သွားတယ်။

ဆက်ရေးပါအုန်းမယ်။


Thursday, March 11, 2010

နန်းစကား မန်းစကား- မြန်မာတို့ရဲ့ မြန်မာစကား ၂ (အဆက်)
ရေးသူ- လူထုစိန်ဝင်း



၂၀။ မောင်းမဲ
ထိတ်လန့်ရွံ့ကြောက်စေရန် ကျယ်လောင်စူးရှသော အသံဖြင့် ပြစ်တင်ပြောဆိုသည်။ ကြိမ်းမောင်းသည်။ (ငေါက်ငမ်း၊ ခြိမ်းခြောက်၊ ဆဲရေး စသော သကားရပ်များနှင့် အနက်တွဲစပ် သုံးနှုန်းထားသည်) လို့ မြန်မာအဘိဓာန် (အကျဉ်းချုပ်)က အဓိပ္ပါယ်ဖွင့်ဆိုထားပါတယ်။
'ပြစ်တင်မောင်းမဲသည်' လို့ တွဲစပ်သုံးလေ့ ရှိကြသေးပေမယ့် 'မောင်းမဲ' တလုံးတည်းတော့ တယ်ပြီး အသုံးမလေ့ကြတော့ပါဘူး။ တော်တော်တိမ်မြုပ်နေပါပြီ။
'၀င်္ဂရွာတွင်၊ ဆာဝါနှင့်ညား၍၊ သုဘဒ်သားကို၊ ဖွားလတ်ပြီးမှ၊ ဆာဝါကမောင်းမဲ၊ တတွတ်တွတ်ဆဲသော အခါ၊ အသဲကနာ၊ စိတ်ထဲကဆာ၍' လို့ ဦးပုညက 'ဥပကနှင့် ဆာဝါဟောစာ' ထဲမှာ 'မောင်းမဲ' တလုံးတည်း သုံးသွားတာ တွေ့ရပါတယ်။


၂၁။ ဆိတ်စာ
'ငပိစိမ်းစားကလေး 'ဆိတ်စာ' လောက်ပေးပါ' ဆိုတဲ့အပြောမျိုး အညာဒေသတွေမှာ သုံးတတ်ကြသေး ပေ မယ့် ဒီနေ့ခေတ် စာပေအရေးအသားတွေမှာ တယ်ပြီး မတွေ့ရတော့ပါဘူး။
ဆိတ်စာ= အနည်းငယ်၊ တဆိတ်စာလို့ မြန်မာအဘိဓာန်ကဖွင့်ပါတယ်။
'တထွေတလာ၊ သည်တခါတွင်၊ ဆိတ်စာလွဲချော်၊ သနားတော်ကို၊ ထိပ်ပေါ်တံ့တံ့၊ ခံပါဝံ့ဟု' (သူဇာ-၃၆) လို့လည်း အထောက်အထား ပြပါတယ်။
ဦးပုညရဲ့ 'ဥပကနှင့် ဆာဝါဟောစာ' မှာလည်း
'ဘယ်ရပ်ဘယ်ရွာ၊ ဘယ်ခမ်းဝါက၊ ကြွလာသတုန်း၊ ဆိုင်းပါအုန်းသည်တွင်၊ ၀င်ပါအုန်းရှင်ဘုရား၊ နားပါအုန်းဆိတ်စာ၊ ခရီးပန်းလို့၊ ညှိုးနွမ်းရှာရော့မည်' လို့ ရေးသားထားပါတယ်။

၂၂။ အယ်
ပြည့်ဖောင်းသော၊ အလွန်များပြားသော (ဘန်း) ကြီးထွားဖွံ့ဖြိုးသော၊
'သူ့ရွှေခြေကျင်းကလည်း အယ်နေတာပဲ' အော်မြည်သောအသံ။ စသည်ဖြင့် အဘိဓာန်က ဖွင့်ဆိုပါတယ်။ ဦးပုညရဲ့ 'ဥပကနှင့် ဆာဝါဟောစာ' မှာလည်း
'တကောင်နှင့်တကောင်၊ နံဘေးချင်းမြှောင်၊ အယ်အောင်ကြီး မပူးစေနှင့်၊ တပ်ဦးက ချီတက်စေ' လို့ ရေးသားပြီး 'အယ်' ကို တအားကြီး မပူးစေနှင့်၊ သိပ်ကြီး မပူးစေနှင့် ဆိုတဲ့ အဓိပ္ပါယ်ရှိကြောင်း ပြခဲ့ပါတယ်။
အဲဒီ 'အယ်' ဆိုတဲ့စကားနဲ့ ခပ်ဆင်ဆင် ကျွန်တော်တို့ မန္တလေးသူ မန္တလေးသားတွေ အသုံးလေ့ကြတဲ့ စကားတွေ ရှိပါသေးတယ်။ အဲဒါတွေကတော့ 'အတင်း'၊ 'အဓမ္မ'၊ 'အာဏာကုန်'၊ 'ဒလကြမ်း' ဆိုတဲ့ အသုံးတွေပါ။

၂၃။ အတင်း
'သူတပါး၏ အလိုနှင့် ဆန့်ကျင်လျက် နိုင့်ထက်စီးနင်း' လို့ ဓာန်-၅၈ မှာ ဖွင့်ဆိုထားပါတယ်။
'အတင်းမျိုချတာပဲ'၊ 'ဇွတ်အတင်း ဖိပြောတာပဲ' စသဖြင့် 'မရမက' လုပ်တဲ့ အဓိပ္ပါယ်နဲ့ ပြောတတ်ကြ ပါတယ်။

၂၄။ အဓမ္မ
'မတရားသဖြင့်၊ နိုင့်ထက်စီးနင်း၊ ဇွတ်အတင်း'။ ဓာန် - ၇၂။
ဒီစကားလည်း မန္တလေးသူ မန္တလေးသားတွေ ပါးစပ်ဖျားမှာ သီးနေတဲ့ စကားပါ။ 'အဓမ္မစားတာပဲ' 'အဓမ္မ၀တာပဲ' 'အဓမ္မဆိုးတာပဲ' စတဲ့ စကားတွေဟာ 'အလွန်အမင်း'၊ 'တရားလွန်' ဆိုတဲ့ အဓိပ္ပါယ်နဲ့ ပြောတတ် ကြတာပါ။

၂၅။ အာဏာကုန်
'စွမ်းဆောင်နိုင်သည့်အတိုင်းအတာ ကုန်ဆုံးသည်အထိ အစွမ်းကုန်' ဓာန် - ၁၅၃။
'ဒီဈေးက အာဏာကုန်ပဲလား'
'ဒါ အာဏာကုန် လျှော့ထားတာပါ'
'အာဏာကုန် လိုက်လျောထားတာပါပဲ' စသဖြင့် အစွမ်းကုန်ပဲ ဆိုတဲ့သဘော ပြောလေ့ရှိကြပါတယ်။

၂၆။ ဒလကြမ်း (တရကြမ်း)
'အပြင်းအထန်၊ အင်ကြီးအားကြီးနှင့်' ဓာန် - ၈၄။
ပြင်းပြင်းထန်ထန်၊ ကြမ်းကြမ်းတမ်းတမ်း လုပ်ရပ်မျိုးကို ပြောလေ့ရှိပါတယ်။
'ဒလကြမ်း ပြေးသွားတယ်'
'ဒလကြမ်း စားတာကိုး၊ နင်မှာပေါ့'
စသဖြင့် ပြောတတ်ပါတယ်။ ကျွန်တော်တို့ ငယ်ငယ်က မန္တလေးသင်္ကြန်မှာ ဈေးချိုတော် တိုက်တန်းကြီးရှေ့က 'ဒလကြမ်း' ရေပက်အဖွဲ့ဆိုတာ ရှိပါတယ်။ မန္တလေးတမြို့လုံးက ဖလားတို့ ခွက်တို့နဲ့သာ ရေပက်ကြတဲ့ခေတ်မှာ အဲဒီ 'ဒလကြမ်း' အဖွဲ့က မီးသတ်ပိုက်ကြီးတွေနဲ့ မညှာမတာကြီး ပက်ကြတာပေါ့။ အဲဒါကြောင့် လူတွေက 'ဒလကြမ်း' အဖွဲ့လို့ ခေါ်ကြတာပါ။ 'ဒလကြမ်း' ဆိုတဲ့စကားကို တခါတလေ 'ဒလမန်းကြမ်း' လို့လည်း ပြောတတ်ကြပါတယ်။

၂၇။ ဒေါင်ကောင်း ဒုကောင်း
အရပ်အမောင်းလည်းကောင်း၊ အလုံးအထည်လည်း တုတ်ခိုင်သန်စွမ်းတဲ့ ထွားထွားကြိုင်းကြိုင်း လူစားကြီးကို ခေါ်တာပါ။ စကားလုံးကွက်တိနဲ့ မျက်စိထဲကို 'ကွင်းခနဲ ထင်းခနဲ' မြင်သွားစေတဲ့ စကားလုံးပါ။ ကွယ်ပျောက်သွားမှာ နှမြောစရာ ကောင်းလှပါတယ်။
ဒီအသုံးကို ဆရာကြီးရွှေဥဒေါင်းက 'ကိုယ်အလေးချိန် တူကောင်းတူလိမ့်မည် ဖြစ်သော်လည်း ဗန္ဓုလက ဒေါင်ကောင်း၍ ဦးတင့်တယ်က ဒုကောင်း၏' လို့ သုံးစွဲရေးသားခဲ့ပါတယ်။
(ရွှေဥဒေါင်း- လက်ထက်တော်ကြီးဝတ္ထု၊ စာ- ၈၃)

၂၈။ တော်အိ လျော်အိ
'ပေါ့တီးပေါ့ဆ' 'ဖြစ်ကတတ်ဆန်း' လုပ်တတ်တာမျိုးကို ပြောတဲ့စကားပါ။ ဆရာကြီး ရွှေဥဒေါင်းရေးပုံ ကလေးကို လေ့လာကြည့်ပါ။
'ဤကိစ္စမျိုးနှင့်ပတ်သက်၍ အင်္ဂလိပ်စကားပုံ တခုမှာ နည်းယူထိုက်၏ လုပ်သင့်သည်ဆို၍ လုပ်သော အလုပ်တခုကို တော်အိလျောအိ သဘောမထားဘဲ ကောင်းကောင်းဖြစ်အောင်လုပ်ရမည်'
(ရွှေဥဒေါင်း - တသက်တာမှတ်တမ်း (ပ) စာ - ၁၇၁)

၂၉။ ဒေါင်းတိမောင်းတိ
မြန်မာအဘိဓာန်က 'ဒေါင်းတည်မောင်တည်' 'ဒေါင်းဒီမောင်ဒီ' 'ဒေါင်းတလူ မောင်းတလူ' စသဖြင့် တည်ပုဒ်ပြပြီး ကိုးရိုးကားယား၊ ဖိုသီဖတ်သီ၊ ဖိုးရိုးဖားရားလို့ အဓိပ္ပါယ် ပေးထားပါတယ်။
ကျွန်တော်တို့ အရပ်ထဲမှာ သုံးကြတာကတော့ 'ဒေါင်းတိမောင်တိ' ပါ။ အဓိပ္ပါယ်ကတော့ အဘိဓာန်က ဖွင့်ဆိုထားတဲ့အတိုင်း 'ဖိုသီဖတ်သီ' ပါပဲ။
ဆရာကြီးရွှေဥဒေါင်းက 'ဖီးလိမ်းပြင်ဆင်မှုနှင့်ပတ်သက်၍ သူ့ခေတ်နှင့်သူ ရှေ့ဆုံးမှ ပြေးလျက်ရှိသော စံဒေ၀ီအား မျက်စိကျလာခဲ့သော ကျွန်ပ်မှာ 'ဒေါင်းတိမောင်တိ' နှင့် တော်သလို ၀တ်ဆင်ထားသော မိန်းကလေးကို မြင်ရသောအခါ မည်သို့မျှ မထိခိုက်ဘဲ ရှိ၏' လို့ တသက်တာမှတ်တမ်းမှာ သုံးခဲ့ပါတယ်။

၃၀။ ပံ့ပိုး
ဒီခေတ်မှာ 'ပံ့ပိုး' ဆိုတဲ့အသုံး တော်တော်လေး သုံးနေကြပါတယ်။ 'နိုင်ငံတော်၏ ပံ့ပိုးမှုဖြင့်' ဆိုတာမျိုး နေ့စဉ်သတင်းစာတွေမှာ တွေ့နေရပါတယ်။ ရှေးကအသုံးနဲ့ အဓိပ္ပါယ်ခြင်း ကွာခြားလာပါတယ်။ ရှေးကတော့ 'ပံ့ပိုး' တိုတာ 'ပိုးကြေးပန်းကြေးပေး' တဲ့ သဘောမျိုးနဲ့ ကဲ့ရဲ့သင်္ဂြိုဟ်တဲ့အခါမျိုးမှာ သုံးတတ်ပါတယ်။
'သူ့ဟာမတွေကို သွားပံ့ပိုးနေတာကိုး။ မိဘအတွက် ဘယ်ပေးနိုင်လိမ့်မတုန်း' လို့ မဲ့ကာ ရွဲ့ကာ ပြောတတ် ကြတာပါ။ မြန်မာအဘိဓာန်ကလည်း- 'အကျိုးမျှော်၍ ပေးကမ်းသည်' 'ကျွန်ပ်၏ဖခင်သည် ဗွေဆိုးဖောက်လျက် ဇာတ်က၍ရသော ငွေကလေးများကို ယိမ်းသမအား ပံ့ပိုးနေရသဖြင့်' စသဖြင့် အဓိပ္ပါယ် ဖွင့်ပေးထားပါတယ်။

၃၁။ ရေငယ်
အခုခေတ်မှာ ရေနည်းတယ်၊ ရေကျတယ်၊ ရေစစ်တယ်လို့သာ အသုံးလေ့ကြပါတယ်။ 'ရေငယ်' ဆိုတဲ့အသုံး သိပ်မတွေ့ရတော့ပါဘူး။
ဆရာကြီး ရွှေဥဒေါင်းက- 'အစိုးရသင်္ဘောများသည်ပင်လည်း အလွန်ရေငယ်သည့် (ဧပြီလ ၁၅ ရက်နေ့အထိ) အချိန်အပိုင်းအခြားအတွင်းသာ သွားလာနိုင်၏။ မြစ်ရေငယ်သော အချိန်အပိုင်းအခြားကိုမှ ရွေးပြီး သွားလာရခြင်းမှာ ၎င်းဒေသတလျှောက်ရှိ ဧရာဝတီဖြစ်သည် အလွန်ကျဉ်းသည်ဖြစ်၍ မြစ်ရေ အတော်အတန် ကြီးသည်ဆိုလျှင် ရေစီးကြမ်းသည်နှင့် သင်္ဘောခုတ်နှင်ဖို့ အလွန်ခဲယဉ်းသောကြောင့် ဖြစ်၏' လို့ တသက်တာ မှတ်တမ်းမှာ ရေးခဲ့ပါတယ်။

၃၂။ မြင်းခုံ
ဒီအသုံးအနှုန်းကတော့ ခေတ်ရဲ့အခြေအနေအရ ကွယ်ပျောက်သွားရတဲ့ အသုံးအနှုန်းပါ။ ခုခေတ်တော့ ကုလားထိုင်တို့၊ ခွေးခြေတို့ ဆိုတာပဲ ရှိပါတော့တယ်။ တတ်နိုင်သူတွေကတော့လည်း ဆိုဖာတို့ ဘာတို့ပေါ့လေ။
ရှေးကတော့ မြန်မာအိမ်မှန်ရင် ကုလားထိုင်အပြင် လူများများထိုင်လို့ ရရုံမက နေ့ခင်းနေ့လည် အညောင်းပြေ ကျောဆန့်လို့လည်းရတဲ့ ခုံရှည်များကိုပါ ထားလေ့ရှိပါတယ်။ နောက်မှီနဲ့ လက်တင်ပါတဲ့ ခုံရှည်ကို 'တန်းလျားခုံ' လို့ ခေါ်ပြီး နောက်မှီနဲ့ လက်တင်မပါတဲ့ ခုံရှည်ကိုတော့ 'မြင်းခုံ' လို့ခေါ်တာ ဖြစ်ပါတယ်။
'တန်းလျားခုံ' တို့၊ 'မြင်းခုံ' တို့ကို အိမ်ဝင်းထဲက အရိပ်ကောင်းတဲ့ မန်ကျည်းပင်ကြီးတွေ အောက် ချထား ပြီး နွေနေ့လည်ခင်းတွေမှာ ကျွန်တော်တို့ အညာသူ အညာသားတွေ တရေးတမော 'ငိုက်မျဉ်း' လေ့ရှိကြတာပါ။ ညဘက်ကျတော့လည်း ပူလွန်း၊ အိုက်လွန်းလို့ အိမ်ထဲမှာ မနေနိုင်တော့ အိမ်ရှေ့တလင်းပြောင်ပြောင်မှာ ခုံရှည်တွေ ချခင်းပြီး လရောင်အောက်မှာ အိမ်နီးချင်းတွေနဲ့ စကားဝိုင်းတွေ ဖွဲ့ကြရပါတယ်။ ကလေးသူငယ်တွေ အဖို့လည်း 'ကွပ်ပြစ်' ကြီးတွေပေါ်မှာ 'တုံးလုံးပက်လက်' လှဲနေတဲ့ အဘိုး၊ အဘွားတွေကို နင်းပေး၊ နှိပ်ပေးရင်း 'ရွှေယုန်နဲ့ရွှေကျား သက်ကယ်ရိတ်သွားတဲ့' ပုံပြင်တွေကို နားထောင်ကြရပါတယ်။
မြို့ပြယဉ်ကျေးမှုနဲ့ အလှမ်းဝေးသေးတဲ့ မြန်မာကျေးတောနေတို့ရဲ့ အိမ်တိုင်းမှာ 'ခုံတန်းလျား' နဲ့ 'မြင်းခုံ' ဆိုတာ မရှိမဖြစ် ပရိဘောဂတခုပါပဲ။
'ဦးတိုင်းကျော်သည် မြင်းခုံတခုပေါ်တွင် ထိုင်၍ ဖယောင်းတိုင်မီးရောင်ဖြင့် စာရေးလျက်ရှိစဉ် ခြေသံကြားသဖြင့် လှည့်ကြည့်လိုက်သည်တွင် နက်ကျော်ကြီးကို မြင်လိုက်ဟန်တူ၏' လို့ ဆရာကြီးရွှေဥဒေါင်းက လက်ထက်တော်ကြီး ၀တ္ထုမှာ ရေးခဲ့သလို 'မြင်းခုံ' ဆိုတာ မြန်မာအိမ်တအိမ်မှာ 'လိုရာသုံး' ပစ္စည်းတခု ဖြစ်ပါတယ်။

၃၃။ ချိုးကပ် ချင်းကပ်
ဒီစကားကတော့ ဒီခေတ်စာပေတွေမှာ အရေးမတွေ့ရတော့ပါဘူး။ ကျွန်တော်တို့ အညာသားတွေသာ အပြောလေ့ကြပါတော့တယ်။ အဘိဓာန်ကျမ်းမှာလည်း မပါပါဘူး။
အဘိဓာန်ကျမ်းမှာ 'ချိုးကပ်' ဆိုတဲ့စကားကိုသာ ထမင်းအိုး ချိုးကပ်တာလို့ အဓိပ္ပါယ်ပေးထားပါတယ်။ မန္တလေးသူ မန္တလေးသားတွေကတော့ အကြွင်းအကျန်ကလေး မဖြစ်စလောက်ကလေး၊ 'စဉ်းငယ်ကလေး' ဆိုတဲ့သဘောနဲ့ ပြောလေ့ရှိကြပါတယ်။
'ဦးသိန်း ဆီလုပ်ငန်းကြီး လုပ်စဉ်အခါက အမြတ်ယူတဲ့ နှုန်းထားဟာ အလွန်နည်းပါတယ်။ အရပ်စကားနဲ့ ပြောရရင် 'ချိုးကပ် ချဉ်းကပ်' စားတယ်ဆိုတာမျိုးပါ။ ဒါပေမယ့် အိုးကြီးကြီး ချက်သူဖြစ်လေတော့ ချိုးကပ်တာ လည်း ချိုးကြီးကြီး ကပ်နိုင်တာပေါ့' လို့ လူထုဒေါ်အမာက 'မန္တလေးသူ မန္တလေးသားများ' စာအုပ်မှာ ရေးခဲ့ပါတယ်။ အဲဒီစကားနဲ့ အဓိပ္ပါယ်တူ အခြားအသုံးတခုကတော့ 'မှုတ်လှန်ခွက်လှန်' ဆိုတာပါ။

၃၄။ မှုတ်လှန်ခွက်လှန်
ရှေးက ဆီကို လက်လီရောင်းတဲ့အခါ မှုတ်နဲ့ ခြင်တွယ်ညပီး ရောင်းပါတယ်။ အငယ်ဆုံး ငါးမတ်သား မှုတ်ကနေ နှစ်ကျပ်ခွဲသားမှုတ်၊ ငါးကျပ်သားမှုတ်၊ တဆယ်သားမှုတ် စသဖြင့်ရှိပြီး ဆီသည်ရဲ့ အိုးထဲက ခပ်ပြီး ၀ယ်သူရဲ့ ပုလင်းထဲ ပုံးထဲကို ကတော့နဲ့ လောင်းထည့်ပေးပါတယ်။
'မှုတ်လှန်ခွက်လှန် ကလေးပဲ စားရတာပါ၊ အမြတ် သိပ်ကျန်တာ မဟုတ်ပါဘူး' လို့ ဆီသည်တွေ ပြောတဲ့အဓိပ္ပါယ်က ခပ်ထည့်ပေးလိုက်ပြီး မှုတ်ကို ပြန်သိမ်းလိုက်တဲ့အခါ မှုတ်မှာ ပြန်ကပ်ပါလာတဲ့ ဆီတွေက အိုးထဲ ပြန်စီးကျသွားပါတယ်။ အဲဒီလို ပြန်ကျရာက ရတဲ့ ဆီကလေးတွေပဲ အမြတ်ရပါတယ်လို့ ဆိုလိုတာပါ။ များများရောင်းရလေ 'မှုတ်လှန်ခွက်လှန်' အရများလေ ဖြစ်တာဆိုတော့ ဆီသည်တွေ ဘုရားတောင် တည်နိုင်ကြတယ်။ သူတို့တည်တဲ့ဘုရားကို 'မှုတ်လှန်ခွက်လှန်ဘုရား' လို့ ခေါ်ကြတယ်လို့တောင် ပြောကြတယ်။

၃၅။ ဆွဲကောင်းငင်ပါ
သိပ်အသုံးမ၀င်လှပါဘူး၊ အဖော်သဟဲဖြစ်ရုံ လောက်ပါ၊ အသင့်အတင့်လောက် အသုံးကျရုံပါ စသဖြင့် ပြောချင်တဲ့အခါများမှာ သုံးတဲ့စကားပါ။ အဘိဓာန်ကျမ်းမှာ မပါပါဘူး။
'သူက တယောက်တည်း ပွဲစားအလုပ်ကို လုပ်စားနေတာ။ သူ့မောင်နှမတွေထဲမှာ မောင်တယောက်ကို သူ့အနားမှာ ခေါ်ထားပါရဲ့။ ဒါပေမယ့် အဲဒီမောင် ဦးအေးက 'ဆွဲကောင်းငင်ပါ' ရှိရုံပါပဲ' လို့ လူထုဒေါ်အမာရဲ့ 'မန္တလေးသူ မန္တလေးသားများ' စာအုပ်မှာ ရေးသား သုံးနှုန်းထားပုံလေးပါ။

၃၆။ မိုးကျကထိန်
အဘိဓာန်ကျမ်းမှာ 'မိုးကျလက်ဖက်' တော့ ပါပါတယ်။ 'မိုးကျကထိန်' တော့ မပါပါဘူး။ ကျွန်တော်တို့ ကျောင်းသားဘ၀က တန်ဆောင်မုန်းလပြည့် အဖိတ်နေ့ညမှာ စစ်ကိုင်းတောင်ရိုးကို မန္တလေးသူမန္တလေးသား တွေရဲ့ ထုံးစံအတိုင်း သွားကြတော့ တီးကြမှုတ်ကြ ကကြခုန်ကြ လုပ်တာ၊ 'ချောင်လည် ချောင်ပတ်'၊ တချောင်ဝင် တချောင်ထွက် လှည့်စားသောက်နေတာမျိုးလည်း မဟုတ်ပဲ အောက်လင်းဓာတ်မီးကြီးတွေ ထမ်းပြီး တတောင်ဆင်း တတောင်တက် ချောင်ကြို ချောင်ကြားက ဘုန်းကြီးကျောင်းတွေဆီ လျှောက်သွားနေတဲ့ လူတွေကို တွေ့ရလေ့ရှိပါတယ်။ အဲဒီလူတွေဟာ လူမသိ သူမသိ၊ ကထိန် လာခင်းမယ့်သူ မရှိအောင်နွမ်းပါးတဲ့ ကျောင်းတွေကို လိုက်ရှာကြတာ ဖြစ်ပါတယ်။ တွေ့ခဲ့ရင် လှူဖွယ်ပစ္စည်းကလေးတွေ ထုတ်ပြီး အဲဒီကျောင်းမှာ ကထိန်ခင်းကြတာပေါ့။ အဲဒီလို ကထိန်ခင်းတာကို 'မိုးကျကထိန်' လို့ ခေါ်တာပါ။
ဒေါ်ဒေါ်ကလည်း 'မန္တလေးသူမန္တလေးသားများ' စာအုပ်မှာ-
'ဒီမိသားစုက တနေ့ ဆန်တတင်းနဲ့ ဆွမ်းဟင်းခွက် ၂၀၀၊ ၃၀၀ နေ့တိုင်းဆွမ်းလောင်းတယ်။ တန်ဆောင်မုန်းလမှာ သင်္ကန်းအစုံ ၁၀၀၀ နဲ့ ကထိန်မရတဲ့ ကျောင်းတွေကို မိုးကျကထိန် ခင်းလှူတယ်' လို့ ရေးပြီး မိုးကျကထိန်ရဲ့ အဓိပ္ပါယ်ကို ပြောပြထားပါတယ်။

၃၇။ ချသ်ရဲပြေ
အာသာပြေရုံသဘော၊ ချဉ်ခြင်းအတပ်ပျောက်ရုံသဘော၊ ဖြစ်ကတတ်ဆန်း လုပ်ရတာမျိုးကို ပြောတာပါ။` ဒေါ်ဒေါ်ရဲ့ 'မန္တလေးသူမန္တလေးသားများ' စာအုပ်မှာပဲ
'ဒါကြောင့် အစစ်ကမူ သူဌေးများအတွက်၊ အတုကလေးတွေက ဆင်းရဲသားများ 'ချဉ်ရဲပြေ' ၀တ်ဆင်ရန်အတွက် ဖြစ်လာရတာပေါ့' လို့ ရေးသားထားပါသေးတယ်။

၃၈။ အလံရှူး
အလံရှူးဆိုတာက ထိုးသားယောင်ဆောင်နေတဲ့ ဒိုင်ရဲ့ဘက်သား 'ကိုယ့်လူသူ့ဘက်သား' ကို ခေါ်တာပါ။ 'ဒလန်' လို့လည်း သုံးတတ်ကြပါသေးတယ်။ ဒီခေတ်မှာ 'ဒလျှို ဒလန်' (သူလျှို ဒလန်) ကို အသုံးများလို့ 'အလံရှူး' အတွေ့ရ နည်းနေပါပြီ။

၃၉။ ဆင်ပွဲ ပ၀ါပျောက်သလို
မထူးဆန်းတော့တဲ့ ဖြစ်ရိုးဖြစ်စဉ်၊ ဖြစ်ရပ်မျိုးတွေကို ပြောတဲ့ အသုံးပါ။ ဒါနဲ့ ပတ်သက်လို့ လူထုဒေါ်အမာက-
'ဆင်ပွဲ ပ၀ါပျောက်သလို' ဆိုတဲ့ စကားပုံတခုဟာ အဲဒီ ဆင်ပွဲက ဖြစ်ပေါ်လာတာပါ။ ဆင်နဲ့ လူ ကစားကြရာမှာ လူက အသက်ဘေးက သီသီကလေးလွတ်အောင် တိမ်းရှောင်လိုက်နိုင်ရင် ပွဲကြည့်တွေက သဘောကျလွန်းလို့ ခေါင်းက ပ၀ါကို ချွတ်ပြီး မြှောက်ကြ၊ ဟစ်ကြ၊ ကြွေးကြ သြဘာပေးကြသတဲ့။ ပ၀ါချွတ်မြှောက်တဲ့အခါ ဆင်ကျုံးပေါ်က မြှောက်တာဆိုတော့ ကိုယ့်ပ၀ါကိုယ် ပြန်ဖမ်းမိချင်မှ မိတာကိုး။ ကျုံးထဲကျချင်လည်း ကျသွားတာပဲ။ တချို့ကျတော့ ဆင်သမားကို သဘောကျလွန်းလို့ ခေါင်းကပ၀ါကိုချွတ်ပြီး ဆင်သမားဆီ ပေါက်ထည့်လိုက်တယ်။ အဲဒီပ၀ါနဲ့ မင့် ဆုချတယ်ပေါ့။
ဒါကြောင့် ဆင်ပွဲပြန်ရင် ခေါင်းပေါ်မှာ ပ၀ါပြန်ပါလာတဲ့ လူက အနည်းသား။ လူချည်းပြန်ခဲ့ကြတာပဲ များတာပဲ။ ဒိတော့ အိမ်က လူများက 'မင်းခေါင်းက ပ၀ါရော' လို့ ဆီးမေးရင် 'သိကြားသားမို့လား။ ကျုပ်လည်း ပ၀ါပျောက်ခဲ့ပြီ' လို့ ဖြေတတ်သတဲ့။
ဒါကြောင့် ဖြစ်ရိုးဖြစ်စဉ်။ သူသူငါငါ ဖြစ်နေကျ ကိစ္စမျိုးနဲ့ ကြုံတဲ့အခါ 'ဆင်ပွဲပ၀ါပျောက်သလိုပေါ့' လို့ ပုံခိုင်း ပြောတတ်သတဲ့လေ စသဖြင့် 'ရွှေဒေါင်းတောင်ဆောင်ပါးများ' စာအုပ်ထဲက 'ဆင်ပွဲ' ဆိုတဲ့ စာမှာ ရှင်းလင်းရေးသားထားတာကို တင်ပြလိုက်ရပါတယ်။

လူထုစိန်ဝင်း
စာပေဂျာနယ်၊ အောက်တိုဘာ ၁၉၉၆။
{လူထုစိန်ဝင်း ရဲ့ ပျောက်ကွယ်လုနီပါး မြန်မာစကားများ- နန်းစကား မန်းစကား မြန်မာတို့ရဲ့ မြန်မာစကား စာအုပ်၊ ပထမနှိပ်ခြင်း၊ ၂၀၀၆ ဇန်န၀ါရီ မှ ကူးယူဖော်ပြပါတယ်။}


Monday, March 1, 2010

မြန်မာအခေါ်ခံရဖို့ မထိုက်တန်တဲ့သူတွေ
ရေးသူ- လူထုစိန်ဝင်း



[အင်တာနက်ကနေ ရဲဘော်တယောက်က အီးမေလ်ပို့လို့ ကြိုက်တာနဲ့ မာယာမှာ ကောက်တင်လိုက်တာ ဖြစ်ပါတယ်။ မူရင်းစာစောင်၊ ဂျာနယ်၊ စာအုပ်နံမည် ရှာတွေ့ရင် ဖြည့်စွက်တင်ပြပေးပါမယ်။ ဒီဆောင်းပါးကို ပြန်ရိုက်ပြီး ပို့ပေး၊ တင်ပေးသူများကိုလည်း ကျေးဇူးတင်ပါတယ်။]


ဖေဖော်ဝါရီ ၂၃ ရက်နေ့က ကျောင်းသူဟောင်း သုံးယောက် ရောက်လာတယ်။ တစ်ယောက်က တိုကျိုက၊ တစ်ယောက်က တိုင်ပေ က၊ နောက်တစ်ယောက်ကတော့ တိုင်ပေမှာ လေး၊ ငါး၊ ခြောက်နှစ် သွားနေပြီးမှ ရန်ကုန်ပြန်လာနေသူ ဖြစ်တယ်။ တိုင်ပေကတစ်ယောက် ကတော့ တရုတ်နှစ်သစ်ကူးအချိန် ရောက်တိုင်း ပြန်လာနေကျဖြစ်ပေမယ့် ဂျပန်ကတစ်ယောက်ကတော့ ထွက်သွားပြီးကတည်းက အခုမှပထမဆုံး အကြိမ်ပြန်တွေ့ရတာ ဖြစ်တယ်။


ဗမာစကားပီသတဲ့လူတွေ

သုံးယောက်သားချိန်းပြီး အတူရောက်လာကြတာဆိုတော့ စကား တွေပြောလို့ မကုန်အောင်ဖြစ်နေကြ တယ်။ အဲဒီလိုစကားပြောကြရင်းက တစ်ခုသတိထားလိုက်မိတယ်။ ဂျပန် ကလာတဲ့ တပည့်မက ဗမာစကားကို ဘာသံမှမ၀ဲဘဲ ပီပီသသကြီးပြောနေတဲ့အချက် ဖြစ်တယ်။ အခုတလော ရေဒီယိုကနေကြားကြားနေရတဲ့ ဂျပန်ရောက်ဗမာတွေရဲ့စကားပြောသံတွေ ဟာ ဂျပန်သံဝဲ၀ဲ နေကြတာတွေ့ရတယ်။ စကားပြောရင်းနောက်ဆုံး စကားလုံးကျရင် အသံကိုသံရှည်ဆွဲ သွားပြီးမှ ရုတ်တရက် ရပ်ပစ်လိုက်ကြတယ်။ ဂျပန်စကားပြောနေကျမို့ နေမှာပဲလို့မှတ်ထင်နေတယ်။ ဟောအခု တစ်ယောက်ကတော့ ဘာသံမှမ၀ဲဘဲ ဗမာစကားကို ဗမာလိုပဲပီပီသသကြီး ကိုပြောနေလိုက်တာ အံ့သြတောင် သွားရတယ်။ တကယ်တော့ သူက ဗမာတောင်မဟုတ်ပါဘူး။ လားရှိုး ဇာတိ မြန်မာပြည်ပေါက် တရုတ်မလေးပါ။ စက်မှုတက္ကသိုလ်က ဗိသု ကာဘွဲ့ရပြီး ၁၉၈၈ ခုနှစ် မတိုင်မီက တည်းက ဂျပန်ကို ထွက်သွားတာဖြစ် ပါတယ်။ အခုရောက်လာတဲ့ သုံးယောက်စလုံး တရုတ်မလေးတွေပါ။ တိုင်ပေမှာနေသူကလည်း ဟိုမှာ နှစ်ပေါင်းနှစ်ဆယ်ကျော်ပါပြီ။ ဘာသံမှ မ၀ဲပါဘူး။

ဗမာစကားမပီသတဲ့ဗမာတွေ

အသံမ၀ဲရုံတင်မဟုတ်ဘူး။ သူ က မြန်မာပြည်ကိုလည်း ချစ်ပါ တယ်။ နှစ်ကူးချိန်ရောက်တိုင်း တစ်နှစ်တစ်ခေါက် ရောက်အောင်ပြန်ပါ တယ်။ ရောက်တာနဲ့သူ့ဇာတိ ဇီးကုန်း ကိုပြန်ပြီး ငယ်စဉ်က ဆရာသမား တွေကိုလိုက်လံ တွေ့ဆုံပြီးကန်တော့ ပါတယ်။ ဘုန်းကြီးကျောင်းတွေ ဘာတွေကိုလည်း လှူဒါန်းမှုတွေ လုပ်ပါတယ်။ သူက တိုင်ပေကအဆင့်မြင့် နိုင်ငံတကာဟိုတယ်ကြီးတစ်ခုမှာ မန်နေဂျာအဆင့် ရာထူးရထားပါတယ်။ ဒါပေမဲ့ သူများတကာတွေလို မိဘဆွေမျိုးတွေပါခေါ်ပြီး ဟိုမှာမနေပါ ဘူး။ တစ်ယောက်တည်းပဲ နေပါတယ်။ သူတို့တစ်တွေလို နှစ်ပေါင်းနှစ်ဆယ်၊ အစိတ်နိုင်ငံခြားသွားနေတဲ့ မြန်မာပြည်ပေါက် တရုတ်မလေးတွေက ဗမာ စကားပီပီသသပြောပြီး မြန်မာပြည် ကို ချစ်နေကြပေမယ့် လွန်ခဲ့တဲ့လေး ငါးနှစ်ကမှ နိုင်ငံခြားရောက်သွားတဲ့ ဗမာစစ်စစ်တွေက ဗမာစကားကိုနိုင်ငံခြားသံဝဲပြီး ပြောနေကြတာကိုတော့ ဘယ်လိုမှနားမလည်နိုင်တာ အမှန်ပါပဲ။

မြန်မာပြည်နဲ့မတန်ဘူးတဲ့

တချို့များ ဗမာစကားကို နိုင်ငံခြားသံဝဲပြီး ပြောရုံတောင်မကပါဘူး။ သူတို့တတ်ထားတဲ့ ပညာတွေဟာ မြန်မာပြည်နဲ့ မတန်အောင် မြင့်နေတဲ့ အတွက် ပြန်လာလည်းအချည်းနှီးပဲ လို့တောင်ပြောတတ်ကြသေးတယ်။ တတ်ထားတဲ့ပညာနဲ့ လူသားတွေကို အကျိုးပြုနေဖို့ပဲလိုတယ်။ ဘယ်နိုင်ငံသားဖြစ်ရမယ်ဆိုတဲ့ ကျဉ်းမြောင်းတဲ့ အမြင်မျိုးမထားသင့်ဘူး။ ဂလိုဘယ်လိုက်ဇေးရှင်းခေတ်မှာ ဂလိုဘယ် အ မြင်ရှိဖို့ လိုတယ်။ ဟိုနိုင်ငံသား၊ ဒီနိုင်ငံသားဆိုတဲ့ သတ်မှတ်ချက်တွေဟာ ခေတ်နဲ့ မညီတော့ဘူး။ လူသားအားလုံးဟာ ကမ္ဘာသူ၊ ကမ္ဘာသားတွေပဲ လို့ ကြည့်တတ်မြင်တတ်ရမယ်လို့လည်း ပြောလေ့ရှိကြတယ်။ အရှက် မရှိလို့ မျက်နှာပြောင်တိုက်ပြီးပြောနေ ကြတာပါ။ ကိုယ့်ရပ်ကိုယ့်ရွာကကိုယ့် ဆွေမျိုးအသိုင်းအ၀ိုင်းကိုတောင် အကျိုးပြုချင်တဲ့ စေတနာမရှိတဲ့သူမျိုးက ကမ္ဘာ့ လူသားတွေကို အကျိုးပြုမယ်လို့ ပြောနေတာကိုဘယ်သူက ယုံမှာလဲ။

သူများတွေပါ အမြီးပြတ်စေချင်လို့

လူပုဂ္ဂိုလ်တစ်ဦးတစ်ယောက် ချင်း ကိုယ်နေချင်ရာနေ၊ ကိုယ်လုပ်ချင်တာလုပ်၊ ကိုယ့်အပူမဟုတ်လို့ ဘာမှပြောစရာမရှိပါဘူး။ ဒါပေမဲ့ ကိုယ့်ဟာကိုယ် အမြီးပြတ်တာကို ဆိတ်ဆိတ်မနေဘဲ သူများတွေပါ အမြီးလိုက်ဖြတ်ဖို့ တောင်ပြောမြောက်ပြော လျောက်ပြောနေတာတွေတော့ သည်း မခံနိုင်ဘူး။ ဒါပေမဲ့ တော်ပါသေးတယ်။ အဲဒီလို အမြီးပြတ်တွေက လက်တစ်ဆုပ်စာလောက်သာရှိလို့။ နိုင်ငံခြားရောက် မြန်မာလူငယ်တွေ အများစုကတော့ သူတို့လိုမဟုတ်ကြ ဘူး။ ကြိုးစားပမ်းစားအလုပ်တွေ လုပ်ပြီး မိဘတွေကိုကျေးဇူးဆပ်နေ ကြရှာတာပါ။ တချို့များ အလုပ်နှစ် မျိုးပြောင်းပြီး တစ်နေ့ကို ၁၆ နာရီ လောက်အထိကို လုပ်ကြရရှာတာ။ တချို့ကျတော့လည်း အလုပ်တစ်ဖက်လုပ်ရင်းနဲ့ ကျောင်းတက်ပညာ သင်လိုက်ကြသေးတယ်။ ဒီကြားထဲ ကတောင် မိဘတွေဆီလစဉ်မပျက်မကွက် လှမ်းပြီးကန်တော့နေကြတာ ချီးကျူးစရာကောင်းလှတယ်။

တွံတေးသိန်းတန်ကြိုက်ကြလွန်းလို့

အနှစ်နှစ်ဆယ်၊ အစိတ် နိုင်ငံခြားသွားမယ့်သူတွေကို အင်္ဂလိပ် စကားပြောသင်တဲ့ ဆရာလုပ်ခဲ့တာဆို တော့ ကမ္ဘာ့နိုင်ငံအတော်များများမှာ ကျောင်းသူကျောင်းသားတွေထောင် နဲ့ချီပြီးရှိနေကြပါတယ်။ မြန်မာပြည် ဟာ သူတို့ပညာနဲ့မထိုက်တန်သေးလို့ ပြန်မလာဘူးလို့ ပြောတဲ့သူ ကိုယ့်ကျောင်းသူကျောင်းသားထဲက လေး ငါးယောက်ထက်မပိုပါဘူး။ အများစုက မြန်မာပြည်ကို လွမ်းတသသနဲ့ နေနေကြတာချည်းပါ။ တွံတေးသိန်းတန်နဲ့ ဟင်္သာတထွန်းရင် သီချင်းခွေတွေဆို ကိုယ်ကသာနားမထောင်တာ တပည့်တွေမှာလို့ ခဏခဏ၀ယ်ပို့နေ ရတယ်။ တချို့များ ကြံကြံဖန်ဖန် ကျောက်ငရုတ်ဆုံနဲ့ လဲမှို့ခေါင်းအုံး တောင်မှာလို့ပို့ရတယ်။ အမေရိကန် မှာ မွေးပြီး ဟိုမှာပဲကြီးတဲ့ တစ်ဦးတည်းသော မြေးယောက်ျားလေးက တောင်မြန်မာပြည်ကအချဉ်ထုပ်တွေ နဲ့ လက်ဖက်သုပ်ကိုသိပ်ကြိုက်တာ။ ''များများနဲ့မြန်မြန်ပို့ပါဖိုးဖိုး'' လို့ဖုန်း ဆက်တိုင်းပြောလေ့ရှိပါတယ်။

သူတို့ပြန်လာကြမှာပါ

အဖေဗမာ၊ အမေဗမာဆိုတော့ မြေးကလေးရဲ့ကိုယ်ထဲမှာ စီးဆင်းနေတဲ့သွေးတွေက ဗမာ့သွေးတွေချည်း မဟုတ်လား။ ဇာတိသွေးဆိုတာ ပျောက်ခဲပါတယ်။ ဗမာသွေးမနှော တဲ့ တပည့်မလေးတွေတောင် မြန်မာ့ မြေမှာမွေး၊ မြန်မာ့လေကိုရှူ၊ မြန်မာ့ ရေကိုသောက်ပြီး မြန်မာ့ဆန်ကိုစားခဲ့ ကြတာ ဖြစ်လေတော့ မြန်မာပြည်ကိုပဲ လွမ်းတသသဖြစ်နေကြတာပါ။ အခွင့်သာတိုင်း မြန်မာပြည်ကိုပြန်လာ ကြပါတယ်။ ကိုယ့်နိုင်ငံအပြင်ထွက် ပြီး နိုင်ငံစုံရောက်ဖူးလေလေ မြန်မာ ပြည်လောက်နေချင်စရာကောင်းတဲ့ ပျော်စရာကောင်းတဲ့နိုင်ငံမရှိဘူးဆိုတာ သိလေလေဖြစ်တာကြောင့် တစ်နေ့မှာ သူတို့ပြန်လာကြမှာပါ။ မြန်မာပြည်ဟာ သူတို့ပညာနဲ့ မထိုက်တန်သေးဘူးဆိုတဲ့ လူတွေကိုလည်းစကား တစ်ခွန်းပြောချင်ပါတယ်။ သူတို့ရဲ့ စိတ်ဓာတ်မျိုးတွေဟာ မြန်မာလူမျိုး ဖြစ်ဖို့ထိုက်တန်တဲ့ အဆင့်မဟုတ်ဘူး ဆိုတာပဲဖြစ်ပါတယ်။

အနတ္တကို ဦးထိပ်ထား

မြန်မာလူမျိုးဖြစ်ဖို့ဆိုတာ လွယ်တယ်ထင်သလား။ ဗြဟ္မစိုရ်တရားနဲ့ ဟီရိသြတပ္ပတရားတွေကို နားလည် သဘောပေါက်ပြီး လိုက်နာကျင့်သုံး မှ မြန်မာလူမျိုးစစ်တာ။ နိုင်ငံခြားမှာ ဘယ်လောက်အကြာကြီးနေနေ ဒီတရားတွေကို လိုက်နာကျင့်ကြံနေသရွေ့မြန်မာလူမျိုးလို့ ခေါ်နိုင်တယ်။ ဒီ တရားတွေကို လုံးဝပစ်ပယ်ပြီး 'ဘယ်သူသေသေငတေမာပြီးရော' ဆိုတဲ့ စိတ်ဓာတ်မျိုးထားသူဆိုရင်တော့ မြန်မာနိုင်ငံတွင်းမှာနေလည်း မြန်မာလူ မျိုးလို့ အခေါ်ခံရဖို့ မထိုက်တန်ပါဘူး။ မြန်မာစိတ်၊ မြန်မာစရိုက်ရဲ့ အနှစ် သာရက 'အတ္တ' ကိုပယ်ခွာခြင်းဖြစ်တယ်။ ဗုဒ္ဓဆုံးမခဲ့တဲ့ 'အနတ္တ' တရား ကိုဦးထိပ်ထားကြတယ်။ ''ဘယ်သူ သေသေ ငတေမာပြီးရော'' စိတ်က 'အတ္တ' လွန်ကဲမှုဖြစ်တယ်။ လူအများ ဘာဖြစ်ဖြစ် 'ငါ' ကောင်းစားဖို့သာ အဓိကဆိုတဲ့စိတ်ဖြစ်တယ်။ ဒီလူမျိုး တွေက မျောက်ပြဆန်တောင်းလုပ်တာမျိုးကိုလည်း ရှက်ရကောင်းမှန်း မသိဘူး၊ကြောက်ရကောင်းမှန်းလည်း မသိဘူး။ မေတ္တာ၊ကရုဏာ၊ စေတနာ ဆိုတာတွေလည်းနားမလည်ပါဘူး။ ဒီလူမျိုးတွေဟာ မြန်မာလို့အခေါ် ခံရဖို့ မထိုက်တန်သူတွေပါ။