Wednesday, February 23, 2011
အော်-မဲနယ်တောင်
ရေးသူ- ဖိုးသံ(လူထု)
မဲနယ်တောင်ပေါ်မှာ နွေဦးပေါက်ပါတော့မယ်။ ဆောင်းခိုစရာမရှိ။ တုန်ကျင်နေအောင်ချမ်းတဲ့ ဥတုရာသီကို တည်ငြိမ်စွာ ရင်ဆိုင်ခဲ့ရာကနေ နွေးထွေးတဲ့ကာလဆီကို ရုန်းထွက်စပြုပါပြီ။
အဲဒီလိုနွေနဲ့ဆောင်း အပြိုင်လုနေကြတဲ့တမနက်မှာ ကျနော်နေတဲ့ဦးကျော်စိန်ရဲ့အိမ်ကို ဦးခွန်ထီးရောက်လာခဲ့ ပါတယ်။ ကျနော့်ကိုလာခေါ်တာပါ။ တောင်ကြီးဦးထွန်းမြင့်လေးနဲ့သူတို့ ဗမာပြည်ကွန်မြူနစ်ပါတီမြေအောက်လုပ်နေတဲ့ ရဲဘော်တွေကိုအဆက်ရပြီဆိုတဲ့ သဘောဖြစ်ပါတယ်။ သူကဂျစ်ကားတစင်းငှားလာခဲ့ပါတယ်။ ဒါကြောင့်မနက်စာစားပြီး ချက်ခြင်းလိုက်ဖို့ပဲပြင်ရပါတယ်။ ကိုယ်ပိုက်ပစ္စည်းရယ်လို့ ဘာမှမရှိလေတော့ပြင်ရတာဘာမှမခက်ပါ။ ခက်တာကခွဲခွာရ တာပါ။
မဲနယ်တောင်ကြီးကိုကျနော်ကချစ်နေမိလို့ပါပဲ။ ကျနော်ပထမဆုံးတောခိုတဲ့နေရာ။ ကျနော်ပထမဆုံးသေနတ်ကိုင် ဖူးတဲ့၊ ပထမဆုံးတိုက်ပွဲကလေးတိုက်ဖူးတဲ့ နေရမဟုတ်လား။ ဒီတောင်ပေါ်မှာကျနော့်ကိုမျက်နှာတင်းတင်းနဲ့ကြည့်သူ၊ ငြိုငြင်တဲ့လူလို့တယောက်မှ မကြုံခဲ့ရပါဘူး။ ကြည်လင်တဲ့အပြုံးတွေချည့် မြင်တွေ့ခဲ့ရဖူးပါတယ်။ “ခွေအုံဖူးမဲကောင်” (ပအို့ဝ်စကား- ကျနော်မဲနယ်တောင်မှာနေဖူးတယ်)လို့ နောင်မှာကျနော်ဂုဏ်ယူစွာပြောလေ့ရှိရတဲ့ တောင်တန်းကြီးဖြစ် ပါတယ်။ ကမ္ဘာမြေကြီးကိုပေါက်ပြားနဲ့ပေါက်တာဟာ ကမ္ဘာမြေကြီးကိုချစ်မြတ်နိုးရာကျတယ်ဆိုတဲ့ အဆိုစကားကို ကျနော်တက္ကသိုလ်မှာနေတုန်းက နောင်တော်ကဗျာဆရာကိုကြည်အောင် မကြာခဏပြောတာကြားရဖူးပါတယ်။ ကျနော်လည်း မဲနယ်တောင်ကြီးပေါ်မှာ သနပ်ဖက်ခင်းတွေပေါက်၊ ကြက်သွန်ခင်းတွေပေါက်ခဲ့တာ နည်းမှမနည်းတော့ပဲ။
မဲနယ်တောင်ကလူတွေက မဲနယ်တောင်ဟာပအို့ဝ်လူမျိုးတွေရဲ့ ယဉ်ကျေးမှုကိုထိန်းသိမ်းဆက်ခံတဲ့ ဗဟိုလို့သဘော ထားပြောဆိုလေ့ရှိကြပါတယ်။ ဘုန်းကြီးကျောင်းကြီးတွေဟာ တိုင်တရာနီးပါးရှိကြပြီး သံယာတော်တွေဟာ အင်မတန် ကြည်ညိုလေးစားတာ ခံကြရပါတယ်။ သံဃာတော်တွေကလည်း ရွာထဲလာလည်ဆိုတာမျိုးလုံးဝမရှိပဲ ကျောင်းပရ၀ုဏ်ထဲ မှာပဲကျောင်းစည်းကမ်းနဲ့အညီနေကြပါတယ်။ အဲဒီဒေသမှာလောင်းကစားတယမရှိသလို၊ မူးယစ်ဆေးဝါးနဲ့ ဘိန်းဘင်း ကဇော်လည်းမရှိပါ။ အရက်တော့သောက်ကြပါတယ်။ ဒါပေမဲ့အရက်မူးလို့ရမ်းတယ်၊ ကြမ်းတယ်ဆိုတာမျိုးတခါမှမတွေရ ဖူးပါဘူး။ အရက်မူးလို့် ရွာလမ်းမှာက’နေတာမျိုးတော့တွေ့ရဖူးပါတယ်။
ကြုံလို့ ကျနော်ဒီတောင်ပေါ်မှာ တံတားပြင်ခဲ့တဲ့အတွေ့အကြုံလေးတခုပြောပြချင်ပါတယ်။ မဲနယ်တောင်တန်းကြီး ပေါ်က ကျနော်တို့နေတဲ့တကြောမှာရွာတွေဟာ တောင်ခါးပန်းက ချောင်းရိုးတလျှောက်မှာ စီတန်းတည်ရှိနေတယ်လို့ ဆိုရင်ရပါတယ်။ နောက်ပြီးရွာကြီးတွေကဆက်နေတာပါ။ တချို့ဆိုရင် တရွာနဲ့တရွာ ကိုက်နှစ်ရာ-သုံးရာပဲဝေးပြီး ဝေးလှ၊ ကွာလှပါတယ်ဆိုတောင်မှ နှစ်မိုင်လောက်ထက်ပိုပြီး ရွာပြတ်တာမရှိသလောက်ပါပဲ။ ဒီတော့ ဒီချောင်းရိုးတလျှောက်က ကားလမ်းဟာအင်မတန်မှအခရာကျပါတယ်။ ကျနော်ပါဝင်တယ်ဆိုတဲ့ တံတားပြင်ပွဲဟာ ကျနော်နေတဲ့ရွာအောက်နား လေးတင်၊ ၄ဖာလုံလောက်အကွာနေရာမှာရှိပါတယ်။ အဲဒီနေ့မနက်မှာ လမ်းပြင်ဖို့အတွက်ရွာထဲမှာတရက်ကြိုပြီး လူစုံတဲ့ ညနေစောင်းမှာ ကာလသားခေါင်းလုပ်သူက ရွာထဲမှာ“မူနမ်ရွေ့၊ ခိုဘမ်းရွေ့”ဆိုပြီးလိုက်ဗျိုးဟစ်ပါတယ်။ ဗမာလိုဆိုရင် “အပျိုတို့၊ လူပျိုတို့”လို့ဆော်သြတာပါ။ ဒီနေရာမှာ ရကောက်ကို‘r’အသံထွက်ပါတယ်။ တံတားပတ်ဝန်းကျင်က ရွာတွေကအပျိုလူပျိုသာမက လူအိုနဲ့လူနာကလွဲရင်အကုန်လုံးလာရပါတယ်။ မနက်စာထမင်းစားပြီးတာနဲ့ (၉နာရီ၊ ၁၀ နာရီအချိန်လောက်)တံတားပြင်မယ့်နေရာကို ရောက်ကြပါတယ်။ ပြင်ရမယ့်အလုပ်က ချောင်းရိုးထဲမှခုတ်ချထားတဲ့၊ အကိုင်းတွေခုတ်ဖြတ်ထားတဲ့ သစ်ပင်ကြီးနှစ်ပင်ကိုကြိုးနဲ့ဆွဲတင်ရတာပါ။ လူ့လက်သုံးဖက်လောက်တုတ်ပြီး အလျား၅လံ ၆လံလောက်ရှိတဲ့ သစ်လုံးကြီးတွေကို အနက်ပေ ၁၀၀နီးပါ်းရှိတဲ့ချောက်ထဲကနေ အကွာကိုက်၂၀၀လောက်ရှိတဲ့နေရာ အထိဆွဲရတာဟာ လွယ်တဲ့အလုပ်မဟုတ်ပါဘူး။ ရွာလေးငါးရွာကသန်သန်မာမာလူပေါင်း ၃-၄၀၀လောက်နဲ့ဆွဲတင် ကြတာရဖြစ်ပါတယ်။ ကာလသားခေါင်းတယောက်ကနေ မောင်းကလေးတလုံးနဲ့ညာသံပေးသလို တီးပေးနေပြီး အားလုံးကတညီထဲဝိုင်းဆွဲတင်ကြပါတယ်။ ကျနော့်အထင် သစ်လုံးကြီးနှစ်လုံးကို ၂နာရီကျော် ၃နာရီလောက်ဆွဲတင် ရပါတယ်။ ရွာစုံကလူစုံလာကြတာဆိုတော့ အားလုံးတပျော်တပါကြီးလုပ်ကြပြီး ပြီးတဲ့အခါမှာလူစုခွဲလိုက်ကြပါတယ်။ ကျနော့်အဖို့ကတော့ ကိုယ်နေတဲ့ရွာကလူတွေနဲ့ရော တခြားရွာကလူတွေနဲ့ပါရင်းနှီးလိုက်ရတာဟာ အမြတ်ဖြစ်ပါပဲ။
ကျနော်ရောက်သွားတဲ့အချိန်က မိုးတွင်းကြီး၊ ၀ါတွင်းကြီးဖြစ်လေတော့ အဖိတ်နေ့တိုင်းမှာ ဘုန်းကြီးကျောင်းပို့ဖို့ ရွာတွေက ဆွမ်းချက်ပွဲတွေလုပ်ကြပါတယ်။ ဆွမ်းချက်ပွဲဆိုတာက ရွာထဲကအိမ်တွေမှာ ကာလသား ကာလသမီးတွေက အလှည့်ကျချက်ကြတာဆိုတော့ စည်ကားတော့တာပေါ့။ သူတို့ဆီမှာကအပျိုလည်တဲ့ဓလေ့လည်းရှိတာကိုး။ တနေ့လုံး ပင်ပင်ပမ်းပမ်းအလုပ်လုပ်ကြရတဲ့ လူငယ်တွေအဖို့ဖျော်ဖြေစရာဆိုလို့ ဒီတခုထဲရှိတာဖြစ်ပါတယ်။ ဒါကြောင့် ညမို့ ရောက်လာတယ်ဆိုရင် ကာလသား ၄-၅ယောက်တဖွဲ့စုပြီးအပျိုတွေရဲ့အိမ်ကိုသွားလည်ကြပါတယ်။ အိမ့်ရှင်အပျိုဟာ လာလည်တဲ့ကာလသားကို လက်ခံစကားပြောရပါတယ်။ လက်မခံလို့မရပါဘူး။ တခါတလေဆိုရင် တခြား ရွာက၊ ဒါမှမဟုတ်တရပ်တကျေးက လူပျိုတွေကိုကိုယ့်ရွာသားတွေဲ ခေါ်လာတာမျိုးလည်းရှိတတ်ပါတယ်။ ဒါဆိုလည်း လက်ခံ ရပါတယ်။ ပြီးရင် ယောက်ျားလေးက “မင်းကိုငါသိပ်ချစ်တယ်။ ငါ့ကိုချစ်သလား”လို့မေးရင် မိန်းကလေးက ချစ်သည် ဖြစ်စေ၊ မချစ်သည်ဖြစ်စေ “ချစ်ပါတယ်”လို့ပဲပြန်ပြောရပါတယ်။ မချစ်ဘူးလို့မပြောရပါဘူး။ ဒါပေမဲ့အဲဒီလို အချိန်မှာ ပြောတဲ့စကားကို အတည်ယူလို့မရပါဘူး။ ထုံးစံမို့ပြောနေတာပဲဆိုတာကို နှစ်ဘက်လုံးနားလည်ရပါတယ်။ အဲဒီလို ထမင်းချက်တဲ့အိမ်ဆီက ထိန်ထိန်ငြီးနေတဲ့အောက်လင်းဓာတ်မီးရောင်တွေနဲ့ အိုးစည်သံလင်းကွင်းသံလည်း ပျံ့လွင့်နေ တတ်ပါတယ်။
ဒီလိုနဲ့သီတင်းကျွတ်တဲ့အချိန်ရောက်တော့ ကျနော့်အထင် အဲဒီကပအို့ယဉ်ကျေးမှုရဲ့ အထွတ်အထိပ်ကိုတွေ့ရပါ တော့တယ်။ စောစောကပြောခဲ့တဲ့ တိုင်တရာနီးပါးရှိတဲ့ဘုန်းကြီးကျောင်းကြီးတွေမှာ လှူဖွယ်ပစ္စည်းတွေနဲ့ ပွဲတော်တွေ ကျင်းပကြပါတယ်။ တကျောင်းပြီးတကျောင်း အလှည့်ကျကျင်းပကြတဲ့ ဒီပွဲတော်ကို ဒီတရိုးမှာရှိတဲ့ရွာအားလုံးက လူအားလုံးဟာ လှူဖွယ်ပစ္စည်းတွေနဲ့လာကြပြီး ညမှာကျောင်းကိုလှည့်ပတ်ပူဇော်ကြပါတယ်။ လှူဖွယ်ကိုကိုင်သူက ကိုင်၊ အိုးစည်ရှည်ကြီးနဲ့သိုင်းကသူက က။ အပတ်ပေါင်းများစွာလှည့်ကြတာပါ။ ဒီလိုပူဇော်ပွဲတွေကို တောင်ခြေပိုင်းရှိရှမ်းရွာတွေ ကလည်းလာကြပါတယ်။ လှည့်ရာမှာအမျိုးသမီးတွေနဲ့ လူကြီးတွေပဲပါတာမို့ ကာလသားတွေအဖို့ ဒီထက်ကောင်းတဲ့ မျက်စေ့ပွဲတော်တည်စရာမရှိတော့သလိုဖြစ်နေပါတယ်။ အစွမ်းကုန်အလှပြင်ထားတဲ့ ရွာတကာကအပျိုတွေကို တထိုင်ထဲ ကြည့်ရတာမဟုတ်လား။ ဒါဟာ ဘုန်းကြီးကျောင်း တကျောင်းပြီးတကျောင်း၊၊ ရွာလုံးကျွတ်၊ ညလုံးပေါက်လောက် ကျင်းပကြတာပါ။ ကျနော်တောင်၎-၅ပွဲလောက်ရောက်ခဲ့ဖူးပါတယ်။ သူတို့နဲ့လိုက်ပြီးပျော်ခဲ့ရပါတယ်။ အလားတူပဲ တောင်ခြေမှာရှိတဲ့ ရှမ်းရွာတွေက ပွဲတွေကိုလည်း တောင်ပေါ်ကလူတွေက သွားပူဇော်ကြပါတယ်။ အဲဒီနေရာတွေမှာ ကျတော့ မြို့ကလာတဲ့ဈေးသည်တွေကိုလည်းတွေ့ရပါတယ်။
ဒီနေရာကိုကျနော်ရောက်ကတဲက ဦးကျော်စိန်ကို“သူတို့နဲ့ကျနော်နဲ့ အဖွဲ့အစည်းချင်းမတူပေမဲ့ ရန်သူကိုဆန့်ကျင် တိုက်ခိုက်တဲ့လုပ်ငန်းမှန်သမျှမှာ ပါဝင်လုပ်ကိုင်ပေးမယ်”လို့ကတိပေးခဲ့ပါတယ်။ ဒါကြောင့် ဒီဇင်ဘာ၁၁ရက်မှာကျတဲ့ သူတို့ရဲ့ပအို့ဝ်တော်လှန်ရေးနေ့ အခမ်းအနားပွဲလမ်းသဘင်တွေမှာ ကျနော်တက်တက်ကြွပါဝင်ခဲ့ပါတယ်။ သူတို့ထုတ်တဲ့ စာစောင်လေးထဲမှာ ကာတွန်းဆွဲပေးတာ၊ ဆောင်းပါးဘာသာပြန်ပေးတာကအစ အားကစားပွဲတွေ ကြီးမှူးလုပ်ကိုင်ပေး၊ ကိုယ်တိုင်ဝင်ပါ စသဖြင့်ထက်ထက်သန်သန် ပါဝင်ခဲ့ပါတယ်။ အဲဒီမှာ ကျနော်ဦးဆောင်တဲ့ ကျနော်တို့ရွာက ဗော်လီဘော အသင်းက ပထမရခဲ့ပါတယ်။
တခါမှာ ညကြီးမင်းကြီး တောင်ပေါ်ကိုရန်သူ့တပ်(မဆလတပ်)လာတယ်ဆိုလို့ သူ့ကိုယ်ရံသဘောမျိုး ကာဘိုင် သေနတ်ဆွဲပြီး တောင်ပေါ်တက်ရှောင်ခဲ့ရဖူးပါတယ်။ နောက်တခါမှာတော့ နေ့ခင်းပိုင်းမှာကားလမ်းတလျှောက် ၀င်လာတဲ့ ရန်သူ့တပ်စုတစုလောက်ကို ဖြတ်တိုက်တာမှာပါခဲ့ပါတယ်။ ကိုယ့်ဘက်က အချိန်နောက်ကျသွားတာအပြင် ရန်သူကို ပိတ်တိုက်တာ မလုပ်နိုင်လို့ဘယ်ဘက်မှထိခိုက်မှုမရှိပဲ ရန်သူတွေလွတ်ထွက်သွားပါတယ်။ မဆလတပ်ရဲ့ ဦးထုပ်တလုံးပဲ ရလိုက်ပါတယ်။
အဲဒီလိုမဲနယ်တောင်သားတွေနဲ့ တပျော်တပါးကြီးနေခဲ့ရာကနေ ပါတီကလာခေါ်တယ်ဆိုတော့ ကျနော့်မှာဘာမှ စဉ်းစားမနေနိုင်တော့ပါဘူး။ ဦးခွန်ထီးက သွားရအောင်၊ အားလုံးစီစဉ်ပြီးပြီလို့ဆိုတော့ ကျနော့်အနေနဲ့ ဘယ်သူတွေလဲ၊ ဘယ်ကယူဂျီလဲ စသဖြင့်မေးမနေနိုင်ပါဘူး။ မေးခွင့်လည်းမရှိဘူးမဟုတ်လား။ “ဟုတ်ကဲ့”တလုံးပဲပြောပြီးထွက်ခွာရ တာပါ။ မနက်စာမစားခင်လေးမှာသူရောက်လာ၊ စားပြီးတာနဲ့ထွက်ဆိုသလိုပဲဖြစ်ပါတယ်။
ကျနော်နဲ့ကိုတော်ဝင်း (ကျနော်ထွက်ပြေးရာမှာကူညီမိလို့ တောခိုရတဲ့ ညီအကိုလိုနေခဲ့သူ)ဟာ ဦးလေးဦးကျော်စိန် တို့လင်မယားကိုကန်တော့ပြီး အိမ်ပေါ်ကဆင်းခဲ့ကြပါတယ်။ သူတို့ကကျနော်တို့ကိုဂျစ်ကားအထိလိုက်ပို့ပါတယ်။ ကား အနားရောက်တော့ ကျနော်နဲ့ဦးလေးဦးကျော်စိန်ရဲ့သား ကိုအောင်မာန်(မြို့နယ်တပ်မှူး)တို့ပုခုံးဘက်ပြီးငိုခဲ့ကြပါတယ်။ ကျနော့်အဖို့ ဒါဟာပထမဆုံးဒီလိုငိုနည်းမျိုးလို့ထင်ပါတယ်။ နေရစ်ဦးတော့မဲနယ်တောင်ပေါ့။ ဂျစ်ကားနောက်ပိုင်းမှာ ထိုင်ပြီး ကိုယ်လျှောက်ခဲ့တဲ့လမ်း၊ ကိုယ်ပြင်ခဲ့တဲ့တံတားနဲ့ ကိုယ်ပေါက်ခဲ့တဲ့သနပ်ဖက်ခင်းတွေကို ငေးမောနှုတ် ဆက်နေမိခဲ့ပါတယ်။ မဲနယ်တောင်နယ်မြေကထွက်ပြီဆိုတာနဲ့ ကျနော့်အဖို့လွတ်လပ်မှုဆုံးသွားပြီး ကားထဲမှာခပ်ဝပ်ဝပ် ထိုင်လိုက်ရပါတော့တယ်။
ဒီလိုနဲ့ မဲနယ်တောင်ကြီးအပေါ်သံယောဇဉ်မပြတ်နိုင်တဲ့ကျနော်ဟာ ရောက်လေရာမှာ မဲနယ်တောင်နဲ့ မဲနယ် တောင်သားတွေအကြောင်း အမြဲစနဲနာခဲ့ပါတယ်။ ပအို့ဝ်တွေနဲ့တွေ့ရင် တတ်သမျှပအို့ဝ်စကားလေး ပြောကြည့်လိုက်ရင် သူတို့က ဒါဟာမဲနယ်တောင်ကပအို့ဝ်စကားပဲ လို့သူတို့ကမှတ်ချက်ချပါတယ်။ ဒါဆိုရင်ကျနော့်အဖို့ ၀မ်းသာလိုက်ရတဲ့ ဖြစ်ခြင်း။ တနေ့ကတော့ မဲနယ်တောင်ကိုမကြာခဏရောက်နေတဲ့ တောင်ကြီးသားနှစ်ယောက်နဲ့တွေ့လို့ မဲနယ်တောင် အခြေအနေကိုမေးမြန်းမိပါတယ်။ ကျနော်နေခဲ့တဲ့ရွာကိုသူတို့ အခေါက်ခေါက်ရောက်ဖူးပါတယ်။ အဲတော့သူတို့က မဲနယ်တောင်ပေါ်မှာ လောင်းကစားဝိုင်းတွေရောက်နေပြီဆရာရေ့တဲ့။ ကျနော့်မျက်စိပြာသွားသလားအောက်မေ့မိ ပါတယ်။ နောက်ပြီးရွာတွေက ယောက်ျားမိန်းမတွေဟာ ယိုးဒယားကိုသွားအလုပ်လုပ်နေကြလို့ ရွာတွေထဲမှာလည်း လူတော်တော်နည်းနေပြီတဲ့။ တချို့နေရာတွေမှာဘိန်းစိုက်တာတောင်ရှိနေသလိုလိုပဲတဲ့။
ကျနော်အကြိမ်ကြိမ်ရေချိုးခဲ့တဲ့ မဲနယ်တောင်ကရွာတွေကိုဖြတ်စီးဆင်းနေတဲ့ ချောင်းကရေဟာ မဲနယ်တောင်သူ၊ မဲနယ်တောင်သားတွေလိုပဲ အင်မတန်သန့်စင်ကြည်လင်တယ်ဆိုတာကို ကျနော်ကောင်းကောင်းမှတ်မိနေပါတယ်။
ဘယ်လိုပဲပြောပြော။ မဲနယ်တောင်ကြီးဟာကျနော့်ရင်ထဲမှာတော ထီးထီးမားမားရှိဆဲပါ။
ဖိုးသံ(လူထု)
Monday, February 7, 2011
ခွေးငတ်များကြိုဆိုရေး ထမင်းစားပွဲကြီး
ရေးသူ- လင်းယုန်မောင်မောင်

[ဓါတ်ပုံဟောင်းများက ပြောပြနေသော ရှေးဟောင်းနှောင်းဖြစ်များ-ခွေးငတ်များ ကြိုဆိုရေး ထမင်းစားပွဲကြီး]
ကျွန်တော်သည် ရန်ကုန်တွင် တည်ထောင်ထားသော ချင်းတွင်းအသင်းတွင် အတွင်းရေးမှူးအဖြစ် ၁၉၇၉ ခုနှစ်မှ ၁၉၈၄ ခုနှစ်ထိ ၆ နှစ်တိုင်တိုင် တာဝန်ယူခဲ့ရသည်။ ထိုနှစ်များတွင် ချင်းတွင်းအသင်းမှ ကြီးမှူး၍ အခြေခံပညာရေး အထက်တန်း (ဆယ်တန်း) စာမေးပွဲတွင် ဂုဏ်ထူး နှစ်ဘာသာနှင့် အထက် အောင်မြင်ခဲ့ကြသော ချင်းတွင်းဒေသမှ ကျောင်းသူ ကျောင်းသားများအား အသင်းအမှုဆောင် လူကြီးများ ကိုယ်တိုင် မုံရွာမြို့သို့ သွားရောက်၍ ပညာရည်ချွန်ဆုများ ချီးမြှင့်ခဲ့ကြသည်။
၁၉၈၃ ခုနှစ်က မှတ်မှတ်ရရ မုံရွာသို့ အဆိုပါ ပညာရည်ချွန် ဆုပေးပွဲအတွက် သွားရောက်ခဲ့စဉ်က ဖြစ်သည်။ မုံရွာမြို့နယ် ပါတီကောင်စီ၏ ကူညီပံ့ပိုးမှုဖြင့် ပညာရည်ချွန်ဆုပေးပွဲအတွက် လိုအပ်သည်များကို ကြိုတင်ပြင်ဆင် လုပ်ကိုင်ရင်း ကျွန်တော်သည် ဖိတ်စာများနှင့် အခြားစာရွက်စာတမ်းများ ရိုက်နှိပ်ရန် မုံရွာမြို့ ရွှေစည်းခုံဘုရား မုခ်ဝတွင် စာကူးစက်လုပ်ငန်း ဖွင့်လှစ်လုပ်ကိုင်နေသော ငယ်သူငယ်ချင်း 'ဘမောင်ဇုံ' ထံသို့ ရောက်သွားခဲ့သည်။ ငယ်နာမည်မှာ 'ဘမောင်' ဖြစ်၍ ကြီးလာမှ ဖခင်ဖြစ်သူ 'ဦးဖိုးဇုံ' ကို အကြောင်းပြု၍ 'ဇုံ' တလုံး တိုးပြီး 'ဘမောင်ဇုံ' ဖြစ်လာခဲ့သည်။
ကျွန်တော်က သူ့အား လက်နှိပ်စက် ရိုက်ရန်နှင့် စာကူးစက်လှည့်ရန် ဖိတ်စာမူကြမ်းနှင့် စာရွက်စာတမ်း များ ပေးအပ်ပြီးနောက် ဟိုအကြောင်း သည်အကြောင်း ရှေးဟောင်းနှောင်းဖြစ်များကို ပြောမိကြသည်။ ထိုစဉ်မှာပင် သူငယ်ချင်း ဘမောင်ဇုံက ရုတ်တရက် ကောက်ခါငင်ခါ ပြောလိုက်သည်။ 'အတော်ပဲ မောင်ရေ... ကြုံကြိုက်တုန်း မောင်ရင့်ကို အမှတ်တရ ရှားရှားပါးပါး လက်ဆောင်တခု ပေးလိုက်ရဦးမယ်' ပြောပြောဆိုဆို သူက အလုပ်အံဆွဲထဲမှ စာအုပ်တအုပ်ကို ထုတ်ယူလိုက်ပြီး ထိုစာအုပ်ကြားထဲမှ ဓာတ်ပုံလေးတပုံကို ကျွန်တော့်အား ရုတ်တရက် လှမ်းပေးလိုက်သည်။
ဓာတ်ပုံမှာ ခတ်သေးသေးပင် ဖြစ်သည်။ ကျွန်တော်တို့ ငယ်ငယ်က 'သေတ္တာကင်မရာ' ဖြင့်ရိုက်သည့် အရွယ်အစား ဖြစ်၍ အလျား ၃လက်မခွဲ၊ အနံ ၂ လက်မခွဲခန့်သာရှိသည်။ ထို ဓာတ်ပုံလေးကို သေသေချာချာ ကြည့်လိုက်မိသည်နှင့် ကျွန်တော့်မှာ အတိုင်းမသိ ပီတိတွေဖြာ၍ ၀မ်းအသာကြီး သာသွားခဲ့သည်။ အကြောင်းသော်မူ ထိုဓာတ်ပုံကလေးသည် ဒုတိယကမ္ဘာစစ် မတိုင်မီလေးက မုံရွာခရိုင် ဒို့ဗမာ အစည်းရုံးဝင် သခင်များ၏ နိုင်ငံရေးလှုပ်ရှားမှုကို မှတ်တမ်းတင်ထားသည့် ဓာတ်ပုံကလေးဖြစ်ကြောင်း ကျွန်တော် အတိအကျ သိလိုက်ရသောကြောင့် ဖြစ်သည်။ ပို၍ တိကျအောင် ပြောရမည်ဆိုပါက ထိုဓာတ်ပုံလေးသည် လွန်ခဲ့သော ၁၉၃၉ ခုနှစ်က ရိုက်ကူးခဲ့သော ပုံဖြစ်၍ (ယခုဆိုလျှင်) နှစ်ပေါင်း ၄၉ နှစ်မျှ ကြာခဲ့ပြီ ဖြစ်သည်။ သို့သော် ဓာတ်ပုံလေး၏ ဆေးသားများမှာ မမှုန်ဝါးသေးဘဲ မူလကူးထားသည့် စီပီယာအရောင်အတိုင်း လူတွေရော အဆောက်အဦများပါ ထင်ရှားနေဆဲ ဖြစ်သည်။ 'ခွေးငတ်များ ကြိုဆိုရေး ထမင်းစားပွဲကြီး' ဆိုသော စာတန်းမှာ ဓာတ်ပုံထဲတွင် ထင်းခနဲ မြင်နေရသည်။
ထိုနေ့က ဘမောင်ဇုံ၏ စာကူးစက်သို့ ကျွန်တော်နှင့်အတူ လိုက်ပါလာသော မုံရွာကောလိပ်မှ သမိုင်းဌာနမှူး ဆရာဝင်းမောင်သည် ကျွန်တော့် လက်ထဲမှ ဓာတ်ပုံကို ခေတ္တ တောင်းယူလိုက်သည်။ သူသည် ဓာတ်ပုံထဲမှ 'ခွေးငတ်များ ကြိုဆိုရေး ထမင်းစားပွဲကြီး' ဟူသော စာတန်းကို ကြည့်ပြီး ရုတ်တရက် နားမလည်အောင် ဖြစ်သွားဟန်တူသည်။
'နေပါဦးဆရာ ဒီ ခွေးငတ်များ ကြိုဆိုရေး ထမင်းစားပွဲကြီး ဆိုတာ ဘာကို ဆိုလိုတာလဲ ဆရာ၊ ပြီးတော့ ဒီဓာတ်ပုံက ဘယ်တုန်းက ရိုက်ထားတဲ့ ဓာတ်ပုံလဲ'
သမိုင်းဌာနမှူးက ထူးဆန်းသော အဆိုပါ စာတန်း၏ အဓိပ္ပါယ်ကို စူးစမ်းသော စိတ်ဖြင့် မေးမြန်းလိုက် သည်။ သည်တော့မှ ကျွန်တော်က သည်ဓာတ်ပုံလေး၏ သမိုင်းကြောင်းကို သမိုင်းဌာနမှူးအား ရှင်းပြရသည်။ မှန်သည်။ သည်ဓာတ်ပုံလေးမှာ ၁၉၃၉ ခုနှစ်က ရိုက်ကူးခဲ့သည့် ပုံဖြစ်သည်။ ထိုအချိန် ထိုအခါက ၁၃၀၀ ပြည့် အရေးတော်ပုံနှင့် ဗိုလ်အောင်ကျော် အရေးအခင်းကို အကြောင်းပြု၍ ဒေါက်တာဗမော် အစိုးရ ပြုတ်ကျပြီး နန်းရင်းဝန် ဦးပုခေါင်းဆောင်သော အစိုးရ တက်လာချိန် ဖြစ်သည်။
ဦးပုသည် နန်းရင်းဝန်ဖြစ်လာပြီး မကြာမီ အထက်မြန်မာနိုင်ငံသို့ တိုင်းခန်းလှည့်လည်ရန် စီစဉ်ခဲ့ရာ မန္တလေးမှ တဆင့် မုံရွာသို့ လာရောက်မည် ဖြစ်ကြောင်း ကျွန်တော်တို့ မုံရွာသခင်များက သတင်းရထားကြသည်။ ဤတွင် နန်းရင်းဝန် ဦးပုနှင့်တကွ နောက်လိုက်နောက်ပါ မင်းတိုင်ပင်အမတ်များ မုံရွာရောက်မလာကြမီ မုံရွာသခင်များက ကန့်ကွက်ဆန္ဒပြကြရန် အစီအစဉ်တခု ပြုလုပ်ခဲ့ကြသည်။ ယင်းအစီအစဉ်မှာ နန်းရင်းဝန်ဦးပုနှင့် မင်းတိုင်ပင်အမတ်များအား ဆရာကြီးသခင်ကိုယ်တော်မှိုင်း ရေးသားပြုစုခဲ့သည့် 'ခွေးဋီကာ' 'ခွေးဂဏ္ဍိ' စသည့် စာအုပ်များထဲမှ စားခွက်လုကြသည့် ခွေးငတ်များအဖြစ် နှိုင်းယှဉ်တင်စားကာ မုံရွာမြို့ပေါ်ရှိ ခွေးလေခွေးလွင့်များ အား အစာကျွေး၍ ဆန္ဒပြ ကန့်ကွက်ကြရန် ဖြစ်သည်။ သို့ဖြစ် နန်းရင်းဝန် ဦးပု ရောက်မလာမီ တပါတ်ခန့်အလိုတွင် အဆိုပါ 'ခွေးငတ်များ ကြိုဆိုရေး ထမင်းစားပွဲကြီး' ကို ကျင်းပ ပြုလုပ်ခဲ့ကြသည်။
သတ်မှတ်ထားသော ထိုနေ့ ထိုရက်တွင် မုံရွာဈေးကြီး (ယခု ဈေးဟောင်း) ထဲမှ အမဲရိုးများနှင့် ဆန်ကွဲ များကို အလှူခံ၍ မိုးဗြဲဒယ်ကြီးတလုံးတွင် ထည့်၍ ပြုတ်ကြသည်။ ပြီးမှ ထိုအမဲရိုးနှင့် ဆန်ကွဲများ ပြုတ်ထားသည့် မိုးဗြဲဒယ်ကြီးကို မြင်းလှည်းတစီးပေါ်တွင် တင်ကာ တမြို့လုံး လှည့်လည်၍ လမ်းဆုံလမ်းခွများတွင် အမဲရိုးပြုတ်များကို ဖက်များဖြင့် ပုံပြီး ခွေးလေခွေးလွင့်များကို စတုဒီသာ ကျွေးကြသည်။ ဤတွင် ခွေးများ၏ သဘာဝအတိုင်း အမဲရိုးပြုတ်များကို အေးအေးဆေးဆေး မစားကြပဲ တကောင်နှင့်တကောင် မာန်ဖီကာ လုယက်ကြ၊ ကိုက်ကြ၊ ခဲကြနှင့် တ၀ုန်းဝုန်း တရုန်းရုန်း ဖြစ်နေကြသည်။ 'ခွေးငတ်များ ကြိုဆိုရေး ထမင်းစားပွဲကြီး' ဟူသော စာတန်းများကို ဖတ်၍ အထူးအဆန်း ဖြစ်နေကြသော မုံရွာ မြို့သူ မြို့သားများသည် ကျွန်တော်တို့ သခင် များက လမ်းဆုံလမ်းခွများတွင် ခွေးလေခွေးလွင့်များအား ထိုသို့ အမဲရိုးပြုတ်များ ကျွေးနေကြသည်ကို တအံ့တသြ ၀ိုင်းအုံ ကြည့်ရှုခဲ့ရမှ တဖြည်းဖြည်း လူစုလူဝေးကြီး ဖြစ်မှန်းမသိ ဖြစ်လာကြသည်။ သည်တော့မှ ကျွန်တော်တို့ သခင်များက အမဲရိုးပြုတ်များကို တကောင်နှင့် တကောင် ရန်စောင် မာန်စောင်ကာ လုယက်စားသောက် နေကြ သော ခွေးများအား 'စားခွက်လု' နေကြသည့် မင်းတိုင်ပင် အမတ်များနှင့် နှိုင်းယှဉ်ကာ အင်္ဂလိပ်အစိုးရအား ဆန့်ကျင်သည့် နိုင်ငံရေးတရားများကို ဟောကြပြောကြသည်။
ထိုနေ့က 'ခွေးငတ်များ ကြိုဆိုရေး ထမင်းစားပွဲကြီး' ကျင်းပကာ လက်တွေ့ကျကျ ဟောခဲ့ပြောခဲ့ကြသော သခင်များ၏ နိုင်ငံရေးတရားများကို မြို့လူထုက သဘောအကျကြီး ကျကာ လက်ခုပ်လက်ဝါးတီး၍ သြဘာပေးခဲ့ ကြသည်ကို ကျွန်တော်ကောင်းကောင်းကြီး မှတ်မိနေခဲ့သည်။ နောက်တခု ကျွန်တော် ကောင်းကောင်းကြီး မှတ်မိနေသည့် အဖြစ်အပျက်တခု ရှိသေးသည်။ အဆိုပါ 'ခွေးငတ်များ ကြိုဆိုရေး ထမင်းစားပွဲကြီး' အကြောင်းကို ထိုစဉ်က မုံရွာသခင်တဦးဖြစ်သော သတင်းထောက်သခင်ကိုကြီး (ပေါင်မုန့်ရောင်းသည့်အတွက် သူ့ကို 'ပေါင်မုန့်ကိုကြီး' ဟု တမြို့လုံးက ခေါ်ကြသည်။) က သတင်းနှင့်တကွ ဓာတ်ပုံကိုပါ ရိုက်၍ ရန်ကုန်ရှိ သတင်းစာတိုက်များသို့ ပို့လိုက်ရာ မြန်မာ့အလင်းသတင်းစာက သတင်းရော ဓာတ်ပုံကိုပါ ဖော်ပြလိုက်သည်။ (ယခုဖော်ပြထားသော ဓာတ်ပုံပင် ဖြစ်သည်) ဤတွင် ထိုဓာတ်ပုံထဲ၌ ခွေးစာကျွေးသည့် သံပုံးစုတ်ကို ကိုင်ထားလျက်သား ကျွန်တော့်ပုံသည် ရှေ့ဆုံးမှ ထင်းကနဲ ပါသွားခဲ့ရာ ထိုဓာတ်ပုံကို အကြောင်းပြု၍ ထိုစဉ်က အင်းစိန် စီအိုင်ဒီတွင် ပုလိပ်စုံထောက် အရာရှိအဖြစ် အမှုထမ်းနေသော ကျွန်တော့်ဖခင်အား မျက်နှာဖြူပုလိပ် မင်းကြီးက ထုချေလွှာတောင်းခဲ့သည်ကို ကျွန်တော်ကောင်းကောင်းကြီး မှတ်မိနေသေးသည်။ 'ခွေးငတ်များ ကြိုဆိုရေး ထမင်းစားပွဲကြီး' ၏ ဂယက်သည် ထိုမျှဖြင့် မပြီးဆုံးသေးပါ။ ၁၉၃၉ ခုနှစ် ဇွန်လဆန်းတွင် နန်းရင်းဝန် ဦးပုသည် မူလစီစဉ်ထားသည့်အတိုင်း အထက်မြန်မာပြည်သို့ တိုင်းခန်းလှည့်လည်ရင်း မန္တလေးမှတဆင့် မုံရွာသို့ ရောက်လာခဲ့သည်။ ဤတွင် ကြိုတင်ပြင်ဆင်၍ 'မောင်းတင်' ထားကြသော ကျွန်တော်တို့ မုံရွာသခင်များက မုံရွာမြို့အ၀င်၊ မြို့တောင်ဘက် ညောင်ပင်အောက် ကွေ့မှ နေ၍ နန်းရင်းဝန် စီးလာသော မော်တော်ကားရှေ့တွင် လှဲအိပ်ကာ ဆန္ဒပြ ကန့်ကွက် တာဆီးခဲ့ကြသည်။ မိမိစီးလာသော ဇိမ်ခံကားကြီးရှေ့တွင် လှဲအိပ်ကာ ကြွေးကြော်သံများဖြင့် လက်သီးလက်မောင်းတန်းပြီး အော်ဟစ်ဆန္ဒပြနေကြသည့် သခင်များကို ကြည့်ကာ နန်းရင်းဝန် ဦးပုမှာ ရာဇအိနြေ္ဒ အပျက်ကြီး ပျက်၍ ရှက်လည်းရှက် ဒေါသလည်း ထွက်ခဲ့ရသည်။ နောက်ဆုံး၌ ဗောင်းတော်ညိတ် စိတ်တော်သိ ဆိုသည့်စကားအတိုင်း နန်းရင်းဝန်တယောက်လုံး အရှက်တကွဲ ဖြစ်နေသည်ကို လက်ပိုက်ကြည့်၍ မဖြစ်တော့သည့်အလျောက် မုံရွာအရေးပိုင်နှင့် ခရိုင်ရာဇ၀တ်ဝန်ကြီးတို့၏ အမိန့်အရ ဦးပုကားရှေ့တွင် လှဲအိပ်ကာ ဆန္ဒပြခဲ့ကြသော မုံရွာ သခင်များအား ပုလိပ်များက တယောက်ပြီးတယောက် ခြေထောက်နှစ်ချောင်းနှင့် ချိုင်းနှစ်ဘက်မှ မကာ အချုပ်ကားထဲသို့ ပစ်သွင်းပြီး အတင်းတရကြမ်း ဖမ်းဆီးခဲ့ကြသည်။ ထိုနေ့က စုစုပေါင်း သခင် ၁၆ ဦး အဖမ်းခံခဲ့ကြရသည်ဖြစ်ရာ အဆိုပါ သခင်များမှာ ၁။ သခင်လှဖေ၊ ၂။ သခင်ကျော်ဇေယျ၊ ၃။ သခင်ဗမောင်၊ ၄။ သခင်ကိုကြီး၊ ၅။ သခင်ရွှေဒေါင်း၊ ၆။ သခင်သန်းတင်၊ ၇။ သခင်လှမောင်၊ ၈။ သခင်စိန်၊ ၉။ သခင်တုံဟော၊ ၁၀။ သခင်ကြည်၊ ၁၁။ သခင်လှသိန်း၊ ၁၂။ သခင်ကံညွန့်၊ ၁၃။ သခင်တင်မြင့်၊ ၁၄။ သခင်သိန်းမောင်၊ ၁၅။ သခင်သောင်းတင်၊ ၁၆။ သခင်ရွှေ တို့ပင် ဖြစ်သည်။
နောက်ဆုံး ကျွန်တော် သိရသလောက် အထက်ပါအဖမ်းခံ သခင် ၁၆ ဦးအနက် သခင်လှဖေ (ယခင် ကျောက်တံတားသ/မ)၊ သခင်ဗမောင် (မုံရွာမြို့နယ် မီးသတ်တပ်ဖွဲ့)၊ သခင်သောင်းတင် (ဇောက်ထိုးသောင်းတင်) နှင့် သခင်ရွှေ (ယခု စာရေးဆရာ လင်းယုန်မောင်မောင်) တို့သာလျှင် မသေသေးဘဲ ကျန်ရှိနေကြ၍ အခြားသခင်များမှာ အားလုံးပင် ကွယ်လွန်ခဲ့ကြပေပြီ။
'သတင်းစာများသည် သမိုင်းကို ပြောနေကြသည်' ဟူသော ကွယ်လွန်သူ လူထုဦးလှ၏ စာအုပ်ကို နှစ်သက်စွဲလန်းခဲ့သော ကျွန်တော်သည် ကျွန်တော့်လက်ထဲမှ ဓာတ်ပုံကလေးကို ကြည့်ရင်း လွန်ခဲ့သော နှစ်ပေါင်း ၅၀ ခန့်က မုံရွာခရိုင် ဒို့ဗမာအစည်းရုံးဝင် သခင်များ၏ လှုပ်ရှားမှု ရှေးဟောင်းနှောင်းဖြစ်များကို ပြန်ပြောင်းသတိ ရနေမိလေသည်။
လင်းယုန်မောင်မောင်
(ဧပြီ ၁၉၈၈ ပန် ရုပ်စုံမဂ္ဂဇင်း)
[ပိတောက်ပွင့်သစ် မဂ္ဂဇင်း၊ အမှတ် ၃၆၊ နိုဝင်ဘာလ ၂၀၁၀ မှ ကူးယူဖော်ပြပါတယ်။]
Wednesday, February 2, 2011
ကျွန်မဆုံခဲ့ရသည့် ၃၆ ခု အရေးတော်ပုံ
ရေးသူ- လူထုဒေါ်အမာ

ကျွန်မတို့ ခေတ်က ကျ (F) ပြဿနာလည်း မရှိ၊ ကျောင်းဆောင် ပြဿနာလည်း မရှိ၊ စာသင်ခန်း ပြဿနာလည်း မရှိ၊ ကျောင်းသားသပိတ်ကြီး ပေါ်လာသည့်အတွက် အချို့သော ကျောင်းသားများက ကိုလိုနီဘ၀၌ တသက ၏ ဦးဆောင်မှုကို သိလိုသူများ ရှိပေမည်။
ဟုတ်ပါပေသည်။ ယနေ့ ကျောင်းသားတွေ၏ အခြေအနေနှင့် ကျွန်မတို့ခေတ်က ကျောင်းသားတွေ၏ အခြေအနေမှာ များစွာမှ ခြားနားပါသည်။ ယခု ကျောင်းသားတွေကို ပြောပြလျှင် ကျောင်းသားတွေက "သြော်..... ရှေးရှေးတုန်းက တက္ကသိုလ်ဆိုတာ ဒီလိုကိုး" ဟု တွေး၍ ဝေးကွာလှသော ကာလဆီသို့ တွန်းပို့လိုက်ကြမည် ထင်ပါသည်။
ကျွန်မတို့ ကျောင်းသားဘ၀က ကိုသိန်းဖေကြီးတို့များ အင်တာ(ဥပစာတန်း) တွင် ၉ နှစ် နေပါသည်။ ကျ ၉ ကျ ဖြစ်သည်ဆို၍ မည်သည့် အာဏာပိုင်ကမျှ မည်သို့မျှ အရေးမယူပါ။ ကျောင်းဆောင်ခ မှန်မှန်ပေးသမျှ အဆောင်ကလည်း လက်ခံသည်။ ကျောင်းလခ မှန်မှန်ရသမျှ တက္ကသိုလ်ကလည်း လက်ခံသည်။ ကျောင်းလခမှာ အင်တာ၌ ၉ိ၊ ၀ိဇ္ဇာတန်း၌ ၁၂ိ ဖြစ်သည်။ အဆောင်ခမှာ တလလျှင် ၂၅ိ ဖြစ်သည်။
ကျောင်းဆောင်ဆိုသည်မှာလည်း တယောက်ခန်းတွင် တယောက်၊ ၂ ယောက်ခန်းတွင် ၂ ယောက်၊ တခါတရံ ၂ ယောက်ခန်းကြီး၌ ပင်လျှင် တယောက်တည်း နေလိုက နေရတတ်သေးသည်။ ၁၀ တန်းအောင်စ ကျောင်းသားများ အဖို့သာ အဆောင်နေရေးကို အဆောင်မှူးထံ စာတင်၍ လျှောက်ထားရသည်။ တနှစ်နေဖူးသည့် ကျောင်းသားဟောင်းဖို့ လျှောက်နေ တောင်းနေစရာ မလိုတော့။ အဆောင်ဖွင့်၍ အချိန်တန် ရောက်လာလျှင် ၀င်နေရုံသာ ရှိသည်။ ယမန်နှစ်က ကိုယ်နေပြီးသား အခန်းပြန်ရလိုလျှင် သူများထက် ၂ ရက် ၃ ရက် စော၍ လာနိုင်လျှင် ရသည်။
စာသင်ခန်း ဆိုပါလျှင်လည်း ကျွန်မတို့ ကျောင်းသူများအဖို့ သူများနည်းတူ အပြေးအလွှားသွား၍ နေရာရအောင် လုထိုင်နေစရာ မလိုပါ။ ခေါင်းလောင်းထိုးခါနီးမှ ဆရာနှင့် မရှေးမနှောင်း ၀င်လာကြပြီး ကျောင်းသားများက တမင်ချန်ပေးထားသော ရှေ့တန်းခုံများတွင် ၀င်ထိုင်၍ သင်ရပါသည်။
၁၉၃၆ ခုနှစ်က မြန်မာတနိုင်ငံလုံး၌ ရှိရှိသမျှ အထက်တန်းကျောင်းတွေ၊ အလယ်တန်းကျောင်းတွေနှင့် ယူနီဗာစီတီကောလိပ်၊ ဂျပ်ဆင်ကောလိပ်တို့ပင် ပါဝင်သည့် ပြည်လုံးကျွတ် သပိတ်ကြီး ပေါ်လာရခြင်းမှာ တကသ ဥက္ကဌကို ကျောင်းထုတ်မည်ဟု ဆိုသောကြာင့် ဖြစ်ပါသည်။
၁၉၃၆ ခုနှစ် ပြည်လုံးကျွတ် ကျောင်းသားသပိတ်ကြီး ပေါ်ပေါက်လာရသည့် လောလောဆယ် အကြောင်းရင်းသည် အောက်ပါအတိုင်း ဖြစ်သည်။
၁၉၃၆ ခုနှစ်၊ ဇန်န၀ါရီလ ၃၁ ရက်နေ့၌ တကသတွင် ကျောင်းသားများ၏ စကားအချေအတင် ဟောပြောပွဲတရပ် ရှိသည်။ ထို စကားအခြေအတင် ပြောပွဲကြီး၌ တကသ ဥက္ကဌ ကိုနုက ကျောင်းသားများ၏ အရေးကိစ္စအတွင်း၌ အချို့သော အာဏာပိုင်တို့ စွက်ဖက်နေမှုနှင့် တက္ကသိုလ်တွင် ကျောင်းသားများအား ကျွန်စိတ်၊ အောက်ကျနောက်ကျစိတ်များ သွင်းပေးနေမှုတို့ကို စကားလုံး ခပ်ကြမ်းကြမ်းနှင့် ပြောကြားသွားခဲ့ သည်။
နောက် ရက်အနည်းငယ်အကြာ၌ အိုးဝေမဂ္ဂဇင်း ထွက်လာသည်။ မဂ္ဂဇင်းတွင် အင်္ဂလိပ်စာ ကဏ္ဍ၌ အယ်ဒီတာထံ ပေးစာတစောင် ပါသည်။ ထိုပေးစာမှာ "ငရဲပြည်မှ ငရဲခွေးတကောင် လွတ်သွားရာ တက္ကသိုလ်၌ ကျက်စားနေသည်ကြား၍ ငရဲပြည်သို့ ပြန်ပို့လိုက်ပါ" ဟူ၍ "ယမမင်း" ဆိုသူက ရေးထားသည်။ ဤပေးစာသည် တက္ကသိုလ်ရှိ ဆရာတဦး တယောက်ကို စောင်းမြောင်း ရေးသားခြင်း ပေလောဟု အာဏာပိုင်လောက၌ လှုပ်ရှားလာသည်။
ထို့ကြောင့် ဇန်န၀ါရီ ၃၁ ရက်နေ့က တကသဥက္ကဌ၏ မိန့်ခွန်းသည်လည်းကောင်း၊ ယခု အိုးဝေမဂ္ဂဇင်းပါ ပေးစာသည်လည်းကောင်း၊ တက္ကသိုလ်ကျောင်းသားတို့၏ စည်းကမ်းသေ၀ပ်မှုနှင့်မညီ။ ထို့အတွက် တကသ ဥက္ကဌသည် ပြောခဲ့သည့် မိန့်ခွန်းအတွက် ထုချေလွှာပေးရမည်။ အိုးဝေအယ်ဒီတာ ကိုအောင်ဆန်းကလည်း ဆောင်းပါးရှင်မှာ မည်သူမည်ဝါ ဖြစ်သည်ဆိုခြင်းကို ဖော်ထုတ်ရမည်ဟု အာဏာပိုင်တို့က တောင်းဆိုလာသည်။
တကသစာစောင်၊ အိုးဝေအယ်ဒီတာ ကိုအောင်ဆန်းက ထိုဆောင်းပါးကို ထည့်သွင်းခြင်းမှာ မှားသည်ဟု ဆိုပါလျှင် အယ်ဒီတာအနေနှင့် ၀မ်းနည်းစကား တောင်းပန်ပါမည်။ သို့သော် အယ်ဒီတာတို့ စောင့်စည်းအပ်သည့် ကမ္ဘာထုံးတမ်းစဉ်လာနှင့်အညီ ဆောင်းပါးရှင်ကား မည်သူမည်ဝါဖြစ်သည်ကို မဖော်ထုတ်နိုင်ပါဟု ဆိုလေသည်။
ဤပြန်ကြားချက်ကို မကျေနပ်၊ ဥက္ကဌထံမှ ထုချေလွှာ မပေးသည်ကိုလည်း မကျေနပ်သော အာဏာပိုင်များက ဥက္ကဌကိုနုအား ယူနီဗာစီတီကောလိပ်မှ ထုတ်ပယ်လိုက်သည်ဆိုသော စာတစောင် ၂၁-၂-၃၆ နေ့တွင် ပေးလာသည်။ စင်စစ် တကသဥက္ကဌမှာ ဒီကရီရပြီးဖြစ်၍ ဥပဒေတန်းတက်နေသည့် ဒုတိယနှစ်ဖြစ်ရာ အာဏာပိုင်တို့က ကျောင်းမှထုတ်သည် ဆိုချိန်၌ စာသင်ခန်း ဖြုတ်ပြီးပြီ ဖြစ်၍ ဥက္ကဌသည် ဘီအယ် စာမေးပွဲဝင်ဖြေ၍ ကျရှုံးစေဦးတော့ နောက်နှစ်၌ ကျောင်းဆက်၍ နေရန် မလိုတော့ပါပေ။
ထို့ကြောင့် အာဏာပိုင်တို့၏ ဤအပြုအမူသည် တကသ၏ ဂုဏ်သိက္ခာကို ကျအောင် တမင်သက်သက် ပြုလုပ်ခြင်း၊ စော်ကားခြင်းဟူ၍ ကျောင်းသားထုက မြင်သည်။ (ထို့ပြင် နောက်ဆက်တွဲ သတင်းစကားအဖြစ်နှင့် အိုးဝေအယ်ဒီတာ ကိုအောင်ဆန်းကိုလည်း ကျောင်းမှ ထုတ်ပယ်လိမ့်မည်ဟု အတွင်းကျကျ ခိုင်လုံစွာ ကြားသိရသည်။ သို့သော် အာဏာပိုင်များသည် သပိတ်မှောက်သွားကြသည်အထိ ကိုအောင်ဆန်းအား ကျောင်းထုတ်သည့် အမိန့် မပေးခဲ့။ သပိတ်မှောက်ပြီး၍ တလကြာမှ တက္ကသိုလ်ကြော်ငြာသင်ပုန်းတွင် ကိုအောင်ဆန်းအား ၃ နှစ်ပယ်လိုက်သည်ဆိုသော အမိန့်ကပ်ထားသည်။)
တက္ကသိုလ် အာဏာပိုင်တို့က ဥက္ကဌကို ကျောင်းထုတ်သည် ဆိုခြင်းကြောင့် ရှုတ်ချကန့်ကွက်သော သဘောဖြင့်၊ အမှုဆောင်အဖွဲ့က တဖွဲ့လုံး စာမေးပွဲမဖြေပဲ သပိတ်မှောက်မည်ဟု စဉ်းစားသည်။ အမှုဆောင်များ အနေဖြင့် ဤမျှသာ အစီအစဉ်ရှိသော်လည်း ကျောင်းသားထုမှာကား တကသကို ဤသို့ စော်ကားရပါမည်လားဟု ပြင်းစွာမခံမရပ် ဖြစ်နေကြလေသည်။ ထို့ကြောင့် အခြေအနေ အရပ်ရပ်ကို တင်ပြရန် ခေါ်ယူသည့် ကျောင်းသားထု စည်းဝေးပွဲကြီးကို ဖေဖော်ဝါရီလ ၂၅ ရက်နေ့၌ ခေါ်ယူတင်ပြ ရှင်းလင်းသည့်အခါ ကျောင်းသားထု၏ အုံကြွမှုကြီး ထိန်းမရတော့ဘဲ ပေါက်ကွဲရလေတော့သည်။
တက္ကသိုလ် သမဂ္ဂခန်းမကြီး လျှံထွက်နေသော ထိုကျောင်းသားထု စည်းဝေးပွဲ၌ ယူနီဗာစီတီ အက်ဥပဒေ၏ အပြစ်အနာများကိုလည်းကောင်း၊ ကျွန်ပညာရေး၏ မဖွယ်မရာပုံများကိုလည်းကောင်း၊ ပြည့်ပြည့်၀၀ကြီး ဖော်ထုတ်၍ သခင်ပညာရေး၊ အမျိုးသားတက္ကသိုလ်စသည့် တကယ့် လွတ်လပ်သော နိုင်ငံတနိုင်ငံ၏ မျှော်မှန်းချက်ကြီးများကို ဖော်ထုတ်၍ တောင်းဆိုလာကြတော့သည်။ ထို့နောက် ကိုလိုနီ ပညာကိုသာ ပေးသည့် ဤတက္ကသိုလ်၌ မနေလိုပါပြီဆိုကာ တက္ကသိုလ်သပိတ်ကြီး ပေါ်ပေါက်လာတော့သည်။ ဂျပ်ဆင်ကောလိပ်ကပါ သပိတ်ထဲ ရောက်လာရသည်။ တက္ကသိုလ်၌ စာမေးပွဲတွေမှာ ဖေဖော်ဝါရီလ (၂၈) ရက်နေ့တွင် စကြမည် ဖြစ်ရာ သပိတ်မှောက်ချိန်မှာ စာမေးပွဲကြီး ဖြေရန် နှစ်ရက်အလိုတွင် ဖြစ်ပါသည်။
မည်သို့မျှ ကြိုတင်စီစဉ်ထားခြင်းမရှိသော ထိုသပိတ်ကို တကသ, က ကောင်းမွန်စွာ ထိန်းသိမ်းနိုင် ခဲ့သည်။ ဗမာတပြည်လုံးရှိ အထက်တန်းကျောင်းများနှင့် အလယ်တန်းကျောင်းများ၏ ကူညီထောက်ခံ သပိတ်ကိုလည်း ပေါ်ပေါက်စေနိုင်ပေသေးသဖြင့် တော်ရုံမှန်ကန်သော စည်းရုံးရေးမျိုးနှင့် မဖြစ်နိုင်သည်မှာ သေချာပါသည်။
ထို့ပြင် ကျွန်မတို့ ခေတ်က တက္ကသိုလ်ကောင်းသားဆိုသည်မှာ မြေပိုင်ရှင်တို့၏ သားသမီးများ၊ အရာရှိအရာခံတို့၏ သားသမီးများက လူများစု ဖြစ်ပါသည်။ ဤသို့ လူတန်းစားများ၏ သားသမီးများကို တကသ, က မည်သို့ စည်းရုံးထား၍ ဤသို့ လှုပ်ရှားနိုင်ခြင်း ဖြစ်ရပါသနည်း။ ပြည်သူလူထုက တကသကို မည်သို့ ထောက်ခံသနည်းဟူ၍ မေးဖွယ်ရာ ရှိပါသည်။
လွတ်လပ်နေပြီဖြစ်သော ဤခေတ်၌ ပြည်တွင်းငြိမ်းချမ်းရေး ရရှိရေးသည် ပြည်သူတို့၏ အဓိကပြဿနာ ဖြစ်သကဲ့သို့ ကျွန်ခေတ်က ပြည်သူတို့၏ တခုတည်းသော ပြဿနာမှာ တမျိုးသားလုံး လွတ်လပ်ရေး၊ ကိုယ့်ကြမ္မာ ကိုယ်ဖန်တီးနိုင်ရေးပင် ဖြစ်ပါသည်။ ဤသို့ အမျိုးသား အဓိကပြဿနာကို တကသ, က ဘယ်တော့မှ မျက်ခြေမပြတ် သည်သာမက၊ အမြဲတမ်း ဆုပ်ကိုင်၍ ရှိပါသည်။ တကသ ဥက္ကဌက မိန့်ခွန်းပေးသည်ဟု ဆိုလျှင် မြန်မာနိုင်ငံ၌ တနှစ်လျှင် ၁၀ တန်း စာမေးပွဲကို ဖြေဆိုသူ ၃၀၀၀ သာရှိ၍ ၃၃ ရာခိုင်နှုန်းခန့် အောင်မြင်သောကြောင့် ကျောင်းသား ၁၀၀၀ခန့် နှစ်စဉ် စာမေးပွဲ အောင်သည်။ သို့ အောင်ရာ၌ အေတန်းမှ အောင်သည်၊ ဘီတန်းမှ အောင်သည်ဟူ၍ နှစ်ဆင့်ခွဲ၍ အောင်စေပြီး၊ အေတန်းမှ အောင်သူကိုသာ တက္ကသိုလ်သို့ ၀င်ခွင့်ပေးသောကြောင့် မန္တလေးဥပစာကောလိပ်၊ ဂျပ်ဆင်ကော်လိပ်တို့ အပါအ၀င် ရန်ကုန်တက္ကသိုလ်၌ နှစ်စဉ် အထက်တန်းပညာသင် ကျောင်းသား ၁၄၀၀ ထက်မပို။ လူဦးရေ ၁၇ သန်း၌ တက္ကသိုလ်ပညာ သင်ယူနိုင်သူ ၁၄၀၀ သာ ရှိစေသည့် ကိုလိုနီ ပညာရေးသည် စုတ်ပဲ့နုံချာလှသည်။ ထွက်လာပြန်တော့လည်း အသက် မွေးဝမ်းကျောင်း ပညာမဟုတ်၍ ဗြိတိသျှအစိုးရ၏ အုပ်ချုပ်ရေး ယန္တရား၌ ကျွန်တယောက်အဖြစ်နှင့်သာ လခစားဘ၀တွင် ၀င်ရောက် အမှုထမ်းရသည်။
ဗြိတိန်၌ တက္ကသိုလ်ပေါင်း မည်မျှရှိ၍ ပညာသင်နိုင်သည့် ဦးရေ မည်မျှရှိသည်။ စက်မှုလက်မှု မည်သို့ ထွန်းကားသည် စသည်များကို နှိုင်းယှဉ်၍ ပြတတ်သည်။ ကျွန်ပညာမှသည် သခင်ပညာရေးသို့၊ ကျွန်တက္ကသိုလ်မှသည် အမျိုးသားတက္ကသိုလ်သို့၊ ကျွန်လခစားဘ၀မှ စက်မှု လုပ်ငန်းကြီးများထူထောင်နိုင်ရေးသို့ စသည်များကို တကသမှ ဖော်ထုတ်၍ စည်းရုံထားပါသည်။
တကသ၏ စည်းရုံးရေးကောင်းပုံကို သာဓကတခု ပြပါမည်။ သပိတ်ကြီး မှောက်သောအခါ ဗြိတိသျှ အစိုးရ၏ အုပ်ချုပ်ရေး စက်ယန္တရားကြီး အတွင်းမှ အရာရှိအရာခံတို့၏ သားသမီးတွေ အများကြီး သပိတ်ထဲ ပါလာသည်။ ဗြိတိသျှအစိုးရသည် ဤမျှအထိ သဘောကောင်းသော နယ်ချဲ့သမား မဟုတ်၍ သူ့ လခစားများအား သားသမီးတွေကို သပိတ်မှ ပြန်ခေါ်ပေးရမည်ဟု ဖိနှိ်ပ်တောင်းဆိုပါသည်။ ဤတွင် မိဘများ ခမျာမှာ အလုပ်ပြုတ်ရတော့မည့် အန္တရာယ်ကြီးနှင့် ရင်ဆိုင်နေရသည်ဖြစ်၍ သားသမီးများကို ချော့မော့၍ လည်းကောင်း၊ ခြောက်ငေါက်၍ လည်းကောင်း ပြန်ခေါ်ယူသည်။ ထိုအခါ သားသမီးများခမျာ မိဘများ အလုပ်ပြုတ်မည့် ဘေးကတဖက်၊ တကသကို သစ္စာမဖောက်နိုင်သည့် ယုံကြည်ချက်ကတဖက် ဖြစ်နေပြီး နောက်ဆုံး၌ မျက်ရည်စက်လက်နှင့် မိဘတွေကို ကျောခိုင်းပြီး တကသကို ဖက်၍ အစအဆုံး ထောက်ခံသွားကြသူ အများကြီး ရှိပါသည်။
ထို့ကြောင့် ကျွန်မတို့ ခေတ် တကသသည် ယခု စစ်ပြီးခေတ် တကသများကဲ့သို့ တိုက်ပွဲတွေ အများအပြား မကြီးကျယ်သော်လည်း စည်းရုံးရေးအားဖြင့် မညံ့ပါ။ တကသ ဦးဆောင်မှုသည် ပြောင်မြောက်သည်သာ ဖြစ်ပါသည်။ ကျောင်းသားတွေ၏ မှီခိုအားထား လဲလျောင်းရာ လည်းဖြစ်ပါသည်။ စင်စစ် ထိုအချိန်အခါသည် ၁၃၀၀ ပြည့် ဗမာ့အလုပ်သမား၊ လယ်သမား အရေးတော်ပုံကြီး ပေါ်တော့မည့် ဆဲဆဲ ဖြစ်၍ ၁၉၃၆ ခု တကသ၏ သပိတ်အရေးတော်ပုံသည် ၁၃၀၀ ပြည့် အရေးတော်ပုံ၏ ပမာဏ ဖြစ်ပါသည်။
တကသသည် ဗမာ့လွတ်လပ်ရေးတိုက်ပွဲ၌ ပြည်သူနှင့် အမြဲတမ်း လက်တွဲလျက် ရံဖန် တပ်ဦးမှ၊ ရံဖန် တပ်ဆွယ်မှ၊ ရံဖန် တပ်လယ်မှ လိုက်ခဲ့သည်။
နောက်တွင်လည်း တကသသည် ပြည်သူ့ အသည်းနှလုံးအဖြစ်နှင့် အဓွန့်ရှည်၍ ထာဝစဉ် တည်ပါစေသတည်း။
အမာ
အိုးဝေမဂ္ဂဇင်း
တကသ နှစ် ၃၀ မြောက် ၁၉၅၉-၆၀ မှ
[မြန်မာသစ် မဂ္ဂဇင်း၊ အမှတ် ၁၉၊ ၂၀၁၀ခုနှစ်၊ ဒီဇင်ဘာလ မှ ကူးယူဖော်ပြပါတယ်]
Monday, January 31, 2011
သိမ်မွေ့တဲ့ခရီး
ရေးသူ- မိနှောင်း

လွန်ခဲ့တဲ့ ဆယ့်ငါးနှစ်ခန့်က ခရီးရှည်တခု ထွက်ခဲ့ဖူးပါတယ်။ ရန်ကုန်ကနေ ရှမ်းပြည်နယ်တောင်ပိုင်း ညောင်ရွှေမြို့သို့ ဖြစ်ပါတယ်။ မြစ်ဝကျွန်းပေါ်သူ ကျွန်မအနေနဲ့ ညောင်ရွှေမရောက်ခင် တောင်တွေကို အဲဒီကျမှ စမြင်ဖူးတာပါ။ ဒီ့ထက် ထူးခြားတာကတော့ တောင်အမြင့်ကြီးတွေကို ကားက လှည့်ပတ်တက်တဲ့အခါမှာ၊ အောက်ကို ကြည့်လိုက်တဲ့အခါမှာ တိမ်တွေကို တွေ့လိုက်ရတာပါဘဲ။ မိမိရဲ့ အောက်မှာ တိမ်တွေပေါ့။ ဒီလိုနဲ့ ညောင်ရွှေမြို့ကို ရောက်ခဲ့ပါတယ်။ ညောင်ရွှေက မိတ်ဆွေဖြစ်သူရဲ့ ဟော်တယ်မှာ တည်းပါတယ်။ လေအေးစက် ဖွင့်ထားသလားလို့ မေးရလောက်အောင် ရာသီဥတုက သူ့သဘာဝအတိုင်းကို အေးမြသာယာနေပါတယ်။ သူတို့နယ်ခံတွေကတော့ ဒီနေ့ ပူတယ်လို့ ပြောကြပါတယ်။
အဲဒီဟော်တယ်မှာ ဂျပန်လူငယ်လေးတယောက်နဲ့ မိတ်ဆွေ ဖြစ်ခဲ့ကြပါတယ်။ သူရောကိုယ်ပါ အင်္ဂလိပ်လို မတတ်တတတ်နဲ့ စကားပြောခဲ့ကြပါတယ်။ သူက ဂျပန်အင်္ဂလိပ် အဘိဓာန်လေး တကိုင်ကိုင်နဲ့ပေါ့။
သူ့အကြောင်းကို မိတ်ဆွေမန်နေဂျာက ပြောပြပါတယ်။ သူဒီမှာ တလခန့်နေမယ်။ ဒါကြောင့်မို့ သူ့ကို ဈေးလျှော့ပေးပါဆိုလို့ မန်နေဂျာက ဈေးလျှော့ပေးပါတယ် ပြောတော့ အဲဒီဂျပန်လေးက မြန်မာလို ဆောင့်ကြောင့်ထိုင်ပြီး မန်နေဂျာကို လက်အုပ်ချီမိုး ကန်တော့ပါသတဲ့။ ဒီလိုနဲ့ပဲ စပ်မိစပ်ရာ ဂျပန်လေးနဲ့ စကားပြောတဲ့အခါ ကျွန်မက သူ့ကို ဗုဒ္ဓဘာသာဝင်လားလို့ မေးတော့လည်း သူက မဟုတ်ပါဘူးလို့ပဲ ပြောပါတယ်။ ဒီကိစ္စကို ကျွန်မရဲ့ ခင်ပွန်းက ၀င်ရှင်းပေးပါတယ်။ ကျွန်မရဲ့ ခင်ပွန်းက သူ့ကို
"တာအို ဘာသာဝင်လား" ဆိုတော့ သူက ဟုတ်ပါတယ်လို့ ဖြေပါတယ်။ သူက ရွှေကိုင်းမျက်မှန် လေးနဲ့ပါ။ တနေ့တနေ့ ညောင်ရွှေမြို့ကို သူတယောက်တည်း လျှောက်ပြီး ပတ်နေတာပါပဲ။
နောက်တခု အတွေ့အကြုံကတော့ ကျွန်မတို့ ညနေဘက် ဟော်တယ်ဧည့်ခန်းမှာ ထိုင်နေတုန်း နိုင်ငံခြားသား သုံးယောက်က ၀င်လာပါတယ်။ သူတို့ကလည်း ကျွန်မတို့ထက် သုံးရက်လောက် စောရောက် နေခဲ့ကြသူတွေ ဖြစ်ပါတယ်။ အနောက်နိုင်ငံသား ပုံစံတွေပါ။ ဧည့်သည်ချင်းအတူတူ ဧည့်ခန်းမှာတွေ့ကြတော့ ထွေရာလေးပါး ပြောပြီး မိတ်ဆက်ကြပါတယ်။
ပထမ သူတို့က ကျွန်မကို မေးတာက
"ဘယ်နိုင်ငံက လာတာလဲ" တဲ့။
ကျွန်မက မြန်မာဝတ်စုံနဲ့ပါ။ ဘယ်သောအခါမှ ဂါဝန်တွေ၊ ဘောင်းဘီတွေ၊ စကတ်တွေ မ၀တ်ပါဘူး။ သို့သော် သူတို့က အဲဒီလို မေးတော့ ကျွန်မ တော်တော် အံ့သြသွားပါတယ်။
"ကျွန်မ မြန်မာစစ်စစ်ယောက်ပါ။ ဘာဖြစ်လို့ ဒီလိုမေးရတာလဲ ဆိုတာ ရှင်းပြစေလိုပါတယ်" လို့ဆိုတော့ သူတို့ထဲက တယောက်က
"စီးကရက် သောက်နေလို့။ ပုံစံက ထူးခြားလို့ မေးတာပါ။ မြန်မာမိန်းကလေးတွေ စီးကရက်သောက်တာ မမြင်ဖူးလို့ အခြားနိုင်ငံကလားလို့ ထင်လို့ မေးတာပါ" လို့ ပြန်ဖြေပါတယ်။
ကျွန်မကလည်း ဖွယ်ဖွယ်ရာရာ ရှင်းပြပါတယ်။ စီးကရက်ကို တခါတရံသာသောက်ပြီး၊ ကျွန်မ အမြဲသောက်တာကတော့ မြန်မာပြည်လုပ် ဆေးပေါ့လိပ် ဖြစ်တဲ့အကြောင်း ပြောပြပါတယ်။ ဒီတော့ သူတို့ထဲက ခေါင်းတုံး (ကတုံး) နဲ့ နားကွင်းနဲ့ လူက အဲဒီ ဆေးပေါ့လိပ်ဆိုတာကို သောက်ကြည့်ချင်ပါတယ် ဆိုလို့ ကျွန်မရဲ့ ဆလင်းဘက်အိပ်ထဲက တလိပ် ထုတ်ပေးလိုက်ပါတယ်။ သူက ဆေးပေါ့လိပ်ကို မီးညှိဖွာရင်း အ့သြဖွယ်ကောင်း ကြောင်း၊ သောက်လို့ အဆင်ပြေကြောင်း အပြင် ဖြစ်နိုင်လျှင် ငါးလိပ်ခန့် သူ့ကို လက်ဆောင်ပေးစေလိုပါကြောင်း ပြောလို့ ကျွန်မက ဆေးပေါ့လိပ်ငါးလိပ်ကို သူ့ကို ပေးတော့ သူက
"အိမ်ပြန်လက်ဆောင်အဖြစ် သူ့အဖေအတွက်က တလိပ်၊ သူ့အမေအတွက်က တလိပ်၊ သူ့အတွက်က တလိပ်၊ သူ့ဇနီးအတွက်က တလိပ်၊ သူ့သားအတွက်က တလိပ် ပေါင်းငါးလိပ်ရလို့ ကျေးဇူးအထူးတင်ကြောင်း" ပြောပါတယ်။ ကျွန်မလည်း သဒ္ဓါထက်သန်ပြီး ဆေးပေါ့လိပ် ငါးဆယ်အစည်းကြီး ထပ်ပေးလိုက်ပါသေးတယ်။
ကျွန်မက သူ့ကို ဘာအလုပ်အကိုင်များ လုပ်သလဲလို့ မေးတော့ သူက 'ကနေဒါ' နိုင်ငံက ကာတွန်းဆရာလို့ ပြောပါတယ်။ ကာတွန်းရဲ့ သဘော သဘာဝတွေကိုလည်း တ၀ါးဝါး တဟားဟားနဲ့ ရှင်းပြနေပါသေးတယ်။ ပြီးတော့ သူက ဆက်ပြောပါသေးတယ်။ သူဟာ သူ့မိသားစုကို ရှာဖွေ ကျွေးမွေးရတဲ့ အိမ်ထောင်ဦးစီးဖြစ်လို့ သူဟာ သူ့မိသားစုအတွက် "ဘုရားသခင်" လို့လည်း ပြောပါတယ်။ ရယ်စရာပြောတာ နေမှာပါ။
အဲဒီဟော်တယ်မှာ ၀ှိုက်ဘုတ်တွေ ချိတ်ထားပါတယ်။ လာရောက်တည်းခိုကြသူ ဧည့်သည်များက မိမိတို့ ရေးချင်ရာရာကို ရေးသားကြလေ့ ရှိပါတယ်။ အံ့သြဖွယ်ကောင်းတာက ဧည့်သည်အားလုံး ရေးကြတဲ့အထဲမှာ မြန်မာပြည်က အင်မတန် ချစ်စရာကောင်းကြောင်းနဲ့ နှစ်တိုင်း လာလည်ကြမယ် ဆိုတာပါပဲ။
မိတ်ဆွေ ဟော်တယ်မန်နေဂျာကလည်း ပြောပါသေးတယ်။ မနှစ်တုန်းက အိန္ဒိယက အဘိုးကြီးနဲ့ အဘွားကြီး နှစ်ယောက် လာလည်ကြပါသတဲ့။ ဆယ်ရက်ခန့် နေသွားကြပါသတဲ့။ ညောင်ရွှေ၊ အင်းလေး ဖောင်တော်ဦးဘုရားကို စက်လှေစီးပြီး သွားဖူးပြီး နောက် အင်းလေးတ၀ိုက်မှာ ရှိတဲ့ ရွာတွေကို စက်လှေနဲ့ပဲ နေ့တိုင်း သွားလည်ကြပါသတဲ့။ အဲဒီ အင်းလေးက ရောက်မိရောက်ရာ ရွာတွေကို ၀င်လည်ကြပါသတဲ့။
အိမ်ရှင် အင်းလေးသား အင်းလေးသူများက ချက်ချင်းဆိုသလို ဖွယ်ဖွယ်ရာရာတွေ ချက်ပြုတ် ကျွေးမွေးကြပါသတဲ့။ ငွေပေးလို့ မယူကြပါတဲ့။ ဆယ်ရက်ခရီးအတွင်း ဘယ်ရောက်ရောက် ဒီလိုပဲ နွေးထွေးစွာ ဧည့်ခံကြိုဆို ကြပါသတဲ့။ သူတို့ ဇနီးမောင်နှံ အင်မတိ အင်မတန် အံ့သြ ၀မ်းသာရပါသတဲ့။ သည်တော့ သူတို့ ပြန်ခါနီးမှာ စာရေးသွားပါတယ်။
"မြန်မာတွေဟာ ဆင်းရဲကြပါတယ်။ ဒါပေမယ့် မြန်မာတွေရဲ့ အံ့သြဖွယ် နွေးထွေးတဲ့ စိတ်ဓာတ်ကို ဘယ်လိုမှ မေ့လို့ မရနိုင်တော့ပါဘူး။ အခြား ဘယ်နိုင်ငံမှာမှလည်း ဒီလို နွေးထွေးမှုမျိုးကို မကြုံဖူးခဲ့ပါဘူး" တဲ့။
ပြန်ခါနီးမှာ အဲဒီ အိန္ဒိယ အဘိုးကြီးနဲ့ အဘွားကြီးဟာ အသက်အရွယ်ကြောင့် နောင်များမှာ မြန်မာပြည်ကို လာမှ လာနိုင်ပါဦးမလားဆိုတဲ့ အသိနဲ့ ရှိုက်ကြီးတင် လွမ်းဆွတ်ငိုကြွေးပြီး ပြန်သွားကြပါသတဲ့။
ဒီဟော်တယ်မှာ ကြုံဆုံခဲ့ရတာလေးတခုလည်း ရှိပါသေးတယ်။ ညဥ့်ဦးပိုင်းပေါ့။ အနောက်နိုင်ငံသူ သုံးယောက် ၀င်လာကြတယ်။ သူတို့လည်း ဒီမှာတည်းတာ သုံးရက်ခန့် ရှိပါပြီ။ တဦးက ဧည့်ခန်းထဲကို ပျော်ပျော်ကြီး အော်ဝင်လာပြီး မြန်မာချိတ်ထမီကို ဖြန့်ပြီး မြှောက်ပြပါတယ်။ ဒီထမီကို တော်တော် မြတ်မြတ်နိုးနိုး တန်ဖိုးထားတဲ့ ပုံပါပဲ။
သို့သော် သူက မန်နေဂျာကို ပြောပါတယ်။ သူက ဒီထမီကို ၀တ်ချင်လို့ ၀တ်ပေးပါဆိုတဲ့ အကြောင်းပါပဲ။ မြန်မာလိုပဲ ၀တ်မှာမို့ အောက်က စကတ်ကိုလည်း ချွတ်ရပါအုန်းမယ်လို့ ပြောပါတယ်။ မန်နေဂျာက ခေါင်းကုတ်ပြီး တောင်ကြည့်မြောက်ကြည့် လုပ်နေတုန်း သူ့ကို သူ့မိန်မက ၀င်ကယ်လိုက်ပါတယ်။ မန်နေဂျာကတော်က ဟိုပြော ဒီပြောနဲ့ အဲဒီ ဧည့်ခန်းအတွင်းမှာပဲ ထဘီနဲ့ စကတ်ကို လဲလို့ရအောင် လုပ်ပေးလိုက်ပါတော့တယ်။
မန်နေဂျာ ပြန်ပြောလို့ သိရတဲ့ အချက်ကလေးတခု ရှိပါသေးတယ်။ နိုင်ငံခြားသား တယောက်အကြောင်း ဖြစ်ပါတယ်။ သူနဲ့ ညနေဘက် အတူတူ လမ်းလျှောက်ရင်းနဲ့ အဲဒီ နိုင်ငံခြားသားက စက်လှေမောင်းတဲ့သူရဲ့ ဆောင်းလက်စ ဟောင်းနွမ်းနေတဲ့ ၀ါးဦးထုပ်ကို လိုချင်လို့ အတင်းဝယ်ခိုင်းပါတယ်။ မန်နေဂျာက ပြောပါတယ်။ အဲဒီလို ဦးထုပ်အသစ်တွေ ၀ယ်ချင်ရင် အများကြီး ရှိတယ်လို့ ပြောပါတယ်။ ဒါပေမယ့် နိုင်ငံခြားသားက သူပြောတဲ့ ဟောင်းနွမ်းနေတဲ့ ဆောင်းလက်စ ဦးထုပ်ကိုသာ ၀ယ်လိုပါသတဲ့။ ပြီးတော့ သူက ပြောပါသေးတယ်။ ဒီလိုမျိုး ဆောင်းပြီးသားကို ပိုတန်ဘိုးထားတယ်လို့ ပြောပါတယ်။ အဲဒါနဲ့ မန်နေဂျာလည်း ဦးထုပ်ဟောင်း ပိုင်ရှင်ထံ သွားပြီး တောင်းတောင်းပန်ပန်နဲ့ ငွေကျပ်နှစ်ထောင် ပေးဝယ်ပြီး အဲဒီ နိုင်ငံခြားသားကို ပေးလိုက်ရပါသတဲ့။
ကျွန်မတို့ ညောင်ရွှေရောက်နေတုန်း"စာတော်ပြန်ပွဲ" နဲ့လည်း ကြုံခဲ့ရပါသေးတယ်။ ပွဲကြီးပါ။ ဈေးဆိုင် ဈေးခန်းတွေလည်း အများကြီးပါ။ အံ့သြဂုဏ်ယူ ကျေနပ်ဖွယ် ကောင်းတာက စာတော်ပြန်ပွဲပြုလုပ်တဲ့ ဓမ္မာရုံပါပဲ။ တော်တော်ကြီးလည်း ကျယ်ဝန်းပါတယ်။ ဓမ္မာရုံရဲ့ မျက်နှာကျက်နဲ့အပြည့် ပိဋကတ်သုံးပုံက စာတွေကို အစအဆုံး ရေးသားထားတာပါပဲ။ ရှေးခေတ်လူကြီးတွေရဲ့ ထွန်းတောက်ဆဲ ပညာတခုလို့ပဲ သုံးသပ်မိပြီး လေးစား ပီတိဖြစ်ခဲ့ရ ပါတယ်။
စာတော်ပြန်ပွဲရဲ့ ကြည်နူးပွဲ မြင်ကွင်းကတော့ ကျွန်မ တသက်မမေ့နိုင်တော့ပါ။ စာဖြေ သံဃာတော်များ အတွက် ကြမ်းပြင်မှာ ထိုင်ရေးလို့ရတဲ့ စာရေးစာပွဲ အပုလေးတွေ လေးငါးရာခန့် ရှိမယ်လို့ ထင်ပါတယ်။ စားပွဲတွေ အားလုံးရဲ့ ဘေးတွေမှာ ထီးအဖြူတွေ ထောင်ပြီး ပိတ်ထားပြီးသား အဆင့်သင့် ရှိပါတယ်။ စာတော်ပြန်ပွဲ စပြီ ဆိုတာနဲ့ တပြိုင်နက်တည်း အဲဒီ ထီးအဖြူ လေးငါးရာခန့်ဟာ တဖြည်းဖြည်းချင်း ပြိုင်တူ ပွင့်လာကြပါတယ်။ ပွင့်ပြီးတာနဲ့ စာပွဲလေးတွေ ရှေ့မှာ စာဖြေသံဃာတော်တွေ စပြီး စာဖြေကြရပါတယ်။ ဓမ္မမိတ်ဆွေများက ပြိုင်တူ ဖွင့်ပေးကြ တာပါ။ စာတော်ပြန်ပွဲ ပြီးတဲ့အခါမှာလည်း အဲဒီ ထီးဖြူတွေ အားလုံး တဖြည်းဖြည်းချင်း ပြိုင်တူ ပိတ်လိုက်ကြ ပါတယ်။ လွန်စွာမှ ကျက်သရေမင်္ဂလာ အပေါင်းနှင့် ပြည့်စုံသော မြင်ကွင်းပါ။
ညောင်ရွှေမှာ ရှေးခေတ်က ဟော်နန်းကိုလည်း ရောက်ခဲ့ပါသေးတယ်။ ဟော်နန်းသော့ကိုင်တဲ့ ဦးလေးကြီးကို မေတ္တာရပ်ခံပြီး ၀င်ကြည့်ခဲ့တာပါ။ အပေါ်ထပ်မှာတော့ ကြမ်းခင်းဆိုတော့ ဖုံတွေ တသောသောပါပဲ။ ဓာတ်ပုံအချို့လည်း ချိတ်ထားတာ တွေ့ခဲ့ရပါတယ်။ အောက်ထပ်မှာကျတော့ သံမံတလင်းခင်းထားပြီး ကန်တော့ခံရာနေရာလို့ ပြောပါတယ်။ ကျယ်ဝန်းလှပါတယ်။ ထူးထူးခြားခြား မှတ်မိနေတာက ဟော်နန်းအ၀င်မှာ ရှေးခေတ်က မြောက်ကြီးတလက် တွေ့ခဲ့ရတာပါပဲ။
နောက်ထပ် မှတ်မှတ်ရရ တခုလည်း ရှိပါသေးတယ်။ ရန်ကုန် ညောင်ရွှေခရီးမှာ ညောင်ရွှေရောက်ခါနီး မှာ ကိုးမြို့ရှင် နတ်နန်းရှိပါတယ်။ အဲဒီနေရာကျရင် လာသမျှကား အားလုံး ရပ်ပေးကြရပါတယ်။ ခရီးသွားသူတွေ အနေနဲ့ ယဉ်ကျေးမှုအရ ငွေကန်တော့ရင်တော့ လက်ခံပါတယ်။ ဘယ်ရွေ့ဘယ်မျှလည်း မပြောပါ။ မကန်တော့ရင်လည်း အဘွားကြီးများက ဆုတောင်းမေတ္တာ ဆက်ပို့နေပြီး ကျန်ရစ်ခဲ့ကြပါတယ်။
ကျွန်မက ကြုံရခဲလို့ ကိုးမြို့ရှင်နန်းကို ၀င်ပြီး အဲဒီတုန်းက ငွေကိုးရာကျပ်တိတိ ကန်တော့ပါတယ်။ နတ်နန်းဦးစီးနဲ့ အဖွဲ့ဟာ ဆွေတော်မျိုးတော်တွေ ရောက်လာပြီဆိုပြီး ၀မ်းသာအားရနဲ့ မောင်းအကြီးဆုံးကြီးကို တမိနစ်ခန့် ထုပါတယ်။ မောင်းသံကြီးက ဟိန်းနေတာပါပဲ။ ရိုးသားပွင့်လင်းစွာ ပြောရရင် ကျွန်မအနေနဲ့ ၀မ်းသာတာက တဖက်၊ မကြားစဖူး မောင်းသံကြီးကို ကြားရလို့ ကျောချမ်းပြီး ကြောက်သွားရတာက တဖက်ပေါ့။ စိတ်ကို တည်ငြိမ် အေးချမ်းသွားအောင် မနည်းလုပ်ခဲ့ရပါတယ်။
အဲဒီ လမ်းခရီးမှာပဲ ထူးခြားတဲ့ မြင်ကွင်းများ တွေ့ခဲ့ရပါတယ်။ ကျွန်မတို့ မြေပြန့်မှာ မရှိပါဘူး။ အဲဒါက ဘာလဲဆိုတော့ ဆွမ်းခံကြွတဲ့ ဘုန်းဘုန်းက အိမ်ထဲ မ၀င်ပါဘူး။ အိမ်ရှေ့ လမ်းဘေးမှာ ရပ်ပါတယ်။ ဆွမ်းလှူသူ လာရင် ဘုန်းဘုန်းက ဆောင့်ကြောင့်ထိုင်ပြီး အလှူခံပါတယ်။ ဆွမ်းလှူသူကလည်း အမျိုးသားပဲ ဖြစ်စေ၊ အမျိုးသမီးပဲ ဖြစ်စေ၊ အဘိုးကြီး အဘွားကြီးပဲ ဖြစ်စေ ဆောင့်ကြောင့်ပဲ ထိုင်ပြီး လှူပါတယ်။ ထူးခြားတဲ့ မြင်ကွင်းများပါပဲ။
လမ်းမှာ ကလေးတွေကို တွေ့ရင် သကြားလုံး အထုပ်လိုက် ပစ်ပေးကြပါတယ်။ ဘီစကွပ်မုံ့ စသည်ဖြင့် လည်း ပါတာပေါ့လေ။ ကလေးတွေက တော်တော် ပျော်မြူးသွားကြပါတယ်။ ရန်ကုန်သကြားလုံး၊ ရန်ကုန် ဘီစကွတ်ဆိုတာက သူတို့ဆီမှာ အလွန် ရှားတာကလား။
ထူးခြားတာတခု ရှိပါသေးတယ်။ ညောင်ရွှေကနေ တောင်ကြီးကို ကားနဲ့ သွားမယ်ဆိုရင် လေးဆယ့်ငါး မိနစ်လောက်ပဲ ကြာပါတယ်။ ထူးခြားတာကတော့ ညောင်ရွှေကနေ တောင်ကြီးကို သွားကြတော့မယ် ဆိုရင်ဖြင့် "အနွေးထည်တွေ ယူလာကြဟေ့" လို့ သတိပေးသံ ကြားရတာပါပဲ။ တကယ်ပါ။ ညောင်ရွှေကနေ တနာရီပြည့် အောင်တောင် မသွားရတဲ့ ဒီခရီး နီးနီးလေးကို အနွေးထည်ထူထူတွေ ယူသွားကြရပါတယ်။ တောင်ကြီး ရောက်ပြီ ဆိုလို့ကတော့ အဲဒီအနွေးထည်တွေ ၀တ်ရော့ပဲ။ ချက်ချင်း တန်းပြီး တအားချမ်းတော့တာပါပဲ။
တောင်ကြီးမှာ ပန်းချီကားတွေထဲက မြင်ကွင်းအတိုင်းပဲ မြင်ရပါတယ်။ ရှမ်းတောင်သူ ပျိုပျိုရွယ်ရွယ်တွေ၊ သက်လတ်ပိုင်းတွေ၊ သက်ကြီးပိုင်းတွေအားလုံး အင်္ကျီထူထူကြီးတွေ၊ ခေါင်းပေါင်း ထူထူကြီးတွေနဲ့ ရောင်းဝယ်ဖောက်ကား နေကြတာပါ။ အများအာဖြင့် လက်တ၀ိုင်းအထက် ကြီးမယ်လို့ ထင်ရတဲ့ ကြွေဇလုံကြီးတွေနဲ့ ကြက်သွန်ချဉ်၊ ရှမ်းချဉ်စသဖြင့် ရောင်းကြတာ တွေ့ရပါတယ်။ "တို့ဟူးနွေး" ဆိုတဲ့ မုန့်တမျိုးကတော့ သူတို့ နေ့စဉ်စားကြတဲ့ နံနက်စာ မုန့်တမျိုး ဖြစ်ပါတယ်။ အခြား ဟင်းသီးဟင်းရွက်ပေါင်းစုံ ရောင်းချနေကြတာလည်း တွေ့ခဲ့ရပါတယ်။ ဆိုင်ကြီး ကန္နားကြီးတွေမှာတော့ တီဗွီတို့ ဘာတို့ ခေတ်ပေါ်လျှပ်စစ်ပစ္စည်းများ ရောင်းချကြတာ တွေ့ခဲ့ရပါတယ်။
ပြန်ပြီ။ ကျွန်မတို့ ပြန်ပါပြီ။ ပြန်ခါနီးမှာ မန်နေဂျာကတော်က ကျွန်မတို့ကို သေသေချာချာ မှာပါတယ်။ နွေနဲ့ မိုးရာသီတွေမှာသာ လာလည်ဖို့ ဖြစ်ပါတယ်။ ဆောင်းရာသီဆိုရင် သူတို့တောင် အနွေးဓာတ်ရအောင် တော်တော်ခက်ခက်ခဲခဲ နေကြရတယ် ပြောပါတယ်။ ပန်းကန်ဆေးရင်တောင် ရေနွေးပူပူနဲ့ ရေအေးအနည်းငယ် ရောပြီး ဆေးရပါသတဲ့။ မခံမရပ်နိုင်အောင် အေးပါသတဲ့။
ပြန်ခါနီး နှုတ်ဆက်ကြတော့ မန်နေဂျာရော သူ့ဇနီးပါ မျက်နှာမကောင်းကြပါဘူး။ တဦးနဲ့တဦး လွမ်းကြလို့ပါ။ ကျွန်မတို့လည်း မျက်ရည်လေး တလည်လည်နဲ့ နှုတ်ဆက်ခဲ့ကြပြီး အပြန်ကားစီးခဲ့ကြပါတယ်။ ကားကို ငါးမိနစ်ခန့်မောင်းပြီးတော့ ကွေ့တခုမှာ ကနေဒါက ကာတွန်းဆရာနဲ့ အဖွဲ့ကို တွေ့ပါတယ်။ ကားရပ်ပြီးတော့ နှုတ်ဆက်ကြပါတယ်။ ကျွန်မ သူ့ကို ပေးခဲ့တဲ့ လက်ဆောင် ဆေးပေါ့လိပ် အစည်းကြီးကို သူ့အိတ်ထဲက ထုတ်ယူပြီး မြှောက်ပြပါသေးတယ်။
ဒီခရီးအစမှာ ဖော်ပြခဲ့တဲ့ ဂျပန်လေးနဲ့လည်း မပြန်ခင် တရက်က ဓာတ်ပုံအတူ ရိုက်ခဲ့ပါသေးတယ်။ ကျွန်မရဲ့ ရန်ကုန် အိမ်လိပ်စာကိုလည်း သူ့ကိုပေးပြီး ရန်ကုန်ရောက်ရင် ထမင်းကျွေးချင်လို့လည်း ဖိတ်ခဲ့ပါသေး တယ်။
တောင်တန်းတွေ အမျိုးမျိုး၊ မြင်ကွင်းတွေ အမျိုးမျိုးကို ဖြတ်ပြီး ကျွန်မတို့ ရန်ကုန် ပြန်ရောက်ခဲ့ပါတယ်။ သုံးရက်လောက်နေတော့ အဲဒီ ညောင်ရွှေက ဂျပန်လေး ကျွန်မတို့အိမ်ကို ခင်မင်မှု အထိမ်းအမှတ်အဖြစ် ဆိုက်ဆိုက်မြိုက်မြိုက် ရောက်လာပါတယ်။ နံနက်စာ တည်ခင်းဧည့်ခံပြီး စကားတွေ ပျော်ပျော်ကြီး ပြောကြပါ တယ်။ သူက ပြောကြပါတယ်။ သူ့အမေက သူ့ကို ပြောတယ်တဲ့။
"မင်း မြန်မာပြည် မသွားနဲ့။ မြန်မာတွေက ဂျပန်ဆိုရင် အသည်းခိုက်အောင် မုန်းတာ။ မင်း အဘိုးတို့ ခေတ်တုန်းက မြန်မာပြည်ကို သွား စစ်ခင်းခဲ့တာ။ မင်းသွားရင် မြန်မာတွေက မင်းကို သတ်လိမ့်မယ်" လို့ ပြောပါသတဲ့။
သူကလည်း စွန့်စွန့်စားစား လာရတာပါတဲ့။ မြန်မာတွေရဲ့ ဖော်ရွေမှုဟာ ကမ္ဘာမှာ ချစ်စရာအကောင်းဆုံး ဓလေ့ဆိုတာ သူဝမ်းမြောက်စွာ သိရပါသတဲ့။
သူက ဂျပန်ပြန်ရောက်တော့ ကျွန်မတို့ဆီကို လက်ဆောင်ပစ္စည်းတွေလည်း ပို့လိုက်ပါသေးတယ်။
တကယ်တော့လည်း စစ်ဆိုတာ ဘယ်လူမျိုးကမှ အလိုမရှိတဲ့ အရာပါ။ ခုနှယ်ခါမှာတော့ ဒုတိယကမ္ဘာစစ်ပြန် ဂျပန်ကြီးတဦးက ကျွန်မတို့ နိုင်ငံက ကလေးတွေအတွက် ဖောင်ဒေးရှင်းတခု တည်ထောင်ပြီး ကူညီနေပါရော့လား။ တကယ်တော့ ယုတ်စွအဆုံး ဒုတိယကမ္ဘာစစ်တုန်းက မြန်မာပြည်ကို အင်္ဂလိပ်တွေနဲ့ အတူဝင်လာတဲ့ ဂေါ်ရခါး စစ်သားတွေတောင် စစ်ကို အလိုမရှိကြတာ အမှန်ပါဆိုတာ ကျွန်မ ယုံကြည်မိပါတယ်။
ဘာပဲ ဖြစ်ခဲ့ ဖြစ်ခဲ့ ကျွန်မရဲ့ ဖော်ပြပါ မေတ္တာခရီးလေးကတော့ အောင်မြင်စွာ၊ စိတ်ကျေနပ်စွာ၊ ပျော်ရွှင်စွာ ပြီးဆုံးခဲ့ပါတယ်ရှင်။
မိနှောင်း
[ပိတောက်ပွင့်သစ်မဂ္ဂဇင်း၊ အမှတ် ၃၇၊ ဒီဇင်ဘာလ၊ ၂၀၁၀ မှ ကူးယူဖော်ပြပါတယ်]
ပြောသူသာ ပက်လက်လန်လိမ့်မယ်
ရေးသူ- လူထုစိန်ဝင်း

'လုပ်တော့ လုပ်ချင်တာပေါ့။ ဒါပေမဲ့........'
နားအခါးဆုံး ဒီစကားလုံးကို စိတ်ပျက်စရာကောင်းလောက်အောင် ထပ်ခါတလဲလဲ ကြားနေရပါတယ်။ နှစ်ပေါင်း ၂၀ ကျော် အင်္ဂလိပ်စကားပြောသင်ဆရာ လုပ်စဉ်က လူငယ်တွေ၊ လူကြီးကလေးတွေနဲ့ နေ့စဉ် ထိတွေ့နေရတော့ ဒီစကားကို အမြဲလိုလို ကြားခဲ့ရပါတယ်။ ကျန်းမာရေးကြောင့် ကျောင်းဆရာဘ၀က နားပြီး မူရင်းဇာတိဘ၀ဖြစ်တဲ့ စာနယ်ဇင်းသမားဘ၀ကို အချိန်ပြည့်သမားအဖြစ် ပြန်လည်ရောက်တော့လည်း အထိအတွေ့များတာက စာနယ်ဇင်းသမား လူငယ်တွေ ဖြစ်ပြန်တော့ ဒီစကားကို နေ့စဉ်လိုလို ကြားရပြန်တာပါပဲ။
'ဖြစ်တော့ဖြစ်ချင်တာပေါ့။ ဒါပေမဲ့.......'
လူငယ်လူရွယ်တွေ ဖြစ်နေပါလျက်နဲ့ လုပ်ချင်တာကို လုပ်ဖြစ်အောင် လုပ်မယ်၊ ဖြစ်ချင်တာကို ဖြစ်အောင်လုပ်မယ်လို့ ပြတ်ပြတ်သားသား ရဲရဲဝံ့ဝံ့ မပြောကြဘဲ နောက်ဆက်တွဲ 'ဒါပေမဲ့...' ဆိုတာကြီးက ကပ်ပြီး ပါလာတာချည်းပါပဲ။ လူငယ်ဆိုတာ ရဲရင့်တယ်၊ ပြတ်သားတယ်၊ ကိုယ်ကျိုးစွန့်နိုင်တယ်၊ တုံးတိုက်တိုက် ကျားကိုက်ကိုက် ဘာကိုမှ မမှုဘူးလို့ စာတွေထဲမှာ အမြဲတမ်း ဖတ်ခဲ့ရတယ်။ လူငယ်ဆိုတာ စိတ်ကူးယဉ် အိပ်မက်တွေနဲ့ ပျော်မွေ့တတ်တယ်လို့လည်း စာတွေထဲမှာ ဖတ်ခဲ့ဖူးတာပါပဲ။
အခုတော့ စာအုပ်တွေနဲ့ စာအုပ်တွေထဲက အဆိုအမိန့်တွေကို ပြောခဲ့တယ်ဆိုတဲ့ ရှေးပညာရှင်တွေကို တောင် သံသယဖြစ်စရာ ကောင်းနေတော့တယ်။ လူငယ်ဖြစ်ပြီး လူငယ်နဲ့ကို မတူတော့ဘူး။ ဖျတ်လတ် သွက်လက်မှုနဲ့ ပျော်ရွှင်လန်းဆန်းမှုကို မမြင်တွေ့ရဘူး။ တုံးတိုက်တိုက် ကျားကိုက်ကိုက်ဆိုတာ မတွေ့ရဘူး။ သံဝေဂတရားကိုသာ တတွတ်တွတ် ကြားရတယ်။ ဒါပေမဲ့..... ဒါပေမဲ့.... ဆိုတာသာ အမြဲ ရွတ်နေကြတယ်။ လူငယ်ဖြစ်ပြီး စိတ်ကူး မယဉ်တတ်ဘူး။ အိပ်မက် မမက်တတ်ဘူး။
ကျောင်းသားတွေကို စာသင်နေစဉ်က ဧ၀ရက်တောင်ထိပ်ကို ရောက်အောင် တက်ခဲ့တဲ့ မျက်မမြင် တောင်တက်သမား တယောက်အကြောင်း မကြာခဏ သင်ပေးခဲ့ဖူးတယ်။ 'မသန်ပေမယ့် စွမ်းတဲ့သူတွေ အကြောင်း' ဆိုတဲ့ခေါင်းစဉ်နဲ့ ကိုယ်လက်အင်္ဂါချို့တဲ့ပေမယ့် ဘယ်သူ့ကိုမှ မမှီခိုဘဲ ကိုယ့်ခြေထောက်ပေါ် ကိုယ်ရပ်ပြီး ကိုယ့်ဘ၀ကိုယ် ကျောင်းနေတဲ့ သူတွေအကြောင်း ဒါဇင်မက သင်ပေးခဲ့ဖူးတယ်။ သင်လည်း သင်သင်ပါပဲ။ ပြောလည်း ပြောပြောပါပဲ။ နားကလောလှတဲ့ 'ဒါပေမဲ့... ဒါပေမဲ့' ဆိုတဲ့ စကားသံကို ကြားရမြဲ ဖြစ်ပါတယ်။
ကျောင်းနံရံမှာ 'Fly, Fly up to the sky' (ပျံ ပျံ မိုးစွန်ထိပ်ဖျား ရောက်အောင်ပျံ) ဆိုတဲ့ အင်္ဂလိပ်စာတန်းနဲ့ 'Nothing is impossible under the Sun' (နေမင်ကြီးအောက်မှာ မဖြစ်နိုင်တာ ဘာမှမရှိ) ဆိုတဲ့ အင်္ဂလိပ်စာတန်းနှစ်ခုကို စာလုံး အကြီးကြီးတွေနဲ့ ကပ်ထားရုံမက စာသင်တဲ့အခါတိုင်းလည်း ဒီသဘောတရားတွေကိုသာ အဓိကထား သင်ပေးခဲ့ပေမယ့် လူငယ်တွေရဲ့ နှုတ်က 'သံဝေဂလင်္ကာ' ရွတ်သံတွေသာ ကြားရမြဲပါပဲ။
လူငယ်ဆိုတာ စိတ်ကူးယဉ်ရဲရမှာပေါ့။ အိပ်မက်တွေ မက်ရဲ ရမှာပေါ့။ ဘာဖြစ်လို့ တုံ့ဆိုင်းနေရမှာလဲ။ ရှေးရှေးပဝေသဏီက လူသားတွေရဲ့ စိတ်ကူးယဉ်မှုတွေနဲ့ အိပ်မက်တွေကြောင့်သာ လူသားတွေ ဒီနေ့ ဒီအခြေအနေမျိုး ရောက်ရှိနေကြရတာလို့ ပြောတဲ့အခါများမှာ ပြောနေတုန်းတော့ နားဝင်သလိုလို ရှိကြပါရဲ့။ ဒါပေမဲ့ ပြောပြီးသွားတော့လည်း သူတို့နဲ့ မဆိုင်သလို ခပ်အေးအေး ပါပဲ။ အရယ်အမော မပျက်၊ လက်ဖက်ရည်ဆိုင် အသွားမပျက်၊ စကော့ဈေး အပတ်မပျက်ပါဘဲ။ ပါးစပ်က အမြှုပ်တစီစီ ထွက်အောင် ဟောပြောသင်ပေးနေသူသာ အမောဆို့ပြီး 'ဟောရင်းသာ ပျံတော်မူတဲ့' ကိန်းဆိုက်လိမ့်မယ် သူတို့ကတော့ ထူးမခြားနားပါပဲ။
ထူးမခြားနာမှန်း သိပေမယ့်လည်း ပြောတော့ ပြောရဦးမှာပါဘဲ။ ကျောင်းသားတွေကို ထပ်ခါ တလဲလဲ သင်ပေးခဲ့ဖူးတဲ့ အဖြစ်မှန်ဇာတ်လမ်းတခု အကြောင်းပါ။ ရီးဒါးစ်ဒိုင်ဂျက် စာအုပ်ထဲမှာ ပါခဲ့တာပါ။ ဂျာနယ်ဆောင်းပါးနဲ့ လိုက်အောင် တိုတိုပဲ ချုပ်ပြီး ပြောပါမယ်။ ဇာတ်ကြောင်းကတော့ မနေ့တနေ့က 'ကတ်ထရီးနာ' ကြောင့် ကမ္ဘာကျော်သွားတဲ့ နယူးအော်လင်းမြို့ကလေးမှာ အခြေခံခဲ့တဲ့ ဇာတ်ကြောင်း ဖြစ်ပါတယ်။ မေရီဆိုတဲ့ ဆယ်ကျော်သက် လူမည်းမလေးဟာ မူလတန်းကျောင်းတောင် ဆုံးအောင်မနေရဘဲ ကျောင်းထွက်ခဲ့ ရသူပါ။ ပညာမတတ်တဲ့ လူမည်းဆင်းရဲသား ကလေးသူငယ်များ သွားရာလမ်းအတိုင်း မေရီလည်း လမ်းပေါ်ရောက်သွားပြီး ဆိုးသွမ်းလူငယ် ဖြစ်သွားပါတယ်။ အလစ်သုတ်တယ်၊ ခိုးတယ်၊ လုတယ်။ နောက်တော့ ထုံးစံအတိုင်း လူငယ်ထိန်းသိမ်းရေးစခန်းကို ရောက်သွားတယ်။ စခန်းကထွက်တော့ အိမ်ထောင်မပြုပဲ ကလေးနှစ်ယောက် မွေးတယ်။ နောက် စခန်းပြန်ရောက်တယ်။ အဲဒီလိုသာ ဖြစ်တာ။ မေရီ ငယ်ငယ်ကတည်းက 'ကြီးရင် ဆရာဝန်လုပ်မယ်' လို့ ပြောမြဲဖြစ်တယ်။ စခန်းမှာ စာသင်ရတယ်။ မေရီမှာက ဖတ်ပြီးရင် မေ့သွားတတ်တဲ့ ဥာဏ်ရည်ချို့တဲ့ရောဂါ (ဒစ်စလီးယား) ရှိတယ်။ ဒါပေမဲ့ ဆရာကောင်းများကြောင့် စခန်းမှာ ထူးချွန်ဆု ရတယ်။ သမ္မတအိမ်ဖြူတော်တောင်သွားပြီး ထူးချွန်ဆု ယူရတယ်။
စခန်းက လွတ်လာတော့ ကလေးနှစ်ယောက်နဲ့ ရုန်းကန်ရင်း အလုပ်လုပ်တယ်။ အိမ်ထောင်ကျတယ်။ အိမ်ထောင်ဘက်ရဲ့ အားပေးကူညီမှုနဲ့ စာတွေ ဆက်သင်တယ်။ သင်လိုက် မေ့လိုက်နဲ့ သင်နေဆဲမှာပဲ လေဖြတ်ပြီး ကိုယ်တခြမ်း သေသွားတယ်။ အရှုံးမပေးချင်စိတ်နဲ့ ကိုယ်တခြမ်းသေရာက ပြန်ပြီး ကောင်းလာအောင် လေ့ကျင့်ခန်းတွေ လုပ်တယ်။ ဖခင်ဖြစ်သူက အားပေးတယ်။ ခင်ပွန်းနဲ့ ကလေးနှစ်ယောက်က ကူညီတယ်။ ဒီလိုနဲ့ နောက်ဆုံးမှာ မေရီဟာ ဆရာဝန် ဖြစ်သွားတယ်။ ဆရာဝန်တောင်မှ 'သာမညောင်ည' ဆရာဝန် မဟုတ်ဘူး။ လူတိုင်းနှုတ်ဖျားမှာ တဖွဖွပြောနေရတဲ့ 'ကရုဏာရှင်' ဆရာဝန်မလေးအဖြစ် နာမည်ကျော်ကြားခဲ့တဲ့ ဆရာဝန် ဖြစ်သွားတာ။
အဲဒီဇာတ်လမ်းဟာ ပုံပြင် ဒဏ္ဍာရီ မဟုတ်ပါဘူး။ စိတ်ကူးယဉ် ၀တ္ထုမဟုတ်ပါဘူး။ တကယ်ဖြစ်ခဲ့တဲ့ ဇာတ်လမ်းလေးပါ။ လူငယ်တွေ စိတ်ခွန်အား ရှိပါစေတော့ဆိုတဲ့ ရည်ရွယ်ချက်နဲ့ ဒီဇာတ်လမ်းလေးကို တနှစ် သုံးလေးကြိမ်လောက် ကျောင်းသားသစ်တိုင်းကို သင်ပေးခဲ့ပါတယ်။ ၁၀ နှစ် ၁၂ နှစ်ကြာအောင် တက်နေတဲ့ ကျောင်းသူ ကျောင်းသားတွေဆို ကျောင်းသားသစ်တွေနဲ့ ရောရောပြီး နားထောင်ရတာဆိုတော့ အကြိမ်ပေါင်း လေးငါးဆယ်လောက် နားထောင်ခဲ့ကြရတာပေါ့။ စာပိုဒ်အချို့ကိုတောင် အလွတ်ရနေကြပါပြီ။ စိတ်ခွန်အားတွေ ရှိသွားလား။ အားကျသလား မေးကြည့်။
သူတို့ အဖြေကြားရင် ပက်လက်လန်သွားလိမ့်မယ်။
လူထုစိန်ဝင်း
၁၉-၁၀-၂၀၀၅
ဖတ်စရာ ၄၂
[ပင်ဝါးရုံစာပေမှ ထုတ်ဝေတဲ့ လူထုစိန်ဝင်း ရဲ့ 'ဖတ်စရာ' စာအုပ်၊ ပထမအကြိမ်၊ ၂၀၀၇ မှ ကူးယူဖော်ပြ တာ ဖြစ်ပါတယ်]
ထန်ထန်ကလေး မြည်တွန်လိုက်ရဦးမယ်
ရေးသူ- လူထုစိန်ဝင်း

ဒီနေ့ခေတ် ဂျာနယ်တွေ မိုးဦးကျကာလမှာ ဟိုနေရာက မှိုတွေထွက်လာ၊ ဒီနေရာက မှိုတွေထွက်လာ ဆိုသလိုမျိုး ပေါပေါများများကြီး ထွက်လာနေကြတာ တွေ့ရတော့ ၀မ်းသာမိတယ်။ လွန်ခဲ့တဲ့ ဆယ့်လေးငါးနှစ် အချိန်တွေတုန်းကဆိုရင် စာနယ်ဇင်းပညာ ကွယ်ပျောက်သွားတော့မှာလားလို့ စိုးရိမ်ရလောက်တဲ့အထိ ဖြစ်ခဲ့ရတာပါ။
အဲဒီလို စိုးရိမ်တဲ့အတွက် စာနယ်ဇင်း အတတ်ပညာဆိုင်ရာ စာတွေ၊ စာနယ်ဇင်းသမားတို့ရဲ့ တာဝန်နဲ့ ၀တ္တရားတွေ၊ ကျင့်ဝတ်စည်းကမ်းတွေအကြောင်း အဆက်မပြတ် ရေးခဲ့ပါတယ်။ နှစ်ပေါင်း ၂၀ ကျော် ကာလ အတွင်း ရေးခဲ့သမျှ စာတွေရဲ့ ထက်ဝက်ကျော်ကျော်ဟာ စာနယ်ဇင်းနဲ့ ဆက်စပ်ရာ စာမျိုးတွေချည်း ဖြစ်ပါတယ်။ စာနယ်ဇင်းသမားတိုင်း တီးမိခေါက်မိဖို့ လိုတဲ့ ကြော်ငြာအတတ်ပညာအကြောင်း၊ စာနယ်ဇင်း layout ဒီဇိုင်း မိတ်ကပ်ပညာအကြောင်း၊ စာနယ်ဇင်း မူပိုင်ခွင့်အကြောင်း၊ စာနယ်ဇင်း ကျင့်ဝတ်အကြောင်း စတဲ့ စာတွေလည်း အများကြီး ရေးခဲ့ပါတယ်။
ဒီနေ့ခေတ်တော့ အပတ်စဉ်ထုတ် ဂျာနယ်တွေ ၁၅၀ ၀န်းကျင်လောက်အထိ ထွက်ရှိလာတာ တွေ့ရပါတယ်။ ထွက်ရှိလာတဲ့ ဂျာနယ်တွေအတွက် 'လူအင်အား' လည်း လိုအပ်လာလေတော့ ရှိရင်းစွဲ လူအင်အားအပြင် 'အင်အားသစ်' တွေ အများအပြား စုဆောင်း ပျိုးထောင်ပေးကြရပါတယ်။ အဲဒီတော့ ကျောင်းပြီးစ ဘွဲ့ရ လူငယ်လေးတွေ၊ မိန်းကလေးတွေ၊ ပညာသင်ရင်း တဖက်တလမ်းက အလုပ်လုပ်နေကြတဲ့ လူငယ်၊ လုံမငယ်တွေ၊ ဂျာနယ်လောကထဲ အုံလိုက်ကျင်းလိုက် ၀င်ရောက်လာကြတာကို ၀မ်းသာစရာ တွေ့နေရပါတယ်။
စာနယ်ဇင်းဆိုင်ရာ စာမျိုးတွေ ရေးတာအပြင် လူငယ်တွေအတွက် အထူးရည်ရွယ်တဲ့ စာမျိုးတွေလည်း အဆက်မပြတ် ရေးသားနေတာကြောင့် ဂျာနယ်တိုက်အသီးသီးမှာ ၀င်လုပ်နေကြတဲ့ လူငယ် လုံမငယ်လေးတွေ အမြဲတမ်းလိုလို လာရောက် မေးမြန်း ဆွေးနွေးတတ်ကြပါတယ်။ လာသမျှ လူငယ်တွေကိုလည်း မျက်နှာစိမ်းကျက် မရွေး တတ်နိုင်သမျှ ကူညီအားပေးလေ့ ရှိပါတယ်။ နောက်တခေတ်အတွက် သူတို့လေးတွေကိုပဲ အားကိုးကြရမှာ မဟုတ်လား။ ရှေး ပုဂ္ဂလိက သတင်းစာတိုက်တွေမှာ လုပ်ကိုင်ခဲ့ကြတဲ့ သတင်းစာဆရာတွေ၊ သတင်းထောက်တွေ ဆိုတာက များများစားစား ရှိကြတော့တာမှ မဟုတ်တာ။ သက်ရှိထင်ရှား ရှိနေသေးပြီး စာနယ်ဇင်းလောကထဲမှာ တနည်းမဟုတ်တနည်း ကျင်လည်နေသေးသူ အရေအတွက်က လက်နှစ်ဖက် ပြည့်အောင်တောင် ရေတွက်စရာ မရှိတော့ဘူးလေ။ ရှိနေသေးတဲ့ လူတွေထဲက အငယ်ဆုံးဆိုတဲ့ လူတောင် အသက် ၆၀ တော့ အနည်းလေး ရှိပြီပေါ့။ အများစုက ၇၀ တန်း၊ ၈၀ တန်းတွေ ဖြစ်ကုန်ကြပြီ။
လူကြီးပိုင်းက ဆရာမောင်ထင်ဆိုရင် ၉၆ ထဲမှာ ရှိနေပြီး ဒေါ်ဒေါ် လူထုဒေါ်အမာတောင် ဒီနှစ် နိုင်ဝင်ဘာ ၂၉ မှာ ၉၀ တင်းတင်းပြည့်ပြီ။ မြန်မာ့အလင်း ဦးသန်းညွန့်တို့၊ မိုးကြိုး ဦးခင်မောင်လေးတို့ဆို ၇၀ ကျော်ကုန် ကြပြီ။ ကြေးမုံ ဦးသာဘန်း၊ ကြေးမုံက မောင်ရဲဝင်း၊ ဟန်ဂေရီ ဦးကိုကိုကြီးတို့၊ ပျဉ်းမနား ဦးခင်မောင်ထွေးတို့လည်း ၇၀ တန်းတွေပေါ့။ ဒီပုဂ္ဂိုလ်တွေဟာ စာနယ်ဇင်းနဲ့ အဆက်မပြတ်သေးဘဲ စာတွေ ကြိုးကြား ကြိုးကြား ရေးနေကြသေးပေမယ့် ပုဂ္ဂလိက နေ့စဉ်သတင်းစာတွေ ပြန်လုပ်ကြပါလို့ ဆိုရင်တောင်မှ တကယ်တမ်းကြတော့ ဘယ်သူမှ စိတ်ရှိသလောက် လုပ်နိုင်ကြတော့မှာ မဟုတ်ပါဘူး။
အဲဒါကြောင့် လူငယ်လေးတွေက နောင်လာမယ့် ပုဂ္ဂလိက သတင်းစာခေတ်ကို ဦးဆောင် လုပ်ကိုင်သွားကြရမှာ ဖြစ်ပါတယ်။ အဲဒါကြောင့်လည်း လူငယ်လေးတွေ၊ လုံမငယ်တွေကို မျက်နှာစိမ်း မျက်နှာကျက်မရွေး တတ်နိုင်သမျှ အားပေးကူညီနေတာ ဖြစ်ပါတယ်။
လူငယ်တွေနဲ့ အမြဲမပြတ် ထိတွေ့နေရတော့ ဂျာနယ်တွေမှာ လက်တွေ့ ၀င်ရောက် လုပ်ကိုင်နေကြပြီ ဖြစ်ပေမယ့် လူငယ်အများစုဟာ 'ဂျာနယ်လစ်ဇင်' ခေါ်တဲ့ စာနယ်ဇင်း အတတ်ပညာဆိုင်ရာ စာအုပ်စာတမ်းတွေ ရှာဖွေဖတ်ရှုမှု အင်မတန် နည်းနေတာ တွေ့ရပါတယ်။ မြန်မာဘာသာနဲ့ ရေးသားထားတဲ့ စာနယ်ဇင်းဆိုင်ရာ စာအုပ်စာတမ်း ပေါင်း ၂၀ ထက် မပိုပါဘူး။ ဒီလို စာအုပ်မျိုးတွေ ဆိုင်တွေ ပေါ်မှာတော့ ဘယ်ရှိတော့မှာလဲ။ အမျိုးသား စာကြည့်တိုက်၊ တက္ကသိုလ် စာကြည့်တိုက်၊ စာပေဗိမာန် စာကြည့်တိုက်၊ ၃၇ လမ်းက လေဟာပြင် 'စာပြတိုက်' တွေမှာ ရှာဖွေ ဖတ်ရှုလို့ ရနိုင်ပါတယ်။ ၀မ်းနည်းစရာ တွေ့ရတာက လာသမျှ လူငယ်တွေရဲ့ ၉၀ ရာခိုင်နှုန်း အဲဒီ စာကြည့်တိုက်တွေ သွားပြီး ရှာဖွေဖတ်ရှု မလုပ်ကြဘူးဆိုတာ တွေ့ရှိရခြင်းပါပဲ။
အကြိမ်ကြိမ်လည်း ရေးခဲ့ဖူးပါပြီ။ စာနယ်ဇင်းသမားမှန်ရင် စာဖတ်ခြင်းကို ထမင်းစား ရေသောက်သလို၊ အသက်ရှူသလို မဖြစ်မနေ လုပ်ကို လုပ်ရမယ့် must တခုအဖြစ် သဘောထား လုပ်ဆောင်ကြရမယ့်အကြောင်း 'ဖန်တရာတေအောင်' ရေးခဲ့ဖူးပါပြီ။ ဒါပေမယ့် လွန်ခဲ့တဲ့ ၉နှစ်၊ ၁၀ နှစ်က စာနယ်ဇင်းသမားတို့ စာဖတ်နည်းကြသလို၊ ဒီနေ့ခေတ် လူငယ်၊ လုံမငယ်တွေလည်း စာဖတ်နည်းကြပါသေးတယ်။
စာရေးဆရာ၊ ကဗျာဆရာက စာမဖတ်တာ ကိစ္စမရှိပါဘူး။ သူက နှလုံးသားနဲ့ ခံစားပြီး စိတ်ကူးစိတ်သန်း ထုတ်ရတဲ့ အလုပ်မျိုး လုပ်တဲ့သူလေ။ ဒါတောင် စာမဖတ်တဲ့ စာရေးဆရာနဲ့ စာဖတ်တဲ့ စာရေးဆရာ ထုတ်လုပ်တဲ့ စာ အရည်အချင်း ကွာခြားပါတယ်။ စာနယ်ဇင်းသမား၊ သတင်းထောက်တို့၊ အယ်ဒီတာတို့ ဆိုတာက စိတ်ကူးနဲ့ အလုပ်လုပ်တဲ့သူတွေ မဟုတ်ပါဘူး။ အချက်အလက် သတင်းပလင်းတွေနဲ့ အလုပ်လုပ်ရတဲ့သူ၊ ခေတ်တခေတ်ရဲ့ နေ့စဉ်မှတ်တမ်းကို မှတ်တမ်းတင်ပေးနေသူတွေ ဖြစ်ပါတယ်။ အဲဒီတော့ ခေတ်ရဲ့ ဘက်ပေါင်းစုံ၊ အလွှာပေါင်းစုံကို သိအောင် စာမျိုးစုံကို ဖတ်၇ပါတယ်။ 'စာမဖတ်ရင် အယ်ဒီတာ မလုပ်နဲ့' ဆိုတဲ့ ခေါင်းစဉ်နဲ့တောင် ခပ်စပ်စပ်လေး ရေးခဲ့ဖူးပါတယ်။ ဒါပေမယ့် ဒီနေ့ လူငယ်တွေလည်း စာသိပ်မဖတ်ကြပါဘူး။ ဒါကြောင့် စာမဖတ်ရင် စာနယ်ဇင်း အလုပ်မလုပ်နဲ့လို့ ထပ်ပြီး ထန်ထန်ကလေး 'မြည်တွန်တောက်တီး' လိုက်ရပါဦးမယ်။
လူထုစိန်ဝင်း
၆-၈-၂၀၀၅
ဖတ်စရာ ၃၁
[ပင်ဝါးရုံစာပေမှ ထုတ်ဝေတဲ့ လူထုစိန်ဝင်း ရဲ့ 'ဖတ်စရာ' စာအုပ်၊ ပထမအကြိမ်၊ ၂၀၀၇ မှ ကူးယူဖော်ပြ တာ ဖြစ်ပါတယ်]
Sunday, January 30, 2011
အပြာရောင်ညနေဆည်းဆာများ
ရေးသူ- မြသန်းတင့်
၁၉၉၅ ခု၊ ဇူလိုင် ၂၃ ရက်နေ့.......
ကျွန်တော်တို့သည် ရွံ့ဗွက်များ၊ ရေအိုင်များကို ရှောင်ကွင်းကာ ချမ်းသာလမ်းဘက်သို့ ချိုးဝင်လိုက် ကြသည်။ ယခင်က သစ်သားအိမ်များသာ ရှိခဲ့သည့် နေရာများတွင် ဟောင်ကောင်ပုံ ၅ လွှာ၊ ၆ လွှာတိုက်တွေ အစီအရီ ဖြစ်နေကြပြီ။ တချို့တိုက်များက ရှေ့မျက်နှာစာတွင် ကျောက်ပြားရောင်စုံတွေ တပ်ထားကြသည်။ တချို့ကအဖြူ၊ တချို့က အနီ၊ တချို့ကအပြာ၊ တချို့က အစိမ်း၊ တိုက်တတိုက်ပေါ်မှ အသက် ၄၀ ကျော်ခန့် ခပ်ဖိုင့်ဖိုင့် ဆံပင်တိုတိုနှင့် မျက်မှန်တပ် အမျိုးသမီးတဦးနှင့် အိမ်ဖော်မလေးနှင့် တူသူတဦး ဆင်းလာကြသည်။ အမျိုးသမီးမှာ ဂန္ဓာလရာဇ်နွယ်ဖွားနှင့် တူသည်။ သူကိုယ်တိုင် နိုင်ငံခြားဖြစ် အင်္ကျီပွပွ၊ ပါတိတ်လုံချည်၊ နိုင်ငံခြားဖြစ် ကွင်းထိုး ဖိနပ်၊ နိုင်ငံခြားဖြစ် ခေါက်ထီးလှလှ၊ နိုင်ငံခြားဖြစ် လက်ကိုင်အိတ်နှင့် နိုင်ငံခြားဖြစ် ပလပ်စတစ်ဆွဲခြင်းကို ကိုင်ထားသည်။ အိမ်ဖော်မလေးက မီးသွေးတောင်း အလွတ်တုံးကို ကိုင်၍ နောက်မှ ဟိုငေးသည်ငေးဖြင့် လိုက်လာသည်။
သူတို့ တိုက်ရှေ့တွင် ဆလွန်းကား သုံးလေးစင်း ရပ်ထားသည်။ ကားတစင်းပေါ်မှ စပို့ရှပ်အင်္ကျီ ကန့်လန့်စင်း၊ ရခိုင်လုံချည် နီညိုရောင်၊ မိုးစီးဖိနပ် အကောင်းစားကို စီးထားသည့် အသက် ၄၀ အတွင်း လူတယောက်ဆင်းလာပြီး တိုက်ပေါ်ကို မော့ကြည့်သည်။ သူ့လက်ထဲတွင် ၀တ္ထုစာအုပ် အရွယ်သာသာရှိသည့် လက်ကိုင်သားရေအိတ်ကို ကိုင်ထားပြီး တဖက်တွင် မော်တော်ကားသေ့ာကို ဝှေ့ယမ်းနေသည်။ သူ့ကို ကြည့်ရသည်မှာလည်း မြန်မာနှင့်မတူ၊ အိန္ဒိယနွယ်ဖွားတဦးနှင့် တူသည်။
လမ်းထဲတွင် တိုက်တာ အိမ်ခြေအသစ်တွေ ပေါ်နေသလို ရွံ့ဗွက်များနှင့် ရေအိုင်များ၏ နယ်နိမိတ် ကလည်း တဖြည်းဖြည်း ကျယ်လာနေသည်။ သူတို့ကို မနည်းလွတ်အောင် ရှောင်နေရသည်။
တခါက လမ်းထိပ်တွင် ကရင်သင်းချိုင်းတခု ပိတ်လျက် ရှိသော်လည်း ယခု သင်းချိုင်းကို ဖျက်ပြီး ဈေးဆောက်ထားသဖြင့် ယခင်ကထက် အသွားအလာ ရှုပ်နေသည်။ လော်ရီကားကြီးများက လမ်းကျဉ်းကျဉ်း ကလေးထဲကို ဖြတ်သွားကာ ဈေးဘက်သို့ ကွေ့သွားကြသည်။ မှန်ကားကလေးများကလည်း မကြာခဏ ၀င်လာတတ်သည်။ ဗားကရာလမ်းဘက်မှ ကွေ့ဝင်လာသော ကားများဖြစ်သည်။
ကျွန်တော်သည် တိုက်တွေကြားမှ ချမ်းသာလမ်းအမှတ် (၅) ကို လှမ်းကြည့်လိုက်၏။ လွန်ခဲ့သည့် ဆယ်စုနှစ် လေးစုကျော်လောက်ကအတိုင်း ဘာမျှ ပြောင်းလဲခြင်းမရှိ။ သွပ်မိုး၊ ပျဉ်ကာ တထပ်အိမ်ကလေး။ လွန်ခဲ့သည့် ဆယ်စုနှစ်တွေတုန်းက ကျွန်တော်မကြာခဏ ရောက်ခဲ့ဖူးသည်။ ဥာဏ်အမြော်အမြင် လင်းလက်ရာ၊ မေတ္တာဝင်းပရာ၊ ငြိမ်းချမ်းမှု ရေတံခွန် စီးသွယ်ဖြာဆင်းရာ......
ထိုနှစ်များအတွင်း လုံးလုံးမရောက်ပဲ နေသည်တော့မဟုတ်။ တနှစ်တခေါက်လောက်တော့ ရောက်သွား တတ်သေးသည်။
ထိုအိမ်ကလေးသည် ဆရာကြီးသခင်ကိုယ်တော်မှိုင်း နေထိုင်သွားခဲ့သည့်အိမ်။ ခေါင်းချသွားခဲ့သည့် အိမ်။
ဆရာကြီး ရှိစဉ်တုန်းကတော့ ကျွန်တော်တို့တတွေ မကြာခဏ ရောက်ခဲ့ကြသည်။ ၁၉၅၅ ခုတ၀ိုက်၊ ပြည်တွင်းငြိမ်းချမ်းရေး လှုပ်ရှားမှု အရှိန်ကောင်းခဲ့စဉ်က ကျွန်တော်တို့တတွေ ဆရာကြီးအိမ်မှာ ဆုံခဲ့ကြသည်။ ဆွေးနွေးခဲ့ကြသည်။ ငြင်းခုန်ခဲ့ကြသည်။ ထို့နောက် ကမ္ဘာ့ငြိမ်းချမ်းရေးလှုပ်ရှားမှု၊ ကမ္ဘာ့ငြိမ်းချမ်းရေး ကွန်ဂရက် (မြန်မာနိုင်ငံ) တွင် ဆရာကြီးက ဥက္ကဌအဖြစ်ဆောင်ရွက်ပြီး ကျွန်တော်က အတွင်းရေးမှူးအဖြစ် ဆောင်ရွက်ခဲ့ ဖူးသည်။ ကမ္ဘာ့ငြိမ်းချမ်းရေး ဟောပြောပွဲတွေ ကျင်းပစဉ် ဆရာကြီးနှင့် နယ်သို့ လိုက်ပါခဲ့ဖူးသည်။ ဆရာကြီးသည် အမျိုးသားရေး၊ ငြိမ်းချမ်းရေး၊ ဒီမိုကရေစီရေး ကိစ္စများတွင် မောသည် ပန်းသည် ဟူ၍ မရှိ။ အမျိုးသားရေးနှင့် ငြိမ်းချမ်းရေး လှုပ်ရှားမှုများထဲတွင် သူ့ဘ၀ကို လုံးဝမြှုပ်နှံသွားခဲ့သည်။
ဆရာကြီး မရှိတော့သည့် နောက်တွင်လည်း ဆရာဇေယျရှိနေသေးသဖြင့် ကျွန်တော် တခါတရံ ရောက်သွားတတ်သည်။ ဆေးပြင်းလိပ်နံ့သင်းသော၊ ဟာသရှိသည့် ဆရာဇေယျသည် ဆရာကြီး အကြောင်းကို ပြန်ပြောင်းပြောတတ်သည်။
"ဆရာကြီးက ရွှေတောင်ဆရာလွန်းဆိုတဲ့ နာမည်နဲ့ ရေးတဲ့ ပြဇာတ်တွေကို သိတ်ကြိုက်ပုံ မရဘူးဗျ။ အဲဒါတွေကို ၀မ်းရေးအရ မလွှဲမရှောင်သာလို့ ရေးခဲ့တာလို့ ယူဆပုံရတယ်။ အဲဒီ ပြဇာတ်အကြောင်းတွေကို မေးရင် မမှတ်မိတော့ပါဘူးကွာ ဆိုပြီး စကားဖြတ်ပစ်တတ်တယ်" ဟု ဆရာဇေယျက ကျွန်တော့်ကို ပြောဖူးသည်။
"အဲဒီ ပြဇာတ်တွေအကြောင်းကို မေးရင် ဆရာကြီး ကြည့်ရတာ ရှက်နေသလိုပဲ" ဟု သူက ဖြည့်စွက်ပြောသည်။
ဆရာကြီးသည် သမိုင်း၊ ကဗျာ၊ နိုင်ငံရေး၊ ဒဿန စသည်တို့နှင့် ပတ်သက်သည့် လေးနက်သော စာများကိုသာ ရေးချင်ပုံရသည်။ မြန်မာဝတ္ထုသမိုင်းတွင် အရေးကြီးသည့် မှတ်တိုင်ကြီးတတိုင်ဖြစ်သည့် 'မှာတော်ပုံ' ၀တ္ထုကြီးကို ရေးရာမှာပင် ဆရာကြီးသည် သူရေးသည့်စာအတွက် ရှက်မိသည်ဟု ၀န်ခံသွားသည်။ သားကျွေးမှု၊ မယားကျွေးမှုကြောင့်သာ ရေးရကြောင်း၊ ထိုဝတ္ထုကို ရေးရသာဖြင့် ရှက်ရကြောင်းဖြင့် မှာတော်ပုံဝတ္ထု နိဂုံးတွင် ရေးသားထားသည်။
ဂိုဏ်းမကွာ အဆွေသဟာ အသင်းတို့ကိုလ
မှိုင်းတဆရာ အသေအချာ လင်းလိုက်ပါရဲ့
တေးသီချင်းအသွားတွေနဲ့
ကလက်သည့် အရာကို
မေရယ် တွေးတွေးပြီး စဉ်းစားလိုက်တော့
(သြော်) ရေးရင်းများငယ်တဲ့ ရှက်မိပါ။
ရှာရန်ဖွေရန် ခက်ဟန်အနေအထားမှာဖြင့်
ကာလံ ဒေသံ အဂ္ဂံ ငွေဓနပေမို့
စာသံ ပေသံ မြွက်ဟန် အခြေမလှပေမယ့်
ငွေရလျှင် ကိစ္စချောရောလို့
ဥာဏ်သဘောအမြင်နည်း
အခြေမဝေးသူသူ မဖြင့် သံယောဇဉ်မီးတွေ ကျွေးရဖို့
(သြော်) ရှေးမကျတကျ နောက်မကျတကျနှင့်
ပေါက်ကရ ဟာတွေ တွေးတွေးပြီး ရေးရပေတာ။
'မှာတော်ပုံ' လို ၀တ္ထုမျိုးကိုပင် ဆရာကြီးက 'သံယောဇဉ် မီးတွေ ကျွေးရဖို့' ရေးရသည့် ပေါက်ကရ ဟာတွေဟု ပြောသည်ကို ထောက်လျှင် ဆရာကြီး၏ စာပေစေတနာကို အလွယ်နှင့် သိနိုင်သည်။
'ညီတော်မင်းနန်ချွတ်ခန်း ဟောစာသစ်' တွင် ဆရာကြီးက တရားတော်ကို တေးသီချင်းလို ရေးခြင်းကို ဘုရားမကြိုက်သည့်တိုင် ၀ါသနာကြောင့် ရေးရကြောင်းဖြင့် ဤသို့ ရေးခဲ့သည်။
"ပညာမူ တေးဂီတကိုလ
ဗုဒ္ဓရယ် စံတဆူပ
သယမ္ဘူ ကိုယ်တော်မကြိုက်တာမို့
ပယ်ထိုက် သိလျက်သားရယ်နဲ့
စိတ်များမှာ ခွေကာရိပါလို့
ဝါသနာအထုံက ပိတာကြောင့်
သဟာယာအစုံ ဖတ်စေဖို့
မအပ်တဲ့ သည်ဟောစာ
မအေးလှသော်လည်း ရေးလိုက်ရပါ"
ကျွန်တော်သည် ကြီးမြတ်သော မဟာမှိုင်းကို အောက်မေ့သတိရရင်း သူ နေထိုင်ခဲ့ရာ၊ သူခေါင်းချခဲ့ရာ အိမ်ကလေးပေါ်သို့ တက်လာခဲ့သည်။
ဆရာကြီးသည် ၁၉၆၄ ခုနှစ်ခုနှစ်၊ ဇူလိုင်လ ၂၃ ရက်နေ့တွင် ကွယ်လွန်ခဲ့ရာ ယခုဆိုလျှင် ၃၁ နှစ် ပြည့်သွားလေပြီ။ ၁၈၇၆ ခုနှစ်က မွေးခဲ့သော ဆရာကြီးသည် ရှေ့နှစ်ဆိုလျှင် နှစ်ပေါင်း ၁၂၀ ပြည့်ပေတော့မည်။
ကျွန်တော်သည် ဆရာကြီး၏ စောစောပိုင်းကာလများက အကြောင်းကို လူပြောသူပြောနှင့် စာအုပ်တွေထဲမှ တဆင့် သိခဲ့ရခြင်း ဖြစ်သည်။ ဆရာကြီး၏ နောက်ဆုံးရက်များကိုလည်း ကျွန်တော်မမြင်လိုက်ရ။ မည်းမှောင်သည့် အခန်းကျဉ်းကလေးထဲတွင် ရောက်နေသည့် ကျွန်တော်သည် သူ ကွယ်လွန်ပြီဆိုသည့် သတင်းကိုပင် လပေါင်းများစွာ ကြာမှ သိခဲ့ရသည်။ သူ့ဈာပန အကြောင်းကိုက နောင်နှစ်ပေါင်းများစွာ ကြာပြီး သတင်းစာတွေ၊ စာအုပ်စာတမ်းတွေ၊ မိတ်ဆွေတွေ မှတဆင့် သိရခြင်း ဖြစ်သည်။
ကျွန်တော် နီးနီးကပ်ကပ် မြင်လိုက်ရသော ဆရာကြီး၏ ရုပ်ပုံလွှာမှာ ၁၉၅၀ ပြည့်လွန်နှစ် ကျမှ မြင်လိုက်ရသော ရုပ်ပုံလွှာသာ ဖြစ်သည်။ ထိုအချိန်က ဆရာကြီးမှာ ၇၀ ကျော်၍ ၈၀ နားသို့ ကပ်နေလေပြီ။ ကျွန်တော်က ၂၅ နှစ်ကျော် ၃၀ အတွင်းမှာသာ ရှိသေးသည်။
သခင်ကိုယ်တော်မှိုင်းဆိုသည့် အမည်ကိုမူ ငယ်ငယ်လေး ကတည်းကပင် ကြားဖူးနေခဲ့သည်။ ထိုစဉ်က ကျွန်တော်သည် စာကိုပင် ဂျောင်းဂျောင်းပြေးအောင် မဖတ်တတ်သေး။ ပထမ ကြားဖူးသည်မှာ မစ္စတာမောင်မှိုင်း ဆိုသော အမည် ဖြစ်သည်။ ကျွန်တော့် နားထဲတွင်တော့ ထိုအမည်သည် ထူးဆန်းနေသည်။ မောင်မှိုင်းဆိုသည့် အမည်မှာ တောက လူများသာ မှည့်သည့် အမည်မျိုး ဖြစ်သည်။ မစ္စတာဆိုသည်မှာ ရန်ကုန်မြို့တော်မှ ဂုဏ်သရေရှိ မင်းများသာ မှည့်သည့် နာမည်ဖြစ်သည်။ ထို့ကြောင့် ကျွန်တော်က အဖေကို မေးကြည့်သည့်အခါတွင် "မစ္စတာ မောင်မှိုင်းက သူ့ ကလောင်နာမည်ကွ။ ဦးမေအောင်တို့၊ ဆာဂျေအေ မောင်ကြီးတို့ စတဲ့ အရာရှိကြီးတွေ မစ္စတာတပ်တာ လှောင်ချင်တာနဲ့ သူကလည်း မစ္စတာ တပ်လိုက်တာပေါ့ကွာ။ မစ္စတာမောင်မှိုင်းက လူ့ဂွစာကြီးကွ။ မဟုတ်မခံရယ်။ လှောင်စရာရှိရင် ဘယ်သူ့ကိုမှ မညှာဘူး" ဟု ရှင်းပြသည်။
မစ္စတာ ဟူသော အမည်ကို ခံခြင်းမှာ လှောင်ပြောင်လိုသော သဘောဖြင့် ဖြစ်ကြောင်းကိုတော့ အဖေ သိပါသည်။ သို့ရာတွင် မစ္စတာနှင့် ချဉ်ပေါင်ရွက်သည် မောင်မှိုင်းတို့ကို တွဲပေးလိုက်သည် ဆိုသည့် အချက်ကိုတော့ ထိုစဉ်က သိသေးဟန်မတူပါ။
စာဖတ်တတ်လာသည့် အခါတွင် ဆရာကြီး၏ စာများကို ဖတ်လာရသည်။ ဂဏ္ဍိကျမ်းများ၊ ဋီကာကျမ်းများ၊ လေးချိုးကြီးများ စသည်တို့ ဖြစ်သည်။ ယောဂီရသေ့ကြီး ဆရာမှိုင်းနှင့် အရီးစိမ်း၊ တပည့် ရသေ့မများ ဖြစ်ကြသည့် ဗေဒါရီ၊ ကေသာဝတီ၊ ပုည၀တီ၊ ခုဇ္ဇာ၊ ဥတ္တရာ စသည်တို့ စကားပြောခန်းများကို ဖတ်ရသည့်အခါတွင် ဆရာကြီးကို တကယ့် ယောဂီရသေ့ကြီးဟု ကျွန်တော် ထင်နေသည်။
ထို့နောက်တွင် သခင်ကိုယ်တော်မှိုင်း ဆိုသော အမည်သည် မကြာခဏ ကြားနေရသည်။ လူကြီးတွေ စကားဝိုင်းနား ရောက်သွားလျှင် "ကိုယ်တော်မှိုင်းကြီးက ဘယ်လိုပြောတာပဲ" ဆိုသည့် ရည်ညွှန်းကိုးကားသံများကို ကြားရသည်။ ကလေးဖြစ်သည့် ကျွန်တော်မှာ ကိုယ်တော်မှိုင်း ဆိုသည်မှာ ဘုန်းတော်ကြီး ဖြစ်ရမည်ဟု နားလည်နေသည်။
ကျွန်တော်က မေးသည့်အခါ အဖေက.....
"သခင်ကိုယ်တော်မှိုင်းဆိုတာ ဘုန်းကြီးလည်းမဟုတ်၊ ရသေ့လည်းမဟုတ်ဘူးကွ။ လူဝတ်ကြောင်နဲ့ ပေမယ့် သီလ၊ သမာဓိ၊ ပညာနဲ့ ပြည့်စုံတဲ့ ပုဂ္ဂိုလ်ကြီးကွ။ ရသေ့မတွေနဲ့ ဖိုထိုးနေတဲ့ ယောဂီရသေ့ကြီး ဆရာမှိုင်းအဖြစ် ပုံဖော် ရေးထားတာကတော့ လူငယ်တွေ ဖတ်ရလွယ်အောင် ရေးထားတာ။ ခု မစ္စတာ မောင်မှိုင်းကြီးက သခင်ကိုယ်တော်မှိုင်း ဆိုပြီး သခင်အမည်ခံလိုက်ပြီ။ ကိုယ်တော်မှိုင်းကြီး ဒီတချက်တော့ မှားပြီ ထင်တယ်ကွာ" ဟု စိတ်မကောင်းဟန်ဖြင့် ပြောသည်။
ကျွန်တော့်အဖေသည် ၂၁ ဦးကို သဘောကျသူဖြစ်ပြီး ဦးဘဘေကို ထောက်ခံသူ ဖြစ်သည်။
ကျွန်တော်သည် အဖေ ပြောသည့်စကားများကို ကောင်းကောင်းနားမလည်ပါ။ သူကလည်း ထို့ထက် ပို၍ ရှင်းမပြပါ။
သို့ရာတွင် သခင်ကိုယ်တော်မှိုင်း၏ အမည်သည် တတိုင်းပြည်လုံးတွင် ဟိန်းနေသည်။ ၁၉၃၅ ခုနှစ်က ရေနံချောင်းတွင် ကျင်းပသည့် တို့ဗမာအစည်းအရုံး၏ ပထမညီလာခံတွင် ဆရာကြီးသည် မစ္စတာမောင်မှိုင်း အမည်ကို စွန့်ကာ သခင်ကိုယ်တော်မှိုင်းအမည်ကို ခံယူလိုက်သည်။
ဆရာကြီးက သူ အမည်ပြောင်းပုံကို လေးချိုးကြီးဖြင့် ဤသို့ တိုင်းပြည်ကို ကြေညာခဲ့လေသည်။
"တို့ဗမာသခင်
ဟိုအကျော်အမော်ဂိုဏ်းတွင်ဖြင့်
မှို့ရတနာသဘင် အကြင်ဗြဟ္မစိုရ်
ဇော်ကသိုဏ်းတွေနှင့်
ပလ္လင်ဗဟို တနှိုင်းပေပ
ဇမ္ဗူသမိုင်း ပျော်စရာ့အခြေ
အိုကွယ် သခင်ကိုယ်တော်မှိုင်း ရယ်လို့
လူတိုင်းခေါ်ကြစေ........."
ဆရာကြီးသည် လူကြီးများ၏ နိုင်ငံရေးကို စိတ်ပျက်သွားပုံရသည်။ ဖေ-ပု-ရှိန် တို့ ဘိလတ်သွား အရေးဆိုခဲ့စဉ်က ဆရာကြီးသည် သူတို့ကို လေးချိုးဆောင်းပါးကြီးများဖြင့် ထောက်ခံရေးခဲ့သည်။ ထို့နောက် ဒိုင်အာခီကို လက်ခံသင့် မခံသင့်ကိစ္စဖြင့် ဂျီစီဘီအေတွင် လှိုင်-ပု-ကျော် ဂျီစီဘီအေ၊ ၂၁ ဦး ဂျီစီဘီအေ၊ ဦးစိုးသိမ်း ဂျီစီဘီအေ၊ ဦးစု ဂျီစီဘီအေ စသည်ဖြင့် အစိတ်စိတ် အမွှာမွှာ ကွဲသွားသည့်အခါ ဆရာကြီးသည် လူကြီးများ၏ နိုင်ငံရေးကို စိတ်ပျက်သွားကာ တို့ဗမာအစည်းအရုံး လူငယ်များကို ထောက်ခံသွားခဲ့သည်။
"သြော် နှစ်ဂိုဏ်း မသင့်ပြန်တော့
စစ်ကိုင်းလွင့်ချင်သပေါ့
မှိုင်းဖြင့် ဖြေကာ မကြည်သနှင့်
ပြည်ဌာနီ အခက်ကြုံဖို့လို့
နှစ်ဖက်စွယ်စုံ သွေးကြတော့
ဝေသာလီ ပျက်ပုံလည်း တွေးမိတဲ့ပြင်"
ဟု ဆရာကြီး ညည်းခဲ့သည်။ ထိုအထဲတွင် ထပ်မံကွဲကြပြန်သည့်အခါ ဆရာကြီးက ကရုဏာဒေါသဖြင့် အောက်ပါအတိုင်း ရေးခဲ့သည်။
"ဒေါင်းရောင်နေ မှေးသကို အခိုက်တွင်ဖြင့်
ခေါင်းဆောင်တွေ ရှေးနဂိုမလိုက်ပြန်တော့
အရေးထိုထို၌ အခိုက်အခွင့်မဟန်
ခွေးလို ကိုက်ချင်တဲ့ စရိုက်အကျင့်တန်"
ဆရာကြီးသခင်ကိုယ်တော်မှိုင်းသည် လူကြီး နိုင်ငံရေးသမားများ၏ အကွဲအပြဲများကို ကြည့်၍ ကရုဏာ ဒေါသ ဖြစ်နေပုံ ရပေသည်။
မြသန်းတင့်
ရွှေအောင်လံမဂ္ဂဇင်း
၁၉၉၅၊ ဇန်န၀ါရီ
[နေရီရီစာအုပ်တိုက်မှ ထုတ်ဝေတဲ့ မြသန်းတင့်ရဲ့ အပြာရောင်ညနေဆည်းဆာများ၊၂၀၁၀ စက်တင်ဘာ၊ ပထမအကြိမ်၊ မှ ကူးယူဖော်ပြတာ ဖြစ်ပါတယ်။]
Saturday, January 29, 2011
ဗန်းမော်တင်အောင်[ရွှေဥဒေါင်း တသက်တာမှတ်တမ်းနှင့်အတွေးအခေါ်များ- စာအုပ်မှ]
ရေးသူ- ရွှေဥဒေါင်း
ကျွန်ပ်ကိုယ်တိုင် နိုင်ငံရေးသမားတယောက် မဟုတ်သော်လည်း ထောင်ထဲ၌ ငါးလခန့် နေခဲ့ရ၍ လွတ်မြောက်လာသည့် နောက်တွင် လက်ဝဲနိုင်ငံရေးသမားများလည်း ကျွန်ပ်အား လူတလုံး သူတလုံး အနေဖြင့် အသိအမှတ် ပြုလာကြသည့် လက္ခဏာ ရှိ၏။ ဂျပန်ခေတ်၌ ဗန်းမော်တင်အောင်သည် ကျွန်ပ် တည်းခိုလျက်ရှိသော ဇရစ်ချောင်ရွာ အနီးသို့ ရောက်၍ ကျွန်ပ်အကြောင်းကို ကြားခဲ့ရသည်ဟု ပြောဖူးသော်လည်း သူနှင့် ပထမအကြိမ် တွေ့ရဖူးခြင်းမှာ ကျွန်ပ် ထောင်မှ လွတ်လာပြီးသည့် နောက်တွင်မှ ဖြစ်၏။
သူ့ခမျာမှာ ထောင်ထဲ၌ နေရသော နှစ်ပရိစ္ဆေဒ အတော်ကြာရှည်သည် ဖြစ်၍ ရန်ကုန်သို့ ကျွန်ပ် ရောက်တိုင်း ထောင်ပြင်၌ သူ ရှိချင်မှ ရှိတတ်၏။ ၁၉၅၇ ခုနှစ်၌ (ကျွန်ပ်အထင်) ရန်ကုန်သို့ ကျွန်ပ်ရောက်သွား၍ ထောင်ပြင်သို့ ရောက်နေခိုက်နှင့် ဆုံစည်း တိုက်ဆိုင်မိရာတွင် ဗန်းမော်တင်အောင်သည် ကျွန်ပ်ထံသို့ ရောက်လာ၏။ ဤလူငယ်ကား (မျက်ခုံးတုတ်သောကြောင့်သာမဟုတ်) တကြိမ်မြင်တွေ့ရလျှင် မမေ့နိုင်စကောင်း သော လူငယ်တယောက် ဖြစ်၏။
ကျွန်ပ်ကို လေးစားသည်ဆို၍ တွေ့ဆုံရန်လာသော လူငယ်များသည် (များသောအားဖြင့်) သူတို့၏ အကြောင်းခြင်းရာကလေးများကို ပြောပြခြင်းအားဖြင့် ခေသောလူတယောက် မဟုတ်ပါ ဆိုခြင်းကို တင်ပြခြင်း အားဖြင့် လောက်သာ ကျေနပ်ကာ ပြန်သွားတတ်ကြ၏။ ကျွန်ပ်ကလည်း မိမိအကြောင်းကို (တရံဆံ လူများအား) အပြောပျင်းသူ တယောက်ဖြစ်သည်နှင့် ၎င်းတို့သည် ကျွန်ပ် အကြောင်းကို ဘာမျှ သိမသွားကြပေ။
ဗန်းမော်တင်အောင်မူကား ထိုကဲ့သို့ မဟုတ်ချေ။ အိမ်သို့ ရောက်လာကတည်းက စကားပြောခြင်း၌ သူ့အလှည့်မယူပဲ ကျွန်ပ်ကိုသာ အများဆုံး အလှည့်ပေးပြီး တတ်နိုင်သမျှ နှိုက်ယူသွားသူတယောက် ဖြစ်လေသည်။ ကျေနပ်ဖွယ်ကောင်းသော အခြင်းအရာတခုမှာ ဗန်းမော်တင်အောင်သည် ကျွန်ပ် ပြောစကားများကို ပေါ့ပေါ့ဆဆ သာမန်ကာ လျှံကာ နားထောင်ခြင်းမျိုး မဟုတ်ဘဲ သူ့အိမ်သို့ ပြန်ရောက်သော အခါ၌ ကျွန်ပ်အကြောင်းကို စာတအုပ် ရေးထုတ်တော့မည့်နှယ် အထူးတလည် ဂရုတစိုက် လေးလေးစားစား မှတ်သားနာယူနေသည့် အမူအရာမျိုးကို ထင်ရှားစွာ ဖော်ပြသူတယောက် ဖြစ်လေသည်။ ဗန်းမော်တင်အောင်က ကျွန်ပ်ကို မည်ကဲ့သို့ မှတ်ချက်ချသည် မပြောတတ်။
ကျွန်ပ်ကမူ ဤခေတ် ဤအခါမျိုးတွင် လူကြီးနှင့် ဆက်ဆံပုံနှင့် ပတ်သက်၍ ရှာမှရှားသော လူငယ်တယောက် ဖြစ်ပေသည်။ အတော် လူကင်းပါးသော ကျွန်ပ်၏ ခယ်မ (ညီ၏မယား) သည် ဗန်းမော်တင်အောင်လာတိုင်း သတိနှင့် စောင့်ကြည့်ကာ အကဲခတ်လျက်ရှိရာ ပြန်သွားသောအခါ၌ ချီးကျူး၍ မဆုံးအောင် ရှိပါတော့သည်။
ရွှေဥဒေါင်း
[၂၀၀၆ ခုနှစ်၊ သြဂုတ်လ၊ စိတ်ကူးချိုချို စာပေတိုက်ထုတ်၊ စဆုံးပေါင်းချုပ် ဒုတ်ယအကြိမ်။ စာမျက်နှာ ၄၆၄။]
Friday, January 21, 2011
စာနယ်ဇင်းသမား စာများများဖတ်ပါ
ရေးသူ- လူထုစိန်ဝင်း
'သတင်းနဲ့ ဆောင်းပါး ဘာကွာခြားသလဲ'။ စာနယ်ဇင်းအတတ်ပညာ လေ့လာဆည်းပူးနေတဲ့ လူငယ်တွေ မေးလေ့မေးထရှိတဲ့ စကားတခွန်း ဖြစ်ပါတယ်။ ဒီမေးခွန်းနဲ့ ပတ်သက်ပြီး ပထမ မြန်မာသတင်းစာလို့ ဆိုအပ်တဲ့ 'ရတနာပုံ နေပြည်တော်သတင်းစာ' က သတင်းစာဆရာကြီး ဘိုးဝဇီရရဲ့ ပြောစကားနဲ့ပဲ ရှင်းပြလေ့ ရှိပါတယ်။
ဘိုးဝဇီရက "ဆောင်းပါးဟူသောစကားမှာ ရှေးက ဆောင်ပါးဟူသောစကားမှ ရွေ့လျောလာခြင်း ဖြစ်ကြောင်း။ မည်သည့် ခေတ်အခါက နည်းဟူမူ မြန်မာသက္ကရာဇ် ၉၀၀ ကျော်လောက်တွင် ထင်ရှားကျော်စော သော ဟံသာဝတီ ဆင်ဖြူရှင် မင်းတရားကြီး ဘုရင့်နောင်ကျော်ထင် နော်ရထာ လက်ထက် ပဲခူး၊ ဟံသာဝတီတွင် ထီးနန်းစိုက်ထူရာ အင်းဝ၊ ပြည်၊ တောင်ငူ စသော ရှေးဟောင်းမြို့များမှ ပညာရှိတို့ သွားရောက် အမှုထမ်းကြ၍ တရွာနှင့်တရွာ၊ တပြည်နှင့်တပြည် ကူးလူးဆက်ဆံကြရာ ကျန်ရစ်သော ဆွေမျိုးမိတ်သင်္ဂဟတို့ထံ ပေးရန် လူကြုံသို့ ဆောင်ယူသွားရန် ပါးလိုက်သောကြောင့် 'ဆောင်ပါး' ဟု ခေါ်ကြောင်း၊ ထို့ကြောင့် ထိုစဉ်အခါက ရှေးစာတပုဒ်မှာ 'ရွှေဝသွား ပါးလိုက်မယ်၊ ဆောင်ပါလေ၊ လွမ်းသူ့ စာခွေ၊ အထွေထွေ ပါလေရဲ့ မနှေး၊ စီလို့သာ ကုံးရတော့ စာလုံးပုံမလှလေဘု မိန်းမလက်ရေး' ဟူ၍ စပ်ဆိုကြောင်း" ရှင်းလင်းပြောကြားခဲ့ပါတယ်။ (စာရေးဆရာကြီး မဟာဆွေရေး ဘိုးဝဇီရ အတ္ထုပ္ပတ္တိစာအုပ်က ထုတ်နှုတ်ပြတာ ဖြစ်ပါတယ်။)
"ယခုခေတ်အခါ၌ ခွဲခွါရေးကားဘယ်လို၊ တွဲရေးကား ဘယ်သို့၊ အုပ်ချုပ်ရေးက ဘယ့်နှာ စသဖြင့် မိမိထင်မြင်ချက်နှင့် တွဲဖက်ရေးသားသော စာကို 'ဆောင်းပါး'၊ ဘယ်မြို့၌ မီးလောင်သည်၊ ငလျင်လှုပ်သည်၊ ဓားပြတိုက်သည် စသော အကြောင်းအရာတို့ကို ရေသားသော စာကို 'သတင်း' ဟု မှတ်ယူကြလေသည်။"
ဆရာကြီး မဟာဆွေရဲ့ ထပ်ဆင့်ရှင်းလင်းချက်ကလည်း ရှင်းလင်းပြတ်သားလှပါတယ်။ ဆောင်းပါးဆို တာက ရေးသူရဲ့ ထင်မြင်သုံးသပ်ဝေဖန်ချက်ပါပြီး သတင်းဆိုတာက အဖြစ်အပျက်ကို အတိအကျ ဖော်ပြရေးသား ချက် ဖြစ်ောကာင်း ရှင်းပြထားတာ ဖြစ်ပါတယ်။
'ရတနာပုံနေပြည်တော် သတင်းစာ' ဆိုတာက မင်းတုန်းမင်းတရားကြီး ကိုယ်တော်တိုင်ရဲ့ ညွှန်ကြားမှု ကြောင့် ထုတ်ဝေခဲ့တဲ့ သတင်းစာ ဖြစ်ပါတယ်။ အဲဒီအချိန်က အင်္ဂလိပ်လက်အောက်ရောက် အောက်မြန်မာပြည် မော်လမြိုင်၊ ရန်ကုန်တို့မှာ သတင်းစာများ ထုတ်ဝေနေကြပေမယ့် မြန်မာမင်းရဲ့ နေပြည်တော်ပိုင်နက် အတွင်းမှာ သတင်းစာ မရှိသေးပါဘူး။ အဲဒါကြောင့် မင်းတုန်းမင်းတရားကြီးက မန္တလေးက သတင်းစာ ထုတ်ဝေခဲ့တာပါ။ ကဒေါင်းရုပ်ပုံ အမှတ်တံဆိပ်နဲ့ 'ရတနာပုံ နေပြည်တော်သတင်းစာ' ဆိုတဲ့ စာတမ်းအောက်မှာ အင်္ဂလိပ်စာလုံးနဲ့ 'Mandalay Gazette' ဆိုတဲ့ စာတမ်း ပါရှိပါတယ်။
မင်းတုန်း မင်းတရားကြီးဟာ အဲဒီလောက် အမြော်အမြင်ကြီးမားပြီး စိတ်နှလုံး နူးညံ့သိမ်မွေ့သူ ဖြစ်ပါတယ်။ ဘိုးဝဇီရက အဲဒီ မန္တလေး ဂေဇက်ရဲ့ 'စာရေးတော်ကြီး' ပါ။ အယ်ဒီတာတို့ စာတည်းတို့ မခေါ်သေးပါဘူး။ စာရေးတဲ့အတွက် စာရေးတော်ကြီးလို့ ခေါ်တာပါ။
စာနယ်ဇင်းပညာ လေ့လာလိုက်စားလိုတဲ့ လူငယ်များကို စာများများ ဖတ်ပါ။ လက်လှမ်းမီတာလည်း ဖတ်ပါ။ လက်လှမ်း မမီတာများကိုလည်း ရှာဖွေပြီး ဖတ်ပါ။ နိုင်ငံခြားက စာအုပ်တွေလည်း ဖတ်ပါ။ မြန်မာစာအုပ် စာတမ်းတွေကိုလည်း ပိုပြီး များများ ဖတ်ပါလို့ တိုက်တွန်းနှိုးဆော်ချင်ပါတယ်။ မြန်မာလူမျိုးတွေ ဖတ်ဖို့ မြန်မာစာနဲ့ ရေးသားနေကြတာ ဖြစ်တာကြောင့် မြန်မာစာကို ပိုပြီး များများဖတ်ပါလို့ တိုက်တွန်းနှိုးဆော်ရတာပါ။ ပြီးတော့ ရေးတဲ့အခါများမှာ အတတ်နိုင်ဆုံး မြန်မာစကား သက်သက်နဲ့သာ ရေးဖို့လည်း အလေးဂရုပြုစေချင်ပါတယ်။ မြန်မာစကားနဲ့ ရှိပြီး၊ ဘာသာပြန်ပြီး စကားလုံးတွေကို အင်္ဂလိပ်စာလုံးတွေ ထည့်ရေးလိုက်တော့ စာစီ စာပြင်မှားသွားတဲ့အခါမှာ ဘာမှန်း ညာမှန်းမသိ ဖြစ်သွားတတ်ပါတယ်။ ဒီခေတ်မှာ စာစီအမှား၊ စာပြင်အမှား ကလည်း တရားလွန်အောင် မှားတတ်ကြတယ်ဆိုတာ လူတိုင်းသိနေကြတယ် မဟုတ်လား။ မြန်မာကို ကမ္ဘာက သိစေဖို့ နိုင်ငံခြားကစာနယ်ဇင်းတွေမှာ အင်္ဂလိပ်လို ရေးဖို့ လိုအပ်ပါတယ်။ များများရေးကြပါ။ ဒါပေမယ့် မြန်မာတွေ ဖတ်ဖို့အတွက်တော့ မြန်မာစကားနဲ့သာ ရေးကြပါလို့ မေတ္တာရပ်ခံချင်ပါတယ်။
လူထုစိန်ဝင်း
၂၇-၂-၂၀၀၅
ဖတ်စရာဂျာနယ် ၁၀
[ပင်ဝါးရုံစာပေမှ ထုတ်ဝေတဲ့ လူထုစိန်ဝင်း ရဲ့ 'ဖတ်စရာ' စာအုပ်၊ ပထမအကြိမ်၊ ၂၀၀၇ မှ ကူးယူဖော်ပြ တာ ဖြစ်ပါတယ်]
ဖတ်စရာ ရှားသလား
ရေးသူ- လူထုစိန်ဝင်း
'ဖတ်စရာ စာအုပ်တွေ လမ်းညွှန်ပေးပါ'
လူငယ်လေးတွေ၊ အထူးသဖြင့် ခေတ်ပေါ် ဂျာနယ်လစ်လူငယ်လေးတွေ ရောက်လာတိုင်း ပြောလေ့ ရှိတဲ့စကား ဖြစ်ပါတယ်။ လူငယ်တွေ စာဖတ်ဝါသနာ ပါကြတယ်။ စာလေးပေလေး ရေးချင်ကြတယ်။ ခေတ်ပေါ် ဂျာနယ်လစ်လူငယ်တွေက စလောင်းက မြင်တွေ့နေရတဲ့ စီအင်အင်တို့၊ အေဘီစီတို့၊ အင်ဘီစီတို့၊ ဘီဘီစီတို့လို သတင်းမီဒီယာကြီးတွေက သတင်းထောက်တွေ၊ သတင်းထောက်မလေးတွေကို အားကျပြီး သူတို့လို ဖြစ်အောင် ကြိုးစားချင်ကြတယ်။ ဒါကြောင့် စာတွေ ဖတ်ချင်ကြတယ်။ ကြိုးစားချင်စိတ်ရှိတာ၊ စာဖတ်ချင်စိတ်ရှိတာ အင်မတန်ကောင်းပါတယ်။ ၀မ်းမြောက်ဝမ်းသာ ဖြစ်ရမှာ၊ အားပေးရမှာ ဖြစ်ပါတယ်။ ဒါပေမယ်လို့ ဂျာနယ်တွေ ၁၅၀ လောက်၊ မဂ္ဂဇင်းတွေ ၁၅၀ လောက် ထွက်ရှိနေတဲ့ကြားက ဘာဖတ်ရမှန်းမသိ ဖြစ်နေတယ် ဆိုတာကတော့ မဟုတ်သေးဘူးလို့ ထင်ပါတယ်။ ပြီးတော့ ဒီခေတ်မှာ နိုင်ငံခြားက တိုင်းမ်၊ နယူးစ်ဝိ၊ ဘစ်ဇနက်ဝိ စတဲ့ အပတ်စဉ်ထုတ် မဂ္ဂဇင်းတွေ၊ ရီးဒါးဒိုင်ဂျက်လို လစဉ်ထုတ်မဂ္ဂဇင်းတွေ၊ စထရိတ်တိုင်း၊ ဘန်ကောက်ပို့စ်၊ နေရှင်းတို့လို နေ့စဉ်ထုတ် သတင်းစာတွေ ပုံမှန်ဝယ်လို့ ရနေတဲ့ အခြေအနေမျိုးမှာ ဘာဖတ်ရမှန်းမသိ ဖြစ်နေတယ် ဆိုတာမျိုးက သာပြီး မဟုတ်သေးဘူးလို့ ထင်ပါတယ်။
ဒီခေတ်လူငယ်တွေက သတင်းစာပညာကျမ်းတို့၊ သတင်းရေးနည်းပညာတို့လို စာအုပ်မျိုးတွေ၊ How to be a Journalist ဆိုတာလို စာနယ်ဇင်းသမားဖြစ်နည်း လမ်းညွှန်စာအုပ်မျိုးတွေ ဖတ်မှ စာနယ်ဇင်းသမား ဖြစ်နိုင်တယ်လို့ အထင်ရောက်နေကြဟန် ရှိပါတယ်။ ပြီးတော့ Fast Food တို့၊ Ready made ၀တ်စုံတို့နဲ့ပဲ ကြီးပြင်းခဲ့ကြလေတော့ ဘာမဆို ရယ်ဒီမိတ်တွေကိုပဲ အားကိုးနေကြတဲ့ အကျင့်ဆိုးကြီးက အရိုးစွဲနေကြဟန် ရှိပါတယ်။ ကျောင်းနေကြတော့လည်း ကျူရှင်က ထုတ်ပေးတဲ့ မှတ်စုလောက်ကိုသာ ကျက်မှတ်နေကြတဲ့ ခေတ်ကြီးကိုး။
အဲဒီလို ရယ်ဒီမိတ်လူငယ်တွေကို သတင်းစာသမားပီပီ 'လိုတိုရှင်း' ပဲ ပြောလိုက်ပါမယ်။ How To စာအုပ်မျိုးတွေ ဖတ်နေလို့ကတော့ ဘာပညာမှ တတ်မြောက်မှာ မဟုတ်ဘူး။ အချိန်ကုန်ရုံ သက်သက်သာ ရှိလိမ့်မယ်။ ပိုးသာကုန် မောင်ပုံစောင်းမတတ်ကိန်းပဲ ကြုံရလိမ့်မယ် ဆိုတာပဲ ဖြစ်ပါတယ်။
ပညာတရပ်ဆိုတာ မှတ်စုဖတ်ရုံနဲ့ မတတ်မြောက်ပါဘူး။ မော်တော်ကား မောင်းနည်း၊ ရေကူးနည်း ဖတ်ရုံနဲ့ ကားမောင်းတတ် ရေကူးတတ် မဖြစ်ပါဘူး။ ကိုယ်တိုင် လက်တွေ့ အလေ့အကျင့်လုပ်မှ တတ်မြောက် ပါတယ်။ အလေ့အကျင့် များများလုပ်လေ ကျွမ်းကျင်လေ ဖြစ်ပါတယ်။ ဒီလိုပြောလို့ စာအုပ်တွေ ဖတ်ဖို့မလိုဘူးလို့ ဆိုလိုတာ မဟုတ်ကြောင်းလည်း ပြောချင်ပါတယ်။ How To စာအုပ်မျိုးတွေ နောက်ကို လိုက်မနေဖို့ ပြောချင်တာပါ။ စာဖတ်တာကတော့ များများဖတ်လေ ကောင်းလေပါပဲ။ ၀တ္ထုရေးနည်း၊ ကဗျာရေးနည်း ဖတ်နေမယ့်အစား ၀တ္ထုစာအုပ်၊ ကဗျာစာအုပ်တွေကို ဖတ်၊ နည်းနာယူ၊ လေ့လာသုံးသပ်ပြီး ကိုယ်တိုင် ၀တ္ထုရေးကျင့်ဖို့၊ ကဗျာရေးကျင့်ဖို့ ဆိုလိုတာ ဖြစ်ပါတယ်။ ဒီနေ့ခေတ်မှာ ဖတ်စရာတွေ အင်မတန် ပေါပါတယ်။ ဘယ်မဂ္ဂဇင်း ကောက်လှန်လှန် ၀တ္ထုတွေ၊ ကဗျာတွေ တွေ့နိုင်ပါတယ်။ ဘာသာရေး မဂ္ဂဇင်းမျိုးမှာတောင် ၀တ္ထုနဲ့ ကဗျာ ပါလေ့ရှိမြဲ ဖြစ်ပါတယ်။ ဂျာနယ်လစ် ဖြစ်ချင်သူများအတွက်လည်း ဂျာနယ်မျိုးစုံ ၁၀၀ ကျော် ၁၅၀ နီးပါး ရှိပါတယ်။ စိတ်ကြိုက် လေ့လာနိုင်ပါတယ်။ စာအုပ်တွေက အရေအတွက်သာ များပြီး အရည်အချင်း မရှိကြဘူး၊ ဒါတွေဖတ်လို့ အကျိုးမရှိဘူးလို့ မပြောပါနဲ့။ လောကမှာ အကျိုးမရှိတဲ့စာဆိုတာ မရှိပါဘူး။ မကောင်းတဲ့ စာအုပ်ဆီကလည်း ဘာတွေ မကောင်းတာလဲ၊ ဘာ့ကြောင့်မကောင်းတာလဲ ဆိုတဲ့ ပညာရနိုင် သင်ခန်းစာယူနိုင် တာပါပဲ။ အရေးကြီးတာက ဘယ်လိုစာအုပ် ဖတ်တယ်ဆိုတာ မဟုတ်ပါဘူး။ စာအုပ်ကို ဘယ်လိုဖတ်တယ် ဆိုတဲ့ စာဖတ်နည်းသာ ဖြစ်ပါတယ်။
စာဖတ်တဲ့အခါမှာ 'ပြီးကပစ်' မဖတ်သင့်ပါဘူး။ မကောင်းတဲ့ စာအုပ်ပဲ ဖြစ်စေဦးတော့ ဖတ်ပြီး ဝေဖန်ဆန်းစစ် ကြည့်ရပါမယ်။ စောစောက ပြောခဲ့သလို ဘယ်လို မကောင်းတာလဲ။ ဘာကြောင့်မကောင်းတာ လဲလို့ သုံးသပ်ရပါတယ်။ ကောင်းတဲ့ စာအုပ်ဖတ်ရင်လည်း ဘယ်လိုကောင်းတာလဲ။ ဘာကြောင့် ကောင်းတာလဲ ဆိုတာ ဝေဖန်ဆန်းစစ် ရပါမယ်။ အဲဒီလို သုံးသပ်ပြီး သင်ခန်းစာ ထုတ်ယူတတ်မှ၊ အတုယူတတ်မှ အကျိုးရှိစေပါတယ်။
အထူးသဖြင့် ဂျာနယ်လစ် ဖြစ်ချင်သူများက စာမှန်သမျှ အကုန်ဖတ်သင့်ပါတယ်။ ဂမ္ဘီရလည်း ဖတ်သင့်တယ်။ အားကစားလည်း ဖတ်သင့်တယ်။ ဖက်ရှင်လည်း ဖတ်သင့်တယ်။ လျှို့ဝှက်သည်းဖိုလည်း ဖတ်သင့်တယ်။ နိုင်ငံရေးလည်း ဖတ်သင့်တယ်။ နိုင်ငံတကာရေးလည်း ဖတ်သင့်ပါတယ်။ ဘာ့ကြောင့်လဲဆိုတော့ စာနယ်ဇင်းဆိုတာ Something of Everything ကို ရေးသားရတာ ဖြစ်လို့ပါ။ မဖတ်သင့်တဲ့ စာအုပ်လို့ မရှိပါဘူး။ ဘယ်လိုစာအုပ်မျိုး ဖတ်တယ်ဆိုတာထက် စာကို ဘယ်လို ဖတ်တယ်ဆိုတာက ပိုပြီး အဓိကကျပါတယ်။
လူထုစိန်ဝင်း
၁-၁-၂၀၀၅
ဖတ်စရာဂျာနယ် ၂။
[ပင်ဝါးရုံစာပေမှ ထုတ်ဝေတဲ့ လူထုစိန်ဝင်း ရဲ့ 'ဖတ်စရာ' စာအုပ်၊ ပထမအကြိမ်၊ ၂၀၀၇ မှ ကူးယူဖော်ပြ တာ ဖြစ်ပါတယ်]
Tuesday, January 18, 2011
စင်ဒရယ်လားသည် စင်ဒရယ်လား ဖြစ်မြဲပါ
ရေးသူ- မြသန်းတင့်

ကျွန်တော်သည် ပတ္တမြားခင်၏ ပေးစာဖိုင်ကြီးကို ထုတ်လိုက်သည်။
၁၉၉၁ ခုနှစ် ကတည်းက ပတ္တမြားခင်သည် ကျွန်တော့်ထံ စာမှန်မှန်ရေးခဲ့သည်။ တလလျှင်တစောင်။ တခါတလေတွင် တလအတွင်းမှာပင် နှစ်စောင်ရောက်ချင် ရောက်လာတတ်သေးသည်။ ရေးသည့်အကြောင်း အရာများက အမေရိကန်တွင် နေထိုင်ရသည့် လူမှုဘ၀၊ နောက် အင်္ဂလန်၊ ဥရောပ စသည့်နိုင်ငံများသို့ သွားသည့် အတွေ့အကြုံတွေ။ တခါတရံတွင် ပတ္တမြားခင်သည် ဆွစ်ဇာလန်မှ စာရေးသည်။ တခါတရံတွင် ပြင်သစ်မှ လှမ်း စာရေးသည်။ တခါတရံတွင် အင်္ဂလန်မှ လှမ်းစာရေးသည်။ ကျွန်တော်သည် သူ့ပေးစာများကို ဖတ်၍ သူ့ကို အားကျကာ ကုလားထိုင်ပေါ်တွင် ထိုင်ရင်းသာ ခရီးသွားရတော့သည်။
ပတ္တမြားခင်သည် တော်တော် စာရေးနိုင်သူ ဖြစ်သည်။ 'သန္တာစမ်းမှ အလွမ်းစာ' ဆိုသည့် ခေါင်းစဉ်ဖြင့် အနောက်နိုင်ငံမှ အတွေ့အကြုံတွေ ရေးထားသည့် သူ့ဆောင်းပါးများတွင် မှတ်သားစရာတွေလည်း ပါသည်။ တွေးတော ဆင်ခြင်စရာတွေလည်း ပါသည်။ အောက်မေ့သတိရစရာတွေလည်း ပါသည်။ ထိုစာများသည် သူ၏ အိမ်လွမ်း ဝေဒနာကို ဖော်ပြနေကြသည်။ နိုင်ငံခြားတွင် အနေကြာလာသည်နှင့်အမျှ သူသည် မြန်မာပြည်ကို ပို၍ တမ်းတ လွမ်းဆွတ် လာဟန်တူသည်။ သူ၏ စာတစောင်ထဲတွင်......
"လန်ဒန်မှာ အဆောက်အဦ၊ အခေါ်အဝေါ်၊ အသုံးအဆောင် တွေကအစ မြန်မာပြည်မှာ သုံးနေကျ၊ ကြားနေကျ၊ တွေ့နေကျ ပစ္စည်းတွေမို့ မြန်မာပြည်ကို အောက်မေ့လိုက်တာ ဆရာရယ်။ ပုဂံကို မမခင် သုံးခေါက် ရောက်ဖူးပါတယ်။ ပထမဆုံး ရောက်ဖူးတာ ယုဝတီအဖွဲ့နဲ့။ မမခင် (ဒဂုန်ခင်ခင်လေး) တို့အဖွဲ့နဲ့ သွားဖြစ်ခဲ့တာပါ။ တခေါက်နဲ့ တခေါက် မတူဘူး။ ပုဂံဟာ တခေါက်ထက်တခေါက် ပိုလှနေတာ တွေ့ရပါတယ်။ ပုဂံရှုခင်းတွေကို မျက်စေ့ထဲမှာ ပြန်ပြီး မြင်ယောင်နေပါတယ်။ ပုပ္ပါးက ထွက်တဲ့ သြဇာသီး အယ်အယ်ကြီးတွေကိုလည်း စားချင်လိုက်တာ။ ဒီမှာ သြဇာသီး ရှိတဲ့အခါ ရှိပါရဲ့။ ပိစိကွေးလေးတွေကို တလုံး ၃ ဒေါ်လာလောက် ပေးရတာမို့ မတတ်နိုင်လို့ များများစားစား ၀ယ်မစား ဖြစ်ပါဘူး။ ညောင်ဦးမှာ မီးလင်းဖိုထဲ ထည့်ပြီး ဖုတ်စားရတဲ့ ထန်းပင်မြစ်ဖုတ်ကိုလည်း လွမ်းတယ်ဆရာရယ်။ ထန်းတောထဲက ထန်းလျက်ဖိုမှာ ပူပူနွေးနွေး ကော်စားရတဲ့ ထန်းလျက်ပူကိုလည်း သတိရတယ်။
မမခင်က ဆရာရဲ့ ဇာတိဖြစ်တဲ့ ပခုက္ကူရဲ့ ဟိုဘက်က ကျည်းကန်ရှင်ကြီးရဲ့ ကျည်းကန်ရွာကိုလည်း ငယ်ငယ်တုန်းက ကျောင်းပိတ်ချိန်တိုင်း ရောက်တယ်။ မမခင်ရဲ့ ဘိုးလေးက ကျည်းကန်ရွာသား ကျောင်းအုပ် ဆရာကြီးလေ။ ငယ်ငယ်က ကျွမ်းဝင်ခဲ့ရတဲ့ တောဓလေ့တွေကို မမေ့နိုင်သေးဘူး ဆရာရယ်"
ပတ္တမြားခင်သည် ကယ်လီဖိုးနီးယားက ပန်းသီးခြံတွေကြားက နေပြီး ပုပ္ပါးသြဇာသီးကို လွမ်းနေသည်။ ကုန်ပဒေသာတိုက်ကြီးတွေထဲ ကက်ဘာရီ ချော့ကလက်တွေကို ကျော်ပြီး အညာက ထန်းလျက်ပူကို လွမ်းနေသည်။ နောက်စာတစောင်ထဲတွင်.........
"ဘာလိုလိုနဲ့ သင်္ကြန်တောင် နီးလာပြီနော်။ ပိတောက်တွေ ပွင့်ကြတော့မယ်။ ဒီမှာ ငုတွေတော့ ရှိတယ်ဆရာ။ ပိတောက်ကိုင်း ယူလာပြီး စိုက်တာ၊ ရက်ကြာသွားလို့လား မသိဘူး၊ မဖြစ်ဘူး။ ငုဖြစ်ရင် ပိတောက်လည်း ဖြစ်နိုင်မယ်လို့ ထင်တာပဲ။ သရက်တွေ ဖူးနေတာ ခဲနေတာပဲ။ သရက် လှိုင်လှိုင်ပွင့်တော့လည်း မြန်မာပြည်ကို သတိရပြန်တာပဲ" ဟုဆိုကာ ပိတောက်နဲ့ သရက်ကို သူ လွမ်းသည်။
နောက်စာတစောင်တွင်မူ မြန်မာပြည်ကို ပြန်ချင်ကြောင်း ပါလာသည်။
"ဒီမှာနေတဲ့ 'ဦး...' ဆိုတာ မြန်မာပြည်ကို ပြန်သွားပြီ။ ဒီမှာ သား ၄ ယောက်နဲ့ လာနေတာ။ အသက်ရ လာတော့ ကိုယ့်တိုင်းပြည်မှာပဲ ပြန်ပြီး အေးအေးဆေးဆေး နေတော့မယ်ဆိုပြီး အပြီးပြန်သွားပါတယ်။ ကလောမှာပဲ အခြေချတော့မယ်တဲ့။ သူများတကာတွေက အမေရိကန်ကို လာရတာ အားကျနေကြပေမယ့် မမခင်ကတော့ အဲဒီလို ပြန်သွားတဲ့ လူတွေကို အားကျမိတာ အမှန်ပဲ ဆရာရယ်။ ကလောလို နေရာမှာ ခြံသေးသေးကလေး၊ အိမ်ပုကလေးနဲ့ ဒေလီယာတွေ၊ နှင်းဆီတွေ ရောင်စုံစိုက်ပြီး နေချင်လိုက်တာ။ ရွှေစက်တော်ကို မမခင် တခေါက်မှ မရောက်ဖူးသေးဘူး။ သိပ်လှပြီး သိပ်သာယာတာပဲလို့ သွားတဲ့လူတိုင်းက ပြောတယ်။ ဓာတ်ပုံတွေမှာပဲ မြင်ရ ကြည့်ရတော့တယ်။ မြန်မာပြည်အနှံ့ ခရီးလျှောက်သွားနေရတဲ့ ဆရာတို့ကို အားကျလိုက်တာ။ ကိုယ့်ရပ်ကိုယ့်ရွာကို ပြန်လည်ရတာလည်း အခွင့်ရေးကောင်းကြီး တခုပါပဲ။ ဆရာ ပခုက္ကူ ပြန်တဲ့အခါ ဘယ်လို ခံစားရလဲ မသိဘူး။ မမခင်တော့ မန္တလေးကို တခေါက် ပြန်လာတိုင်း အသက်ပိုငယ်သွားသလို ခံစားရတယ်။ ငယ်ပေါင်းကြီးဖော်တွေနဲ့ နင်တလုံး၊ ငါတလုံးပြော၊ ကျောက်မဲခုံဖိနပ် တဂေါက်ဂေါက် မြည်အောင်စီးပြီး ဘာမှ ဟန်လုပ်ဆက်ဆံတာမျိုး မရှိဘဲ နေရတာ သိပ်ပြီး အရသာတွေ့တာပဲ" ဟု ရေးသည်။
နောက်စာတစောင်တွင်မူ.......
"တနေ့နေ့တော့ မြန်မာပြည်ကို ပြန်ရောက်ကောင်းပါရဲ့။ ဆရာနဲ့လည်း တ၀ကြီး စကားတွေ ပြောခွင့်ရချင်ပါရဲ့။ အဲဒီတနေ့ဟာ တကယ်မှ ရောက်ပါ့မလားတော့ မပြောတတ်ပါဘူး ဆရာရယ်။ အသက်ရှင်နေသေးရင်ပေါ့လေ" ဟု စိုးရိမ်စိတ်ဖြင့် သူတမ်းတသည်။
++++ ++++ ++++ ++++
၁၉၉၁ ခုနှစ်လောက်မှစ၍ ပတ္တမြားခင်သည် တလတစောင် သို့မဟုတ် နှစ်လတစောင် ရေးတတ်ပါသည်။ ပတ္တမြားခင်သည် မဂ္ဂဇင်းများတွင် ဆောင်းပါးတွေ ရေးရုံမျှမက မိတ်ဆွေများထံလည်း တာဝန်ကျေစွာဖြင့် စာတွေ မှန်မှန် ရေးနိုင်သူ ဖြစ်သဖြင့် ချီးကျူးရသည်။ ကျွန်တော်ကမူ စာမှန်မှန် မပြန်ဖြစ်ပါ။ တခါတလေ ကျွန်တော်ထံမှ စာအပြန်ကျဲသွားလျှင် ပတ္တမြားခင်သည် ဘာဖြစ်လို့လဲ၊ နေထိုင်မကောင်းလို့လား၊ ကျန်းမာရေး မကောင်းလို့လား စသဖြင့် စာတွေ တစောင်ပြီးတစောင် ရေးပြီး မေးတတ်ပါသည်။ ကျွန်တော်မှာ စာရေးပျင်းသူ ဖြစ်သည်။ ဆောင်းပါး၊ ၀တ္ထု စသည်များကို ရေးသည်မှ လွဲလျှင် ကိုယ်ရေးကိုယ်တာ ပေးစာကို ကျွန်တော် ရေးဖြစ်ခဲသည်။ မိဘများ ရှိစဉ်ကလည်း မိဘတွေက ရေးသည့်တိုင် ကျွန်တော် မရေးဖြစ်ပါ။ သူတို့ ၄၊ ၅၊ ၁၀ စောင်ရေးမှ တစောင်တလေသာ ပြန်ဖြစ်ပါသည်။ နောက် သားချင်းဆွေမျိုးများ ထံသို့လည်း ကျွန်တော် မရေးဖြစ်ပါ။ ပတ္တမြားခင်ထံသို့မူ မကြာခဏ ရေးဖြစ်နေပါသည်။ ကျွန်တော်က စာမပြန်လျှင် နေထိုင်မကောင်းဟု အထင်ရှိကာ စာတွေ တစောင်ပြီးတစောင် လှမ်းရေးနေတတ်သဖြင့် သူ့ကို အားနာကာ စာတွေ ရေးဖြစ်အောင် ကြိုးစား၍ ရေးရပါသည်။
[တလောက နယ်သို့ ရောက်သွားရာတွင် အသက် ၄၀ ကျော် ၅၀ အတွင်း မိတ်ဆွေတယောက်က မှန်ပေါင်သွင်းထားသည့် စာတစောင်ကို ပြပါသည်။ သူ့ အသက် ၁၂ နှစ်သားတုန်းက သူ့ထံ ဆရာကြီး သခင်ကိုယ်တော်မှိုင်းက ရေးသောစာ ဖြစ်ပါသည်။ သူက မြန်မာစာ တော်ရန် မည်သည့်စာမျိုးကို ဖတ်သင့်သနည်းဟု ဆရာကြီးထံ စာရေးမေးမြန်းရာတွင် ဆရာကြီးက ပြန်ကြားသော စာ ဖြစ်ပါသည်။ ဆရာကြီးက မြန်မာစာတော်ချင်လျှင် ရှင်မဟာသီလ၀ံသ၏ 'ရာဇ၀င်ကျော်' 'မှန်နန်းရာဇ၀င်တော်ကြီး' နှင့် 'ဇိနတ္ထပကာသနီ' စသောကျမ်းများကို ဖတ်ရန် ရေးထားပါသည်။ ထို့ပြင် လူငယ်တွေ ကြိုးစားဖို့ လိုကြောင်း စသည်တို့ကိုလည်း ရေးထားပါသည်။ ၁၂ နှစ်သားလေးထံ လေးလေးစားစား စာပြန်သော ဆရာကြီး၏ မေတ္တာ၊ ဆရာကြီး၏ စေတနာ၊ ဆရာကြီး၏ အလေးဂရုပြုပုံမျိုးကို ကြည့်၍ အံ့သြအားကျမိပါသည်]
ပတ္တမြားခင်က သူ့စာရေးဟန်နှင့် ပတ်သက်၍လည်း သူ့ကိုယ်သူ ဝေဖန်ထားသည်။
"မမခင် ဒီက အတွေ့အကြုံတွေကို မျှဝေပေးချင်တယ်။ ဆောင်းပါးပုံစံ ရေးရမှာကလည်း ရေးစ မရှိတော့ မရေးတတ်ဘူး။ ဒါနဲ့ ပေးစာ ပုံသဏ္ဍာန်နဲ့ဆိုရင် စကားပြောသလို ရေးလို့ရတော့ ရေးရတာ လွယ်မှာပဲဆိုပြီး ရေးလိုက်တာ။ နောက်ပြီး 'ကိုဦး' (၀င်းဦး) ဆီကလာတဲ့ စာတွေကလည်း ပေးစာပုံသဏ္ဍာန်နဲ့ ဆိုတော့ ဒီလိုရေးရင် ကောင်းမှာပဲ ဆိုပြီး စန္ဒာထဲမှာ 'သန္တာစမ်းက အလွမ်းစာ' ဆိုပြီး ရေးလိုက်တာပါ။ ဒီလိုရေးမိရာကနေပြီး ကံကောင်းတော့ ဟုတ်သလိုလို ဖြစ်သွားတာ။ အမျိုးသမီး ဓာတ်ပုံဆရာမ ဖြစ်သွားတာလည်း ဒီအတိုင်းပါပဲ။ တော်လို့ တတ်လို့ ဆိုင်ဖွင့်ဖြစ်တာ မဟုတ်ပါဘူး။ ဓာတ်ပုံရိုက်တာ ပိုက်ဆံဖြုန်းတယ်ဆိုပြီး ယောက်ျား အဆဲခံရလို့ ကိုယ့်ဘာကိုယ် တ၀ ရိုက်ရအောင် ဆိုပြီး ဆိုင်ဖွင့်ဖြစ်သွားတာ။ လူတွေက အားပေးလာတော့မှ ပြူးပြူးပြဲပြဲဖြစ်ပြီး မနည်းလိုက် လေ့လာရတာနဲ့ 'ခန့်ခန့်ကြီးဓာတ်ပုံ' ဆိုပြီး ဖြစ်သွားရတာ ဆရာရေ့ ။
မမခင်မှာ ရေးစရာ Life Story တွေ တပုံကြီးပဲ။ ဆရာပြောသလို အချိန်က နည်းလာပြီမို့ ရေးခွင့်ရတုန်းမှာ ကြိုးစားပြီး ရေးထားရဦးမယ်။ မမခင် အခု ကိုယ်တိုင်ရေး အတ္ထုပ္ပတ္တိ ရေးနေတယ်။ အဲဒါ တနှစ်နဲ့ ပြီးရင်တော့ ကံကောင်းပေါ့ ဆရာရယ်။ အဲဒါ ဆရာ့ကိုပဲ အားကိုးရမှာ။ ဆရာကပဲ ကြည့်ပြီး တည်းဖြတ်ပြင်ဆင်ပေးပါ။ အရှိကို အရှိအတိုင်း ရေးမှာဆိုတော့ တည်းဖြတ်တာတို့ ဘာတို့ လုပ်မှ ဖြစ်မှာ။ 'သန္တာစမ်းက အလွမ်းစာ' ကိုလည်း မမခင်ရဲ့ အနှစ် ၇၀ ပြည့်မှာ ရုပ်လုံးပေါ်ချင်ပါတယ်။ နောင် ၃ နှစ်နီးပါးဆိုရင် ၇၀ ပြည့်တော့မှာ မဟုတ်လား။ ဖိုးသားကိုတော့ မှာထားတယ်။ အကယ်၍များ မမခင် မရှိတော့ဘူး ဆိုရင်တောင် သူ တာဝန်ယူပြီး ထုတ်ပေးပါလို့။ အဲဒီအခါကျရင် ဆရာ့ကို အကူအညီ တောင်းဖို့လည်း ပြောထားပါတယ်။ မမခင် ရှိရှိ မရှိရှိ မမခင်ရဲ့ စာအုပ်ကို ဆရာ အမှာစာ ရေးပေးရမယ်နော်"
သူ့စာမှာ ၁၉၉၁ ခုနှစ်၊ စက်တင်ဘာလကတည်းက ရေးလိုက်သည့်စာ ဖြစ်သည်။ ယခုလောက်ဆိုရင် ပတ္တမြားခင်သည် အသက် ၇၀ ပြည့်လောက်ပြီ။ သူ့အသက် ၇၀ ပြည့်တွင် ပတ္တမြားခင်သည် သူထုတ်ချင်သည့် စာအုပ်ကို မထုတ်ဖြစ်သေးသော်လည်း သူ့အတ္ထုပ္ပတ္တိကိုမူ ရေးဖြစ်လေပြီ။
ပတ္တမြားခင်သည် မြန်မာပြည်နှင့် နှစ်ပေါင်းများစွာ ကွဲကွာနေပြီးနောက် မနှစ်တုန်းက မြန်မာပြည်သို့ ရောက်လာသည်။ မိတ်ဟောင်း ဆွေဟောင်း၊ မိတ်သစ် ဆွေသစ်တွေဆီ သွားလာရနှင့် အချိန်ကို လုနေရသည်။ သည်ကြားထဲ မန္တလေး၊ စစ်ကိုင်း၊ ပုဂံတို့ကို ရောက်အောင် သွားလိုက်သေးသည်။ သူပြန်သွားပြီး မကြာခင်မှာပင် စာရေးနိုင်သည့် ပတ္တမြားခင်ထံမှ စာတွေ ရောက်လာသည်။ သူ့ စာတစောင်ထဲတွင်.........
"အမေရိကန်မှာ အချိန်ကို လုပြီး အလုပ်လုပ်ကြတယ်။ သူတို့ အဖို့တော့ Time is money ပဲ။ မမခင်တို့ မြန်မာတွေကတော့ နေရာတိုင်းမှာ အေးဆေးလွန်းတာကို ကြည့်ပြီး စိတ်ထဲမှာ အားကိုမရပဲ ဖြစ်ဖြစ်နေတယ်။ ကိုယ်ကလည်း ဘာမှ လုပ်နိုင်စွမ်း မရှိတော့ သည်းခံနိုင်အောင် ကိုယ့်ကိုယ်ကို ပြန်ပြီး ဆုံးမရတယ်။ စိတ်တိုင်းမကျတဲ့ အဖြစ်ကလေးတွေ ကြုံရပေမယ့် Home Sweet Home ဆိုတာ အမှန်ပါပဲ။ သုံးပတ်ဆိုတဲ့ အချိန်လေးဟာ မမခင်ဘ၀မှာ မေ့မရနိုင်တဲ့ တကယ့်ကို ပျော်ရွှင်ကြည်နူးခဲ့ရတဲ့ အချိန်ပိုင်းကလေးအဖြစ် သေရာပါသွားမယ့် ခံစားချက်ကလေးပါပဲ ဆရာ။ အိပ်မက် မက်လိုက်ရသလိုပါဘဲ။ အိပ်မက်က လန့်နိုးတော့ ၀ိုးတ၀ါးဖြစ်နေသလို ခုလည်း နိုးတ၀က်နဲ့ စိတ်က မြန်မာပြည် ပြန်ရောက်လိုက်၊ လက်ရှိဘ၀ကို မေ့သွားတဲ့ အခါတွေဟာလည်း အကြိမ်များစွာပဲ။ တကယ့် Reality ကို သတိရတဲ့အခါမှာ မျက်ရည်တောင် ၀ိုင်းမိပါတယ် ဆရာ။
ဆရာ့အိမ်ကအပြန် ကားထွက်ခါနီးမှာ ဆရာက 'မတူးရယ် ညည်းအမေကို ၂ နှစ်တခါလောက်တော့ ပြန်ပို့ပါ' လို့ တမ်းတမ်းတတမှာတဲ့ အမှာစကားကိုလည်း နားထဲက မထွက်တော့ဘူး။ တကယ် အဲဒီလို ပြန်လာခွင့် ကြုံကြိုက်နိုင်ရင်တော့ ကောင်းမှာပဲ ဆရာရယ်။ မတူးလေးလည်း ခုထိ Home Sick ဖြစ်နေတုန်းပဲ။ စင်ဒရယ်လား ပုံပြင်ထဲကလို ၁၂ နာရီထိုးတာနဲ့ ကိုယ့်နေရာကို ပြေးပြန်လာခဲ့ရတာ အဆောင်အယောင်တွေ၊ မေတ္တာ စေတနာ တွေလည်း တခါတည်း ကွယ်ပျောက်။ ဖန်ဖိနပ်ကလေး တဖက် ပြန်ပါလာသလို လက်ဆောင်ပစ္စည်းကလေးတွေ မြင်ရမှ ငါတကယ် မြန်မာပြည်ကို ရောက်ခဲ့တာပါလားလို့ သိရသလို ခံစားရတယ် ဆရာရယ်"
ကျွန်တော်သည် အိမ်လွမ်းဝေဒနာသည် တဦး၏ စာများကို ဖတ်ရင်း သူ့အဖြစ်ကို စာနာမိသည်။
စင်ဒရယ်လားပုံပြင်တွင် စင်ဒရယ်လားသည် မင်းသားလေး၏ ကပွဲကို တက်ရောက်ခဲ့သူ ဖြစ်ကြောင်း အထောက်အထားမပြနိုင်အောင် ဆိုးယုတ်သည့် မိထွေးက ဖန်ဖိနပ်ကလေးတဖက်ကို ရိုက်ခွဲပစ်လိုက်သည်။ သို့ရာတွင် စင်ဒရယ်လားတွင် ဖိနပ်ကလေးတဖက် ကျန်နေသေးသဖြင့် မနေ့ညက ကပွဲသို့ ရောက်ခဲ့ကြောင်းကို သက်သေပြနိုင်ခဲ့သည်။
ပတ္တမြားခင်သည် အချိန်မီ အပြေးအလွှား ပြန်ခဲ့ရသဖြင့် ဖိနပ်တဖက် ပျောက်ခဲ့သည့် စင်ဒရယ်လားနှင့် တူသည်ဟု သူ့ကိုယ်သူ ပုံခိုင်းသွားသည်။ သို့ရာတွင် စင်ဒရယ်လားတွင် သက်သေပြစရာ ဖိနပ်ကလေးတဖက် ကျန်သလို ပတ္တမြားခင်တွင်လည်း ဖိနပ်တဖက် ကျန်ပါသေးသည်။
ထို ဖန်ဖိနပ်တဖက်မှာ မြန်မာဆိုသည့် ဇာတိစိတ် ဖြစ်သည်။ ဇာတိစိတ်ကို ဘယ်သူမှ ဖျောက်၍ မရပါ။ ဘယ်သူတွေ ဘာပဲ ပြောပြော စင်ဒရယ်လားသည် စင်ဒရယ်လားပင် ဖြစ်ပါသည်။
မြသန်းတင့်
မဟေသီမဂ္ဂဇင်း
၁၉၉၄ ဇွန်။
[နေရီရီစာအုပ်တိုက်မှ ထုတ်ဝေတဲ့ မြသန်းတင့်ရဲ့ အပြာရောင်ညနေဆည်းဆာများ၊၂၀၁၀ စက်တင်ဘာ၊ ပထမအကြိမ်၊ မှ ကူးယူဖော်ပြတာ ဖြစ်ပါတယ်။]
Saturday, January 8, 2011
လေထီးရဲမေ ဒေါ်မြရီ<ကျောက်ဆည်> နှင့် တွေ့ဆုံခြင်း
တွေ့ဆုံမေးမြန်းသူ- မိုးဇံ
[၂၀၀၁ ဧပြီ၊ ဗြူတီမဂ္ဂဇင်းမှာ ဖော်ပြခဲ့တဲ့ မိုးဇံရဲ့ အင်တာဗျူးကို ၂၀၀၃ ခု၊ လူထုဒေါ်အမာ ၈၈ မွေးနေ့၊ မာယာ အထူးထုတ်မှာ ပုံနှိပ်ဖော်ပြပြီး ဖြစ်ပါတယ်။ ယခု ဒီဆောင်းပါးကို မဖတ်လိုက်ရသူတွေအတွက် မာယာ အင်တာနက်မဂ္ဂဇင်းမှာ ထပ်မံဖော်ပြခြင်း ဖြစ်ပါတယ်။]
ဒေါ်မြရီကို ဒေါ်မြရီ(ကျောက်ဆည်) အနေနဲ့၊ ပြီးတော့ မဟာမိတ်နဲ့ ဆက်သွယ်တဲ့ တော်လှန်ရေးရဲမေ မခင်စီအဖြစ်နဲ့၊ သတ္တိရှိတဲ့ ရဲဘော်သခင်တင်ရွှေရဲ့ ဇနီးအဖြစ်နဲ့ သိကြပါတယ်။
မြန်မာနိုင်ငံရဲ့ လွတ်လပ်ရေးသမိုင်းမှာ အကြီးကျယ် အခမ်းနားဆုံး ဖက်ဆစ်တော်လှန်ရေး ပြည်သူ့ လှုပ်ရှားမှုကြီးထဲမှာ မဟာမိတ်နဲ့ ပူးပေါင်းဖို့ ဆက်သွယ်တဲ့ ကဏ္ဍဟာ အရေးပါပါတယ်။
ဖက်ဆစ်ရဲ့ အန္တရာယ်ဟာ ပိုကြီးတယ်။ ဒါကြောင့် အင်္ဂလိပ်ကို ယာယီမဟာမိတ်ပြုပြီး ဖက်ဆစ်ကို အရင်တော်လှန်ရမယ်ဆိုတဲ့ လွတ်လပ်ရေးတိုက်ပွဲဝင် ခေါင်းဆောင်များရဲ့ ဆုံးဖြတ်ချက်နဲ့ မဟာမိတ်နဲ့ ဆက်သွယ်ကြတဲ့ လေထီးခုန်ဆင်းကြတဲ့ ရဲဝံ့စွန့်စားတဲ့ လူငယ်များဟာ အိန္ဒိယမှာ စုဝေးမိကြပါတယ်။ ဦးသိန်းဖေ (သိန်းဖေမြင့်)၊ ဗိုလ်မှူးချစ်ကောင်း၊ မန်းဝင်းမောင်၊ လေထီးဦးအုန်းမောင်၊ သခင်တင်ရွှေ၊ ဒေါ်မြရီ၊ ပါမောက္ခဦးကျော်ရင် စသူတို့ဟာ ထင်ရှားကြပါတယ်။
လူငယ်နဲ့စွန့်စားစိတ်ဆိုတဲ့ ခေါင်းစဉ်အောက်မှာ ဒေါ်မြရီနဲ့ ကျောက်ဆည်မြို့က သူ့အိမ်မှာ သွားရောက်ပြီး တွေ့ဆုံစကား ပြောဖြစ်ခဲ့ပါတယ်။ ဒေါ်ဒေါ်က ၁၁ ဧပြီ ၁၉၁၈ မွေးတာဆိုတော့ ယခုဆိုရင် ၈၃ နှစ် ရှိပါပြီ။ ကျန်းမာဖျတ်လတ် နေဆဲပါ (၂၀၀၃ခု နှစ်)။
မိုးဇံ။ ။ မနှစ်က တော်လှန်ရေးနေ့ လေထီးသမားတွေ့ဆုံတဲ့ပွဲကို ဒေါ်ဒေါ် မလာဖြစ်ဘူးလို့ ကြားတယ်။ နေကောင်းရဲ့လား။
ဒေါ်မြရီ။ ။ ကောင်းပါတယ်။ အဲဒီရက်က ကိုယ်က ပေါင်ကျိုးသွားလို့။ ခဏခဏ လဲတယ်။ လဲရင်လည်း ကျိုးတယ်။ အငြိမ်မနေတဲ့သူဆိုတော့ ခက်သားပဲ ဟား ဟား။
မိုးဇံ။ ။ ကျွန်တော်က ဒေါ်ဒေါ်တို့ ဖက်ဆစ်တော်လှန်ရေး စွန့်စားခန်းတွေအကြောင်း ဒေါ်ဒေါ်ပြောပြတာ နားထောင်ချင်လို့ပါ။ ဒေါ်ဒေါ်က 'မဟာမိတ်နဲ့ ဗမာ့တမန်' ခရီးမှာ သူရဲကောင်းတယောက် မဟုတ်လား။ အိန္ဒိယ သွားကြတော့ ရခိုင်ရိုးမကို ဖြတ်ပြီး လမ်းလျှောက်ရတာနော်။
ဒေါ်မြရီ။ ။ ဟုတ်တယ်။ ခရီးက ရန်ကုန်- ပုသိမ်၊ ပုသိမ်က ငါးသိုင်းချောင်း၊ ငါးသိုင်းချောင်းက မြောက်ချောင်း၊ အဲဒီလို သွားရတာ။ ခရီးက သိပ်ဆင်းရဲပင်ပန်းတယ်။ ရခိုင်ရိုးမကြီးက တောကလည်းကြီး၊ နက်လဲ နက်တယ်။ တောင်တွေကလဲ ကြမ်း၊ လမ်းကလဲ ဆိုး၊ တခါတခါ ခြေဖ၀ါးတွေ ကွဲပြီး ဆက်သွားလို့ကို မရတော့ဘူး။ တောင်အတက်တွေ ကုန်းအတက်တွေကျရင် ကိုတင်ရွှေနဲ့ ကိုညိုထွန်းက တဖက်စီတွဲပြီး ချိုင်းကနေ ဆွဲမ ဆွဲတင်ကြတယ်။ တခါတခါကျတော့ ဒရွတ်တိုက်ပါပဲ။ ဒါပေမယ့်လည်း အဲဒီတုန်းက သူတို့ ချိန်းထားတဲ့ အချိန်ရက်ကို ရောက်ဖို့ဆိုတော့ ရောက်အောင်သွားရတာပဲ။ ရာသီကလည်း ဆောင်းတွင်းကြီးပေမယ့် လူတွေမှာ ချွေးဒီးဒီးကျနေတော့ ချမ်းတယ် စီးတယ်မသိ။ ပင်ပန်းတာပဲ သိတာ။
မိုးဇံ။ ။ ရခိုင်ရိုးမဆိုတာ အဲဒီအချိန်က တကယ့် တောနက်ကြီး မဟုတ်လား။
ဒေါ်မြရီ။ ။ တကယ့်တောနက်ကြီး။ ငှက်တော၊ ကျားတော။ ငှက်ဖျားက သိပ်ကြမ်းတယ်။ ကျားဆိုးလဲ ပေါတယ်။ ဆင်ရိုင်းတွေ ရှိတယ်။ ကျားဆိုးတွေကလဲ သိပ်ရဲတင်းတယ်လို့ နာမည်ကြီးတယ်။ သိပ်လဲ ကြောက်စရာ ကောင်းတယ်။ ဒါပေမယ့် ဒီလောက်ပင်ပန်းတဲ့ကြားက မမှုပါဘူး။ ရောက်အောင်သွားတယ်။ ဒါဟာ တို့တိုင်းပြည် လွတ်လပ်ရေးအတွက် စွန့်စားရတာပဲ။ ဒီလို အဆင်းရဲ အပင်ပန်းခံ စွန့်စားမှ ဖက်ဆစ်တွေကို နိုင်မှာ၊ နယ်ချဲ့ကို နိုင်မှာ၊ လွတ်လပ်ရေးရမှာ ဆိုတဲ့ စိတ်ဓါတ်ပေါ့။
တခါတလေများ ကိုယ့်ကိုယ်ကို မကျေနပ်လိုက်တာလေ။ ငါ့နှယ် ပျော့လိုက်တာလို့။ စိတ်တိုတယ်။ ဖယ်ကြ မဆွဲကြနဲ့၊ ကိုယ့်ဘာသာ တက်မယ်ဆိုပြီး သစ်ပင်နွယ်ပင်တွေ ဆွဲတက်၊ တောင်ဆင်းတွေဆိုလဲ ဟိုအပင် ဒီအပင်ဖက်ဆင်း၊ ဖင်ဒရွတ်ဆွဲဆင်း၊ လှိမ့်ဆင်း လျှောဆင်း၊ ရင်ဘတ်တွေ ပွန်းပဲ့ လက်တွေ ခြေထောက်တွေ ပွန်းပဲ့ ရောင်ကိုင်းနေတာ။
တခါကျတော့ လှည်းနဲ့ သွားရတာ၊ မနက်မိုးလင်းကနေ မိုးချုပ်ထိ တနေကုန်ပဲ။ နောက်ည ဆက်သွားကြတော့ ဘယ်အချိန်မှာ လူရော နွားရော ပင်ပန်းပြီး အိပ်ပျော်သွားလဲ မသိဘူး။ လှည်းကြီး ရပ်နေပြီး နေမြင့်လင်းလာမှ လန့်နိုးကြတယ်။
ကံကောင်းလို့ပေါ့ ကျားစာ မဖြစ်တာ။
နောက်တော့ ရခိုင်ရိုးမကျော်ပြီး ဂွ ရောက်တယ်။ ဂွမြို့က ကျောက်ချွန်ဆိုတဲ့ ပင်လယ်ကမ်းခြေ ရွာကလေး။ အဲဒီကမှ ညဘက်မှာ ကိုတင်ရွှေက အချက်ပြတယ်။ လသာတဲ့ ညကြီး။ ပင်လယ်ထဲမှာ ရာဘာဘုတ်လေးနဲ့ လာခေါ်တော့ သုံးယောက်သား သွားကြတာ။ ပြီးတော့ စစ်သင်္ဘောကြီးဆီကို ရာဘာဘုတ်နဲ့ ကပ်၊ အဲဒီ သင်္ဘောနဲ့ မောင်းထွက်ရတာ။ အဲဒီမှာ သင်္ဘောပေါ်တက်တော့ မြန်မာပြည်ပေါက် ကုလားကြီး တယောက်က ၀မ်းသာအားရ ဆီးကြိုပြီး နေကောင်းရဲ့လား မေးတုန်းရှိသေးတယ်။ ဘေးနားမှာ ရှိတဲ့ ဆားလှေတွေပေါ်က ဂျပန်က လှမ်းပစ်လိုက်တာ ရင်ဘတ်မှန်ပြီး တခါတည်း တုံးဆို ပွဲချင်းပြီး သေသွားရှာတယ်။ သင်္ဘောလဲ ချက်ချင်း မောင်းထွက်ရတယ်။ သင်္ဘောကလူး၊ လှိုင်းကမူးနဲ့ အော့အန်လိုက်တာ၊ စားထားတာ ကုန်ရောပဲ။ ပင်လယ်ထဲမှာ သင်္ဘော သုံးခါပြောင်းစီးပြီး နောက်တော့ စစ်တကောင်းရောက်တယ်။ စစ်တကောင်းကနေ မီရတ်ဆိုတဲ့ ဟိမ၀န္တာတောင်စောင်းက တပ်မြို့လေးကို လေယာဉ်နဲ့ ပို့တယ်။ နောက် အဲဒီမှာ ကိုသိန်းဖေ(သိန်းဖေမြင့်)နဲ့ တွေ့ပြီး ဒေလီရွှေ့တယ်။ ဒေလီကမှ နယူးဒေလီပြောင်း၊ နောက် ကာလကတ္တား၊ ဘီဟားလားကို ရောက်တယ်။
မိုးဇံ။ ။ ကာလကတ္တား ရောက်တော့ စစ်သင်တန်းတွေ နိုင်ငံရေးသင်တန်းတွေ တက်ရတာပေါ့။
ဒေါ်မြရီ။ ။ ကာလကတ္တားမှာ အကိုကြီး ကိုသိန်းဖေက ခေါင်းဆောင်လေ။ သူက တာဝန်တွေ နေရာတွေ ခွဲဝေတယ်။ နောက် ဖက်ဆစ်ဂျပန်ရဲ့ အောက်မှာ မြန်မာပြည်သူတွေ ဘယ်လိုနေထိုင်၊ ခံစား၊ ဆင်းရဲကျပ်တည်းတာတွေ ဒုက္ခရောက်တာတွေ၊ ကုန်ဈေးနှုန်း အဆမတန်ဖြစ်တာတွေ စာတမ်းရေးရတယ်။ ဂျပန်ငွေစက္ကူဆိုတာ မင်းတို့ ကြားဖူးတယ် မဟုတ်လား။ ဘာမှ တန်ဘိုးမရှိအောင် ဖြစ်နေတာ။ အဲဒီ စာတမ်းတွေကို ကိုသန်းဖေက တည်းဖြတ်ပြီး လေနတ်သားသတင်းစာမှာ ထည့်တယ်။ နောက် ကိုသိန်းဖေက နိုင်ငံရေးလဲ သင်တန်းပေးတယ်။ လေထီးသင်တန်းတက်ဖို့ စီစဉ်ပြီးမှ ကိုယ်တို့ ကျောက်ဆည်ရဲ့ အခြေအနေအရ ဆင်းစရာ မလိုတော့ဘူးဆိုပြီး သင်တန်းမတက်ရတော့ဘူး။
နောက် အဲဒီသင်တန်းကို ပထမအသုတ် သခင်ဗိုလ်၊ မန်းဝင်းမောင်၊ ကိုချစ်ကောင်း၊ ကိုအုန်းမောင်တို့ ရောက်လာတယ်။ ဒါနဲ့ အဲဒီဘုံရိပ်သာကို အုပ်ချုပ်ဖို့ ဗဟိုကလပ်စည်းတခု အများဝိုင်းရွေးကြတယ်။ ကိုသိန်းဖေ ခေါင်းဆောင်ပြီး သခင်မြသွင်၊ ကိုကျော်ရင်၊ ကိုထွန်းအောင်ကျော်၊ ဂိုရှယ်နဲ့ ကိုယ်တို့ ပါတယ်။ အဲဒီကလပ်စည်းက ဘုံရိပ်သာတခုလုံးကို အုပ်ချုပ်တာ။
ခုပြန်တွေးကြည့်တော့လဲ အဲဒီတုန်းက တို့အားလုံး အသက်ငယ်ငယ်လေးတွေ ရှိကြသေးတာ။ လှကွန်း (သခင်လှကွန်း)တို့၊ ဘစော (၀န်ကြီးဟောင်းဦးဘစော)တို့၊ မောင်ကြည်တို့က အသက် ၁၈ နှစ်၊ ၁၉ နှစ်ပဲ ရှိသေးတာ။ ကိုယ်တို့ စွန့်စားတယ် ဆိုတာမှာ ကိုယ့်အတွက် ဘာဖြစ်ရမယ်၊ ညာဖြစ်ရမယ်ဆိုတာ ဘာမှ မပါဘူး။ ကိုယ်ကျိုးမပါဘူး။ ကိုယ့်တိုင်းပြည်နဲ့ လူမျိုးအတွက်။ ကိုယ့်ပြည်သူ ပြည်သားတွေကို တိုင်းတပါးက လာပြီး နှိပ်စက်ကလူပြုတာ မခံနိုင်တာ။
ကိုသိန်းဖေဆိုရင် အသက်သုံးဆယ် မပြည့်သေးဘူး။ တကယ့်ခေါင်းဆောင်ပဲ။ အဲဒီကာလက သူ့ လုပ်ဆောင်ချက်တွေကို လူတိုင်းက လေးစားရတယ်။ ချီးမွမ်းရတယ်။ သူက ကျောရိုးတီဘီနဲ့ အိပ်ရာပေါ်မှာ ပက်လက်ကြီး မလှုပ်မရှား နေရတာ။ အလုပ် အရမ်းလုပ်တယ်။ သင်တန်းတွေပေးတယ်။ စာတွေ ရေးတယ်။ နိုင်ငံရေး ဆွေးနွေးပွဲတွေ လုပ်တယ်။ ညွှန်ကြားချက်တွေ ပေးတယ်။ တချက်မညည်းဘူး။ ခေါင်းဆောင်က ဒီလိုလုပ်တော့ ကျန်တဲ့လူအားလုံး လုပ်ကြတယ်။ တယောက်နဲ့တယောက်လဲ သိပ်လေးစားကြ၊ ချစ်ကြတယ်။ လူငယ်တွေပဲ၊ တခါတလေ ပေါက်ကွဲလဲ ထိန်းလိုက်ရင် ရတယ်။ သိတ်ညီညွတ်တာ။ တယောက်နဲ့ တယောက်လဲ ဝေဖန်တယ်။ အမှားပြင်တယ်။ ပြန်ကြည့်တော့ အားလုံး လူငယ်တွေ မဟုတ်လား။ ကိုအုန်းမောင် (လေထီးအုန်းမောင်) မှ အသက်နှစ်ဆယ် ရှိသေးတယ်။
မိုးဇံ။ ။ အဲဒီတုန်းက ဒေါ်ဒေါ်တို့ကို ဘယ်သူက လွှတ်တာလဲ။ ဒေါ်ဒေါ့်ကို မခင်စီဆိုပြီး သခင်စိုးက နာမည်ပေးလွှတ်တာလို့ ဖတ်ဖူးတယ်။
ဒေါ်မြရီ။ ။ နေဦး၊ ကိုယ်တို့ သွားတာက ဇာတ်လမ်းက အရှည်ကြီး။ ကိုသိန်းဖေနဲ့ ကိုတင်ရွှေက အိန္ဒယမှာ နေရင်း တနှစ်လောက် ဗမာပြည်နဲ့ အဆက်အသွယ် ပြတ်နေတယ်။ ဒီမှာ ကိုသိန်းဖေက ကိုတင်ရွှေကို ဗမာပြည်ပြန်လွှတ်တာ။ အင်္ဂလိပ်ကလဲ ကိုတင်ရွှေပြန်ပြီး သစ္စာဖောက်ရင် ဘယ်လိုလုပ်မလဲ ဆိုတဲ့သဘောနဲ့ ကိုသိန်းဖေကို အသက်ပေါင်ထားရတဲ့ သဘောပေါ့။ ကိုတင်ရွှေပြန်မလာရင် ကိုသိန်းဖေ ကျန်နေတယ်။ ဒါမျိုးပေါ့။ ရှေးတုန်းက လွယ်တယ်။ ရဲဘော်ရဲဘက်တွေ တယောက်နဲ့တယောက် အသက်ပေးပြီး သစ္စာရှိကြတယ်။ အဲဒီလို ကိုသိန်းဖေ အသက်ကို အပေါင်ထားပြီး ကိုတင်ရွှေက ကျောက်တော်ဘက်ဆင်းပြီး ပြန်လာတယ်။
အဲဒီမှာ သခင်စိုးက အမျိုးသမီးစည်းရုံးရေးလိုတယ်ဆိုပြီး ကိုယ်က ရောက်တာ။ အမှန်က ကိုဘဟိန်းနဲ့ ကိုဘဟိန်းမိန်းမ (ဒေါ်ခင်ကြီး) ကို ခေါ်တာ။ ကိုဘဟိန်းက အဲဒီအချိန်မှာ မကျန်းမာဘူး။ ကောင်းကောင်း နေမကောင်းဘူး။ ဒါနဲ့ သူတို့ မပါဘူး။ အဲဒီမှာ သခင်စိုးက ငါမမြရီကို လွှတ်လိုက်မယ်ဆိုပြီး ခေါ်တယ်။ သခင်တင်မြနဲ့ နှစ်ယောက် သွားကြတာ။
မိုးဇံ။ ။ အဲဒါ ဖျာပုံသွားတာနော်။
ဒေါ်မြရီ။ ။ ဟုတ်တယ်။ ဖျာပုံအသွား၊ သခင်သန်းမြိုင်နဲ့ အိုးဘိုဆိပ်မှာ တွေ့တယ်။ သူက ဟေ့ ကိုတင်ရွှေ ရောက်နေတယ်လို့ ပြောတယ်။ ကိုယ်က ကိုတင်ရွှေ အိန္ဒိယမှာဆိုတာ ကိုယ်သိနေတာပဲ။ သူရောက်နေတယ် ဘယ်သိမလဲ။ အဲဒီမှာ သခင်တင်မြနဲ့ သွားတာ။ အဲဒီမှာ သခင်စိုးက မခင်စီလို့ နာမည်ပြောင်း ပေးပြီး ကိုတင်ရွှေနဲ့ လက်ထပ်ပေးပြီး ဘဲ ငါးကောင်ချက်ပြီး ပွဲလုပ်ပေးသေးတယ်။
ကိုတင်ရွှေက ဖိုးရုံဆိုပြီး၊ ဖိုးရုံနဲ့ မခင်စီသွားကြတာ။ စက်ပိုင်သမီး မခင်စီကို ခိုးပြေးလာတာလို့ ဇာတ်လမ်းဆင်ပြီး သွားကြတာ။ တကယ်တမ်းကြည့်တော့ ရယ်စရာကြီး။ ခိုးပြေးခံရတဲ့ စက်ပိုင်သမီးက တချိန်လုံး၊ လမ်းထွက်၊ အပြင်ထွက် ဈေးဝယ်လုပ်နေရတယ်။ ကိုတင်ရွှေက လူမြင်ခံလို့ မဖြစ်ဘူးဆိုတော့ ပုန်းနေရတယ်။ ဟားဟား ဟားဟား လုပ်ပုံ လုပ်ပုံ။ ဖြစ်ပုံတွေက အဲဒီလို။ ခိုးခံရတဲ့ စက်ပိုင်သမီးက ဟိုသွားလိုက်ဦး၊ ဒီသွားလိုက်ဦး၊ တော်ကြာ ငွေတောင်တန်း သွားလိုက်ဦးဆိုပြီး သွားနေရတာ။
ရခိုင်ရိုးမဖြတ်တော့ ကိုညိုထွန်း မဟာဗမာမင်းကြီးဆိုတော့ သူက မင်းကြီး၊ ကိုယ်နဲ့ ကိုတင်ရွှေက စာရေး လင်မယား၊ ကိုကျော်ရင်(ပါမောက္ခဦးကျော်ရင်)က အတွင်းရေးမှူးလုပ်ပြီး သွားရတာ။ လမ်းမှာ လူရှေ့သူရှေ့ဆိုရင် ခပ်တည်တည်နဲ့ ဟေ့ ဆေးလိပ်ယူခဲ့၊ လက်ဖက်ရည်ယူခဲ့ ဆိုပြီး ခိုင်းတာ။ စာရေးလင်မယားဆိုတော့ ကုပ်ချောင်းချောင်းနဲ့။ သူ ဆေးလိပ်သောက်တာကအစ မင်သေသေနဲ့၊ လက်နှစ်ဖက်နဲ့ ရိုရိုသေသေ ပေးရတာ။ ပြီးလို့ ဘယ်သူမှ မရှိဘူးဆိုရင် အခန်းထဲမှာ ကိုယ်တို့နှစ်ယောက်က လှိမ့်ထိုးကြတာ။ ဟဲ့ ငါတို့ကို ခိုင်းဦးဟဲ့ ဆိုပြီး။ သူကလဲ ဒါ ငါ့ကုသိုလ်နဲ့ ငါ ဖြစ်တာဆိုပြီး တဟားဟားနဲ့ပေါ့။ ရဲဘော်ရဲဘက်တွေဟာ တယောက်နဲ့တယောက် သိပ်ချစ်ကြတာ။
မိုးဇံ။ ။ ဂျပန်က ၀င်နေတာ တနှစ်လောက် ရှိပြီနော်။ အဲဒီတော့ ဂျပန်နဲ့ တခါမှ မဆုံဘူးလား။
ဒေါ်မြရီ။ ။ ဟာ အကြီးအကျယ် ဆုံတာပေါ့။ ဒါပေမယ့် တို့က ဂျပန်သင်ပုန်းကြီးစာအုပ်တွေ သယ်သွားတာ။ ကကိကုကေကော တို့၊ နာ့နိနုနေနော တို့ပေါ့။ ဂျပန်လိုနဲ့ ဗမာလိုနဲ့ ရေးထားတဲ့ စာအုပ်ပေါ့။ အဲဒါတွေကို ဂျပန်တွေ ပြသွားရတယ်။ သူတို့ကလဲ ကောင်းတယ် ကောင်းတယ် ဆိုပြီး ကျန်ခဲ့တာပဲ။ စာအုပ်ထုတ်ကြီးလဲ ကျောက်တော်ရောက်တော့ ကုန်တာပါပဲ။ အဲဒီတုန်းက စွန့်စားခန်းပါပဲ။
အဲဒီလို နေလာလိုက်တာ ကက်စဘီ* လက်ထက်ကျမှ ဗမာပြည် ပြန်ရောက်တော့တယ်။ ဖက်ဆစ် တော်လှန်ရေးကြီးလဲ အောင်မြင်ခဲ့တယ်ပေါ့ကွာ။
မိုးဇံ။ ။ ဒေါ်ဒေါ်တို့ လူငယ်အရွယ်ပေါ့။ ဒီလိုစွန့်စားခန်းတွေ စွန့်ရတာတွေကို ဘယ်လို ရည်မှန်းချက် တွေနဲ့ ကျော်ဖြတ်သွားခဲ့ကြတာလဲ။
ဒေါ်မြရီ။ ။ အဲဒီတုန်းက ကုမ္မာရီစိတ်ဓါတ်ပေါ့လေ။ တို့အမျိုးသမီးတွေဟာလဲ ဘယ်အလုပ်မဆို ရင်ဘောင်တန်းနိုင်တယ်၊ လုပ်နိုင်တယ် ဆိုတာပေါ့ကွာ။ ပြီးတော့ တို့က စာအုပ်တွေ ဘာတွေ ဖတ်တော့ နိုက်တင်းဂေးတို့ ဘာတို့ ဖတ်ပြီး ကိုယ့်စိတ်ထဲမှာ ဒီလို စိတ်ဓာတ် ရှိနေတာပေါ့။ အဲဒီတုန်းက အများဆုံး ဖတ်တာကတော့ နဂါးနီ** ပေါ့ကွာ။ နဂါးနီ စာအုပ်တွေ ဖတ်ပြီး လူက နိုးကြားနေတာပေါ့။ ဒီလိုဖြစ်ရမယ်ဆိုတဲ့ စိတ်ဓာတ်ရှိနေတာပေါ့။
ပြီးတော့ ကိုယ်က စာလဲရေးတယ်ကွ။ အဲဒီတုန်းက မြေလတ်မိခင် ဆိုပြီးတော့လဲ ရေးဖူးတယ်။ မြ၀တ်ရည် ဆိုတာနဲ့လဲ ရေးဖူးတယ်။ ယုဝတီတို့ ဘာတို့ မှာပေါ့။ ဆောင်းပါးတွေ ရေးတယ်။
မိုးဇံ။ ။ အဓိက ကတော့ အမျိုးသားရေးစိတ်ပေါ့နော်။ ကိုယ်က အပြင်သွား ဘာညာဆိုရင် လူမျိုးရေး အဓိကရုဏ်းကိစ္စ ဘာညာကလဲ ရှိတယ်မဟုတ်လား။ အဲဒီတုန်းက ကုလားဗမာ ဘာညာဆိုတာ ရှိတယ်လေ။ ကိုယ်က အမျိုးသားရေးစိတ်လဲ ပြင်းတဲ့သူဆိုတော့ အိမ်က အဖေကြီး အမေကြီးတို့က မှာတယ်။ ဟဲ့ မမြရီ အပြင်သွားရင် လူမရိုက်ခဲ့နဲ့နော်တဲ့။ ဟား ဟား ဟား ဟား။ သမီးရည်းစားတွေ ဘာတွေ မထားနဲ့လို့ မမှာဘူး။
ခုချိန် ပြန်တွေးတော့ ကိုယ်က အမျိုးသားရေးပဲ ဖြစ်နေတာကိုး။
ငယ်ငယ်တုန်းကတော့ အမျိုးသားစိတ်။ လွတ်လပ်ရေး ရအောင်လုပ်မယ်။ တို့ အမျိုးသားရေးအတွက် တို့ စွန့်လွှတ် အနစ်နာခံမယ်ဆိုတဲ့ စိတ်ဓာတ်နဲ့ ယုံကြည်ချက်တွေပေါ့။
မိုးဇံ။ ။ ဒေါ်ဒေါ်တို့ အိန္ဒိယသွားကြတော့ ခရီးမှာ မြန်မာနိုင်ငံ လွတ်လပ်ရေးအတွက် ဖက်ဆစ်ကို အရင်တိုက်ရမယ်ဆိုတဲ့ အယူအဆ ဆိုတာက အဲဒီအခါအတွက်တော့ အမျိုးသားရေး သက်သက်မဟုတ် တော့ဘူး။ ကိုယ်တိုက်ပွဲဝင်နေတဲ့ နယ်ချဲ့အင်္ဂလိပ်ကို ပြန်ပြီး လက်တွဲရတာ မဟုတ်လား။ အဲဒါ ဘယ်ကနေ ဘယ်လိုစတာလဲ။
ဒေါ်မြရီ။ ။ ကျောက်ဆည်မှာ ကိုတင်ရွှေ သူ့အကိုနဲ့ ပါရင်း ရောက်လာပြီးတော့ ကိုယ်နဲ့တွေ့တယ်။ နောက် တို့ဗမာအစည်းအရုံးမှာ အတူတူ လုပ်ရင်းကိုင်ရင်း မေတ္တာရှိကြတယ်။ သူကလဲ ကိုယ့်ဗမာလူမျိုးအတွက် မြန်မာနိုင်ငံအတွက် စွန့်စားမယ်။ လုပ်မယ်။ စွန့်ဝံ့တယ်ဆိုတဲ့ စိတ်ဓာတ်ရှိတယ်။ ဇွဲလဲ သိပ်ကြီးတယ်။ ဒီလိုနဲ့ တနေ့မှာ သူက လာနှုတ်ဆက်တယ်။ ဘယ်သွားမယ်၊ ဘာလုပ်မယ်ဆိုတာ မပြောဘူး။ တိုင်းပြည်အတွက် စွန့်တော့မယ်တဲ့။ ကိုယ်ကလဲ ပြောလိုက်တယ်။ သွား..... နောက်ဆံမငင်နဲ့။ မသေရင် ပြန်တွေ့ကြမယ်လို့ ပြောလိုက်တယ်။ နောက် သူထွက်သွားပြီး တော်တော်ကြာမှ ကိုသိန်းဖေနဲ့ အိန္ဒိပါသွားတယ်ဆိုတာ သိရတယ်။ သူဆက်ပေးခဲ့လို့ သခင်တင်မြတို့၊ ကိုတူး(ဗိုလ်မှူးချစ်ကောင်း)တို့နဲ့ ဆက်မိတယ်။ ကိုယ်က ဖက်ဆစ်တော်လှန်ေ၇း စာတမ်းတွေ စာစောင်တွေ ကူးတယ်။ ဖြန့်တယ်။ တနေ့မှာ သခင်တင်မြရောက်လာပြီး သခင်စိုးက ခေါ်ခိုင်းတယ်။ တော်လှန်ရေးအတွက် တာဝန်ပေးစရာရှိတယ်ဆိုတာနဲ့ ထလိုက်သွားတာ။ အဲဒါ ဖျာပုံရောက်တော့ ကိုတင်ရွှေ ပြန်ရောက်နေတာ တွေ့ပြီး၊ သခင်စိုးက ကိုယ်တို့နှစ်ယောက် လက်ထပ်ပေးပြီး၊ ဖက်ဆစ်ဆန့်ကျင်ရေး ကိစ္စပြောပြ၊ အိန္ဒိယကို လွှတ်တာပဲ။
ဂျပန်က ၀င်လာနေပြီဆိုတော့ ဂျပန်အကြောင်းကို ကောင်းကောင်း သိနေပြီ။ ဒါနဲ့ ဂျပန်ကို တော်လှန် ရမယ်ဆိုတာ လုပ်ကြတာပဲ။
မိုးဇံ။ ။ ဒေါ်ဒေါ်တို့ အားလုံးက အဲဒီမှာ လူငယ်တွေပဲ ရှိကြသေးတာ။ စွန့်စားခန်း တွေ့ကြုံရင် ရင်တုန်နေကြမှာပေါ့။ ပျော်လဲ ပျော်စရာကြီး ဖြစ်မှာပဲ။
ဒေါ်မြရီ။ ။ လူငယ်ဆိုတော့ စွန့်စားနေရတာ ပျော်တာပေါ့။ မကြောက်ကြပါဘူး။ မကြောက်မလန့်ဘူး ဆိုပေမယ့် လုပ်ရတဲ့ အလုပ်တွေက ရယ်စရာ မဟုတ်ဘူး။ လေယဉ်ပျံတောင် မစီးဘူးသူတွေက လေထီးခုန်ကြ ရတာလေ။ မောင်ကြည်ဆိုရင် အမြဲတမ်း ပြောတယ်။ "လေထီးခုန်တာ ဘာခက်တာမှတ်လို့ မမရယ်။ ၀မ်း တူး သရီးဆို ခုန်ချလိုက်၊ ပတ်ချာလည်ဆင်းသွားပြီး လေထီးပွင့်သွားရင် နတ်သားလေး ဖြစ်သွားရော" တဲ့။ အဲဒီလို စိတ်ဓာတ်တွေ၊ သတ္တိခဲတွေ။
နောက် ဗမာပြည်ကို လေထီးနဲ့ စဆင်းတာလဲ မောင်ကြည်ပဲ။ သူက ၁၈ နှစ်လောက် ရှိဦးမှာပေါ့။ ရွှေဘို တန့်ဆည်ဘက်က။ လေထီးခုန်ဆင်းတော့ ပဲခူး ပျဉ်ပုံကြီးဘက်မှာ။ သူဆင်းတော့ ဘယ်သူမှ ကြိုမယ့်သူ မရှိဘူး။ ကံကောင်းလို့ အောက်မှာ ဂျပန်မရှိဘူး သူက အဲဒီနယ်ကို တခါမှ ရောက်ဖူးတာ မဟုတ်ဘူး။ အဲဒါ ဂျပန်စစ်ဝတ်စစ်စားနဲ့ ၀တ်ထားပြီး ဂျပန်စစ်ကားတစီးကို ခပ်တည်တည်နဲ့ တားစီးသွားတယ်။ သူက ဂျပန်လို ပြောတတ်တော့ ဂျပန်တွေကို ဂျပန်လို ပြောပြီး ရန်ကုန်ရောက်သွားတယ်။ ရန်ကုန်ရောက်တော့ သူက R.E.T ဦးကျော်ငြိမ်း၊ ဒေါ်သိန်းတို့ဆီ သွားရမှာ။ ကိုတင်ရွှေက သူ့ကို မှာလိုက်တယ်။ ဒေါ်သိန်းဆိုတာ ဘယ်လို ပုံစံပေါ့လေ။ အဲဒါရောက်သွားတော့ အဲဒီမှာ ဂျပန်တွေ ရောက်နေတယ်။ သူက ပြန်လှည့်ထွက်လို့လဲ မဖြစ်၊ ဒါနဲ့ ခပ်တည်တည်နဲ့ ချက်ချင်းပဲ ဒေါ်သိန်းကို အမေသိန်း- ကျွန်တော်ဗိုက်ဆာလှပြီ လို့ပြောပြီး မီးဖိုချောင်ထဲ ၀င်သွားတာ။ ဒေါ်သိန်းနဲ့ သူက တခါမှ တွေ့ဖူးတာ မဟုတ်ဘူး။ အဲဒီတော့ ဒေါ်သိန်း မီးဖိုချောင်ထဲ လိုက်လာတော့မှ အဒေါ်က ဒေါ်သိန်းမဟုတ်လား။ ကျွန်တော့်ကို အိန္ဒိယက လွှတ်လိုက်တာ၊ ဂျပန်နဲ့ ဆက်ပြီး အိနြေ္ဒမပျက် စကားပြောနေ။ ပြီးမှ ကျွန်တော် ရှင်းပြမယ်လုပ်တာ။ မောင်ကြည် အဲဒီလို ဖြတ်ထိုးဥာဏ်ကလဲ ကောင်းတယ်။ အဲဒီလို အူယားစရာတွေ၊ ကြောက်စရာတွေ အများကြီးကြားမှာ တို့အားလုံး စွန့်စွန့်စားစား လုပ်ခဲ့ကြတာပါ။
မိုးဇံ။ ။ လေထီးဆင်းဖို့ လွှတ်တဲ့ လေဝာဉ်တစင်း ပျက်ကျသွားတယ်နော်။ ကျွန်တော် သိန်းဖေမြင့်ရဲ့ မဟာမိတ်နဲ့ ဗမာ့တမန် စာအုပ်မှာ ဖတ်ဖူးတယ်။
ဒေါ်မြရီ။ ။ ဟုတ်တယ်၊ သခင်ဗိုလ်ရယ်၊ စောဦးရယ်၊ ဘသိန်းရယ် သူတို့လေယာဉ်ပျက်ကျတာ။ တို့ အားလုံးလေ... စိတ်မကောင်းဖြစ်လိုက်ကြရတာ။ ကိုသိန်းဖေက ညနေဖက် ခေါ်ပြောတယ်။ ညစာစားပြီးစ ပန်းကန်တောင် မဆေးရသေးဘူး။ "မခင်စီရေ၊ သခင်ဗိုလ်တို့၊ အတာ(ဘသိန်း)တို့ မရှိတော့ဘူး" တဲ့။ အံ့အားသင့်ပြီး ဘာစကားမှ ပြန်ပြောလို့ မရတော့ဘူး။ သခင်ဗိုလ်က ကောလိပ်ကျောင်းကနေ သခင်ဖြစ်လာတာ။ စာရေးကောင်း။ စောဦးကလဲ ဘားမားရိုင်ဖယ်ကနေ အိန္ဒိယ ရောက်လာတာ။ အတာက ခေတ်ပညာတတ်။ ဘီအေ အင်္ဂလိပ်စာဂုဏ်ထူး။ ဗမာ့တပ်မတော်က တပ်မှူး။ ဇွဲ လုံ့လ ၀ိရိယ ရှိတယ်။ ဗမာ့တပ်မတော်က တပ်မှူးဆိုပေမယ့် နှိမ့်နှိမ့်ချချ နေတယ်။ လူချစ်လူခင် အင်မတန် ပေါတာ။ တို့အားလုံး ယူကျုံးမရ ဖြစ်ရတယ်။ အစ်ကိုကြီး ကိုသိန်းဖေက ချက်ချင်း အစည်းအဝေးခေါ်ပြီး သူတို့ကို အလေးပြုတယ်။ ချီးကျူးတယ်။ ၀မ်းနည်းစကားပြောတယ်။ ပြီးတော့ သူတို့အတွက် တိုင်းပြည်တာဝန်တွေ ပိုယူကြမယ်လို့ အဓိဌာန်ပြုကြတယ်။
မိုးဇံ။ ။ အဲဒီလို စွန့်စားခဲ့ကြတာအတွက် ဒေါ်ဒေါ်တို့ ဘာရလဲ။
ဒေါ်မြရီ။ ။ ဖက်ဆစ်တွေကို တော်လှန်မောင်းထုတ်နိုင်ခဲ့တယ်။ တို့လွတ်လပ်ရေးရတယ်။ ကိုယ်ရေးကိုယ်တာ မစဉ်းစားပါဘူးကွာ။ ကိုယ့်ဘာသာ လုပ်ကိုင် စားသောက်နေတာပဲ။
မိုးဇံ
၁၄၊ မတ်၊ ၂၀၀၁။
မာယာအယ်ဒီတာမှတ်ချက်။
*ကက်စဘီ= Civil Affairs Service (Burma) ရဲ့ အတိုကောက် CAS(b) ကို ဗမာလို ခေါ်တာ ဖြစ်တယ်။
**နဂါးနီစာအုပ်အသင်း (၁၉၃၇)၊ သခင်လူငယ် ခေတ်ပညာတတ်များ တည်ထောင်တယ်။ ဆိုရှယ်လစ် သဘောတရားများ၊ ကွန်မြူနစ်သဘောတရားများကို ပြည်သူလူထုထဲ ပျံ့နှံ့အောင် ဖြန့်ချိပေးတဲ့ စာအုပ်တိုက်အဖြစ် မြန်မာ့နိုင်ငံရေးသမိုင်းမှာ ထင်ရှားခဲ့တယ်။
Thursday, January 6, 2011
အနီရဲ့မှတ်ကျောက် နီအောင်မေသု
ရေးသူ - ဖိုးသံ (လူထု)
ကျနော်သိတဲ့ သူ့နာမည်က
နီအောင်မေသု
အသည်းနှလုံး တကယ်နီသူ
နီတာမှ သွေးလိုနီ
အရုဏ်ဦးလို
ကမ္ဘာ့ပြည်သူတွေရဲ့
အောင်လံနီလိုနီသူ။
သူဟာ
သွေးနီတဲ့အကြောင်းကို
မဟာရန်ကုန်က လမ်းမတွေနဲ့
သာယာဝတီနယ်က တောရောမြို့ကိုပါ
အင်းစိန်ထောင်၊ ကိုကိုးကျွန်း
သာယာဝတီထောင်၊ ရန်ကုန်ဆေးရုံကြီး
စမ်းသပ်လေရာမှာ
မီးတောက်မီးလျှံပမာ
ဖော်ပြခဲ့သူ။
ဒီလို ပုဂ္ဂိုလ်မျိုးကို
သိကျွမ်းခဲ့၊ ရဲဘော်ခေါ်ခွင့်ရခဲ့လို့
ငါ့ဘဝဟာ ဒုလ္လဘတပါးလို့
ကြေညာလိုက်မယ်။
သူနဲ့အတူ ရယ်မောခဲ့
အတူအံကြိတ်ခဲ့
အတူလွှဆွဲခဲ့
အင်တာနေရှင်နယ်သီချင်းကို
အတူဟစ်ဆိုခဲ့ရတဲ့အတွက်
ငါတသက်လုံး ဂုဏ်ယူ
တဘဝလုံး ကျေနပ်သွားမယ်။
ငါသူ့အတွက်
အမျှမဝေ၊ ခေါင်းလောင်းမထိုး
ကိုရန်ကျမ်းစာမဖတ်
ဘာကုသိုလ်မှ မလုပ်ဖြစ်ပေမယ့်
ညာလက်ရုံးကို မိုးသို့ချီ
သူ့ဂုဏ်တွေကို နှလုံးသွင်းကာ
“၅၃ရက်တိုက်ပွဲ” * တုန်းကလိုပဲ
တိုင်တည်လိုက်ပါတယ်
“ကျနော်ဘယ်တော့မှ
သစ္စာမဖောက်ပါ-ရဲဘော်ကြီး”
သူ့အကြောင်း
ကျမ်းတစောင်-ပေတဖွဲ့
ရေးနိုင်စွမ်းမရှိတဲ့ ငါ့အဖြစ်
အမှန်ပဲ ဝမ်းနည်းမိပါရဲ့
ဒါပေမဲ့ တကယ်လို့များ
တနေ့မှာ
ငါ့အကြောင်းရေးတဲ့သူရှိရင်
“နီအောင်မေသုရဲ့
တိုက်ဖော်တိုက်ဖက်ဖြစ်ဖူးတယ်”
ဆိုတဲ့စာတကြောင်း
ထည့်ဖြစ်အောင်ထည့်ပေးပါလို့
ကြိုတင်တောင်းပန်ချင်ပါတယ်။
ဖိုးသံ (လူထု)
(ဒီကဗျာကို သူကျဆုံးတဲ့သတင်းကြားပြီး တနာရီအတွင်းရေးချလိုက်တာပါ။)
*ကိုကိုးကျွန်းက ရဲဘော်ရှစ်ဦးကျဆုံးခဲ့တဲ့ ၅၃ရက်တိုက်ပွဲကိုဆိုလိုတာပါ။
Sunday, January 2, 2011
ဗမာ့အမျိုးသမီးအာဇာနည် အဒေါ် ဒေါ်မြရီ
ရေးသူ - ဖိုးသံ (လူထု)

လူတယောက်ကို တွေ့ကတည်းက ခင်သွားရတယ်ဆိုတဲ့ လူမျိုးတွေထဲမှာ အဒေါ်ဒေါ်မြရီဟာ ထိပ်ဆုံးက ပါပါတယ်။ ခင်ကြတာမှ သူ့ထက် အသက်ကြီးသူတွေ၊ သူ့အောက် အပုံကြီးငယ်သူတွေ၊ ရွယ်တူတွေ လူအရွယ်ရွယ် အစားစားက ချစ်ခင်ကြတာပါ။ အကြောင်းကတော့ သူက လူတွေကို အမြဲ တန်းတူလို သဘောထား၊ ရဲဘော်ရဲဘက်လို သဘောထားပြီး ရှင်းရှင်း ဘွင်းဘွင်းနဲ့ ဟက်ဟက်ပက်ပက်ကြီး ဆက်ဆံ ပြောဆိုလေ့ရှိလို့ပါ။ သူနဲ့ ရွယ်တူ (ရင်းနှီးသူ)၊ သူ့အောက် ငယ်သူတွေနဲ့ စကားပြောရင် သူက သူ့ကိုယ်သူ “ကိုယ်” လို့ ခေါ်ဝေါ် သုံးနှုန်းလေ့ရှိပါတယ်။ ‘အန်တီကလေ’၊ ‘အဒေါ်ကလေ’၊ ‘ငါကလေ’ ဆိုတဲ့ အသုံးအနှုန်းမျိုးကို သူ့ပစပ်က ကြားရခဲမျှပါ။ ကိုယ့်အောက် ငယ်သူတွေနဲ့ ပြောရင်တောင်မှ ဒီလိုပဲ ပြောပါတယ်။
လူထုတိုက်ကို တံခါးမရှိ ဓားမရှိ ၀င်ထွက် လည်ပတ်နေကြသူတွေထဲမှာ အင်မတန် အာဝိဇ္ဖာန်းရွှင်တဲ့၊ ဟာသမြောက်တဲ့ လူတချို့ရှိပါတယ်။ ဥပမာအားဖြင့် ဦးလေးကျားဘငြိမ်းပါ။ သူကိုယ်တိုင်က လူထုတိုက်သားလို ဖြစ်နေတဲ့ ဦးလေးကျားဘငြိမ်းဟာ အဖေ့စာပွဲ၊ အမေ့စာပွဲ၊ အယ်ဒီတာစာပွဲ စတာတွေကို တနေရာပြီးတနေရာ ပြောင်းထိုင်ပြီး သူ့မှာပါလာတဲ့ ပုံပြင်တွေ၊ ဟာသတွေကို ပြောပြလေ့ ရှိပါတယ်။ ဒါကြောင့် သူရောက်ရာ နေရာမှာ တဝေါဝေါ ရယ်သံတွေ အမြဲကြားရလေ့ ရှိပါတယ်။ သူ့လိုပဲ ပြောစမှတ်ပြုရတဲ့ နောက်တဦးကတော့ ဒေါ်မြရီပါ။ သူကတော့ စာပွဲတကာ သွားလေ့မရှိပါဘူး။ အမေ့ စာပွဲမှာပဲ အထိုင်များပါတယ်။ နောက် ကျနော်တို့ ညီအစ်ကို မောင်နှမတွေနဲ့ စကားပြောပါတယ်။ သူက ကျနော်တို့ကို သူငယ်ချင်းလို တရင်းတနှီးကြီး ပြောတာမျိုးကို ကျနော်တို့က သိပ်သဘောကျတာပါ။ တခါတလေ သူပြောတဲ့ ဟာသကို သဘောမပေါက်ပဲ ဖြစ်နေသူကိုသူက “ဟ- ဒီကောင်ကြီး အခုမှ ကြေးစည်ရိုက်နေပြီ” လို့ပြောတတ်ပါတယ်။ အဲဒါဘာကို ဆိုလိုတာလဲ နားမလည်လို့ မေးကြည့်တော့မှ သူက “ဘုန်းကြီးကျောင်းမှာ ကြေးစည်ရိုက်ရင် ခွေးတွေက အူတယ်လေ။ ဒါကြောင့် ဒီကောင်ကြီး အူနေတယ်၊ အူကြောင်ကြောင် ဖြစ်နေတယ်လို့ ကိုယ်ကပြောလိုက်တာ” လို့ ထပ်ရှင်းပြပါတယ်။ သူဟာသ၊ သူ့အာဝိဖ္ဖာန်းတွေက အဲဒီလိုမြန်မာဆံပြီး လူထုလက္ခဏာလည်း ဆောင်ပါတယ်။
အဒေါ်ဒေါ်မြရီရဲ့ လူပုံက ပိန်ပိန်ပါးပါး၊ မျက်နှာဝိုင်းဝိုင်း။ အဝေးကြည့်မျက်မှန် အမြဲတပ်ထားရပါတယ်း။ ဒါပေမဲ့သူ စကားပြောပုံက တကယ့်ကို ဒေါင်းတည်မောင်းတည်ပါ။ တခါတော့၊ ၁၉၅၉-၆၀ လောက်မှာ၊ မန္တလေးမှာ ပထစ အစည်းအဝေးကြီး ကျင်းပတုန်း ရောက်ချလာပါတယ်။ တည်မြဲနဲ့ သန့်ရှင်းကွဲပြီးလို့ ၁၉၆၀ခုနှစ် ရွေးကောက်ပွဲအတွက် အားစု နေကြချိန်၊ ဦးနု သိပ်ပေါ်ပြူလာဖြစ်နေချိန်ပါ။ ၈၅လမ်းနဲ့ ၃၂လမ်းထောင့်အနား၊ မလွန်ထဲက (နောင်မှာ ပထစအမတ် ဖြစ်လာတဲ့) မန်းညွန့်ဦးမောင်ကလေးရဲ့  တိုက်ပေါ်မှာ ဦးနု တည်းနေတော့ မန္တလေး ရွှေဆိုင်တန်းက အမျိုးသမီးတွေက “ဖေဖေနု”၊ “ဖေဖေနု” ဆိုပြီးဝတ်ကြီး ၀တ်ငယ်ပြုစုနေတာကို ကျနော်ကိုယ်တိုင် တွေ့ဖူးပါတယ်။ အဲဒီအချိန်မှာ ပထစက အင်အားပြတဲ့သဘောနဲ့ ဘုရားကြီး ၄၅တာမှာ မဏ္ဌပ်ကြီးထိုးပြီး အစည်းအဝေးကြီး ကျင်းပပါတယ်။ အဲဒီအစည်း အဝေးကြီးဆီကို ပထစထောက်ခံသူတွေက အိမ်တော်ရာဘုရားကနေ လမ်းလျှောက် ချီတက်ဆန္ဒပြကြပါတယ်။ ပထစအဖွဲ့ရဲ့ အထက်ဗမာပြည်မှာအင်အားပြတဲ့ပွဲကြီးမို့ ထဘီအ၀ါဝတ် အမျိုးသမီးတွေ အများကြီး ပါပါတယ်။ ဈေးချိုထဲက အမျိုးသမီးတွေ အများကြီးပါပါတယ်။ အဲဒီ လူတန်းကြီး လူထုတိုက်ရှေ့က ဖြတ်တော့ ကျနော်တို့က ထွက်ကြည့်ကြပါတယ်။ လူအုပ်ကြီးထဲက လက်သီးလက်မောင်းတန်းပြီး ကြွေးကြော်သံတိုင်နေတဲ့ အမျိုးသမီးတယောက်က ကျနော်တို့ ဘက်လှည့် ပြုံးပြတာ မြင်လိုက်ရလို့ ကျနော်တို့အားလုံး ကြောင်သွားပါတယ်။ နောက်- ကျနော့် အမေက “မမြရီပါလား” လို့ ဆိုလိုက်ပြီး အားလုံး တ၀ါးဝါးရီကြ ရပါတယ်။
ဖြစ်ပုံက အဲဒီတုန်းက လူတွေဟာ တည်မြဲ-ဖဆပလ နဲ့ ၁၉၅၈ ခုနှစ်မှာ အာဏာသိမ်းတဲ့ ဗိုလ်နေ၀င်း-ဗိုလ်မောင်မောင်- ဗိုလ်အောင်ကြီးစတဲ့ ဆိုရှယ်လစ်စစ်ဗိုလ်တွေကို သိပ်မုန်းကြတော့ ပထစကို ပုံပြီး ထောက်ခံကြ၊ မဲပေးကြပါတယ်။ ဒီလို အခါမှာ နိုင်ငံရေး အမြင်ကြွယ်တဲ့ အဒေါ်ဒေါ်မြရီရဲ့ နိုင်ငံရေးပိုးက ငြိမ်ငြိမ် မနေတော့ပါဘူး။ (ဆိုရှယ်လစ်ပါတီနဲ့ ဆိုရှယ် လစ်စစ်ဗိုလ်တွေရဲ့ဒဏ်ကို သူလည်း အသိဆုံး တယောက်မဟုတ်လား။) အဲဒီ အစည်းအဝေးကြီးက ပြန်လာတဲ့အခါမှာ ဒေါ်မြရီက အမေ့ကို ဒီလို ပြောပြပါတယ်။ “ဒေါ်အမာရယ်၊ သူတို့က ကြွေးကြော်သံမတိုင် - ဘာမတိုင်နဲ့ အသုဘပို့သလို ဆိတ်ဆိတ်ကြီး လျှောက်လာကြတာ၊ ကျမက ဒီလိုတော့ မဖြစ်ချေဘူးဆိုပြီး ကြွေးကြော်သံတိုင် လိုက်တော့ သူတို့က- ‘ဟာ သူက တိုင်တတ်တယ်ဟေ့၊ သူ့နောက်က လိုက်အော်ကြရအောင်’ ဆိုပြီး အားလုံး ပါလာကြတာ။ တိုင်တတ်တာပေါ့၊ ကွန်မြူနစ်ပဲ” ဆိုပြီး တဟားဟား ရီပါတော့တယ်။ စံကျတဲ့၊ သူ့ကိုသိသူတိုင်း မမေ့နိုင်တဲ့၊ ချစ်ရတဲ့ ရီသံကြီးပါ။ နားထောင်သူများလည်း လိုက်ရီရတဲ့ ရီသံပါ။
အဲဒီတုန်းက သူနဲ့အတူ လူထုတိုက်ကို လာလေ့ရှိသူက ကျောက်ဆည်ကပဲဖြစ်တဲ့ ဒေါ်သန်းသန်းပါ။ ဒေါ်သန်းသန်းဟာ ဗမာပြည်ကွန်မြူနစ်ပါတီ၊ မန္တလေးခရိုင်ကော်မတီ၊ ယူဂျီတာဝန်ခံအဖြစ် တောထဲကနေ လုပ်ကိုင်နေတုန်း အဖမ်းခံလိုက်ရ သူဖြစ်ပါတယ်။ ဒေါ်သန်းသန်းက ရှေ့နေဆိုပေမဲ့ စကားပြော အင်မတန်တိုးပြီး အဒေါ်ဒေါ်မြရီကတော့ အသံအင်မတန် အောင်ပါတယ်။ နောက်ပြီး သူ့ရဲ့ဟန်ဆောင်မှု ကင်းတဲ့ တ၀ါးဝါးရီသံကြီးကလည်း သူ့အပြောတွေထဲကနေ ခုန်-ခုန်ထွက် လာတတ်ပါတယ်။
အဒေါ်ဒေါ်မြရီကို သူ့ဖြတ်သန်းမှု အတွေ့အကြုံတွေ ပြောခိုင်းရင် သူကကြွားသံ၊ လက်မထောင်ဟန် လုံးဝမပါပဲ မပြောပလောက်တဲ့ ကိစ္စပါဆိုတဲ့ သဘောမျိုးလောက်နဲ့ စိတ်ရှည်လက်ရှည် ပြောပြတတ်ပါတယ်။ ဒါပေမဲ့ သူ့ထုံးစံအတိုင်း ဟာသတွေကတော့ ပါစမြဲပါ။ အဲဒီတုန်းက ကျနော်တို့ မောင်နှမတွေအတွက် သူဟာ ခေတ်သစ်သမိုင်းဖတ်စာအုပ်တအုပ် လိုဖြစ်နေတာကို မှတ်မိနေပါတယ်။ သူ မန္တလေးကိုရောက်ရင် မဖြစ်မနေ သွားဖြစ်အောင် သွားတဲ့ နောက်တနေရာက ကျနော့်ဦးလေး ဗိုလ်လှဖေနဲ့ အဒေါ် ဒေါ်တင်တင်တို့ရဲ့ အိမ်ပါ။ ကျနော့်ဦးလေးနဲ့ အဒေါ်က သူနဲ့ အပင်ပမ်းအဆင်းရဲ ခံဖော် ခံဖက်တွေဆိုတော့ အရင်းနှီးဆုံး အပေါင်း အဖော်စာရင်းထဲ ပါတာပေါ့။
ဒါက သူရီနိုင်တဲ့ အချိန်တွေပါ။ သူမရီနိုင်တဲ့ အချိန်တွေအကြောင်းကိုတော့ အထူးရေးဖို့ မလိုဘူးထင်ပါတယ်။ ဗမာ ပြည်မှာ တိုင်းပြည်လွတ်လပ်ရေးအတွက် အမျိုးသမီးတွေ လုံးပမ်းခဲ့ကြရာမှာ သူဟာ အပင်ပမ်း အဆင်းရဲ အခံခဲ့ဆုံး တယောက်ဖြစ်တယ်လို့ ပြောရင် မလွန်ဘူး ထင်ပါတယ်။ အနောက်ရိုးမကို ဖြတ်ပြီး အိန္ဒိယအထိ ခြေလျင်သွားတယ်ဆိုတာ အမျိုးသမီးတယောက်အဖို့ အဲဒီတုန်းကတော့ တွေးတောင် မတွေးဝံ့စရာပါ။ ဒီလိုနဲ့ လွတ်လပ်ရေးဟာ အလွယ်တကူရခဲ့တာ မဟုတ်ကြောင်း အကောင်းဆုံး သက်သေပြတဲ့ သာဓကတွေကို သူတို့လို အမျိုးကောင်းသား သမီးတွေက ပြသခဲ့ပါတယ်။ သူ့အကြောင်းရေးတဲ့ ဆောင်းပါးတပုဒ်ထဲမှာ သူဟာ ဗမာအမျိုးသမီးတွေထဲမှာ ပထမဆုံး ရေငုပ်သင်္ဘောစီးသူလို့ ရေးထားတာ ဖတ်ရပါတယ်။ ပြန်စဉ်းစားလိုက်တော့ သူဟာ ပထမဆုံး တင်မကပါဘူး၊ အခုအထိဆိုရင် ရေငုပ်သင်္ဘောစီးဖူးတဲ့ နောက်ဆုံးအမျိုးသမီးလည်း ဖြစ်မြဲ ဖြစ်နေပါတယ်။ တလောက လူထုကိုစိန်ဝင်းက ဗမာပြည်က အမျိုးသမီးတွေ လွတ်လပ်ရေးအတွက် စွန့်စွန့်စားစား လုပ်ကြတဲ့ အကြောင်းကိုဖတ်ရတော့ ကျနော်က အဒေါ်ဒေါ်မြရီကိုပဲ တန်းသတိရ မိပါတယ်။ တပါတည်းမှာ ဗမာပြည်လို မလွတ်မြောက်သေးတဲ့ နိုင်ငံတခုမှာ အမျိုးသမီးတွေဟာ တော်လှန်ရေး လုပ်ငန်းတွေ၊ နိုင်ငံရေးလုပ်ငန်းတွေမှာ အမျိုးသားတွေနဲ့ တန်းတူ ရင်ပေါင်တန်း လုပ်ရင် အမျိုးသမီး လွတ်လပ်မှုနဲ့ အမျိုးသားတွေရဲ့ အသိအမှတ်ပြု လေးစားမှုကို ခံစားရတယ် ဆိုတာကိုလည်း တရားတခုလိုပဲ သတိထားမိပါတယ်။
သူ့ခမျာ မြေပေါ်ကို ပြန်ရောက်တဲ့အခါမှာ သားနှစ်ယောက်နဲ့ မုဆိုးမအဖြစ်ဘ၀ အတွက် အတော်ကို လုံးပမ်းရပါတယ်။ ဒါပေမဲ့ သူတို့ ကျောက်ဆည်က ဗကပ တောပြန်တွေ စုပြီး ‘ပြည်လုံးနိုင်’ ဆိုတဲ့ အထက်တန်းကျောင်း တကျောင်းကိုဖွင့် လိုက်တော့မှ အလုပ်အကိုင်ရပြီး အဆင်ပြေသွားတာပါ။ သူတို့ရဲ့ ပြည်လုံးနိုင်ကျောင်းဟာ မဆလအစိုးရရဲ့ “ပြည်သူပိုင်” သိမ်းခြင်းကို ခံလိုက်ရပေမဲ့ ကျောက်ဆည်မြို့ရဲ့ သမိုင်းမှာ ချန်ထားလို့ မရတဲ့ ကိုယ်ပိုင်ကျောင်းတကျောင်း ဖြစ်သွားခဲ့ပါတယ်။ သူနဲ့အတူ ခရီးကြမ်းလျှောက်ခဲ့သူတွေထဲမှာ သမတဖြစ်သူဖြစ်၊ ၀န်ကြီးဖြစ်သူကဖြစ်၊ အထူးအရာရှိ ဖြစ်သူကဖြစ်၊ ကောင်းစားသူတွေ ရှိပေမဲ့ သူက သူ့နေရေး ထိုင်ရေးအတွက် တခါမှ အကူအညီ မတောင်းခဲ့ပါဘူး။ သူ့ရင်ထဲက ဖိနှိပ်တဲ့ အစိုးရတွေ အပေါ်နာကျည်းချက်ကို ဘာနဲ့မှ လဲမပစ်ခဲ့ပါဘူ။ ဒီလိုနဲ့ သူ့သား ကိုစိုးသိန်းကို ကျနော်နဲ့ တနှစ်ထဲ မန္တလေးတက္ကသိုလ်ကို ပို့နိုင်ခဲ့ပါတယ်။ နောက်မှာ ကျနော့် နှမ မတင်ဝင်းအောက် နည်းနည်းငယ်တဲ့ သူ့သမီးခင်စောဝင်းကိုလည်း တက္ကသိုလ်ပို့နိုင်ခဲ့ပါတယ်။
အဒေါ်ဒေါ်မြရီနဲ့ ပတ်သက်လို့ နောက်ဆုံး ပြောချင်တဲ့အချက်တခုကတော့ သူဟာ ပြည်သူလူထုကို ဘယ်တော့မှ သစ္စာမဖောက်ဘူးဆိုတာပါပဲ။ သူဟာ အခြေအနေကြောင့် လက်နက်ကိုင်တော်လှန်ရေးနဲ့ ကင်းကွာသွားခဲ့ပေမဲ့ မြေပေါ်လူထု လှုပ်ရှားမှုတွေထဲမှာ မပြတ်ပါဝင်ခဲ့ပါတယ်။ ၁၉၆၃ခုနှစ်မှာ ဗိုလ်နေ၀င်းက စေ့စပ်ဆွေးနွေးပွဲ ဆိုတာကို လုပ်တော့ မန္တလေးမှာ (၇)ခရိုင် ငြိမ်းချမ်းရေးဆန္ဒပြပွဲကြီး ၀ှဲချီးကျင်းပပါတယ်။ အဲဒီတုန်းက ကျနော်လည်း ပိုစတာရေး၊ ပိုစတာကပ် လိုက်ပါ နေရာကနေ ဆန္ဒပြပွဲကြီးမှာ ဂျစ်ကားအမိုးပေါ်ကနေ လိုက်လံလှုံ့ဆောင်တာလည်း လုပ်ခဲ့ပါတယ်။ ဒီလိုနဲ့ ကျောက်ဆည် စစ်ကြောင်းကို ဆီးကြိုတဲ့အခါမှာတော့ အဒေါ်ဒေါ်မြရီကို ကြွေးကြော်သံဟစ်နေတာ တွေ့ရပြန်ပါတယ်။
ကျနော် ထောင်ကထွက်လာတဲ့အခါမှာ သူဟာ ကျောက်ဆည်ကနေ တကူးတက လာတွေ့ပါတယ်။ မျက်ရည်တွေနဲ့ ကျနော့်ကို ပြုံးပြုံးကြီးကြည့်ရင်း “ငါ့ကောင်ကြီး” ဆိုပြီး ကျနော့်ရဲ့ ထောင်တွင်း ရပ်တည်ချက်များကို ချီးကျူးပါတယ်။ ဒီလိုနဲ့ ကျနော် လက်နက်ကိုင်တော်လှန်ရေးထဲ ရောက်နေတုန်း ရှစ်လေးလုံး အရေးအခင်းကြီး ပေါ်ထွက်လာတော့ အသက်၇၀ရှိပြီ ဖြစ်တဲ့ အဒေါ်ဒေါ်မြရီတယောက် ဆန္ဒပြပွဲတွေထဲမှာ ကြွေးကြော်သံတွေကို ထက်ထက်သန်သန် တိုင်နေပြန်ပြီလို့ ကြားရပါတယ်။
တကယ်တော့ သူဟာ ကွယ်လွန်တဲ့အထိ ပြည်သူ့ဘက်က ရပ်တည်ခဲ့သူ ဖြစ်ပါတယ်။ ဒါထက်မက သူ့မိခင်ပါတီ အပေါ်လည်း သစ္စာမပျက်ခဲ့သူ ဖြစ်ပါတယ်။ အဒေါ်ဒေါ်မြရီရဲ့ စိတ်ဓာတ်နဲ့ လုပ်ဟန်တွေဟာ ဗမာပြည်သားတွေ၊ အမျိုး သမီးတွေအတွက် တံခွန်သဖွယ် ထာဝရ တလူလူလွင့်ပျံနေမှာ ဖြစ်ပါတယ်။
ဖိုးသံ(လူထု)
Subscribe to:
Posts (Atom)