ဒဂုန်တာရာစာ ဒဂုန်တာရာစကား။ စုဆောင်းတင်ပြသူ - အောင်မြင့်ဦး(လူထုစာကြည့်တိုက်)

ဒဂုန်တာရာစာ ဒဂုန်တာရာစကား။

စုဆောင်းတင်ပြသူ - အောင်မြင့်ဦး(လူထုစာကြည့်တိုက်)

အမှာစာ

ဆရာအောင်မြင့်ဦး (လူထုစာကြည့်တိုက်) အပတ်တကုတ် စုဆောင်း ထုတ်ဝေလိုက်သော 'ဒဂုန်တာရာစာ၊ ဒဂုန်တာရာစကား' စာစုကို တစိမ့်စိမ့် ဖတ်ရှုမိပေသည်။ အထပ်ထပ်လည်း ပြန်လည် ဖတ်ရှုမိသည်။ ဤသို့ ဖတ်ရှုမိမှလည်း ဆရာဒဂုန်တာရာ၏ နိုင်ငံရေးဒဿန အစူးအရှ အနက်အရှိုင်းကို (ပိုမို) ဆဝါးမိပေတော့သည်။

ဆရာတာရာသည် မျိုးနွယ်အရ မြေပိုင်ရှင် လယ်ပိုင်ရှင် မျိုးရိုးမှ ဆင်းသက်လာသူ ဖြစ်သည်။ ခေတ်ပညာတတ်တဦး၊ ဘန်ကောက်ပုဆိုး ဝတ်ဆင်တတ်ပြီး နုနုရွရွ ကဗျာအလှများကို တဖက်ကမ်းခတ်အောင် ဖွဲ့သီနိုင်သူ၊ ဆေးပန်းချီ စုတ်ချယ်သရာ၌လည်း ပျော်မွေ့သူ၊ နို့နှစ်ရောင် စန္ဒရားခလုတ်လေးများ ပေါ်၌ သူ၏ အနုပညာ လက်ချောင်းလေးများက ပြေးလွှား ဆော့ကစား တီးခတ်တတ်သေးသူ ဖြစ်ပေသည်။ စွယ်စုံအနုပညာကျော် ဟုဆိုက မလွန်တန်ရာပေ။

ခေတ်သစ် မြန်မာစာပေလောကနှင့် နိုင်ငံရေးနယ်ပယ်တွင် ဦးဆောင်မှုပေးခဲ့သော စာဆိုကြီး သုံးဦး ရှိ၏။ ဆရာကြီးသခင်ကိုယ်တော်မှိုင်း၊ ဆရာဒဂုန်တာရာနှင့် ဆရာဗန်းမော်တင်အောင်တို့ ဖြစ်သည်။

အနုအရွ အလှကဗျာ ဖွဲ့သီပြီး၊ ဂီတပန်းချီ အနုအထွေးများကို လိုက်စားသဖြင့် ဆရာတာရာသည် အနုအလှတွင်သာ စီးမျောနေသူဟု မှတ်ယူမိပါက စွဲမှတ်သူအပေါ် အပြစ်မမြင်သာပါပေ။

ဆရာတာရာသည် 'အနုပညာသည် အနုပညာအတွက်' ဆိုသည့် အတွေးအယူသမား တဦး တော့ မဟုတ်ချေ။ ဆရာတာရာသည် စာပေအနုပညာနှင့် နိုင်ငံရေးတိုက်ပွဲအနုပညာကို မှန်ကန်စွာ ပေါင်းစပ်နိုင်သူ ဖြစ်ပေသည်။ မြန်မာစာပေသမိုင်း၌ စာပေသစ် သဘောတရားမှတ်တိုင်ကို ဦးဆောင်စိုက်ထူနိုင်ခဲ့သော စာပေခေါင်းဆောင်တဦးလည်း ဖြစ်ပေသည်။ ဆရာတာရာ၏ စာပေသစ်အလံကို ခိုင်ခိုင်မတ်မတ်ဖြစ်အောင် ဝိုင်းဝန်းထူစိုက် ခဲ့သော ရေးဖော်များမှာ ဆရာဗန်းမော်တင်အောင်၊ အောင်လင်း၊ မြသန်း(မြသန်းတင့်)၊ ကျော်အောင်၊ လင်းယုန်နီ၊ ဘဝင် စသူတို့ ပါဝင်ကြောင်းအား ချန်လှပ်ခဲ့ရန် မသင့်ပေ။

ဆရာတာရာသည် မွှေးရနံ့ သင်းပြီး နုထွတ်လှယဉ်သော နှင်းဆီပန်းပွင့်ကလေးနှင့်လည်း တူသည်။ စာပေ၊ ဂီတ၊ ပန်းချီစသော အနုပညာ အခက်အရွက်များသည် နှင်းဆီပွင့်၏ ပွင့်ဖတ်များပမာ ဖြစ်၏။ သို့သော် နှင်းဆီပွင့်သည် လွယ်လွယ်နှင့်တော့ ဆွဲကိုင်လှုပ်ယမ်း၍  မရပေ။ သူ၌ ထက်မြက်စူးရှသော ဆူးခက်ကလေးများ ရှိနေသောကြောင့်တည်း။

ဆရာတာရာသည် အနုပညာ အလှအပနှင့် တော်လှန်ရေးအတွေးအခေါ်  ဆူးခက်များ ပေါင်းစပ်ထား၏။

ဆရာအောင်မြင့်ဦးသည် ထိုဆူးခက်များကို ရှာဖွေပြုစု ဖော်ထုတ် ပြသလိုက်သည်။

ဆူးခက်များသည် ပြည်သူများကို အကာအကွယ်ပြုသော ဆူးခက်များ ဖြစ်သည်။ ပြည်သူများအတွက် လက်နက်၊ ရန်သူများအတွက် ထိုးနှက်ချက် ဖြစ်ပေသည်။

စာပေအနုပညာ၊ ယဉ်ကျေးမှု ဆိုသည်မှာ ရှင်သန်ကြီးထွား ပွင့်ဖူးရန် ရေခံမြေခံ မြေဆီသြဇာ ကောင်းရန် လိုအပ်ပေသည်။ စာပေအနုပညာယဉ်ကျေးမှု လွတ်လပ်စွာ ဖူးပွင့်ဝေဆာရန်မှာ လွတ်လပ်သော နေရောင်ခြည် မဖြာဆင်းနိုင်ဘဲ၊ ပိတ်ဖုံးမှောင်မည်းသော နိုင်ငံရေးမိုးတိမ်များ လွှမ်းခြုံပါက ဖူးသော ပန်းများ မဖူးနိုင်သကဲ့သို့ ပွင့်သောပန်းများ လန်းဆန်းနိုင်ဖွယ်ရာ မရှိနိုင်ပေ။

လူသားတို့၏ သမိုင်းသည် ကမ္ဘာဦး ဘုံခေတ် ပြိုလဲပြီးနောက် လူလူချင်း သွေးစုပ်ခြယ်လှယ် ဖိနှိပ်စိုးမိုးသော လူတန်းစားခေတ် ထွန်းကားခဲ့သည်။ အဖိနှိပ်ခံ၊ သွေးစုပ်ခံ ကျေးကျွန်များ၊ လယ်သမားများနှင့် အလုပ်သမား လူတန်းစားတို့သည် သွေးစုပ်ဖိနှိပ်မှုကို ပြင်းထန်စွာ ပုန်ကန် အုံကြွ တော်လှန်ခဲ့ကြ၏။ အကြမ်းဖက် တော်လှန်ခဲ့ကြ၏။ သို့နှင့် ခေတ်ဟောင်းတို့ ချုပ်ငြိမ်းပြီး ခေတ်သစ်သို့ ကူးပြောင်းခဲ့ကြရသည်။ မျက်မှောက်ခေတ်ကား အရင်းရှင် လူတန်းစားစနစ် စိုးမိုး ဖိနှိပ်သွေးစုပ်၏။ အလုပ်သမား လူတန်းစားက ဦးဆောင်ပြီး အဖိနှိပ်ခံ ပြည်သူများအား စုစည်းကာ ခေတ်ပြောင်းတော်လှန်ရေး ဆင်နွှဲနေသော ကာလရှည်ကြီးအား ဖြတ်သန်းနေ သော အခါသမယပင် ဖြစ်သည်။

စစ်နှင့် တော်လှန်ရေးခေတ်တွင် ဆရာတာရာသည် မွေးဖွါးခဲ့၏။ ဤခေတ်၏ သမိုင်းတာဝန် သည် ဆရာတာရာ့ ပုခုံးထက် ရောက်လာသည်။ ဆရာသည် ခေတ်တာဝန်ကို နောက်ဆုံး ထွက်သက် ရှူထုတ်လိုက်သည်အထိ ထမ်းရွက်သွားသည်။

ဆရာတာရာကား ကွယ်လွန်ခဲ့ပြီ။ သို့သော် ဆရာတာရာ၏ ထာဝရအသက်ကား ရှင်သန်ဆဲ ဖြစ်သည်။

ဆရာတာရာ၏ တော်လှန်ရေးအသက် ရှိသေးကြောင်း ဆရာအောင်မြင့်ဦးက ဖော်ထုတ်လိုက် ပေသည်။

မျက်မှောက် မြန်မာ့နိုင်ငံရေးသည် စစ်အာဏာရှင်စနစ်အား နောက်ဆုံးပိတ် စစ်ပွဲ ဆင်နွှဲပြီး အပြီးအပိုင် မြေမြှပ်ပစ်ရန် အလုပ်သမား၊ လယ်သမား၊ ကျောင်းသား၊ အလွှာစုံပြည်သူများ၊ လူမျိုးစုံပြည်သူလူထုကြီးက၂၀၀၈ ဖွဲ့စည်းပုံ အခြေခံဥပဒေ လုံးဝဖျက်ဆီးပစ်ရေး ဒီမိုကရေစီ ဖွဲ့စည်းပုံ ဥပဒေသစ်ဖြင့် အစားထိုးရေး တိုက်ပွဲကိုလှုံ့ဆော်နေကြသည် မဟုတ်ပါလော။

ဤနေရာ၌ ဆရာဒဂုန်တာရာက လူထုနိုင်ငံရေးကိုလည်း ဤသို့ အနက်ဖွင့်ခဲ့သည်ကို အနည်းငယ်ဖော်ပြခြင်းဖြင့် ကျွန်တော်၏ အမှာစာအား နိဂုံးချုပ်လိုပေသည်။ ဆရာဒဂုံတာရာက-

'လူထုသည် အဖိနှိပ်ခံ၊ ခေါင်းပုံအဖြတ်ခံ၊ အအုပ်စိုးခံ ဖြစ်သည်။ ထို့ကြောင့် လူထု၌ ခံစားမှု အစစ် ရှိသည်။ ဆန္ဒအစစ်ရှိသည်။ စားဝတ်နေမှု ကြပ်တည်းခြင်းသည် လူထု၏ ခံစားမှု ဖြစ်သည်။ ယင်းဘဝမှ လွတ်မြောက်လိုခြင်းသည် လူထုဆန္ဒဖြစ်သည်။ ယင်းလူထု၏ ခံစားမှုကို သိမြင်ကာ ယင်းအဖိနှပ်ခံဘဝ၊ ခေါင်းပုံအဖြတ်ခံဘဝ၊ အအုပ်စိုးခံဘဝမှ လွတ်မြောက်အောင် ဆောင်ရွက်ခြင်းသည် လူထုနိုင်ငံရေး ဖြစ်ပေသည်။' ဟု ဖော်ပြခဲ့သည်။

ဆရာတာရာ၏ 'လူထုနိုင်ငံရေး' အတွေးအခေါ်သည် လူငယ်ထု၏ နှလုံးအိမ်တွင်းသို့ တမြေ့မြေ့ စီးဆင်းကိန်းဝပ်ပြီး အင်အားကြီးထွားသွားပါက အဆုံးသပ်တော်လှန်ရေးသည် မုချ အောင်ပွဲဆီသို့ ကူးစက်သွားပေမည်။ ယင်းသို့ ဖြစ်ထွန်းလာပါက 'ဆရာဒဂုန်တာရာစာ ဆရာဒဂုန်တာရာစကား' စာစုငယ် ထုတ်ဝေရကျိုး နပ်ပြီဟု ထင်မြင်ကြောင်းပါဗျား။

ခမ်းဝင်း

၁၇၊ ၁၀၊ ၂၀၁၃။