မန္တလေး အနှစ်၁၅၀
၂ဝဝ၉ ခုနှစ်၊ မတ်လ ၅ ရက်။
ကိုဟိုဒင်းရေ-
အုတ်ကျစ်ကျော်အေး မန္တလေး၊ အင်ကြင်းကြာအုံ ရတနာပုံ ဆိုတဲ့အတိုင်း မြန်မာသက္ကရာဇ် ၁၂၂၁ ခုနှစ်မှာ မင်းတုန်းမင်း တည်ခဲ့တဲ့ မန္တလေးမြို့ကြီးဟာ မကြာမီ လပိုင်း အတွင်းမှာပဲ အသက်၁၅ဝ ပြည့်တော့မယ်။ ဒီအကြောင်းကို ပြန်စဉ်းစားမယ် လုပ်လိုက်တာနဲ့ပဲ ခေါင်းထဲမှာ မန်းတောင်လက်ျာ ယိုးဒယား လိုဟာကအစ မြို့မဆရာငြိမ်းရဲ့ 'နန်းမြို့တော်' သီချင်း၊ ဆရာလင်းခေးလုလင်ရဲ့ 'မန်းရတနာပုံနေပြည်' သီချင်း စတဲ့ သီချင်းသံတွေကို ကြားယောင် လာပြီး မန်းရာပြည့်ပွဲတော်ကြီးကိုလည်း ပြန်သတိရလာမိတယ်ဗျာ။ ဟုတ်တယ်၊ ရတနာပုံ မန္တလေးမြို့ကို တည်တာ အနှစ်တရာ တင်းတင်းပြည့်တဲ့ အထိမ်းအမှတ်ပွဲတော်ကြီးကို ပြောတာပါ။
တကယ်တော့ ၁၉၅၉ ခုနှစ် ဆိုတာဟာ အိမ်စောင့်အစိုးရလို့ခေါ်တဲ့ ဗမာပြည်ရဲ့ ပထမဆုံး စစ်အစိုးရလက်ထက်ပဲ ဖြစ်ပါတယ်။ ပထစအစိုးရ တက်လာမယ့်ရွေးကောက်ပွဲကို မကျင်းပရသေးပါဘူး။ ကျနော် မှတ်မိသလောက်ဆိုရင် မန္တလေးအနှစ်တရာပြည့်ကို အစောဆုံး စိတ်ဝင်စား၊ ဖော်ထုတ်သူဟာ ရွှေကိုင်းသားလို့ ကလောင်နာမည်ယူထားတဲ့ ဆရာတော် ဦးသောဘိတပဲဗျ။ သူက အစောကြီးကတည်းက ဒီကာလကို ကြိုတွက်ပြီး မန္တလေးဆိုတဲ့ စာအုပ်ကြီးတအုပ်ကိုလည်းပြုစု၊ လူထုသတင်းစာကနေလည်း လှုံ့ဆော်နေတာ။ အဲဒီတုန်းက ဆရာကြီးဦးသန်းထွန်းတို့၊ ဦးကျော်ရင်တို့ မန္တလေးကိုမရောက်ကြသေးဘူး။ ဆရာတော်က ဒီလို တင်လိုက်တော့ ရှိနေတဲ့ ဆရာကြီး ရွှေပြည်ဦးဘတင်တို့လို မြန်မာပညာရှိကြီးတွေကလည်း ပါဝင်ကြ၊ တက္ကသိုလ်မြန်မာစာဌာနလိုဟာက သိုင်းဝိုင်းကြနဲ့ အဲဒီခေတ် အဲဒီအခါက ဗမာပြည်မှာ အကြီးကျယ်ဆုံးလို့ ဆိုရမယ့် မန်းရာပြည့်ပွဲတော်ဆိုတာကြီး ဖြစ်ပေါ်လာခဲ့ တာပဲဗျ။ မန္တလေးတောင်ခြေမှာ၊ အဲဒီတုန်းက ဘာမှအသုံးမပြုတဲ့၊ အခု တိရစ္ဆာန်ဥယာဉ် လုပ်ထားတဲ့ ကွက်လပ်ကြီးမှာ ခွန်နှစ်ရက်၊ ခွန်နှစ်လီ ကျင်းပတာ။ ဒိအယင်ကတော့ ဒီကွင်းကြီးထဲမှာ ရသေ့ကြီး ဦးခန္တီရဲ့ဈာပနပဲ ကျင်းပဖူးတယ်။
ဒီပွဲတော်ကြီး ကျင်းပတယ်ဆိုတော့ မန္တလေးသားတွေအဖို့ ဂုဏ်ယူမဆုံး၊ မော်မဆုံးပေါ့ဗျာ။ အဲဒီတုန်းက မန္တလေးမှာ အာဏာပိုင်ဖြစ်နေတဲ့ နမခ ခေါ် အနောက်မြောက်တိုင်းစစ်ဌာနချုပ်ကတော့ ထုံးစံအတိုင်း မြင်းဝန်မင်းဘုရားတည်၊ မြင်းသား များကောင်းမှု ဆိုတာမျိုး နှမ်းဖြူးတာပေါ့ဗျာ။ ဖွင့်ပွဲမှာ တိုင်းမှူးက ဖွင့်လှစ်တယ် ထင်ပါရဲ့။ တကယ်လုပ်ကြတာ၊ ပင်ပမ်းကြတာကတော့ မြို့လူကြီးတွေနဲ့ မြို့လူထုတွေပါ။ ဘာပဲပြောပြော သူတို့ ပင်ပမ်းရကျိုး နပ်တယ်လို့ ဆိုရမယ်ထင်ပါရဲ့၊ ပွဲကြီး ပြီးသွားတော့ အားလုံးပဲ ကျေနပ် အားရ ဖြစ်သွားကြတယ်။ နောင် နှစ်ပေါင်းများစွာပဲ ဒီအကြောင်းကိုမန္တလေးသားတွေက မြိန်ရေယှက်ရေ ပြောလေ့ရှိကြတယ်။ သူတို့က လူတယောက်ရဲ့ အသက်အကြောင်းပြောရင် သူက မန်းရာပြည့်ကျင်းပတဲ့ နှစ်မှာမွေးတာ၊ မန်းရာပြည့်ပြီး နောက်တနှစ်မှာ မွေးတာ စသဖြင့် ညွှန်းတတ်ကြတယ်။ ဒါ့အပြင် လူနာမည်တောင် ရာပြည့်လို့ မှည့်သူတွေ မနည်းဘူး။
အော်- မန္တလေးဆိုတာကလည်း ဗမာပြည်သမိုင်းနဲ့ ဗမာပြည်သားတွေရဲ့ စိတ်ထဲမှာ သူ့ထူးခြားချက်နဲ့ သူရှိနေတာကိုးဗျ။ မြန်မာမှုရဲ့မြို့တော်၊ မြန်မာ့ယဉ်ကျေးမှုရဲ့ အချက်အခြာ၊ ဗမာပြည် ဗုဒ္ဓဘာသာဝင်တွေရဲ့ အဓိကရ မြို့ကြီး စတဲ့ ဂုဏ်ပုဒ်တွေကို လူတွေက ပေါ့ပေါ့ဆဆ ချီးမြှင့်ထားကြတာမှ မဟုတ်တာကလား။ ဗမာတနိုင်ငံလုံး သူ့ကျွန်ဘဝရောက်ပြီး မြန်မာမှု၊ မြန်မာ့ယဉ်ကျေးမှုတွေ အခြိမ်းခြောက်ခံရချိန်မှာ ဒီနေရာကနေ တောင့်တောင့် တင်းခံပြီး "သူ့ကျွန်မခံ၊ မျိုးမာန်မချ၊ မကျသူ့အောက်" ဆိုသလို အမျိုးသား အလံကို လွှင့်ထူခဲ့တဲ့မြို့၊ လူမှုရေး၊ နိုင်ငံရေး၊ ယဉ်ကျေးမှုရေး၊ ဘယ်ဖက်ကဖြစ်ဖြစ် ဂုဏ်ယူစရာတွေနဲ့ ပြည့်လျှမ်းနေတဲ့ မြို့ကြီးပါဗျာ။
အင်္ဂလိပ် ကိုလိုနီသမားတွေက ဗမာနိုင်ငံရဲ့ မြို့တော်ကို ရန်ကုန်ကို ပြောင်းပစ် လိုက်တဲ့ နောက်မှာ မန္တလေးဟာ သူမို့လို့ ဒီလို သူ့ဂုဏ်သူ့ဒြပ်နဲ့ နေနိုင်တယ်လို့ ပြောရလောက်အောင် အိနြေ္ဒအပြည့်၊ တည်ကြည်ဂုဏ်ရှိစွာ ရပ်တည်ခဲ့ပါတယ်။ ရန်ကုန်မြို့ကြီး ဟာ အရှေ့တောင်အာရှရဲ့ နံပါတ်တစ်မြို့တော်လို့ ဆိုရမလောက် တိုက်တွေတာတွေ၊ ဥယျာဉ်တွေ ပန်းခြံတွေ၊ လေယာဉ်ကွင်းတွေ ပင်လယ်ဆိပ်ကမ်းတွေနဲ့ ကြီးကျယ်လာခဲ့ပေမဲ့ မန္တလေးကတော့ မန္တလေးပဲလို့ ဆိုရလောက်အောင် တသီးတခြား၊ ထူးထူးခြားခြား တည်ရှိခဲ့ပါတယ်။ ဒါကြောင့်လည်း နန်းတော်ရှေ့ဆရာတင်က သူ့ရဲ့ ရွှေမိုးညို သီချင်းထဲမှာ "ရန်ကုန်မှာ မပြတ်နေပါတယ်၊ နတ်ပြည်ကြီးလို့ပဲ ဆိုကြပါစို့၊ သို့ပေမဲ့ ကိုယ့်မြို့ကိုယ်တော့၊ လွမ်းသေးတယ် ရိုးရိုးပဲဗျို" လို့ရေးခဲ့တာဖြစ်ပါတယ်။
အခုတော့ ဒီ မြို့ကြီး အနှစ်၁၅ဝပြည့်တဲ့ အထိမ်းအမှတ်ကို နအဖစစ်ဗိုလ်များက ပေယျာလကံ ပြုထားကြလေရဲ့ ကိုဟိုဒင်းရေ့။ ဒီ လူတွေဟာ အတိတ်နဲ့ သူတို့နဲ့ ဘာမှမဆိုင်၊ ရှေ့ကလူတွေပြုစု ထူထောင်ခဲ့တာတွေကို တန်ဖိုးမထား၊ သူတို့ကိုယ်သူတို့ တသီးတခြား သမိုင်းတရပ် ထူထောင်နိုင်မယ်လို့ ယူဆနေကြလေသလား မသိပါဘူး။ သူတို့ရဲ့ "နေပြည်တော်" ကလွဲပြီး တခြား ဘယ်မြို့ဘယ်ရွာမှ ဂုဏ်မပြုထိုက်၊ စာမဖွဲ့ထိုက်လို့ ယူဆနေကြဟန် တူပါရဲ့ဗျာ။ သူတို့အနေနဲ့ (ကြပ်ပြေးလို) မြို့တော်တခုကို တည်ဆောက် လိုက်တယ် ဆိုတာနဲ့ အဲဒီ မြို့တော်မှာ ဂုဏ်တွေဒြပ်တွေ သူ့အလိုလို ရှိသွားရောလို့ ထင်မှတ် နေကြသလား မသိပါဘူး။ မဟုတ်ပါဘူးဗျာ။ မြို့ဆိုတာလည်း လူတွေလိုပဲ သမိုင်းကိုဖြတ်သန်း၊ စမ်းသပ်ခံပြီးမှ ဂုဏ်တက်ကြ၊ ဂုဏ်တည်တံ့ရတာ ဖြစ်ပါတယ်။ ဗမာပြည်မှာ မင်းနေပြည် ဖြစ်ခဲ့ဖူးတဲ့ မြို့တွေမနည်းပါဘူး။ ဒါပေမဲ့ သူတို့က မန္တလေးလို အနီးဆုံးခေတ် နယ်ချဲ့ ဆန့်ကျင်ရေး လှုပ်ရှားမှုကြီးနဲ့ ဆက်စပ်မိသွားတာမျိုး မဖြစ်ခဲ့ကြဘူးလေ။ ရှေးခေတ်တုန်းက ပဒေသရာဇ်မင်းတပါးဟာ မင်းနေပြည်ကို ပြောင်းတယ်ဆိုရင် နေပြည်တော်အဟောင်းကနေ သူ့ကို ခြားနားမှာစိုးလို့ အဲဒီမြို့ကို ဖျက်ထားခဲ့လေ့ရှိကြတယ်။ မန္တလေးကျတော့ အဲဒီလို မဟုတ်ဘူး။ နန်းတော်၊ နန်းမြို့ရိုးစတာတွေက လူတွေကို ကိုယ့်ထီးကိုယ့်နန်း နေခဲ့တဲ့ ဘဝတွေ မမေ့ဖို့ အင်္ဂလိပ်လက်အောက်မှာ သတိပေးနေသလို ထီးထီးမားမား ကျန်နေခဲ့တာ။ ဒီလို တည်ရှိနေတာတွေက ဆရာကြီးသခင်ကိုယ်တော်မှိုင်းလို လူကို "သြော်- မန်းအပျက်တွင်ဖြင့်၊ ကြငှန်းမက်လိုက်ရပုံက၊ ပုခန်းထွက်တဲ့ပြီး၊ အကြမ်းဖက်ရော့မဟဲ့လို့၊ ငမ်းငမ်းတက် သရေယို အောင်၊ နန်းဆက်အမွေကိုလဲ မှန်းမိတဲ့ပြင်" ရေးစေခဲ့တာဖြစ်ပါတယ်။
ဒါပေမဲ့ နအဖအစိုးရ လုပ်နေတာနဲ့ပဲ နောင်တချိန်ကျတော့ ဗမာပြည်သားတွေရဲ့ သညာထဲမှာ သူတို့ရဲ့ ကြပ်ပြေးမြို့တော်ဟာ ဗမာပြည်သားတွေကို သတ်ဖြတ်ညှင်းဆဲဖို့ အမိန့်တွေ ထုတ်ပြန်ခဲ့တဲ့ မြို့တမြို့လို့စွဲမှတ်သွားမယ့် အလားအလာတွေ တွေ့နေရတယ်။ ဒါမှမဟုတ်လည်း အကောင်းဖက်က ပြန်စဉ်းစားရင် နအဖစစ်အုပ်စုကို နောက်ဆုံးချေမှုံးနိုင်တဲ့ နေရာလို့ ကမ္ဗည်းတင်နိုင်တဲ့ မြို့များဖြစ်မလားပေါ့။ ဒါနဲ့ပတ်သက်လို့ ကျနော့် ခေါင်းထဲမှာ ဝင်နေတဲ့ မေးခွန်းတခုက 'ဒီနေ့ကာလမှာ ကိုယ့်ကိုယ်ကို နေပြည်တော် (ကြပ်ပြေး)သား' လို့ လက်မထောင် ဂုဏ်ယူတဲ့လူရယ်လို့ ရှိမှရှိရဲ့လားဆိုတာပဲ။ တခြားမြို့သားတွေကတော့ ကိုယ့်ကိုယ်ကို ဘယ်မြို့သားလို့ ဂုဏ်ယူလေ့ ရှိကြတယ် မဟုတ်လားဗျ။
အာဏာရှိတဲ့ လူတွေအနေနဲ့ မြို့တော်ဆိုတာကို ထင်သလို ဟိုရွှေ့ ဒီပြောင်း လုပ်နိုင်ကြပါတယ်။ ဒါပေမဲ့ သူတို့ အဲဒီလို ရွှေ့လေရာမှာ အဲဒီမြို့ရဲ့ ဝိဉာဉ်ကိုတော့ တပါတည်း သယ်မသွားနိုင်ပါဘူး။ မြို့တော်ကို ရန်ကုန်ကနေ ကြပ်ပြေးဆီ ပြောင်းသွားပေမယ့် ရန်ကုန် မြို့ကြီးရဲ့ ဂုဏ်သိက္ခာ၊ ဗမာပြည်သားတွေရဲ့ ရန်ကုန်အပေါ် သံယောဇဉ်နဲ့ အလေးထားမှု၊ ဒီ မြို့ကြီးအတွက် ဂုဏ်ယူမှု စတာ တွေဟာ ဟောဒီ ရွှေတိဂုံစေတီတော်မြတ်ကြီးနဲ့ သူ့ခြေရင်းမှာ ကျန်ခဲ့ပါတယ်။ ဗမာပြည်သားတွေ အဖို့တော့ ရန်ကုန်ဟာ ရန်ကုန်ပါပဲ။ တကယ့်ကို မဟာရန်ကုန် ဖြစ်ပါတယ်။
အလားတူပဲ၊ မန္တလေးဟာလည်း မန္တလေးပါပဲဗျာ။ မန္တလေးသားတွေ မြို့ပြင်ရောက်၊ တပြည်သားတွေ ပြည်တွင်းရောက်၊ ဘယ်လိုပဲ ကပြောင်းကပြန်တွေ ဖြစ်ဖြစ် စိန်ဗေဒါ၊ မြို့မငြိမ်း၊ လေဘာတီမမြရင် စသူတွေရဲ့ ရင်ထဲအသဲထဲက မန္တလေးမြို့ကြီးဆိုတဲ့ အဖြစ်ကိုတော့ ဘယ်လိုမှမပြောင်း လဲနိုင်ပါဘူး။ ရာစုနှစ်တခုနဲ့ တဝက်တိတိ ဗမာပြည်သားတွေရဲ့ ချစ်သဲ ဖြစ်နေခဲ့တဲ့ မန္တလေးဟာ နောင်မှာလည်း ချစ်သဲဖြစ်နေအုန်းမှာ သေချာပါတယ်။
စောင့်ကြည့်ပါ မိတ်ဆွေကြီးရယ်။ ဘာမှမဝေးတဲ့ တချိန်ကျရင် မန္တလေးသား တွေဟာ ပြည်တော်ဝင် သီချင်းကို မြိုင်မြိုင်ဆိုတီးကြပြီး သူတို့မြို့ကို သူတို့ စိတ်ကြိုက် တည်ဆောက်ကြအုန်းမှာပါ။
ဘယာဘေး ကွာဝေးကြပါစေ။
ယာတောကသာဗြော
အဝေးကပေးစာတစောင်
No comments:
Post a Comment