ပြည်သူချစ်သော စာပေ အနုပညာရှင်သို့ရေးသူ-ကိုသက်

ကိုအေးဝင်းရေးတဲ့ “လွမ်းနေတုန်းပဲ ဂျမ်းရယ်” ဆောင်းပါးကို ဖတ်ဖြစ်ပါတယ်။ လွမ်းစရာကောင်းတယ်။ ဆရာ တင်မိုးနဲ့ပတ်သက်လို့ အမှတ်ရစရာတွေ တရေးရေးပေါ်လာရတယ်။

ကျနော်ကဗျာရေးတဲ့အခါ ဆရာ့ကို အထူးသတိရတယ်။ ဆရာ့ကဗျာရေးဟန်နဲ့ကဗျာထဲမှာ ဖန်တီးထည့်သွင်းထား တဲ့ အတွေးအမြင်၊ အနုပညာ၊ နောက်ခံ၊ သဘာဝ၊ ရိုးသားမှုစတဲ့ အဆီအနှစ်တွေကို ကျနော်ကြိုက်လို့ပါ။ ကဗျာ ရေးတဲ့ အတတ်ပညာကို သင်တန်းတခုဖွင့်ပြီး ဆရာ့ထံမှာ မတက်ခဲ့သော်လဲ နေ့စဉ်လိုလို ဆရာရေးတဲ့ကဗျာတွေ ကိုဖတ်ရင်း ခေတ်ဟောင်း ခေတ်သစ် ရှင်လူရဟန်း ကဗျာစာဆိုတွေအကြောင်း၊ စာပေအကြောင်းတွေ ပြောခွင့်ရ တဲ့ အခြေအနေတခုဟာ နေ့စဉ်သင်တန်းတက်နေသလိုပဲ။


တခါက ကိုခင်မောင်ရွှေ+မတော်တို့အိမ်မှာ ကျနော်နဲ့ ကိုလတ် ကဗျာအကြောင်းဆွေးနွေးရင်း ငြင်းခုံနေကြတယ်။ ဆရာတင်မိုးက ကျနော်တို့နဲ့မျက်နှာချင်းဆိုင်ခုံမှာထိုင်လို့ အကြမ်းတခွက် စားပွဲပေါ်တင်ပြီး စာဖတ်နေတယ်။ ငြင်း ဖြစ်တဲ့အကြောင်းက ကဗျာတွေရဲ့ပုံစံခွက် (စပ်နည်း) အကြောင်းဖြစ်ပါတယ်။ အဖြေမထွက်နိုင်တဲ့ ငြင်းဆိုချက်များ ကို ဆရာက ၀င်ရောက်ဖြေရှင်းပေးသွားတယ်။ အဖြေရလို့ အဆင်ပြေသွားပါတယ်။

ဒီခေတ်မှာ စပ်နည်း သိပ်မရှိတော့ကြောင်းနဲ့ကာရန်မျှကိုသာအသုံးပြု၍ ကဗျာကို စပ်ဆိုကြကြောင်း၊ စပ်နည်းတွေ ထက် အတွေးအမြင်၊ ရသ၊ သဘာဝကိုသာ အသုံးပြုတာများကြောင်း၊ တချို့ဆို စကားပြေလိုဖြစ်နေကြောင်း၊ ဘာ အတွေးအမြင်ကိုမျှ စဉ်းစားလို့မရနိုင်၊ နားမလည်နိုင်တဲ့ကဗျာတွေ မဂ္ဂဇင်းတွေမှာ ပါနေကြောင်း ဆရာရှင်းပြပေး လို့ သိရပါတယ်။ ခဏမျှရှင်းပြသော်လဲ ကျနော်တို့အတွက်တော့ တန်ဖိုးဖြတ်လို့ မရပါ။ ကဗျာနဲ့ပတ်သက်လို့ ယုံ ကြည်မှု၊ ခိုင်မာမှုအင်အားတွေ ရရှိလာတယ်။

“ကဗျာ စပ်တတ်ပြီ၊ ပဉ္ဇင်းလောင်းတွေ ရဟန်းဖြစ်အောင် သိမ်ဝင်ရသလို ကဗျာနဲ့ပတ်သက်တဲ့ ယုံကြည်မှု ခိုင်မာ မှုတွေရသွားပြီဖြစ်လို့ ဒါကဗျာသိမ်ဝင်တာပဲ။ ကဗျာစပ်တော့”တဲ့ ဆရာတင်မိုးက ကျနော်တို့ကို အဲသည်ညနေခင်း မှာပဲ တိုက်တွန်းလာပါတယ်။ ကျနော်နဲ့ ကိုလတ်ကလည်း ယုံကြည်မှုတွေနဲ့ပေါ့။

စကားဝိုင်းတခုမှာ ကဗျာ့ရေစီးကြောင်းကို ဆရာက ကောက်ကြောင်းဖော်ပြဖူးတယ်။ အထူးသဖြင့် မောင်သာနိုးရဲ့ ထင်းရူးပင်ရိပ် စာအုပ်နဲ့ ခေတ်လူငယ်တွေရဲ့ ကဗျာ့ရေစီးကြောင်းကို ဆရာက ပြောပြတယ်။

“မောင်သာနိုး ကဗျာတွေကို ဘာသာပြန်တာ မဖြစ် ဖြစ်အောင်ပြန်ရတာမို့ စကားတွေက မချောမွေ့ဘူး။ ဒါကို လူငယ်တွေက တမင်ထွင်ရေးတာထင်ပြီး ကဗျာရေးတဲ့အခါ မောင်သာနိုးလို အတုယူပြီး လိုက်ရေးကြတယ်။ ကဗျာဆိုရင် ခလုတုတုရေးမှ ကဗျာနဲ့တူတာလို့ လူငယ်တွေထင်လာကြတယ်။ အခုတော့ အဲသည်ရေစီးကြောင်း ကို တားဖို့မလွယ်ကူတော့ဘူး။ နားလည်ရခက်တဲ့ ကဗျာတွေရေးလာကြတယ်။ ကဗျာစာသားတွေထဲမှာ အင်္ဂလိပ် စကားလုံးတွေကို ပြစားတဲ့အနေနဲ့ တွင်တွင်သုံးလာကြတယ်။”

အနောက်ကမ္ဘာက ဂန္ထ၀င်ကဗျာတွေကို ဆရာမောင်သာနိုး ဘာသာပြန်ပေးလို့ လူငယ်တွေ ဖတ်ခွင့်ရ နားလည်ခွင့် ရတဲ့ အကြောင်းကိုလည်း ဆရာတင်မိုးက ထည့်သွင်းပြောပြပါတယ်။ သူ့ခေတ်နဲ့သူ တိုးတက်ပြောင်းလဲမှုတွေကို ဆရာက လက်ခံသဘောကျပါတယ်။ ခေတ်ကို အကြောင်းပြုပြီး ကဗျာတပုဒ်ကို ဖတ်လို့ဆုံးတာနဲ့ ဘာမှန်းမသိရ တာမျိုးတွေကို ဆရာတင်မိုးက သိပ်ကြိုက်ဟန်မတူဘူး။

တခါက မဂ္ဂဇင်းတအုပ်မှာပါတဲ့ ကဗျာတွေကို ဆရာနဲ့ကျနော် အချင်းချင်း ဝေဖန်ကြတယ်။ ကဗျာတွေကို အစအ ဆုံးဖတ်တယ်။ စာပိုဒ်တခုစီမှာပါတဲ့ ဆိုလိုရင်းအဓိပ္ပါယ်ကို မှတ်သားတယ်။ စာပိုဒ်တခုနဲ့တခု အဓိပ္ပါယ်တွေကို ဆ က်စပ်ယူတယ်။ ကဗျာဆုံးသွားတော့ တပုဒ်လုံးရဲ့ဆိုလိုရင်းကို အဓိပ္ပါယ်ဖော်တယ်။ ဆရာက မေးတယ် “ဘယ်လို သဘောပေါက်လဲ၊ နားလည်လား”တဲ့။ ကျနော်က “ကဗျာဆုံးတော့ လုံးဝနားမလည်တော့ဘူး ဆရာ”လို့ပြောတော့ သူလည်း နားမလည်ကြောင်း ပြောတယ်။ ဘာကြောင့်ကဗျာတွေကို နားမလည်အောင် ရေးသလဲ မသိတော့ပါ။

အမှတ်ရစရာတွေ ပြန်ပြောရင် သံယောဇဉ်အမျှင်တန်းတဲ့ ဇာတ်လမ်းတွေက များစွာရှိသေးပါတယ်။ မကြာသေးမီ ရက်ပိုင်းက မိတ်ဆွေများဖြစ်တဲ့ မီးရထားက ဦးတင်မောင်ဦး+ဒေါ်သင်းသင်းဆွေတို့နဲ့အတူ နေ့လည်စာကို ထမင်း ဆိုင်တဆိုင်မှာ အတူသွားစားဖြစ်ကြပါတယ်။ ဆိုင်က Lower Azusa နဲ့ Santa Anita ဒေါင့်မှာရှိတဲ့ ၀င်းထဲမှာဖြစ် တယ်။ ဈေးချိုတယ်။ အဆင်ပြေပြေလက်ရာတွေဖြစ်လို့ လူကြိုက်များတဲ့ ထမင်းဆိုင်ပါ။

တိုက်တိုက်ဆိုင်ဆိုင်ပဲ ဒီဆိုင်ကို ကိုဝင်းညွန့်တို့နဲ့အတူ သူ လာစားဖူးကြောင်း၊ ဆရာတင်မိုးရှိစဉ်က မကြာခဏ ဒီ ဆိုင်မှာ ကိုဝင်းညွန့်တို့တွေ လာစားဖြစ်တဲ့အကြောင်း၊ သူတို့မိသားစုလည်း လမ်းကြုံတိုင်း ဒီဆိုင်မှာ လာစားတာ ဆိုင်ပိတ်ထားတာနဲ့ ဆုံနေကြောင်း ဦးတင်မောင်ဦးက ပြောလာတယ်။

ဆိုင်ထဲမှာ နေရာယူပြီးနောက် ဆိုင်ဝန်ထမ်း မိန်းကလေးတဦးက ဘာစားမလဲလို့မေးရင်း duck (half), deep fried fish (whole fish) စတာတွေကို မမေးဘဲ သူ့ဘာသာပြောလာတယ်။ အရွက်ကြော်နဲ့ ၀က်နံရိုးကြော်လည်း ပါတယ်။ “ဦးကြီးတွေနဲ့ ဒီဆိုင်မှာ လာစားတုန်းက ဒီအစားအစာတွေကိုပဲ မှာနေကြမဟုတ်လား”တဲ့ ကျနော့်ကို ကြည့်ပြီး မေးလာတယ်။ ဦးတင်မောင်ဦးက အံ့သြနေတယ်။

မှန်ပါတယ်။ ဆရာတင်မိုး၊ ဦးလေးကြီး၊ ကိုကျော်ဝဏ္ဏနဲ့ ချိုသင်း၊ ကိုမိုး၊ ကိုဝင်းညွန့်၊ ဒေါက်တာကျော်ဝင်းတို့နဲ့အတူ ဒီဆိုင်ကို အကြိမ်ပေါင်းများစွာ ကျနော်ရောက်ဖူးတယ်။ ရောက်တိုင်းလည်း မရိုးနိုင်တဲ့ ဘဲကင်၊ ငါးကြော် စသည် များကို ထပ်တလဲလဲ မှာနေကြပဲလေ။ မဆိုင်တဲ့ ဘေးလူတဦးကတောင် ဆရာကြီးနဲ့ကျနော်တို့ကို သတိရနေ သေးတယ်ဆိုရင် ဆရာတင်မိုးနဲ့ သက်ဆိုင်သူ သားသမီး၊ ဆွေမျိုး၊ မိတ်ဆွေ၊ တပည့်တွေက ဘယ်လောက်များ သတိရနေကြမလဲဆိုတာ အတွေးရောက်မိတယ်။

မမေ့နိုင်သေးတဲ့ အမှတ်ရစရာတခုက ဘော်စတန်မှာပါ။ နယူးရောက်မှာလုပ်တဲ့ ဆရာ့ဆုပေးပွဲကို တက်ပြီးတဲ့နော က်မှာ အိမ်မဲဆရာတော်နဲ့အတူ ဘော်စတန်သို့ အလည်သွားဖို့ပြင်တယ်။ သူတို့လည်း အတူလိုက်လို့ရလားတဲ့ ဆ ရာတင်မိုးက မေးလာတယ်။ “ဆရာကြီးလိုက်ရင် ၀မ်းသာတယ်။ ဘုန်းကြီးကျောင်းမှာပဲ တည်းပါ”တဲ့ အိမ်မဲဆရာ တော်က ပြောလာတယ်။ ဆရာကြီး၊ ဆရာစွမ်း၊ မိုးမိုးနှင်း မိသားစုတို့နဲ့အတူ ကျနော် ဘော်စတန်သို့ အလည်တ ခေါက် ရောက်ခဲ့ပါတယ်။ ဟိုမှာက ဆရာ့သားတပည့် ကျောင်းဆရာ ကိုနေ၀င်းအောင်လည်းရှိတယ်။

ဘော်စတန်ရဲ့ ဆောင်းက ကျနော်တို့အားလုံးကို မညှာတာဘူး။ ခိုက်ခိုက်တုန်အောင် အေးစေတယ်။ ဆောင်းနှင်း တွေရဲ့ အအေးကြောင့် သစ်ရွက်တွေကြွေလို့ နွေလို့ထင်ရတယ်။ သစ်ပင်တွေက ရိုးတန်ကျဲကျဲနဲ့။ အောက်ခြေမှာ တော့ ရေက ခဲနေတယ်။ လမ်းတွေပေါ်မှာ ရေကရွှဲရွှဲစိုနေတယ်။

ကားကြီးတစီးငှါးပြီး တမြို့လုံး နေရာအနှံ့နီးပါး လိုက်လည်ကြတယ်။ တချို့နေရာတွေကို ရထားနဲ့သွားကြတယ်။ အိမ်မဲဆရာတော်နဲ့ ကိုနေ၀င်းအောင်တို့က လမ်းပြပေါ့။ လူစုံတက်စုံတဲ့ ကားပေါ်မှာလည်း ဟိုအကြောင်း သည်အ
ကြောင်းလေးတွေပြောကြလို့ တ၀ါးဝါး တဟားဟားနဲ့ ပျော်စရာပါ။
ဆရာ့မြေးမလေးများဖြစ်တဲ့ မာယာနဲ့ စန္ဒရာတို့က နှပ်တွဲလောင်းနဲ့ တမြို့လုံးကို မငြီးမငြူ အလည်လိုက်တယ်။ ဆ ရာစွမ်းက ဆရာဂျမ်းပြောသမျှကို နားထောင်ပေးနေရတယ်။ ကြားဖူးပြီးသားပေမဲ့ နားမထောင်ရင် အဟောက်ခံရ မှာမို့ ကိုနေ၀င်အောင်လည်း နားထောင်ရတဲ့ထဲမှာ အစစ်ပါတယ်။

အိမ်မဲဆရာတော်နဲ့ ဆရာတင်မိုးတို့က အကြောင်းအရာတခုစီကို အလှည့်ကြ တင်သွင်းနေတဲ့ ၀ိုင်းခေါင်းဆောင် ကြီးများဖြစ်တယ်။ ဆရာ့သားမက် ကာလ်ရယ်က တုဏှီဘာဝေ ဆိတ်ဆိတ်နေတယ်။ ကျနော်တို့ ဗမာလိုပြောနေ သမျှကို သူ့ခမျာ နားမှ မလည်နိုင်တာ၊ ကလေးထိန်းရင်း လည်ပတ်ရင်းနဲ့ လိုသမျှကို ဆောင်ရွက်ကူညီပေးတယ်။

နောက်ဆုံးရက် ဘော်စတန်က အထွက်၊ မီးရတားဘူတာရုံကို ဖြတ်တော့ လူတယောက်က လက်တော့ပ်ကွန်ပြူ တာကို ခရီးသွားများအား ဘူတာရုံထဲမှာ ရောင်းနေတယ်။ ကွန်ပြူတာတလုံးကို တန်ဖိုးကနှစ်ရာမို့ ဈေးကသိပ်ချို နေတယ်။ ဒါကို မိုးမိုးနှင်းက သိပ်ဘောကျနေတယ်။

ဟုတ်တာပေါ့။ ဆိုင်ကြီးတွေမှာ ထောင်ကျော်တဲ့ဟာ ဒီမှာက နှစ်ရာထဲဆိုတော့ ဈေးက သိပ်ကွာနေတယ်။ တခုပဲ ပြောစရာရှိတယ်။ အဲဒါက လူကို ကြည့်ပြီး မယုံရတာနဲ့ အားလုံးက မ၀ယ်ဖို့ ၀ိုင်းတားပြီး ဆက်လျှောက်သွားကြတ ယ်။ နောက်လှည့်ကြည့်တော့ မိုးမိုးနှင်း ပါမလာဘူး။ ကွန်ပြူတာဇောက မပြတ်နိုင်သေးဘူးလေ။ အားလုံးပဲ ပြန်လှ ည့်ပြီး မိုးမိုးနှင်းကို မ၀ယ်ဖို့ပြောပြီး ပြန်ခေါ်ရတယ်။

ဈေးရောင်းတဲ့ ငနဲက မိုးမိုးနှင်း သိပ်လိုချင်ကြောင်း သိနေတာမို့ အမျိုးမျိုးလှည့်ရောင်းနေတယ်။ မသင်္ကာစရာတခု က ရှိနေတယ်။ ကွန်ပြူတာကို ဒေါ်လာနှစ်ရာနဲ့ရောင်းတယ်၊ ဒါပေမဲ့ ဖွင့်ကြည့်ခွင့်မရှိဘူးလို့ ဒီငနဲက ပြောတယ်။ ဒါ က မရိုးသားဘူးဆိုတာ ထင်ရှားတယ်။ ဒါကြောင့် အားလုံးက တားတယ်။ မိုးမိုးနှင်းက မလျှော့ဘူး။ ၀ယ်ချင်နေပြန် တယ်။ ရောင်းတဲ့ငနဲကလည်း ၀ယ်သူရဲ့ဆန္ဒအဓိက၊ မင်းတို့နဲ့ မဆိုင်ဘူးဆိုတဲ့ အပြောမျိုးတွေ ပြောလာတယ်။

ဆရာတင်မိုးနဲ့ ဆရာစွမ်းက စကားတပြောပြောနဲ့ မြေးကလေးတွေတွဲပြီး ရှေ့မှာ ရောက်နှင့်နေပြီ။ ခင်ပွန်းဖြစ်သူ ကာလ်ရယ်ကလည်း မိုးမိုးနှင်း ဘာဖြစ်ချင်လဲ၊ ဖြစ်ချင်တာကို လုပ်ပေးမယ်ဆိုတဲ့ သဘော၊ ပိုက်ဆံပေးဖို့ ပြင်နေပြီ၊ ကျနော်တို့မှာတော့ ကိုယ့်လူ အညာခံရမယ်ဆိုတာ သိနေလို့ အသဲယားနေပြီ။ မိတ်ဆွေ ဦးဇင်းတပါး မိန့်သလိုပဲ၊ မန္တလေးလို နေရာမျိုးမှာသာဆို ညာရောင်းတဲ့ ဒီငနဲကို ဆွဲတီးလိုက်ပြီ။

နောက်ဆုံးမှာ ကျနော်တို့ရဲ့ ခရီးသွားခေါင်းဆောင် အိမ်မဲဆရာတော် လက်ထဲကို ဒီကိစ္စအပ်လိုက်တယ်။ အိမ်မဲဆ ရာတော်က ရောင်းတဲ့ငနဲကို သွားဟောက်ပါလေရော။ ရောင်းတဲ့ငနဲက မင်းနဲ့ဘာဆိုင်လို့လဲတဲ့ အိမ်မဲဆရာတော် ကို ပြန်ပြောလာတယ်။ ဆရာတော်က ငါက ဒီအဖွဲ့ခေါင်းဆောင်၊ တခုခုဖြစ်ရင် ငါ့မှာ တာဝန်ရှိတယ်။ မင်းက အာမ ခံချက်မရှိတဲ့ ပစ္စည်းတခုကို ရိုးသားသူတွေပေါ်မှာ လိမ်ရောင်းဖို့ ကြိုးစားနေတာပဲ။ ငါ ရဲခေါ်မယ် ဘာမယ်လို့ ဆို တော့မှ ကိစ္စက ပြတ်သွားတယ်။

ဒါကို ဆရာတင်မိုး သိတော့ ...

“သမီးရယ် ... ကလေးတွေးပဲ တွေးပါအုံး။ ကြည့်ခွင့် မရှိတဲ့ပစ္စည်း၊ အထဲမှာ ကောင်းလားဆိုလား ကိုယ်မသိရတဲ့ ပစ္စည်းကို ၀ယ်မယ်ဆိုတော့ အညာခံရတော့မယ်။ ဆရာတော်ပါလာတာ ကံကောင်းပေလို့ပေါ့”တဲ့ ပြောရှာတယ်။

ဆောင်းပါးလေး အဆုံးမသတ်မီ နောက်ထပ်ဇာတ်လမ်းလေးတပုဒ် ထည့်ပါရစေအုံး။ တနေ့မှာ ဆရာက တယော အကြောင်းပြောလာတယ်။ အင်ဒီယာနာမှာ တယော ဘယ်လိုထိုးကြောင်းပေါ့လေ။ ဒါနဲ့ ကျနော်လဲ လာဆရာကြီး သွားမယ်လို့ ပြောပြီး ဆရာကြီးကို တယောဆိုင် ခေါ်သွားလိုက်တယ်။
Monterey Park မှာရှိတဲ့ တယောဆိုင်မှာ တယောအဟောင်းလေးတလက်ကို ဈေးချိုချိုနဲ့ ၀ယ်ခဲ့တယ်။ ဒေါ်လာ ခုနစ်ဆယ် ကျော်ကျော်လောက်ပဲ ပေးရပါတယ်။ တယောဆိုင်က တရုတ်က တယောကြိုးကိုတောင် ညှိပေးလိုက် သေးတယ်။ “ခင်ဗျားနဲ့ တယောနဲ့ သိပ်လိုက်တယ်”လို့ ဆရာကြီးကို လောကွတ်လုပ် ပြောလိုက်သေးတယ်။

အားတဲ့အခါ အိမ်မှာ၊ ဘုန်းကြီးကျောင်းမှာ ဆရာ တယောထိုးတယ်။ ဆရာ တီးတဲ့သီချင်းတွေက ဆရာ့အကြိုက် ဖြစ်တဲ့ ဂီတနက်သန် ကိုစောငြိမ်းနဲ့ ဆရာမြို့မငြိမ်း သီချင်းတွေပဲများပါတယ်။ ကိုအေးဝင်းနဲ့ကိုမောင်မောင်အောင် တို့က ဆရာတယောထိုးတဲ့ ဓာတ်ပုံကို ရိုက်ယူသွားတယ်။ ဆရာရေးတဲ့ “အဖိုးကြီး”ကဗျာနဲ့တွဲပြီး အဲသည်ဓာတ် ပုံကို ပန်းချီကားအဖြစ်ဖန်တီးကာ ဆရာ့မွေးနေ့လက်ဆောင်အဖြစ် ပေးခဲ့ကြတယ်။

တယောပြီးတော့ စန္ဒယားအလှည့်ပါ။ ဒီကြားထဲမှာ ပန်းချီဆရာ၊ ကဗျာဆရာ ကိုအောင်တိတ် မြန်မာပြည်ပြန်တုန်း လက်ဆောင်ယူလာတဲ့ ပိတောက်သားနဲ့ ထွင်းထုထားတဲ့ မယ်ဒိုလင်က ရှိသေးတယ်။ စန္ဒယားတီးဖို့ ကလေးတွေ ကစားတဲ့ ကီးဘုတ်ကလေးကို ဆယ့်ငါးဒေါ်လာနဲ့ ဆရာဝယ်လိုက်တယ်။

“ဆရာရယ် ... ကီးဘုတ်လေး တခုမှ ဒေါ်လာတရာတောင် မရှိဘူး၊ ဖရိုင်းတို့ ဘက်စ်ဘိုင်တို့မှာ သွားဝယ်လိုက်ပါ” လို့ ကျနော်က တိုက်တွန်းတော့ ချိုသင်း+ ကိုကျော်ဝဏ္ဏတို့နဲ့အတူ ဖရိုင်းသွားပြီး ကီးဘုတ်ဝယ်ခဲ့တယ်။

အိမ်ပြန်ရောက်တော့ ကီးဘုတ်လေး တပ်ဆင်ပြီး အဆိုကျော်ကြီး မာမာအေးရဲ့ “မေ့ကွက်ကိုရှာ” သီချင်းကို စတီး ကြတယ်။ ဆရာရော ကျနော်ပါ ကီးဘုတ် တီးတတ်သူတွေ မဟုတ်လေတော့ တချောင်းထိုးနဲ့ အသံတွေ စမ်းသပ် တီးကြရတယ်။ မီးကျိုးမောင်းပျက် ကျနော်တို့တီးကွက်တွေကို မာမာအေးသာ မြင်ရင် “ငါ့သီချင်းတော့ ပျက်ပါပြီ” ဆိုပြီး ထောင်ငိုလောက်တယ်။ ဒါပေမဲ့ ထူးခြားတာက သီးချင်းတော်တော်များများရဲ့ သံစဉ်တွေကို ဆရာတင်မိုးက ပါးစပ်နဲ့ တီးကွက်ဖော်တတ်ခြင်းပါပဲဗျား။ ဆရာ့ဖခင်က ဂီတအနုပညာရှင်ကြီးတဦးဖြစ်လို့ ထင်ပါတယ်။

ဆရာ့အိမ်မှာ အနုပညာပစ္စည်း အတော်များများရှိနေတယ်။ တယော၊ မယ်ဒိုလင်၊ စန္ဒယားကီးဘုတ် စတာတွေဖြစ် ပါတယ်။ အနုပညာနဲ့ အနုပညာပစ္စည်းလေးတွေကို ဆရာမြတ်နိုးတတ်မှန်းသိလို့ ကျနော် ကိုရီးယားသွားတုန်းက တောင် ဆရာ့အတွက် ဘာဂျာလေးတခု ၀ယ်ခဲ့သေးတယ်။ ဆရာ့ဈာပနမှာ ဆရာစွမ်း မသွားတယ်။ ဆရာစွမ်းက လည်း ဒါတွေကို ဆရာတင်မိုးလိုပဲ မြတ်နိုးတတ်ပါတယ်။

ကီးဘုတ်လေး ၀ယ်ပြီးအပြန်မှာ ဆရာ့သမီး မိုးချိုသင်းက ပြုံးစိစိနဲ့မို့ ကျနော်က မေးလိုက်တယ်။ “ချိုသင်း ... နင် ဘာပြုံးတာလဲ”ဆိုတော့ “အင်းစိန် အိမ်မှာ အခုလိုပဲ အဖေတီးချင်လို့ စုထားတဲ့အနုပညာပစ္စည်းတွေ အများကြီးပဲ” တဲ့ ပြောပြတယ်။ အခု အမေရိကရှိ အိမ်မှာလည်း တဖြည်းဖြည်းများလာပြီ၊ နောက်ထပ် အဖေ ဘာတွေ ၀ယ်အုံး မယ် မသိသေးဘူးဆိုတဲ့ သဘောနဲ့ ဖခင်ကို သဘောကျနေပုံရပါတယ်။ ချိုသင်းနဲ့ ကိုကျော်ဝဏ္ဏလည်း သူ့အဖေ ပျော်ရွှင်ဖို့ စိတ်ချမ်းသာဖို့ကို အလွန်ဦးစားပေးကြပါတယ်။

စိန်ချစ်တီးရဲ့သား၊ နိုင်ငံတော်ဆိုင်းဝိုင်းခေါင်းဆောင် ကိုကျော်ကျော်နိုင်နဲ့ပါ ခင်မင်ပေါင်းသင်းနေပြီဆိုတော့ ဆရာဒီ တခါဝယ်မဲ့ အနုပညာပစ္စည်းဟာ ဗုံတို ဗုံရှည်တွေနဲ့ မြန်မာ့ဆိုင်းဝိုင်းဖြစ်ဖို့များတယ်။ အင်း ... ဆရာ့အိမ်ကလည်း ကျယ်တာမို့ ချိုသင်းတို့ဇနီးမောင်နှံတော့ ဒီပစ္စည်းတွေ နေရာတကျ ထားဖို့သာ ပြင်ပေရော့။

ဆရာတင်မိုးရဲ့ နောက်ဆုံးအချိန်တွေဟာ ကျနော်တို့နဲ့အတူရှိနေတာများတယ်။ ရေးစရာအကြောင်းအရာတွေက များစွာပါ။ ကျန်တာတွေ နောက်တော့ ရေးကြသေးတာပေါ့။ ဤဆောင်းပါးဖြင့် ပြည်သူချစ်သော စာပေ၊ အနုပညာ ရှင် ဆရာကြီးဦးတင်မိုးအား လေးစားဂါရ၀ပြုလိုက်ပါတယ်။